Мүгәддәс Китаб һәјатлары дәјишир

Ҝәнҹлијиндә марихуана вә түтүн чәкән бир нәфәр бу пис вәрдишләрдән јаха гуртармаг үчүн ҝүҹү һарадан әлдә етмишди? Гулдур дәстәсинин үзвү нәјин сајәсиндә гәзәбини ҹиловламағы өјрәнмиш вә ирги нифрәтә галиб ҝәлә билмишдир? Ҝәлин ҝөрәк онлар өзләри бу һагда нә дејирләр.

ҮМУМИ ТАНЫШЛЫГ

АДЫ: ҺЕНРИХ МАР

ЈАШЫ: 38

ӨЛКӘ: ГАЗАХЫСТАН

ТАРИХЧӘСИ: МАРИХУАНА ВӘ ТҮТҮН ЧӘКӘН

КЕЧМИШИМ: Мән Газахыстанын ҹәнубунда, Дашкәнд шәһәриндән тәхминән 120 километр аралыда доғулмушам. Орада јајда гураглыг вә исти олур, һаванын һәрарәти мүсбәт 45 дәрәҹәјә чатыр, гышда исә мәнфи 10 дәрәҹәјә енир. Бу, үзүм вә чәтәнә биткисинин битмәси үчүн идеал шәраитдир.

Валидејнләрим миллијјәтҹә алман идиләр. Онларын һәр икиси протестант мәзһәбинә мәнсуб олсалар да, диндар дејилдиләр. Буна бахмајараг, онлар мәнә Иса Мәсиһин нүмунәви дуасыны әзбәрләтмишдиләр. Анам вә бөјүк баҹым бир мүддәт Јеһованын Шаһидләри илә Мүгәддәс Китабы өјрәндиләр. Онда мәним 14 јашым вар иди. Бир дәфә анамла өјрәнмә кечирән ики Шаһид анама онун көһнә Мүгәддәс Китабындан Аллаһын адынын Јеһова олдуғуну ҝөстәрди вә мән дә тәсадүфән буну ешитдим. Бу, мәнә ҝүҹлү тәсир бағышлады. Лакин анам өјрәнмәни сахлады, беләликлә мән дә Аллаһ һаггында өјрәнмәк үчүн һеч бир аддым атмадым. Буна бахмајараг, бир гәдәр сонра мәктәбдә мүәллим Јеһованын Шаһидләри «тәригәти» һагда ујдурма һадисәләр данышанда онун дедикләринин киминсә ујдурдуғу јалан олдуғуну сөјләдим, чүнки баҹымла онларын јығынҹаг ҝөрүшләринин бәзиләриндә олмушдум.

15 јашым оланда мәни пешә саһиби олмаг үчүн Русијанын Ленинград, индики Санкт-Петербург шәһәринә ҝөндәрдиләр. Јеһова һаггында билдикләрими отаг јолдашларыма данышырдым. Лакин мән сигарет чәкмәјә башладым. Газахыстана, евимизә ҝедәндә гејри-гануни олмасына бахмајараг, асанлыгла марихуана әлдә едирдим. Һәмчинин чохлу араг вә евдә дүзәлмә чахыр ичирдим.

Пешә мәктәбини битирдикдән сонра ики ил Совет ордусунда хидмәт етдим. Јенијетмә оланда Мүгәддәс Китабдан өјрәндикләрим һәлә дә јадымда иди. Фүрсәт дүшәндә әсҝәрлик јолдашларыма Јеһова һаггында данышыр вә кимсә Јеһованын Шаһидләри һагда јалан данышанда онлары мүдафиә едирдим.

Һәрби хидмәти битирдикдән сонра Алманијаја көчдүм. Мүһаҹирләрин јашадығы шәһәрдә мәнә Мүгәддәс Китабы өјрәнмәк үчүн нәзәрдә тутулан Јеһованын Шаһидләри тәрәфиндән дәрҹ едилмиш нәшр вердиләр. Мән ону бөјүк марагла охудум вә орада дејиләнләрин һәгигәт олдуғуну анладым. Лакин түтүндән вә марихуанадан әл чәкә билмирдим. Бир мүддәт сонра Карлсруе шәһәринин јахынлығына көчдүм. Орада Јеһованын Шаһидләриндән бири илә таныш олдум вә о, мәнимлә Мүгәддәс Китабы өјрәнмәјә башлады.

