Аллаһа јахынлашын

Јеһованын Өзү һагда Мусаја дедикләри

Чыхыш 34:6, 7

СИЗ Аллаһы неҹә тәсвир едәрдиниз? О, һансы кејфијјәтләрә маликдир? Бу вә ја диҝәр вәзијјәтләрдә неҹә давраныр? Тәсәввүр един ки, бу суаллары сиз шәхсән Аллаһын Өзүнә верир вә сонра Онун дедикләрини динләјирсиниз. Муса пејғәмбәрин әлинә мәһз бу ҹүр имкан дүшмүшдү. Үстәлик, Аллаһ она илһам вермишди ки, бу шејләри јазыја алсын.

Сина дағында оланда Муса Јеһовадан хаһиш етмишди: «Иззәтини мәнә ҝөстәр» (Чыхыш 33:18). Нөвбәти ҝүн Аллаһ Өз иззәтини өтәри олараг она ҝөстәрдиa. Муса бу мөһтәшәм ҝөрүнтүнү һәртәрәфли тәсвир етмәсә дә, даһа ваҹиб олан бир шеји — Аллаһын сөзләрини гәләмә алды. Ҝәлин Чыхыш 34:6, 7 ајәләриндә Јеһованын Өзү һагда дедикләрини арашдыраг.

Јеһова илк олараг Өзүнүн «рәһмли вә лүтфкар» Аллаһ олдуғуну ачыглады (6-ҹы ајә). Бир алимин фикринҹә, «рәһмли» кими тәрҹүмә олунан ибрани сөзү илә «атанын өз өвладларына бәсләдији дәрин шәфгәт һисси» нәзәрдә тутулурду. «Лүтфкар» кими тәрҹүмә олунан сөз «нәјә исә еһтијаҹы олан инсана үрәкдән көмәк етмәк истәјән адамын һиссини тәсвир едән» феллә бағлыдыр. Беләликлә, Јеһова бизи әмин етмәк истәјир ки, О, мәһәббәтлә вә гајғыкешликлә ушагларынын гејдинә галан ата-ана кими, бизим гејдимизә галыр (Мәзмур 103:8, 13).

Сонра Јеһова «һәдсиз сәбирли» Аллаһ олдуғуну бәјан етди (6-ҹы ајә). О, јердәки хидмәтчиләринә гәзәбләнмәјә тәләсмир. Әксинә, диггәти онларын чатышмајан ҹәһәтләринә ҹәмләмәјәрәк, сәбир едиб дүзәлмәләри үчүн вахт верир (2 Петер 3:9).

Аллаһ сөзүнә давам едәрәк ‘бол мәһәббәтли вә сәдагәтли’ олдуғуну деди (6-ҹы ајә). Мәһәббәт Јеһованы Өз халгына сых бағлајан гијмәтли кејфијјәтдир (Ганунун тәкрары 7:9). Бундан башга, Јеһова һәгигәт мәнбәјидир. О нә алдадыр, нә дә алданыр. «Һәгигәт Аллаһы» олдуғундан, Онун бүтүн дедикләринә, еләҹә дә ҝәләҹәјә даир вә’дләринә там е’тибар едә биләрик (Мәзмур 31:5).

Сонда Јеһова бизә Өзү һаггында даһа бир ваҹиб һәгигәти ачыб: О, «ҹәзаны, ганунсузлуғу вә ҝүнаһы» әфв едир (7-ҹи ајә). О, ҝүнаһларындан төвбә едәнләри ‘бағышлајыр’ (Мәзмур 86:5). Ејни заманда, Јеһова һеч вахт ганунсузлуға ҝөз јуммур вә ҹәзасыз гојмур (7-ҹи ајә). Мүгәддәс вә әдаләтли Аллаһ гәсдән ҝүнаһ ишләдәнләри ҹәзасыз гојмајаҹаг. Ҝеҹ-тез онлар өз ҝүнаһларынын аҹы нәтиҹәләрини дадаҹаглар.

Јеһованын Өзү һагда данышмасы ҝөстәрир ки, О, бизим Ону танымағымызы, һансы кејфијјәтләрә малик олдуғуну, бу вә ја диҝәр вәзијјәтләрдә неҹә даврандығыны билмәјимизи истәјир. Мәҝәр бу, бизи Онун ҝөзәл кејфијјәтләри һагда даһа чох өјрәнмәјә тәшвиг етмирми?

[Һашијә]