Мәсулијјәтләри бөлүшүн

ЈЕР күрәси һәлә јаранмамышдан чох-чох әввәл мәсулијјәтләрини башгасы илә бөлүшән бир шәхс олмушду. Јеһова ваһид Оғлуну јаратды вә ондан каинатын јарадылмасында «маһир уста» (ЈД) кими истифадә етди (Сүл. мәс. 8:22, 23, 30; Јәһ. 1:3). Аллаһ илк инсан ҹүтүнү јараданда онлара ‘јер үзүнү бүрүјүб она саһиб олмағы’ тапшырды (Јар. 1:28). Јарадан улу валидејнләримизә бујурду ки, Еден бағынын һүдудларыны ҝенишләндириб бүтүн јер күрәсини ҹәннәтә чевирсинләр. Бәли, та башланғыҹдан һансыса иши башгалары илә бөлүшмәк Јеһованын тәшкилатынын сәҹијјәви әламәтләриндән бири олмушдур.

Мәсулијјәтләри бөлүшмәк өзүнә нәји дахил едир? Мәсиһчи ағсаггаллар нәјә ҝөрә јығынҹаг ишләрини башгалары илә бөлүшмәји өјрәнмәлидирләр вә онлар буну неҹә едә биләрләр?

Мәсулијјәтләри бөлүшмәк нә демәкдир?

«Мәсулијјәтләри бөлүшмәк башгаларына тапшырыг, сәлаһијјәт вә ја мәсулијјәт вермәк; кимисә тәмсилчи тәјин етмәк» мәнасыны дашыјыр. Беләликлә, мәсулијјәтләри бөлүшмәк башгаларыны ишә ҹәлб етмәји тәләб едир, бу да, өз нөвбәсиндә, онлара сәлаһијјәт вермәк демәкдир.

Мәсиһчи јығынҹағында тапшырыг аланлар исә иши јеринә јетирмәли, бу тапшырығы онлара верән кәсә ишин ҝедишаты һаггында мәлумат вермәли вә һәмин адамла мәсләһәтләшмәлидирләр. Бунунла белә, ишә ҝөрә әсас мәсулијјәти бу тапшырығы онлара верән гардаш дашыјыр. О, ишин ҝедишатына нәзарәт етмәли вә лазым ҝәлдикдә мәсләһәт вермәлидир. Амма бәзиләри соруша биләр: «Әҝәр ишин өһдәсиндән өзүм ҝәлә биләрәмсә, нәјә ҝөрә ону башгалары илә бөлүшмәлијәм?»

Мәсулијјәтләри бөлүшмәк нәјә ҝөрә ваҹибдир?

Ҝәлин Јеһованын Өз ваһид Оғлуну јаратдыгдан сонра ону галан ишләрә ҹәлб етмәси барәдә дүшүнәк. Бәли, «ҝөјләрдә вә јердә олан, ҝөрүнән вә ҝөрүнмәјән һәр шеј Онун васитәсилә јаранды» (Колос. 1:16). Јарадан бүтүн ишләри Өзү дә ҝөрә биләрди, анҹаг О, Оғлунун сәмәрәли ишдән севинҹ дујмасыны истәјирди (Сүл. мәс. 8:31). Бунун сајәсиндә Оғул Атасынын кејфијјәтләри һаггында даһа чох өјрәнди. Демәк олар ки, Атанын ваһид Оғлуна тәлим-тәрбијә вермәк үчүн ҝөзәл имканы јаранмышды.

Иса Мәсиһ јер үзүндә оланда мәсулијјәтләри бөлүшмәк ишиндә Атасыны тәглид едирди. Иса тәдриҹән шаҝирдләринә тәлим верирди. О, 12 һәварисини, сонра исә 70 шаҝирдини өзүндән габаг тәблиғ етмәјә ҝөндәрди (Лука 9:1-6; 10:1-7). Иса һәмин јерләрә ҝәләндә онун тәблиғи үчүн артыг јахшы тәмәл гојулмушду. О, јери тәрк едәндә тәлим алмыш шаҝирдләринә, үмумдүнја тәблиғ иши дә дахил олмагла, ҹидди мәсулијјәтләр һәвалә етди (Мат. 24:45-47; Һәв. иш. 1:8).

