Субајлыг әнамындан неҹә севинҹ әлдә етмәк олар?

«ОНЛАР гырх ҝүн-гырх ҝеҹә тој едиб шад-хүррәм вә узун өмүр сүрдүләр». Нағылларын әксәријјәти бу сөзләрлә битир. Мәһәббәт филмләри вә романлары да тез-тез ејни фикри тәлгин едир: хошбәхт олмаг үчүн инсан ҝәрәк евләнсин. Бундан әлавә, бир чох мәдәнијјәтләрдә ҝәнҹләрә евләнмәләри үчүн ҝүҹлү тәсир ҝөстәрилир. Дебби 20 јашларында оланда демишди: «Инсанлар сәни инандырмаға чалышыр ки, гыз анҹаг әрә ҝетмәк үчүн јараныб вә әсил һәјат евлиликдән сонра башлајыр».

Јеһованын нөгтеји-нәзәрини баша дүшән инсан бу мәсәләдә һәддән артыг гәти мөвге тутмајаҹаг. Дүздүр, гәдим Исраилдә евләнмәк нормал һесаб едилсә дә, Мүгәддәс Китабда хошбәхт һәјат сүрмүш субај киши вә гадынлардан да бәһс едилир. Бу ҝүн бәзи мәсиһчиләр өмүр боју субај галмағы сечсәләр дә, бир чохлары шәраит уҹбатындан субај галмышлар. Субајлығын сәбәби һәр нә олурса-олсун, јенә дә белә бир ваҹиб суал мејдана чыхыр: «Мәсиһчи субајлыг илләриндән неҹә сәмәрәли истифадә едә биләр?»

Иса да евли дејилди. Она верилән тапшырығы нәзәрә алсаг, сәбәб ајдындыр. О, шаҝирдләринә демишди ки, давамчылары арасында евләнмәкдән имтина едәнләр олаҹаг (Мат. 19:10-12). Бунунла бәрабәр о ҝөстәрди ки, субајлыгдан сәмәрәли истифадә етмәк үчүн инсан бу һәјат јолуну бүтүн үрәји вә дүшүнҹәси илә гәбул етмәлидир.

Исанын бу мәсләһәти анҹаг өзләрини тамамилә теократик хидмәтә һәср етмәк үчүн һәјатларынын сонунадәк субај галмаг гәрарына ҝәлән инсанларамы аиддир? (1 Кор. 7:34, 35). Бу һеч дә белә дејил. Ҝәлин аилә һәјаты гурмаг истәјән, лакин һәлә өзүнә мүнасиб һәјат јолдашы тапа билмәјән бир мәсиһчинин нүмунәсинә бахаг. Јашы 30-дан јухары олан субај баҹымыз Анна дејир: «Бу јахынларда Јеһованын Шаһиди олмајан иш јолдашым мәнә ҝөзләнилмәдән евләнмәк тәклиф етди. Әввәлҹә бу, мәним хошума ҝәлди, анҹаг дәрһал бу һиссләри өзүмдә боғдум, чүнки елә адама әрә ҝетмәк истәјирәм ки, мәнә Јеһоваја даһа да јахын олмаға көмәк етсин».

Анҹаг «Рәббә бағлы» олан адамла евләнмәк арзусу Анна кими бир чох баҹыларымызы иманларына шәрик олмајан адамла евләнмәкдән горујурa (1 Кор. 7:39; 2 Кор. 6:14). Аллаһын бу тәләбинә һөрмәтдән ирәли ҝәләрәк онлар, ән азы бир мүддәт, субај галмағы үстүн тутурлар. Онлар бу вахтдан неҹә сәмәрәли истифадә едә биләрләр?

Мүсбәт ҹәһәтләри ҝөрмәји өјрән

Үрәјимизҹә олмајан вәзијјәти олдуғу кими гәбул етмәк әсас етибарилә әһвал-руһијјәмиздән асылыдыр. «Мән малик олдуғум шејләрлә кифајәтләнирәм, олмајан шејләр барәсиндә исә хәјаллар гурмурам»,— дејә јашы 40-ы өтмүш субај баҹымыз Кармен гејд едир. Дүздүр, өзүмүзү тәнһа вә мәјус һисс етдијимиз анлар да олур. Анҹаг бүтүн дүнјада бир чох гардаш-баҹыларымызын ејни вәзијјәтлә үзләшдијини билмәк әминликлә ирәлијә доғру ҝетмәјимиз үчүн бизә ҝүҹ верә биләр. Јеһова бир чохларына субајлыг илләриндән сәмәрәли истифадә етмәјә вә башга чәтинликләрин өһдәсиндән ҝәлмәјә көмәк етмишдир (1 Пет. 5:9, 10).

