Боливијадан ҝәлән мәктуб
Јохсуллуға бахмајараг, хошбәхт вә никбин гадын
ИНКИШАФ етмәкдә олан өлкәдә миссионер кими хидмәт етдијим мүддәтдә јохсуллуғу вә үмидсизлији ҝөрмәјә алыша билмәдим ки билмәдим. Мән тез бир заманда һәр кәсин әзаб-әзијјәтдән гуртулаҹағыны ҝөрмәк истәјирәм. Лакин билирәм ки, бу проблемләри јалныз Аллаһын Падшаһлығы арадан галдыраҹаг. Бунунла белә, дәфәләрлә ҝөрмүшәм ки, Аллаһын Кәламыны рәһбәр тутан инсанлар чәтин вәзијјәтә бахмајараг, хошбәхтлик тапырлар. Һәмин инсанлардан бири Сабинадыр.
Чох илләр әввәл әри көһнә автобуса миниб ҝәлирли иш ахтарышында башга өлкәјә ҝедәркән Сабина ики балаҹа гызы гуҹағында ону јола салмышды. Онун јолуну ҝөзләјә-ҝөзләјә илләр ајлары әвәз етди, о исә бир даһа ҝери гајытмады. О ҝедән ҝүндән Сабина өзүнү, Милена вә Ҝилјан адлы гызларыны доландырмаг үчүн һәр ҝүн һава ачыландан гаралана кими ишләмәли олурду.
Мән илк дәфә Сабинаны баҹысынын мағазасында тәрс мүштәриләрә сәбирлә хидмәт едәркән ҝөрмүшдүм. Онун јорғун ҝөзләринә баханда һисс етдим ки, бүтүн ҝүнү дурмадан ишләјиб. Она өзү вә гызлары илә Мүгәддәс Китабы өјрәнмәји тәклиф етдим. О исә деди: «Бөјүк мәмнунијјәтлә истәјәрдим, лакин вахтым јохдур. Анҹаг гызларымла өјрәнә биләрсиниз». Мән дә разылашдым. Гызларла өјрәндикҹә Сабинаны даһа јахшы таныјыр, онун вәзијјәтини баша дүшмәјә башлајырдым.
Сабина үчүн ҝүн сәһәр саат дөрддә башлајырды. Гызлары бир отаглы евдә јатаркән, Сабина оҹаг галајыб бөјүк алүмин газаны онун үстүнә гојур. О, пирог үчүн әт гызардыр ки, ону сатыб аиләни доландырсын. Бир ҝеҹә әввәлдән Сабина пирогун хәмирини јоғурур.
О, еһтијатла һәмин ҝүн үчүн лазым олан һәр шеји — ҝүндән горунмаг үчүн чәтири, бир ҝөзлү собаны, газ балонуну, столу, стуллары, газанлары, јағы, еләҹә дә әти, хәмири вә евдә мејвәдән һазырладығы бир нечә литр ичкини иҹарәјә ҝөтүрдүјү әл арабасына јығыр.
Артыг саат алтыда Сабина ики гызы илә һазыр олур. Онлар гапыны гыфыллајыр вә үзләриндә һеч бир ифадә олмадан динмәз-сөјләмәз јола дүшүрләр. Онлар вар гүввәләрини ҝөрәҹәкләри ишә јөнәлдирләр. Чох вахт сәһәрләр галдығымыз миссионер евинин пәнҹәрәсиндән мән бу кими сәһнәләри мүшаһидә едирдим. Бәли, Сабина Боливијанын күчәләриндә јемәк-ичмәк сатмаг үчүн дан јери сөкүлмәмиш евдән чыхан гадынлардан јалныз биридир.
Једдинин јарысында ҝүнәш дағларын үстүндән бојлананда Сабина гызлары илә ишләдикләри јерә ҝәлиб чатырлар. Бир кәлмә кәсмәдән онлар арабаны бошалдыр вә мәтбәхи гурурлар. О, биринҹи пирогу јағын ичинә атыр вә о, ҹызылдаја-ҹызылдаја бишир. Онун иштаһ ојадан ији сәһәрин сәрин һавасында әтрафа јајылараг аҹ алыҹылары өзүнә ҹәлб едир.
«Нечә дәнә?» — дејә Сабина илк мүштәридән сорушур. Башыны галдырмадан јухулу киши ики бармағыны ҝөстәрир. Сабина јахшыҹа гызармыш исти пироглары она верир, әвәзиндә исә гәпик-гуруш алды. Бу минвалла бүтүн пироглар ҝүн әрзиндә сатылыр. Ахырынҹы пирогу сатандан сонра јығышыб евә јолланырлар. Сәһәрки ишдән сонра ајагларынын ағрымасына бахмајараг, Сабина баҹысынын мағазасына, икинҹи ишә ҝедир.