Тапшырыглары бөлүшмәк вә тәлим вермәк мәсиһчи јығынҹағынын да сәҹијјәви хүсусијјәти олду. Һәвари Павел Тимотејә демишди: «Мәндән ешитдијин сөзләри диҝәрләрини дә өјрәтмәјә габил ола биләҹәк садиг адамлара тапшыр» (2 Тим. 2:2). Бәли, тәҹрүбәли гардашлар башгаларына тәлим вермәлидирләр ки, онлар да, өз нөвбәсиндә, башгаларыны өјрәдә билсинләр.

Ағсаггал ишинин мүәјјән гисмини башгаларына һәвалә етмәклә тәлим вермәкдән вә сүрүнүн гајғысына галмагдан дујулан севинҹи онларла бөлүшә биләр. Инсанын имканлары мәһдуддур, буна ҝөрә дә јығынҹағын мәсулијјәтләрини башгалары илә бөлүшмәк үчүн ағсаггалларын даһа чох сәбәбләри вар. Мүгәддәс Китабда дејилир: «Һикмәт тәвазөкарын јанына ҝәләр» (Сүл. мәс. 11:2). Тәвазөкарлыг өз имканларынын мәһдуд олдуғуну баша дүшмәк демәкдир. Әҝәр һәр шеји өзүмүз етмәјә чалышсаг, тез әлдән дүшәҹәк вә аилә үзвләримизи онларла кечирмәли олдуғумуз вахтдан мәһрум едәҹәјик. Бир сөзлә, мәсулијјәт јүкүнү башгалары илә бөлүшмәк мүдриклијин тәзаһүрүдүр. Мәсәлән, ағсаггаллар шурасынын координатору кими хидмәт едән гардашы ҝөтүрәк. О, башга ағсаггаллардан јығынҹағын малијјә һесабатыны јохламағы хаһиш едә биләр. Онлар бүтүн сәнәдләри нәзәрдән кечирәрәк јығынҹағын малијјә вәзијјәти илә таныш ола биләрләр.

Ағсаггаллар өз мәсулијјәтләрини башгалары илә бөлүшәндә онлара лазыми баҹарыг вә тәҹрүбәјә јијәләнмәјә көмәк едирләр. Бунунла јанашы, мәсулијјәтләри бөлүшән ағсаггалларын иш тапшырдыглары гардашларын баҹарыгларыны ҝөрмәк фүрсәти јараныр. Беләликлә онлар бу гардашларын ҝәләҹәкдә јахшы хидмәти көмәкчи олуб-олмајаҹагларыны сынагдан кечирә биләрләр (1 Тим. 3:10).

Вә нәһајәт, ағсаггаллар өз мәсулијјәтләрини бөлүшмәклә башгаларына етибар етдикләрини ҝөстәрирләр. Һәвари Павел Тимотејә миссионер хидмәтиндә онунла әмәкдашлыг едән заман тәлим верирди. Онларын арасында сәмими мүнасибәт јаранмышды. Павел һәтта Тимотејә «иманда һәгиги оғлум» дејә мүраҹиәт едирди (1 Тим. 1:2). Ејнилә, Јеһова илә Иса һәр шеји бирҝә јараданда онларын арасында да сых бағлылыг јаранмышды. Ағсаггаллар ишләри башгаларына етибар етмәклә онларла јахын мүнасибәт гура биләрләр.

Нәјә ҝөрә бәзиләри тәрәддүд едир?

Ишин мүәјјән гисмини башгаларына тапшырмағын мүсбәт ҹәһәтләрини билсәләр дә, бәзи ағсаггаллар буну етмәкдә тәрәддүд едирләр, чүнки, ола билсин, онлар һакимијјәтләринин әлдән ҝедәҹәјини дүшүнүрләр. Ола билсин, онлар фикирләширләр ки, «сүкан архасында» һәмишә өзләри олмалыдыр. Лакин унутмамалыјыг ки, Иса ҝөјә галхмаздан әввәл, шаҝирдләринә мәсулијјәтли иш һәвалә етмишди. О билирди ки, онлар ондан даһа бөјүк ишләр ҝөрәҹәкләр! (Мат. 28:19, 20; Јәһ. 14:12).