МҮГӘДДӘС КИТАБ ҺӘЈАТЫМЫ ДӘЈИШДИ: Мән Мүгәддәс Китабы һәмишә Аллаһын Кәламы һесаб етмишәм. Мәнә вердикләри китабы охудугдан сонра исә әмин олдум ки, Мүгәддәс Китаб һәјатын бүтүн ваҹиб суалларына ҹаваб верир. Дүздүр, пис вәрдишләри дәрһал ата билмәдим. Ахырда, Мүгәддәс Китабын 2 Коринфлиләрә 7:1 ајәсиндәки мәсләһәтин үзәриндә ҹидди дүшүндүм вә өзүмү «һәр бир бәдән вә руһ мурдарлығындан» тәмизләмәк, јәни түтүн вә марихуананы тәрҝитмәк гәрарына ҝәлдим.

Марихуананы, демәк олар ки, дәрһал атдым. Түтүнә ҝәлинҹә исә, дүз алты ај вахт лазым олду. Бир дәфә мәнимлә Мүгәддәс Китабы өјрәнән сорушду: «Сәнин һәјатынын мәнасы нәдир?» Онун суалы мәни түтүнү атмаг һаггында ҹидди дүшүнмәјә тәшвиг етди. Буну етмәјә дәфәләрлә ҹәһд ҝөстәрмишдим. Бу дәфә исә гәрара ҝәлдим ки, сигарети чәкәндән сонра әфв диләмәк үчүн јох, ону чәкмәмишдән әввәл мәнә көмәк етмәси үчүн дуа едим. 1993-ҹү илдә сигарети атмаг үчүн конкрет ҝүн тәјин етдим. О вахтдан бәри Јеһованын көмәјилә сигаретә һеч ҝөзүмүн уҹу илә дә бахмамышам.

МӘНӘ ФАЈДАСЫ: Инди мән һәм баһа баша ҝәлән, һәм дә зәрәрли олан марихуана вә түтүндән гуртулмушам, үстәлик сәһһәтим дә јахшылашыб. Һал-һазырда Јеһованын Шаһидләринин Алманијада јерләшән филиалында көнүллү кими хидмәт едирәм. Мүгәддәс Китабда олан мәсләһәтләрә риајәт етмәји өјрәндијим үчүн неҹә дә хошбәхтәм! Мүгәддәс Китабдакы һәгигәтләри өјрәнмәклә һәјатымын мәнасыны тапмышам.

ҮМУМИ ТАНЫШЛЫГ

АДЫ: ТАЈТУС ШАНГАДИ

ЈАШЫ: 43

ӨЛКӘ: НАМИБИЈА

ТАРИХЧӘСИ: ГУЛДУР ДӘСТӘСИНИН ҮЗВҮ

КЕЧМИШИМ: Мән Намибијанын шималындакы Оһангвена вилајәтинин кәндиндә бөјүјүб боја-баша чатмышам. 1980-ҹи илләрдә орада ҝедән мүһарибәдә кәндимизин әһалисинин чохуну дөјмүш вә өлдүрмүшдүләр. Бизим кәнддә јалныз далашмағы баҹаран вә башгаларыны дөјән оғлан ушағы әсил киши һесаб олунурду. Буна ҝөрә дә мән далашмағы өјрәнмишдим!

Мәктәби битирдикдән сонра дәниз кәнарында јерләшән Свакопмунд шәһәринә, дајымын јанына көчдүм. Чох кечмәмиш гулдур дәстәсинә гошулдум. Биз дава салмаг үчүн шәһәрин гараларын ҝирмәси гадаған олунан јерләринә, мәсәлән, меһманханалара, барлара ҝедирдик. Бир нечә дәфә кешикчиләрлә вә полисләрлә далашмышдыг. Һәр ҝеҹә күчәјә чыханда өзүмлә ити, узун бычаг ҝөтүрүрдүм. Беләликлә, јолуму кәсән һәр кәсә һүҹум чәкмәјә һазыр идим.

