Нәјә ҝөрә өзүмүзү Јеһоваја һәср етмәлијик?
«Мәнсуб олдуғум... Аллаһын бир мәләји бу ҝеҹә мәнә заһир олду» (ҺӘВ. ИШ. 27:23).
1. Вәфтиз олунанлар артыг һансы аддымлары атмышлар вә бу, һансы суаллары доғурур?
«ИСА МӘСИҺИН фидјә гурбанлығы әсасында ҝүнаһларындан төвбә етмисәнми вә Јеһованын ирадәсини јеринә јетирмәк үчүн өзүнү Она һәср етмисәнми?» Бу, вәфтиз үчүн мәрузәнин сонунда вәфтиз олунмаға һазырлашанлара верилән ики суалдан биридир. Нәјә ҝөрә мәсиһчиләр өзләрини Јеһоваја һәср етмәлидирләр? Аллаһа һәср олунмағын фајдасы нәдир? Нәјә ҝөрә өзүнү Аллаһа һәср етмәјән инсанын ибадәти Аллаһа мәгбул ола билмәз? Бу суаллара ҹаваб тапмаг үчүн, илк нөвбәдә, һәср олунманын нә демәк олдуғуну билмәлијик.
2. Јеһоваја һәср олунмаг нә демәкдир?
2 Аллаһа һәср олунмаг нә демәкдир? Ҝөрүн, һәвари Павел Аллаһла мүнасибәтини неҹә тәсвир едир. Тәһлүкә илә үзләшән ҝәмидә ҝедән бир чох инсанларын өнүндә о, Јеһованы ‘мәнсуб олдуғу Аллаһ’ адландырды. (Һәвариләрин ишләри 27:22—24 ајәләрини оху.) Бүтүн һәгиги мәсиһчиләр Јеһоваја мәнсубдурлар. Дүнја исә үмумиликдә «шәририн һакимијјәти алтындадыр» (1 Јәһ. 5:19). Инсан өзүнү мүнасиб шәкилдә дуада Јеһоваја һәср етдикдән сонра артыг Она мәнсубдур. Һәср олунма инсанын шәхсән вердији анддыр. Бундан сонра инсан суда вәфтиз олунур.
3. Исанын вәфтизи нәји тәмсил едирди вә давамчылары ону неҹә тәглид едә биләрләр?
3 Иса шәхсән Аллаһын ирадәсини јеринә јетирмәји сечмәклә бизә нүмунә гојуб. О, анаданҝәлмә һәср олунмуш Исраил халгына мәнсуб олдуғу үчүн артыг Аллаһа һәср олунмушду. Анҹаг вәфтиз олунмагла о, Ганунда тәләб олунандан даһа артыг шеј етди. Аллаһын Кәламына әсасән, о деди: «Будур, Мән ҝәлдим ки, еј Аллаһ, Сәнин ирадәни јеринә јетирим» (Ибр. 10:7; Лука 3:21). Беләликлә, Исанын вәфтизи Атасынын ирадәсини јеринә јетирмәк үчүн өзүнү Аллаһа тәгдим етмәсинин символу иди. Онун давамчылары вәфтиз олунанда онун нүмунәсини изләмиш олурлар. Лакин суда вәфтиз олунмагла онлар һамынын гаршысында ҝөстәрирләр ки, өзләрини дуада Аллаһа һәср едибләр.
Һәср олунманын фајдасы
4. Давудла Јонатанын достлуғундан нә өјрәнирик?
4 Бир мәсиһчи кими инсанын өзүнү Аллаһа һәср етмәси чох ҹидди мәсәләдир. Бу, садәҹә өһдәчилик дејил. Бәс онда һәср олунма һансы фајданы ҝәтирир? Мүгајисә үчүн: ҝәлин инсанларын бир-бири гаршысында үзәрләринә өһдәчилик ҝөтүрмәләринин онлара һансы фајданы ҝәтирдијини нәзәрдән кечирәк. Бунун үчүн достлуғу нүмунә ҝәтирмәк олар. Достлуғун севинҹ ҝәтирмәси үчүн онун үзәримизә гојдуғу мәсулијјәтләри дашымаға һазыр олмалыјыг. Достлуг үзәримизә өһдәчилик ҝөтүрмәк демәкдир — биз достумузун гајғысына галмағы өзүмүзә борҹ билирик. Мүгәддәс Китабда бәһс едилән ән ҝөзәл достлуглардан бири Давудла Јонатанын достлуғудур. Онлар һәтта бир-бирилә достлуг әһди бағламышдылар. (1 Шамуел 17:57; 18:1, 3 ајәләрини оху.) Бу ҹүр достлуглар надир һал олса да, чох вахт достлар бир-бири гаршысында мәсулијјәт һисс едәндә онларын достлуғу даһа да мөһкәмләнир (Сүл. мәс. 17:17; 18:24б).