Бәзи ағсаггаллар исә, ола билсин, вахтилә кимләрәсә мүәјјән ишләр тапшырмышлар, амма нәтиҹә һеч дә гәнаәтбәхш олмамышдыр. Ола билсин, онлар иши өзләринин даһа јахшы вә даһа ҹәлд ҝөрә биләҹәкләрини дүшүнүрләр. Амма ҝәлин Павелин нүмунәсинә бир даһа нәзәр салаг. О, мәсулијјәтләрин бир гисмини башгаларына һәвалә етмәјин үстүн ҹәһәтләри олдуғуну билирди, бунунла белә, о анлајырды ки, тәлим кечәнләрин һамысы иши һәмишә онун истәдији кими јеринә јетирмәјәҹәкләр. Павел биринҹи миссионер сәјаһәти заманы ҝәнҹ әмәкдашы Марка тәлим вермишди. Лакин Марк ону јары јолда гојуб евинә гајыданда Павел чох мәјус олду (Һәв. иш. 13:13; 15:37, 38). Буна бахмајараг, о, башгаларына тәлим вермәк ишинә сон гојмады. Әксинә, артыг гејд олундуғу кими, ҝәнҹ Тимотеји миссионер хидмәтиндә ону мүшајиәт етмәјә дәвәт етди. Павел Тимотејин ҹидди мәсулијјәтләрә һазыр олдуғуну ҝөрәндә ону Ефесдә сахлады вә јығынҹагда ағсаггаллар вә хидмәти көмәкчиләр тәјин етмәк сәлаһијјәти верди (1 Тим. 1:3; 3:1-10, 12, 13; 5:22).

Бу ҝүн дә, әҝәр кимсә ишин өһдәсиндән ҝәлә билмирсә, ағсаггаллар башгаларына тәлим вермәкдән имтина етмәмәлидирләр. Инсанлара етибар етмәји өјрәнмәк вә онлара тәлим вермәк һәм мүдрикликдир, һәм дә чох ваҹибдир. Бәс бу заман ағсаггаллар һансы амилләри нәзәрә алмалыдырлар?

Буну неҹә етмәли?

Кимәсә иш тапшырмаг истәјәндә онун нәјә габил олуб-олмадығыны да нәзәрә алмаг лазымдыр. Мәсәлән, Јерусәлимдә ҝүндәлик јемәк пајламаг ишини ҝөрмәк үчүн һәвариләр ‘Мүгәддәс Руһ вә һикмәтлә долу једди нәфәр сечдиләр’ (Һәв. иш. 6:3). Әҝәр сиз етибарсыз бир адама иш тапшырсаныз, әлбәттә, о, буну едә билмәјәҹәк. Буна ҝөрә дә әввәлҹә хырда ишләрдән башлајын. Инсан етибара лајиг олдуғуну ҝөстәрәрсә, демәли, о, даһа чох мәсулијјәтләрин өһдәсиндән ҝәлә биләр.

Лакин башга амилләри дә нәзәрә алмаг лазымдыр. Инсанлар хасијјәтләринә вә габилијјәтләринә ҝөрә бир-бирләриндән фәргләнирләр. Ејни заманда, тәҹрүбә сарыдан да инсандан инсана фәрг олур. Меһрибан вә ҝүләрүз гардашы хидмәтчи тәјин етмәк олар, иши вахтында вә сәлигәли ҝөрән гардаш исә јығынҹаг катибинә көмәк етмәк үчүн даһа јарарлы ола биләр. Инҹә зөвглү баҹыја Хатирә Ҝеҹәси илә әлагәдар бәзәк ишләрини тапшырмаг олар.

Кимәсә тапшырыг верәндә онун нә етмәли олдуғуну ајдын баша салын. Вәфтизчи Јәһја Исанын јанына адамлар ҝөндәрәндә нәји өјрәнмәк вә һансы суалы вермәк истәдијини онлара ајдын баша салды (Лука 7:18-20). Диҝәр тәрәфдән, Иса халгы мөҹүзәли шәкилдә једиздирдикдән сонра шаҝирдләринә јемәјин галыгларыны топламағы тапшырды, анҹаг буну неҹә етмәји онларын өһдәсинә бурахды (Јәһ. 6:12, 13). Чох шеј тапшырығын характериндән вә иши ҝөрәнин баҹарығындан асылыдыр. Һәм тапшырыг верән, һәм дә она көмәк едән гардаш ајдын баша дүшмәлидир ки, ишин нәтиҹәси неҹә олмалыдыр вә мәсулијјәт дашыјан гардаша ишин ҝедишаты барәсиндә нә дәрәҹәдә тез-тез мәлумат верилмәлидир. Онларын һәр икиси дә билмәлидир ки, һансы мәсәләләрә даир гәрар гәбул етмәк иши ҝөрән адамын өһдәсинә бурахылыр. Әҝәр тапшырыг мүәјјән вахтадәк ҝөрүлүб гуртарылмалыдырса, гәти вахт тәјин едиб дедијимизин үстүндә дурмагданса, бирҝә мүзакирә едиб үмуми разылыға ҝәлмәк даһа јахшы оларды.