Бир чох баҹы вә гардашлар әмин олмушлар ки, субајлығын өз мүсбәт ҹәһәтләри вар. Јашы 30-дан чох олан субај баҹымыз Естер дејир: «Мәним фикримҹә, хошбәхтлијин ачары инсанын дүшдүјү һәр вәзијјәтдә мүсбәт ҹәһәтләри ҝөрмәсидир». Кармен исә әлавә едир: «Әрдә олсам да, олмасам да, әминәм ки, Падшаһлығын марагларыны биринҹи јерә гојсам, Јеһова Өз хејирхаһлығыны мәндән әсирҝәмәјәҹәк. Һәјатым тамамилә планлашдырдығым кими олмаса да, өзүмү хошбәхт һисс едирәм вә бу, һәмишә белә олаҹаг» (Мәз. 84:11).

Гәдимдә субај галанларын нүмунәси

Ифтаһын гызы субај галмағы планлашдырмырды. Лакин атасынын вәди онун үзәринә ҝәнҹ јашларындан гурбанҝаһда хидмәт етмәк өһдәчилији гојду. Шүбһәсиз, бу ҝөзләнилмәз тәјинат гызын планларыны алт-үст етди, үстәлик, онун тәбии һиссләринә зидд иди. Аилә гуруб оғул-ушаг саһиби ола билмәјәҹәјини анлајанда ики ај јас тутду. Амма о, јени вәзијјәти илә барышды вә өмрүнүн сонунадәк ҹанла-башла хидмәт етди. Диҝәр исраилли гадынлар һәр ил она баш чәкиб фәдакарлыг руһуна ҝөрә ону ‘мәдһ едирдиләр’ (Һак. 11:36-40, ЈД).

Јешајанын ҝүнләриндәки хәдимләр вәзијјәтләринә ҝөрә мәјус ола биләрдиләр. Мүгәддәс Китабда онларын хәдим олмаларына нә сәбәб олдуғу һагда һеч нә дејилмир. Онлар нә Исраил иҹмасынын тамһүгуглу үзвү, нә дә евләниб ушаг саһиби ола билирдиләр (Ганун. т. 23:1). Амма Јеһова онларын һиссләрини баша дүшүрдү вә әһдинә сәмими-гәлбдән итаәт етдикләринә ҝөрә онлары тәрифләјирди. Һәмчинин Аллаһ онлара демишди ки, евиндә ‘хатирәјә’ вә ‘әбәди бир ада’ малик олаҹаглар. Бир сөзлә, бу садиг хәдимләр Иса Мәсиһин рәһбәрлији алтында әбәди јашајаҹагларына әмин ола биләрдиләр. Јеһова онлары һеч вахт унутмајаҹагды (Јешаја 56:3-5).

Јеремјанын вәзијјәти исә тамам фәргли иди. Пејғәмбәр тәјин олундугдан сонра Аллаһ она јашадығы ағыр вә тәһлүкәли дөврү вә тәјинатынын характерини нәзәрә алараг евләнмәмәји тапшырды: «Өзүнә арвад алма, гој бу јердә оғулларын вә гызларын олмасын» (Јер. 16:1-4). Мүгәддәс Китабда бу сөзләрин Јеремјада һансы һиссләр доғурдуғу барәдә дејилмәсә дә, орадан ајдын ҝөрүрүк ки, Јеһованын кәламы она севинҹ ҝәтирирди (Јер. 15:16). Илләр өтдүкдән сонра Јеремја 18 ајлыг дәһшәтли мүһасирәдән сағ чыханда, шүбһәсиз, Јеһованын субај галмаг ҝөстәришинә әмәл етмәјин мүдриклик олдуғуна әмин олду (Мәрс. 4:4, 10).