5. Гул јахшы ағаја мәнсуб олмағын она өмүрлүк фајда ҝәтирмәси үчүн нә етмәли иди?
5 Аллаһын исраиллиләрә вердији Ганунда инсанларын бир-бири гаршысында өһдәчилик ҝөтүрмәклә фајда әлдә етдикләри башга мүнасибәтләрдән дә сөз едилир. Әҝәр гул өмүрлүк јахшы ағаја мәхсус олмаг истәјирдисә, ағасы илә һәмишәлик вә ләғволунмаз әһд кәсирди. Ганунда дејилирди: «Гул тәкидлә: “Ағамы, арвадымла ушагларымы севирәм вә азад олмаг истәмирәм” десә, онда гој гулун ағасы ону мәбәдә — Аллаһын һүзуруна ҝәтирсин; гулуну гапыја јахуд гапынын јан тахтасына сөјкәјиб гулағыны бизлә дешсин. Бу гул ағасына өмүрлүк гуллуг етсин» (Чых. 21:5, 6).
6, 7. а) Мүгавиләләрин һансы хејри вар? б) Бунун Јеһова илә мүнасибәтләримизә һансы аидијјәти вар?
6 Евлилијә исә даһа мәсулијјәтли јанашмаг тәләб олунур. Бу, садәҹә мүгавилә јох, ики шәхсин арасында кәсилән әһддир. Нә никаһсыз бир јердә јашајан гадынла киши, нә дә онларын ушаглары өзләрини тәһлүкәсизликдә һисс едәҹәк. Лакин ләјагәтли никаһда олан гадынла кишинин јаранан чәтинликләри мәһәббәтлә һәлл етмәк үчүн Мүгәддәс Китаба әсасланан тутарлы сәбәбләри вар (Мат. 19:5, 6; 1 Кор. 13:7, 8; Ибр. 13:4).
7 Гәдим дөврләрдә инсанлар иҹрасы мүтләг олан ишҝүзар вә әмәк мүгавиләләри бағлајырдылар (Мат. 20:1, 2, 8). Бу кими мүгавиләләр бу ҝүн дә бағланыр. Мәсәлән, һансыса рискли ишә ҝиришмәздән вә ја һәр һансы ширкәтдә ишләмәјә башламаздан өнҹә, адәтән, јазылы мүгавилә бағлајырыг. Әҝәр бу кими өһдәчиликләр достлуғу, никаһы вә ишҝүзар мүнасибәтләри бу гәдәр мөһкәмләндирирсә, өзүнү гејдсиз-шәртсиз Јеһоваја һәср етмәјин Онунла мүнасибәтләри даһа да мөһкәмләндирәҹәји нә гәдәр јәгиндир! Ҝәлин Јеһова Аллаһа һәср олунмағын гәдимдә инсанлара һансы фајданы ҝәтирдијини вә онун садәҹә бир өһдәчилик олмадығыны нәзәрдән кечирәк.
Аллаһа һәср олунмаг исраиллиләрә һансы фајданы ҝәтирирди?
8. Аллаһа һәср олунмалары исраиллиләр үчүн һансы мәнаны кәсб едирди?
8 Исраил халгы Јеһованын гаршысында анд ичәндә бүтөвлүкдә Аллаһа һәср олунмуш халг олду. Јеһова онлары Сина дағынын әтәјиндә топлајыб деди: «Әҝәр сөзүмә диггәтлә гулаг асыб әһдимә риајәт етсәниз, сиз бүтүн халглар арасындан Мәнә мәхсус халг олаҹагсыныз». Бүтүн халг да бир нәфәр кими ҹаваб верди: «Рәббин бүтүн сөјләдикләринә әмәл едәҹәјик» (Чых. 19:4—8). Исраиллиләр үчүн Аллаһа һәср олунмаг үзәрләринә һансыса бир иши ҝөтүрмәкдән даһа бөјүк мәна кәсб едирди. Бу о демәк иди ки, онлар артыг Јеһоваја мәхсусдурлар, Јеһова да онларла мүвафиг тәрздә давранырды.