Иш тапшырылан адам лазыми вәсаит вә аваданлыгла тәҹһиз олунмалы, һәмчинин она көмәклик ҝөстәрилмәлидир. Ишдән башгаларынын да хәбәри олса, бунун ишә көмәји дәјә биләр. Мәсәлән, Иса «Сәмави Сәлтәнәтин ачарларыны» Петерә верәндә јанында диҝәр шаҝирдләр дә варды (Мат. 16:13-19). Буна бәнзәр тәрздә, бәзән јығынҹағын мүәјјән ишә ҝөрә кимин мәсулијјәт дашыдығыны билмәси јахшы ола биләр.

Һәмчинин еһтијатлы олмаг лазымдыр. Ағсаггал тапшырыг вердикдән сонра даим иши нәзарәт алтында сахламаға чалышырса, санки, белә дејир: «Мән әслиндә сәнә етибар етмирәм». Доғрудур, бәзән нәтиҹә ҝөзләдијимиз кими олмур. Анҹаг мәсулијјәт һәвалә олунан гардаша мүәјјән сәрбәстлик вериләрсә, чох еһтимал ки, онун өзүнә олан әминлији артаҹаг вә о, тәҹрүбә әлдә едәҹәк. Әлбәттә, бу о демәк дејил ки, онун тапшырығы неҹә јеринә јетирмәси илә үмумијјәтлә марагланмаг лазым дејил. Јеһова јарадыҹылыг ишинә Оғлуну ҹәлб етмиш олса да, О, Өзү дә ишләјирди. О, Маһир Устаја деди: «Өз сурәтимизә вә бәнзәримизә ҝөрә инсаны јарадаг» (Јар. 1:26). Беләликлә, ҝөрүлән иши сөзләримизлә вә әмәлләримизлә дәстәкләмәк вә инсаны сәјинә ҝөрә тәрифләмәк чох ваҹибдир. Онун ҝөрдүјү ишин нәтиҹәсинә садәҹә нәзәр салмағын она көмәји дәјә биләр. Әҝәр иш лазыми гајдада ҝетмирсә, әлавә мәсләһәт вермәјә вә көмәклик ҝөстәрмәјә чәкинмәк лазым дејил. Јадда сахламаг лазымдыр ки, сон нәтиҹәјә ҝөрә мәсулијјәт тапшырығы верәнин үзәринә дүшүр (Лука 12:48).

Сәмими мараг ҝөрдүкләри ағсаггаллар тәрәфиндән тапшырыг алмалары чохларына фајда ҝәтирмишдир. Һәгигәтән дә, ҝәрәк бүтүн ағсаггаллар Јеһованы тәглид едәрәк тапшырыглары нәјә ҝөрә вә неҹә бөлүшмәли олдугларыны өјрәнсинләр.

[29-ҹу сәһифәдәки чәрчивә]

МӘСУЛИЈЈӘТЛӘРИ БӨЛҮШӘНДӘ

• сәмәрәли ишдән әлдә едилән севинҹи башгалары илә бөлүшүрүк

• даһа чох иш ҝөрүлүр

• мүдриклик вә тәвазөкарлыг тәзаһүр етдиририк

• башгаларыны өјрәдирик

• башгаларына етибар етдијимизи ҝөстәририк

[30-ҹу сәһифәдәки чәрчивә]

МӘСУЛИЈЈӘТЛӘРИ НЕҸӘ БӨЛҮШМӘЛИ?

•Тапшырыг үчүн мүнасиб адам сечин

• Ајдын изаһ един/данышын

• Һансы нәтиҹә ҝөзләнилдијини дәгигләшдирин

• Лазым олан вәсаитләрлә тәмин един

• Ишлә марагланын вә етибар етдијинизи ҝөстәрин

• Сон нәтиҹәләрә ҝөрә мәсулијјәти өз үзәринизә ҝөтүрмәјә һазыр олун

[31-ҹи сәһифәдәки шәкил]

Мәсулијјәтләри бөлүшмәк иши башгаларына тапшырмаг вә онун ҝедишатына нәзарәт етмәк демәкдир