Гызлары илә Мүгәддәс Китабы өјрәнмәјә башламаг үчүн мағазаја ҝәләндә артыг бир күнҹдә ики кичик скамја һазыр дурурду. Лап башланғыҹдан 9 вә 7 јашларында олан Милена вә Ҝилјан һәр нөвбәти мүзакирәни сәбирсизликлә ҝөзләјир вә буна јахшы һазырлашырдылар. Ҝетдикҹә бу утанҹаг гызлар ачылышмаға вә мәнимлә достлашмаға башладылар. Бу, Сабинанын үрәјинә тәсир етди. Тезликлә, јоруҹу ҹәдвәлинә бахмајараг, о да Мүгәддәс Китабы өјрәнмәк гәрарына ҝәлди.
Сабинанын билији артдыгҹа Јеһова Аллаһа мәһәббәти дә артырды. О, үрәјиндә јени бир һисси — хошбәхтлији дујмаға башлады! Бир заманлар үзүндән јорғунлуг вә гәм-гүссә төкүлән күчә алверчиси инди башга ҹүр ҝөрүнүрдү. Инди онун гамәти дүз, башы дик дурур, ҝөзләри исә алышыб-јанырды. Онун баҹысы дејир: «Инди Сабинанын үзүндән тәбәссүм әскик олмур. Мән ону һеч вахт белә ҝөрмәмишдим». Ејнилә, башгалары да Сабинада вә онун гызларында бөјүк дәјишикликләр баш вердијини ҝөрдүләр. Инди онун узун мүддәт һисс етдији руһани бошлугдан әсәр-әламәт белә галмајыб.
Өјрәндикләри Сабинанын хошуна ҝәлирди, лакин иш графикинә ҝөрә мәсиһчи ҝөрүшләринә ҝәлә билмирди. Нәһајәт, бир ҝүн дәвәтими гәбул едәрәк Падшаһлыг Залына ҝәлди. Бундан сонра о, бир ҝөрүш дә олсун бурахмады. Сабина јығынҹагда өзүнә әсил достлар тапды. О, һәмчинин өз үзәриндә һисс етди ки, Јеһова һәгигәтән дә Ону севәнләрин вә Она хидмәт етмәк үчүн гурбан верәнләрин гајғысына галыр (Лука 12:22-24; 1 Тимотејә 6:8).
Өјрәндикләри Сабинанын гәлбинә јатырды вә о, бунлары башгалары илә бөлүшмәк истәјирди. Лакин о дејирди: «Һәр дәфә тәблиғ етмәк һагда дүшүнәндә ҹаныма титрәмә дүшүр». Чүнки о, белә дүшүнүрдү: «Мәним кими утанҹаг, аз тәһсилли гадын неҹә кимәсә дәрс кечә биләр?» Буна бахмајараг, она ҝөстәрилән хејирхаһлыг вә һәјатында јахшылыға доғру баш верән дәјишикликләр ону бу ваҹиб аддымы атмаға тәшвиг етди. О, һәмчинин баша дүшүрдү ки, гызлары ондан нүмунә ҝөтүрүрләр. Буна ҝөрә дә чох кечмәди ки, о, хош хәбәри башгалары илә бөлүшмәјә башлады. Онун гызлары да һәвәслә она гошулдулар.
Бу ҝүн Сабина артыг һәр ҝүн јоруҹу ишдә ишләјәрәк севинҹини итирән һәмин касыб гадын дејил. Онун мадди вәзијјәти елә дә чох дәјишмәјиб, дәјишән онун һәјата олан бахышыдыр. Инди о, вәфтиз олунмуш бир мәсиһчи кими, дүнјадакы јохсуллуғу вә үмидсизлији бирдәфәлик арадан галдыраҹаг Аллаһын Падшаһлығы һаггында хош хәбәри инсанларла бөлүшүр (Матта 6:10).
Саат бешдир вә Сабина јенә дә өзүнүн бир отаглы евиндән чыхмаға һазырлашыр. Лакин бу сәһәр о, әт пирогу сатмајаҹаг. О, бир груп баҹы-гардашла ҝөрүшүб күчәдә шаһидлик едәҹәк. Һәр һәфтә вахтынын бир һиссәсини башгаларына көмәк етмәјә ајырмаг онун һәјатына хошбәхтлик ҝәтирир. О, гапыны гыфыллајыр вә хош тәбәссүмлә күчәјә чыхыр. Лакин инди о, араба илә ишә јох, әлиндә чанта башга јерә ҝедир. Бир аздан о, чантасындакы Мүгәддәс Китабын вә она әсасланан нәшрләрин көмәји илә инсанлара үмид хәбәрини чатдыраҹаг. Сабина ҝүлүмсүнәрәк әминликлә дејир: «Нә вахтса инсанларла Мүгәддәс Китаб һаггында даныша биләҹәјим һеч хәјалымдан да кечмирди». Сонра да әлавә едир: «Бу мәним чох хошума ҝәлир!»