9. Исраиллиләрин Аллаһа һәср олунмалары онлара һансы фајданы ҝәтирирди?
9 Јеһоваја мәхсус олмаг исраиллиләрин хејринә иди. Севән валидејн кими, О, сәдагәт вә гајғыкешлик ҝөстәрирди. Аллаһ Исраил халгына демишди: «Ана сүдәмәр көрпәсини һеч унудармы? Бәтниндән чыхан оғлуна рәһм етмәзми? Ана өз көрпәсини унутса белә, Мән сәни әсла унутмарам» (Јешаја 49:15). Јеһованын Гануну онлара рәһбәрлик верир, пејғәмбәрләри онлары мөһкәмләндирир, мәләкләри исә мүдафиә едирдиләр. Мәзмурчу јазырды: «О, Јагуб нәслинә сөзләрини, исраиллиләрә ганун вә һөкмләрини билдирир. Башга милләтләр үчүн белә етмәјиб». (Мәз. 147:19, 20; Мәзмур 34:7, 19; 48:14 ајәләрини оху.) Јеһова гәдим заманларда Она мәхсус олан халгын гајғысына галдығы кими, бу ҝүн дә өзләрини Она һәср едәнләрин гајғысына галаҹаг.
Биз Аллаһа нәјә ҝөрә һәср олунмалыјыг?
10, 11. Аллаһын бөјүк аиләсиндән кәнарда доғулдуғумузун сәбәбини изаһ един.
10 Өзүнү Аллаһа һәср едиб вәфтиз олунмаг истәјән адамы белә бир суал дүшүндүрә биләр: «Аллаһа хидмәт етмәк үчүн һәср олунма нәјә лазымдыр?» Һал-һазырда Аллаһ гаршысындакы вәзијјәтимизи нәзәрә алсаг, сәбәб ајдын олар. Билдијимиз кими, Адәмин ҝүнаһы уҹбатындан биз һамымыз Аллаһын аиләсиндән кәнарда доғулмушуг (Ром. 3:23; 5:12). Аллаһын бөјүк аиләсинин үзвү олмаг үчүн өзүмүзү Она һәср етмәјимиз ваҹиб тәләбдир. Ҝәлин ҝөрәк, нә үчүн.
11 Һеч бир ата доғма өвладларына Аллаһын нијјәтиндә тутдуғу камил һәјаты верә билмәз (1 Тим. 6:19). Илк инсан ҹүтү ҝүнаһа батдығы вә гајғыкеш Ата вә Јарадандан узаг дүшдүјү үчүн биз Аллаһын оғуллары кими доғулмуруг. (Ганунун тәкрары 32:5 ајәси илә мүгајисә ет.) Та гәдимдән бәшәријјәт Јеһованын бөјүк аиләсиндән кәнар, Аллаһдан ајры јашајыр.
12. а) Гејри-камил инсанлар Аллаһын аиләсинә неҹә дахил ола биләрләр? б) Вәфтиздән өнҹә һансы аддымлары атмаг лазымдыр?
12 Бунунла белә, һәр биримиз Аллаһдан хаһиш едә биләрик ки, бизи Онун илтифатыны газанмыш хидмәтчиләрдән ибарәт аиләсинә гәбул етсинa. Бу, бизим кими ҝүнаһлы инсанлар үчүн неҹә мүмкүндүр? Һәвари Павел јазырды: ‘Биз Аллаһын дүшмәнләри икән Онун Оғлунун өлүмү васитәси илә Аллаһла барышдыг’ (Ром. 5:10). Вәфтиз оланда биз Аллаһдан тәмиз виҹдан диләјирик ки, Она мәгбул олаг (1 Пет. 3:21). Лакин вәфтиздән өнҹә бир нечә аддым атмаг ҝәрәкдир. Биз Аллаһы јахындан танымалы, Она етибар етмәји өјрәнмәли, төвбә етмәли вә пис јолумуздан дөнмәлијик (Јәһ. 17:3; Һәв. иш. 3:19; Ибр. 11:6). Аллаһын аиләсинә гәбул едилмәздән өнҹә даһа бир шеј дә етмәк лазымдыр. Бу нәдир?
