Јеттајын садиглијини тәглид един
«ЕЈ КҮЛЛ-ИХТИЈАР Рәбб Аллаһ! Сәнин әмәлләрин бөјүк вә харигуладәдир. Еј милләтләрин Һөкмдары! Сәнин јолларын доғру вә һәгигидир. Ја Рәбб! Ким Сәндән горхмајаҹаг вә Сәнин адыны иззәтләндирмәјәҹәкдир? Чүнки јалныз Сән мүгәддәссән [«садигсән», ЈД]». Ҝөјләрдә ‘ҹанавара вә онун сурәтинә галиб ҝәләнләр’ тәрәфиндән охунан бу маһны диггәти Аллаһын садиглијинә јөнәлдир (Вәһј 15:2-4). Јеһова хидмәтчиләринин Онун бу ҝөзәл кејфијјәтини тәглид етмәләрини истәјир.
Диҝәр тәрәфдән исә, Шејтан Иблис әлиндән ҝәләни едир ки, Аллаһын јер үзүндәки хидмәтчиләрини ибадәт етдикләри Аллаһын мәһәббәтиндән ајырсын. Буна бахмајараг, чохлары ән ағыр вәзијјәтләрдә белә Аллаһа садигликләрини горујуб сахламышдылар. Бу ҹүр садиглији јүксәк гијмәтләндирдији үчүн Јеһоваја неҹә дә миннәтдарыг! Мүгәддәс Јазылар бизи әмин едир ки, Јеһова «әдаләти севир, һеч заман мөминләри [јәни садигләри] тәрк етмир» (Мәз. 37:28). Садиглијимизи горумаға көмәк етмәк үчүн О, Өз Кәламында бир чох садиг инсанларын нүмунәләрини јаздырмышдыр. Онлардан бири гатлы Јеттајын нүмунәсидир.
Јаделли вә јурдундан сүрҝүн олунмуш адам
Јеттај, еһтимал ки, нәһәнҝ Голјатын вә Исраилин диҝәр ваһимәли дүшмәнләринин доғма шәһәри олан Филишт дијарынын танынмыш Гат шәһәриндән иди. Бу тәҹрүбәли ҹәнҝавәр һаггында илк дәфә Авшалом Давуд падшаһа гаршы үсјан галдыран заман хатырланыр вә онун һаггында әлавә һеч бир мәлумат верилмир. Јеттај вә онун ардынҹа ҝедән 600 филиштли Јерусәлим јахынлығында сүрҝүндә јашајырдылар.
Ола билсин, Јеттајын вә онун адамларынын вәзијјәти Давуда 600 исраилли әсҝәрлә бирҝә гачаг дүшәрәк Филишт әразисиндә вә Гат падшаһы Акишин торпагларында мәскунлашдығы ҝүнләри хатырлатды (1 Шам. 27:2, 3). Атасы Давуда гаршы Авшаломун үсјан галдырдығыны ҝөрән Јеттај вә адамлары неҹә давранаҹаглар? Онлар Авшаломун тәрәфинә кечәҹәк, битәрәф галаҹаг, јохса Давудун тәрәфини тутаҹаглар?
Тәсәввүр един: Давуд Јерусәлимдән гачараг «Узаг ев» мәнасыны дашыјан Бејт-мерһак адланан јерә ҝәлир. Еһтимал ки, бу ев Гидрон вадисини кечмәмиш Зејтун дағына тәрәф ҝедән јолда јерләшән Јерусәлимин сонунҹу еви иди (2 Шам. 15:17, КМ). Бурада Давуд нә гәдәр ҝүҹлү ордуја малик олдуғуну нәзәрдән кечирир. Будур, тәкҹә садиг исраиллиләр дејил, ејни заманда керетлиләр вә пелетлиләр дә онунладыр. Үстәлик, бүтүн гатлылар — Јеттај вә онун 600 дөјүшчүсү дә орададыр (2 Шам. 15:18).
Давуд Јеттаја ҹан јандырараг деди: «Сән нијә бизимлә ҝедирсән? Гајыт тәзә падшаһла [еһтимал ки, Авшаломла] гал. Сән ки јаделлисән вә өз јурдундан әсир апарылмыш [«сүрҝүн едилмиш», КМ] адамсан, гајыт өз јеринә. Сән бура һәлә дүнән ҝәлмисән. Бу ҝүн сәни өзүмүзлә ҝетмәјәми мәҹбур едим? Мән һара ҝедә билсәм, ора ҝедәҹәјәм. Сән исә гајыт, өз сојдашларыны да ҝери гајтар. Хејирхаһлыг вә сәдагәт сәнә јар олсун» (2 Шам. 15:19, 20).