Бир дәфә башга дәстә илә далашаркән аз гала өлмүшдүм. Һәмин дәстәдән олан оғлан архадан мәнә јахынлашыб башымы кәсмәк истәјирди. Анҹаг бизимкиләрдән бири ону елә вурду ки, о, һушуну итириб јерә јыхылды. Өлүмә бу гәдәр јахын олмағыма бахмајараг, һәјат тәрзими дәјишмәк истәмирдим. Киши вә ја гадын олмасындан асылы олмајараг, киминләсә сөзүм чәп ҝәләндә илк зәрбәни һәмишә мән вурурдум.

МҮГӘДДӘС КИТАБ ҺӘЈАТЫМЫ ДӘЈИШДИ: Мән биринҹи дәфә Јеһованын Шаһидләриндән бири илә растлашанда о, мәнә 37-ҹи мәзмурдан бир нечә ајә охуду вә сонра Мүгәддәс Јазыларын «Вәһј» китабында башга ҝөзәл вәдләр верилдијини сөјләди. Анҹаг бу вәдләрин һарада јазылдығыны дәгиг демәдији үчүн мән Мүгәддәс Китаб тапыб һәмин ҝеҹә бүтүн «Вәһј» китабыны охудум. Вәһј 21:3, 4 ајәләриндәки «артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр» сөзләри мәним чох хошума ҝәлди. Шаһидләр икинҹи дәфә ҝәләндә Мүгәддәс Китабы өјрәнмәјә разылашдым.

Дүшүнҹә тәрзими вә давранышымы дәјишмәк чох чәтин иди. Лакин Һәвариләрин ишләри 10:34, 35 ајәләриндән өјрәндим ки, «Аллаһ инсанларын кимлијинә бахмаз. Амма һәр халгдан олуб, Ондан горхан вә һагг иш ҝөрән Она мәгбулдур». Һәмчинин Ромалылара 12:18 ајәсиндә јазылан «мүмкүнсә, әлиниздән ҝәлдији гәдәр бүтүн адамларла сүлһдә олун» принсипини тәтбиг етмәк үчүн чох чалышырдым.

Мән нәинки өз гәзәбими ҹиловламағы өјрәнир, һәмчинин сигаретә олан асылылығымдан да гуртулмаға чалышырдым. Чох вахт ағлаја-ағлаја Јеһоваја јалварыб көмәк истәјирдим. Лакин илк вахтлар һәр шеји тәрсинә едирдим. «Бу, ахырынҹыдыр»,— дејиб, сигарети чәкир, сонра дуа едирдим. Мәнимлә өјрәнән Шаһид баша салды ки, сигарети чәкмәздән әввәл дуа етмәк лазымдыр. Мәнә, һәмчинин сигарет чәкән инсанлардан да узаг дурмаг лазым иди. Бундан башга, алдығым мәсләһәтә әмәл едәрәк иш јолдашларыма сигаретин зијаны һагда данышдым. Бунун доғрудан да көмәји дәјди, чүнки ишдә артыг һеч кәс мәнә мүфтә сигарет тәклиф етмирди.

Вахт кечдикҹә, сигарети атмаға вә әввәлки һәјат тәрзимдән јаха гуртармаға мүвәффәг олдум. Мүгәддәс Китабы өјрәнмәјә вә орадакы принсипләри тәтбиг етмәјә башладыгдан алты ај сонра мән вәфтиз олуб Јеһованын Шаһиди олдум.

МӘНӘ ФАЈДАСЫ: Ирги вә дәрисинин рәнҝи мүхтәлиф олан Јеһованын Шаһидләри арасында сәмими мәһәббәти ҝөрәндә баша дүшдүм ки, бу, һәгиги диндир. Һәлә вәфтиз олмамышдан әввәл ағдәрили Шаһид мәни өз евинә наһара дәвәт етмишди. Бу, санки јуху иди. Әввәлләр ағдәрили инсанла сакит отурмағы белә баҹармырдым, о ки галды евиндә отуруб онунла наһар едим. Мән өзүмү бејнәлхалг гардашлығын үзвү кими һисс етдим.

Кечмишдә кешикчиләр вә полисләр мәним дүшүнҹәми вә һәрәкәтләрими дәјишмәјә чалышсалар да, ҹәһдләри боша чыхырды. Јалныз Мүгәддәс Китабын сајәсиндә хасијјәтими дәјишә вә хошбәхт ола билдим.

[21-ҹи сәһифәдәки јазы]

«Чох вахт ағлаја-ағлаја Јеһоваја јалварыб көмәк истәјирдим»