13. Нәјә ҝөрә Аллаһын аиләсинин бир үзвү олмаг үчүн өзүмүзү Она һәср етмәлијик?
13 Аллаһдан узаг дүшмүш кәс Онун аиләсинин үзвү олмаг үчүн, илк нөвбәдә, Јеһоваја сөз вермәлидир. Бунун сәбәбини баша дүшмәк үчүн кимсәсиз ушаға сәмими мараг ҝөстәрән вә ону өвладлыға ҝөтүрмәк истәјән хејирхаһ атаны тәсәввүр едәк. Һамы атаны јахшы бир инсан кими таныјыр. Анҹаг ушағы аиләсинә гәбул етмәздән өнҹә, ата истәјир ки, ушаг ону доғма ата кими севиб һөрмәт едәҹәјинә сөз версин. Ушаг јалныз бу шәрти јеринә јетирдикдән сонра һәмин адам ону өз аиләсинә гәбул едәҹәк. Бу, ағлабатан дејилми? Ејнилә, Јеһова Өз аиләсинә јалныз анд ичәрәк өзләрини Она һәср етмәјә һазыр оланлары гәбул едир. Мүгәддәс Китабда дејилир: «Бәдәнләринизи дири, мүгәддәс, Аллаһа мәгбул гурбан кими тәгдим един» (Ром. 12:1).
Мәһәббәт вә иманын тәзаһүрү
14. Һансы мәнада һәср олунма мәһәббәтин тәзаһүрүдүр?
14 Һәср олунма анды ичмәклә Јеһованы үрәкдән севдијимизи ҝөстәририк. Бу, мүәјјән мәнада никаһ андына бәнзәјир. Мәсиһчи бәј, һәр нә олурса-олсун, ҝәләҹәк һәјат јолдашына садиг галаҹағына анд ичмәклә она өз мәһәббәтини изһар едир. Бу, садәҹә нәји исә едиб-етмәјәҹәјимизә даир верилән сөз јох, анддыр. Бәј анлајыр ки, евлилик анды ичмәсә, севдији гыз илә бир дам алтында јашаја билмәз. Ејнилә, биз дә һәср олунма анды ичмәсәк, Јеһованын аиләсинин үзвү олмагдан там севинҹ әлдә едә билмәјәҹәјик. Гејри-камиллијимизә бахмајараг, Аллаһа мәхсус олмаг истәдијимиз вә һәр нә олурса-олсун, Она садиг галмаға гәти гәрарлы олдуғумуз үчүн өзүмүзү Она һәср едирик (Мат. 22:37).
15. Һансы мәнада һәср олунма иманын тәзаһүрүдүр?
15 Өзүмүзү Аллаһа һәср етмәјимиз иманын тәзаһүрүдүр. Нә үчүн? Јеһоваја иманымыз сајәсиндә әминик ки, Она јахынлашмаг бизим үчүн јахшыдыр (Мәз. 73:28). «Әјри вә позғун нәсил» арасында јашадығымыз үчүн Аллаһла јеримәјин һәмишә асан олмајаҹағыны билирик, анҹаг биз Аллаһын сәјләримизә дәстәк олаҹағына даир вердији вәдинә ҝүвәнирик (Филип. 2:15; 4:13, И—93). Биз гејри-камил олдуғумузу дәрк едирик, анҹаг сәһвләрә јол версәк дә, Јеһованын бизә гаршы рәһмли олаҹағына әминик. (Мәзмур 103:13, 14; Ромалылара 7:21—25 ајәләрини оху.) Биз инанырыг ки, Јеһова нөгсансызлығымызы горумаг гәтијјәтимизи хејир-дуаландыраҹаг (Әјј. 27:5).
Аллаһа һәср олунмаг хошбәхтлик ҝәтирир
16, 17. Нәјә ҝөрә Јеһоваја һәср олунмаг хошбәхтлик ҝәтирир?