Һәјаты зәнҝинләшдирмәјин үсулу

Јухарыда адлары чәкилән Мүгәддәс Китаб персонажлары субај олмаларына бахмајараг, Јеһованын дәстәјини һисс едирдиләр вә өзләрини тамамилә Она хидмәтә һәср етмишдиләр. Фајдалы ишлә мәшғул олмаг бизим дә һәјатымызы зәнҝинләшдирә биләр. Мүгәддәс Јазыларда габагҹадан дејилмишдир ки, хош хәбәри тәблиғ едән гадынларын сајы бир алај олаҹагдыр (Мәз. 68:11). Бу издиһамын ичиндә минләрлә субај баҹыларымыз вар. Онларын хидмәти бар ҝәтириб вә чохлары руһани оғул вә гызларла хејир-дуаланылыблар (Марк 10:29, 30; 1 Салон. 2:7, 8).

14 ил пионер кими хидмәт едән Лоли дејир: «Пионерлик һәјатыма истигамәт верир. Субај бир баҹы кими мән фәал һәјат тәрзи сүрүрәм, бу да мәнә тәнһалыға гапылмамаға көмәк едир. Һәр ҝүнүн сонунда мәмнунлуг һисс едирәм, чүнки ҝөрүрәм ки, хидмәтим инсанлара һәгигәтән дә фајда ҝәтирир. Бу, мәнә бөјүк севинҹ бәхш едир».

Бир чох баҹылар хариҹи дили өјрәнмиш вә әҹнәбидилли әразидә тәблиғ етмәклә хидмәтләрини ҝенишләндирмишләр. Јухарыда ады чәкилән Анна дејир: «Бизим шәһәрдә минләрлә әҹнәби јашајыр». Франсыз дилиндә данышан инсанлара тәблиғ етмәк она севинҹ ҝәтирир. «Онларла үнсијјәтдә олмаг үчүн өјрәндијим дил мәнә јени фәалијјәт үчүн ҝениш гапы ачыб вә тәблиғ хидмәтими даһа да мараглы едиб».

Адәтән, субајларын аилә мәсулијјәтләри аз олдуғу үчүн бәзиләри мөвҹуд шәраитләриндән истифадә едәрәк тәблиғчиләрә бөјүк еһтијаҹ олан әразиләрдә тәблиғ едирләр. «Мән тамамилә әминәм ки, инсан Јеһоваја хидмәтдә нә гәдәр чох шеј едирсә, јахын достлар тапмаг бир о гәдәр асан олур вә өзүнүн севилдијини һисс едир,— дејә јашы 30-дан јухары олан вә тәблиғчиләрә еһтијаҹ олан әразиләрдә хидмәт едән субај баҹымыз Лидиана гејд едир. — Мәним һәјатымы зәнҝинләшдирән мүхтәлифмәншәли вә мүхтәлиф милләтләрдән чохлу јахын достларым вар».

Мүгәддәс Китабда мүждәчи Филипин пејғәмбәрлик едән дөрд субај гызы һаггында данышылыр (Һәв. иш. 21:8, 9). Онлар да аталары кими сәјлә хидмәт едирдиләр. Ола билсин, онлар пејғәмбәрлик етмәк әнамларындан Гејсәријәдәки һәмиманлыларынын рифаһына истифадә едирдиләр (1 Кор. 14:1, 3). Бу ҝүн дә бир чох субај баҹылар мүнтәзәм олараг мәсиһчи ҝөрүшләринә ҝәлмәклә вә онларда иштирак етмәклә башгаларыны руһландырыр.

Лидија исә Филипи шәһәриндә јашајан еркән мәсиһчиләрдән бири иди вә Мүгәддәс Китабда гонагпәрвәрлијинә ҝөрә тәрифләнир (Һәв. иш. 16:14, 15, 40). Еһтимала ҝөрә субај, јахуд дул олан Лидија сәхавәтли гадын иди. Бунун сајәсиндә онун Павел, Сила вә Лука кими сәјјар нәзарәтчиләрлә үнсијјәт етмәк имканы олурду. Бу ҹүр руһ тәзаһүр етдирмәк бу ҝүн дә хејир-дуалар ҝәтирир.

Истәкли олмаг тәләбатымызы неҹә өдәјә биләрик?