«Вар олан Рәббә вә ағам падшаһымын ҹанына анд олсун, падшаһым һарада олса, мүтләг бу гулун өлсә дә, галса да, орада олаҹаг»,— демәклә Јеттај садиг галмаға гәти гәрарлы олдуғуну ҝөстәрди (2 Шам. 15:21). Ола билсин, бу сөзләр Давуда улу нәнәси Рутун дедикләрини хатырлатды (Рут 1:16, 17). Јеттајын бу сөзләриндән мүтәәссир олан Давуд деди: «Онда ҝәл,— Гидрон вадисини — кеч». Бу сөзләрдән сонра «Гатлы Јеттај илә бүтүн адамлары вә јанында олан бүтүн ушаглар ҝәлиб онларын тәрәфинә кечди» (2 Шам. 15:22).
«Бизә тәлим олараг»
Ромалылара 15:4 ајәсиндә дејилир ки, ‘бундан әввәл јазыланларын һамысы бизә тәлим олараг јазылыб’. Өзүмүздән сорушмаг јахшы оларды: «Јеттајын нүмунәсиндән нә өјрәнә биләрәм?» Ҝәлин ҝөрәк, ону Давуда садиг галмаға тәшвиг едән нә иди. Јаделли олмасына вә Филишт дијарындан сүрҝүн едилмәсинә бахмајараг, о, Јеһованын јашајан Аллаһ олдуғуну вә Давуду Јеһованын мәсһ олунмушу кими гәбул едирди. Исраиллиләрлә филиштлиләр арасында мөвҹуд олан әдавәтә бахмајараг, Јеттајда кин дејилән шеј јох иди. Јеттај Давуда садәҹә филиштли ҹәнҝавәр олан Голјаты вә онун бир чох һәмвәтәнләрини өлдүрән бир инсан кими бахмырды (1 Шам. 18:6, 7). Јеттај Давуда Јеһованы севән бир шәхс кими бахыр вә шүбһәсиз ки, онун ҝөзәл кејфијјәтләринә диггәт јетирирди. Өз нөвбәсиндә Давуд да Јеттаја бөјүк һөрмәтлә јанашырды. Елә буна ҝөрә дә, Давуд Авшаломун ордусуна гаршы һәлледиҹи дөјүшдә гатлы Јеттајы ордусунун үчдә биринә башчы тәјин етди (2 Шам. 18:2).
Мәдәни, ирги, јахуд етник фәргләр уҹбатындан инсанлар арасында мөвҹуд олан мәнфи рәјләрә вә әдавәтә бахмајараг, биз дә башгаларынын јахшы хүсусијјәтләрини ҝөрмәјә чалышмалыјыг. Давудла Јеттај арасындакы мүнасибәт ҝөстәрир ки, бизим Јеһованы танымағымыз вә Она олан мәһәббәтимиз бу кими манеәләри ашмаға көмәк едәҹәк.
Јеттајын нүмунәси үзәриндә дүшүнәрәк биз өзүмүздән соруша биләрик: «Бөјүк Давуд олан Мәсиһ Исаја мән дә бу ҹүр сәдагәт ҝөстәрирәмми? Падшаһлығын тәблиғиндә вә шаҝирд һазырламаг ишиндә сәјлә иштирак етмәклә сәдагәтли олдуғуму ҝөстәрирәмми?» (Мат. 24:14; 28:19, 20). «Садиглијими сүбута јетирмәк үчүн нәләрә дөзмәјә һазырам?»
Јеттајын садиглији үзәриндә дүшүнмәк аилә башчылары үчүн дә фајдалы олаҹаг. Јеттајын Давуда олан садиглији вә Аллаһын мәсһ олунмуш падшаһы илә јеримәк гәрары онун адамларына да өз тәсирини ҝөстәрмишди. Ејнилә аилә башчыларынын һәгиги ибадәти дәстәкләмәк үчүн гәбул етдикләри гәрарлар аиләнин диҝәр үзвләринә дә тәсир едәр, һәтта мүвәггәти чәтинликләр белә төрәдә биләр. Бунунла белә, Мүгәддәс Китаб бизи әмин едир ки, Јеһова ‘сәдагәтлиләрлә сәдагәтлидир’ (Мәз. 18:25).
Давудла Авшалом арасындакы дөјүшдән сонра Мүгәддәс Јазыларда Јеттај һаггында һеч бир мәлумат верилмир. Аллаһын Кәламында онун һаггында јазылан мәлумат гыса олса да, Давудун чәтин анлары Јеттајын неҹә инсан олдуғуну ајдын ҝөстәрир. Мүгәддәс Китабда Јеттајын хатырланмасы ҝөстәрир ки, Јеһова Она сәдагәтли оланлары унутмур вә мүтләг мүкафатландырыр (Ибр. 6:10).