16 Јеһоваја һәср олунаркән өзүмүзү Онун ихтијарына вердијимиз үчүн бу, бизә хошбәхтлик ҝәтирир. Иса «вермәк алмагдан даһа бөјүк бәхтијарлыг ҝәтирир» демәклә ваҹиб һәгигәти вурғуламышды (Һәв. иш. 20:35). О, јерүзү хидмәти заманы бу принсипә әсасән јашамагла там хошбәхтлији дадмышды. Инсанлара һәјата апаран јолу тапмаға көмәк етмәк үчүн, лазым ҝәлдикдә, о, истираһәтиндән, јемәјиндән вә раһатлығындан кечирди (Јәһ. 4:34). Исаја Атасынын үрәјини севиндирмәк хош иди. О демишди: «Мән даим Онун хошуна ҝәлән ишләри ҝөрүрәм» (Јәһ. 8:29; Сүл. мәс. 27:11).
17 Беләликлә, Иса «ким ардымҹа ҝетмәк истәјирсә, өзүнү инкар етсин» демәклә өз давамчыларына ән мәмнунедиҹи һәјат јолуну ҝөстәрди (Мат. 16:24). Онун сөзләринә ујғун јашамагла биз Јеһоваја даһа јахын олуруг. Ондан јахшы кимсә бизим гајғымыза гала биләрми?
18. Нәјә ҝөрә Јеһоваја һәср олунмағымыза ујғун јашамаг кимәсә вә ја нәјәсә һәср олунмагдан даһа бөјүк хошбәхтлик ҝәтирир?
18 Өзүмүзү Јеһоваја һәср етмәк вә сонра һәср олунмағымыза ујғун јашајараг Онун ирадәсини һәјата кечирмәк кимәсә вә јахуд нәјәсә һәср олунмагдан даһа бөјүк хошбәхтлик ҝәтирир. Мәсәлән, бир чох инсанлар һәјатларыны һеч бир хошбәхтлик вә әсил мәмнунлуг ҝәтирмәјән вар-дөвләт топламаға сәрф едирләр. Өзләрини Јеһоваја һәср едәнләр исә түкәнмәз хошбәхтлик тапырлар (Мат. 6:24). ‘Аллаһын әмәкдашлары’ олмаг шәрәфи онлара севинҹ ҝәтирир, лакин онлар өзләрини һансыса ишә јох, гәдир билән Аллаһымыза һәср едибләр (1 Кор. 3:9). Бизим фәдакарлығымызы Онун гәдәр гијмәтләндирән тапылмаз. О һәтта садиг хидмәтчиләрини ҹаванлыг ҝүнләринә гајтараҹаг ки, онлар Онун гајғысындан әбәдијјән јарарлансынлар. (Әјј. 33:25; Ибраниләрә 6:10 ајәсини оху.)
19. Өзләрини Јеһоваја һәср едәнләрин һансы ҝөзәл имканы вар?
19 Инсанын һәјатыны Јеһоваја һәср етмәси Јеһова илә јахын мүнасибәтләр гурмағына көмәк едир. Мүгәддәс Китабда дејилир: «Аллаһа јахынлашын, О да сизә јахынлашар» (Јаг. 4:8; Мәз. 25:14). Нөвбәти мәгаләдә биз Јеһоваја мәнсуб олмаг гәрарымызын нәјә ҝөрә дүзҝүн олдуғуну мүзакирә едәҹәјик.
[Һашијә]
a Исанын ‘башга гојунлары’ миниллијин сонуна гәдәр Аллаһын оғуллары олмајаҹаглар. Лакин онлар өзләрини Аллаһа һәср етдикләри үчүн Она ‘Ата’ дејә мүраҹиәт едә биләрләр вә онларын өзләрини Јеһованын хидмәтчиләрдән ибарәт аиләсинин үзвләри һесаб етмәк үчүн там әсаслары варды (Јәһ. 10:16; Јешаја 64:8; Мат. 6:9; Вәһј 20:5).
Неҹә ҹаваб верәрдиниз?
• Аллаһа һәср олунмаг һансы мәнаны дашыјыр?
• Аллаһа һәср олунмаг һансы фајданы ҝәтирир?
• Мәсиһчи олмаг үчүн нәјә ҝөрә инсан өзүнү Јеһоваја һәср етмәлидир?
[6-ҹы сәһифәдәки шәкил]
Һәср олунмағымыза ујғун јашамаг түкәнмәз хошбәхтлик ҝәтирир