Охуҹуларын суаллары

Мәсиһчи ҝөрүшләриндә вә конгресләрдә Мүгәддәс Китаба әсасланан чыхышлары жест дилинә тәрҹүмә едән баҹы башыны өртмәлидирми?

Үмуми ҝөтүрсәк, әҝәр мәсиһчи гадын әринин вә ја јығынҹагдакы гардашын мәсулијјәтини иҹра едирсә, бу заман онун башыны өртмәси лабүддүр. Бу, һәвари Павелин «башы өртүлмәмиш дуа вә ја пејғәмбәрлик едән һәр гадын... өз башы олан әрини хәҹаләтли едир» сөзләриндәки принсипә ујғун ҝәлир, чүнки «арвадын башы әр»дир (1 Кор. 11:3-10). Белә вәзијјәтләрдә баҹы садә вә мүнасиб баш өртүјү ҝејинмәклә теократик гурулуша табе олдуғуну ҝөстәрир (1 Тим. 2:11, 12)a.

Бәс әҝәр баҹы гардашын нитгини жест дилинә тәрҹүмә едирсә, онда неҹә? Дүздүр, баҹынын ролу садәҹә олараг гардашын дедикләрини динләјиҹиләрә чатдырмагдан ибарәтдир. Башга сөзлә, тәлим верән баҹы јох, нитгини тәрҹүмә етдији гардашдыр. Лакин жест дилинә тәрҹүмә етмәклә шифаһи дилләрә тәрҹүмә етмәк арасында бөјүк фәрг вар. Нитг шифаһи дилә тәрҹүмә едилән заман динләјиҹиләр диггәти һәм натигә ҹәмләјә биләр, һәм дә тәрҹүмәчијә гулаг аса биләрләр. Һәмчинин жест дилинә тәрҹүмә едән баҹылардан фәргли олараг, шифаһи дилә тәрҹүмә едән баҹылар, адәтән, диггәт мәркәзиндә олмурлар. Бәзән онларын отурараг вә ја ајаг үстә дурараг тәрҹүмә етмәк сечимләри олур. Ајаг үстә тәрҹүмә едән заман баҹы үзүнү аудиторијаја јох, натигә тәрәф тутур. Белә һалларда онун башыны өртмәсинә еһтијаҹ јохдур.

Бундан әлавә, технолоҝијанын инкишафыны нәзәрә алсаг, нитг жест дилинә тәрҹүмә олунанда тәрҹүмәчинин ролу даһа габарыг олур. Чох вахт бөјүк екранда тәрҹүмәчи ҝөрүнүр, натиг исә аудиторијанын нәзәриндән кәнарда галыр. Бу амилләри нәзәрә аланда, баҹынын бир тәрҹүмәчи кими икинҹи рол ојнамасынын әламәти олараг башыны өртмәси мүнасибдир.

Бу рәһбәрликдә едилән дәјишикликләр Теократик Хидмәт Мәктәби бәндләринин, сәһнәҹикләрин, еләҹә дә Јығынҹағын Мүгәддәс Китаб өјрәнмәсиндә, Хидмәти ҝөрүшдә вә «Ҝөзәтчи Гүлләси»нин өјрәнилмәсиндә верилән шәрһләрин жест дилинә тәрҹүмәсинә неҹә тәсир едә биләр? Жест дилинә тәрҹүмә едән баҹы бу һалларда да башыны өртмәлидирми? Мүәјјән һалларда баҹынын башыны өртмәсинә еһтијаҹ јохдур, чүнки аудиторијаја онсуз да ајдындыр ки, ҝөрүшү апаран баҹы дејил. Мәсәлән, иштирак едәнләрин шәрһләрини, баҹыларын диалогларыны вә ја сәһнәҹикләри тәрҹүмә едәндә буна еһтијаҹ јохдур. Лакин бу ҝөрүшләрдә гардашларын нитгләрини, «Ҝөзәтчи Гүлләси»ни вә ја Јығынҹағын Мүгәддәс Китаб өјрәнмәсини апаран гардашы тәрҹүмә едәндә, јахуд нәғмә охунан заман апарыҹы ролуну ојнајанда о, башыны өртмәлидир. Ҝөрүш заманы тәрҹүмә едән баҹыја гардашларын, баҹыларын, ушагларын вә ағсаггалларын сөзләрини тәрҹүмә етмәк лазым ҝәлә биләр. Буна ҝөрә дә бүтүн ҝөрүш боју баш өртүјүнү чыхармамаг даһа раһат оларды.

[Һашијә]