Һәјатда фајдалы ишлә мәшғул олмагдан савајы, һамымызын мәһәббәтә вә диггәтә еһтијаҹы вар. Субај инсанлар бу тәләбаты неҹә өдәјә биләрләр? Илк нөвбәдә унутмамалыјыг ки, Јеһова бизи һәмишә севир, мөһкәмләндирир вә дуаларымызы динләјир. Давуд падшаһ өзүнү бәзән ‘тәнһа вә зүлм ичиндә’ һисс етсә дә, билирди ки, һәр заман Јеһоваја көмәк үчүн үз тута биләр (Мәз. 25:16; 55:22). О јазмышды: «Ата-анам мәни атса белә, Рәбб мәни гәбул едәр» (Мәз. 27:10). Аллаһ бүтүн хидмәтчиләрини Она јахынлашмаға вә Онунла јахын дост олмаға чағырыр (Мәз. 25:14; Јаг. 2:23; 4:8).

Бундан әлавә, биз үмумдүнја гардашлығымызда өз мәһәббәтләри илә һәјатымызы зәнҝинләшдирәҹәк руһани ата, ана, гардаш вә баҹылар тапа биләрик (Мат. 19:29; 1 Пет. 2:17). Бир чох субај мәсиһчиләр ‘хејирли ишләри вә вердији сәдәгәләри’ илә танынан Табитанын нүмунәсини тәглид етмәкдән бөјүк мәмнунлуг дујурлар (Һәв. иш. 9:36, 39). Лоли дејир: «Ҝетдијим һәр јығынҹагда мәни севәҹәк вә руһдан дүшәндә мәнә дајаг олаҹаг әсил достлар ахтарырам. Достлуг телләрини мөһкәмләндирмәк үчүн мән инсанлара мәһәббәт вә мараг ҝөстәрмәјә чалышырам. Индијәдәк хидмәт етдијим сәккиз јығынҹагда гаршыма һәмишә әсил достлар чыхыб. Онларын арасында тәкҹә һәмјашыдларым јох, еләҹә дә јашлы вә јенијетмә баҹылар олуб». Һәр јығынҹагда севҝијә вә достлуға еһтијаҹы олан инсанлар вар. Белә адамлара сәмими мараг ҝөстәрмәк онлара бөјүк көмәк олар вә севиб-севилмәк тәләбатымызы өдәјә биләр (Лука 6:38).

Аллаһ унутмајаҹаг

Мүгәддәс Китаб ҝөстәрир ки, бүтүн мәсиһчиләр, јашадығымыз чәтин ҝүнләри нәзәрә алараг, мүәјјән шејләри гурбан вермәлидирләр (1 Кор. 7:29-31). Јалныз Рәббә бағлы инсанла аилә гурмаг тәләбинә итаәт етдијинә ҝөрә субај галан мәсиһчиләр хүсуси һөрмәтә вә диггәтә лајигдирләр (Мат. 19:12). Анҹаг бу тәгдирәлајиг гурбан о демәк дејил ки, онлар һәјатдан там севинҹ әлдә етмирләр.

«Мән Јеһова илә јахын мүнасибәтләрдән вә хидмәтдән бөјүк мәмнунлуг дујурам,— дејә Лидиана гејд едир. — Мән евли оланлар арасында һәм хошбәхт, һәм дә хошбәхт олмајан инсанлары таныјырам. Бу, мәни әмин едир ки, хошбәхт олмағым ҝәләҹәкдә әрә ҝедиб-ҝетмәјәҹәјимдән асылы дејил». Исанын вурғуладығы кими, хошбәхтлик әсас етибарилә вермәкдән вә хидмәт етмәкдән асылыдыр, буну исә бүтүн мәсиһчиләр баҹарар (Јәһ. 13:14-17; Һәв. иш. 20:35).

Шүбһәсиз, бизи ән чох севиндирән одур ки, Аллаһын ирадәсини јеринә јетирмәк үчүн вердијимиз гурбанлардан асылы олмајараг, Онун бизә хејир-дуа верәҹәјини билирик. Мүгәддәс Китаб бизи әмин едир: «Аллаһ һагсыз дејилдир ки, сизин... Онун ады наминә ҝөстәрдијиниз мәһәббәти унутсун» (Ибр. 6:10).

[Һашијәләр]

[25-ҹи сәһифәдәки шәкил]

«Мән малик олдуғум шејләрлә кифајәтләнирәм, олмајан шејләр барәсиндә исә хәјаллар гурмурам» (Кармен)

[26-ҹы сәһифәдәки шәкил]

Лоли вә Лидиана тәблиғчиләрә еһтијаҹ олан јерләрдә хидмәт етмәкдән севинҹ дујурлар

[27-ҹи сәһифәдәки шәкил]

Аллаһ бүтүн хидмәтчиләрини Она јахынлашмаға дәвәт едир