Вәфтиз вә Аллаһла достлуг

1. Һәбәш мәләкәсинин сарај хидмәтчиси нәјә ҝөрә вәфтиз олунмаг истәди?

«БУДУР су; вәфтиз олунмағыма нә әнҝәл вар?» — бу суалы, ерамызын I әсриндә јашамыш Һәбәш мәләкәсинин сарај хидмәтчиси вермишдир. Исанын шаҝирди Филип она Исанын вә’д едилмиш Мәсиһ олдуғуну изаһ етди. Мүгәддәс Јазылардан өјрәндикләри бу адама дәрин тә’сир бағышлады вә о, вәфтиз олунмаг истәди (Һәвариләрин ишләри 8:26-36).

2. Нәјә ҝөрә вәфтиз олунмаг һаггында ҹидди дүшүнмәк лазымдыр?

² Әҝәр сиз бу китабын әввәлки фәсилләрини Јеһованын Шаһидләриндән бири илә диггәтлә өјрәнмисинизсә, јәгин сиз дә: ‘Мәним вәфтиз олунмағыма нә әнҝәл вар?’ дејә өзүнүздән сорушмаға һазырсыныз. Сиз Мүгәддәс Китабын Ҹәннәтдә әбәди һәјат вә’д етдијини өјрәндиниз (Лука 23:43; Вәһј 21:3, 4). Сиз, һәмчинин өлүләрин вәзијјәти вә дирилмә үмиди һаггында да өјрәндиниз (Ваиз 9:5; Јәһја 5:28, 29). Ола билсин, артыг Јеһованын Шаһидләринин јығынҹаг ҝөрүшләринә ҝәлир вә онларын һәгиги динин тәләбләринә неҹә әмәл етдикләрини өз ҝөзләринизлә ҝөрүрсүнүз (Јәһја 13:35). Ән ваҹиби исә, сиз Јеһова илә таныш олмаға вә Онунла јахын мүнасибәтләр гурмаға башламысыныз.

3. а) Иса өз давамчыларына нә тапшырмышдыр? б) Вәфтиз неҹә иҹра едилир?

³ Аллаһа хидмәт етмәк истәдијинизи неҹә ҝөстәрә биләрсиниз? Иса өз давамчыларына тапшырмышдыр: «Ҝедин, бүтүн халглары шаҝирдим един, онлары... вәфтиз един» (Матта 28:19). Иса суда вәфтиз олунмагла бу саһәдә бизә нүмунә гојду. Вәфтиз заманы онун үстүнә нә су чиләдиләр, нә дә башындан ашағы су төкдүләр (Матта 3:16). Јунан дилиндән «вәфтиз етмәк» кими тәрҹүмә олунан фе’л «батырмаг» мә’насыны дашыјыр. Елә буна ҝөрә дә, мәсиһчи вәфтизи тамамилә суја батырма јолу илә иҹра едилир.

4. Вәфтиз нә һагда шәһадәт едир?

⁴ Суда вәфтиз олунмаг, Јеһова Аллаһла дост олмаг истәјән һәр кәс үчүн ваҹиб шәртдир. Вәфтиз, Аллаһа хидмәт етмәк истәдијимизи ачыг-ајдын ҝөстәрир. Бу аддым, Јеһованын ирадәсини јеринә јетирмәјә һазыр олдуғумузу сүбут едир (Мәзмур 40:7, 8). Лакин вәфтизә олан тәләбләрә ҹаваб вермәк үчүн ваҹиб аддымлар атмаг ҝәрәкдир.

БИЛИК ВӘ ИМАН ТӘЛӘБ ОЛУНУР

5. а) Вәфтизә јарарлы олмаг үчүн илк аддым һансыдыр? б) Мәсиһчи ҝөрүшләринә ҝәлмәк нә үчүн ваҹибдир?

⁵ Сиз артыг илк аддымы атмысыныз. Неҹә? Мүнтәзәм олараг Мүгәддәс Китабы өјрәнмәјин сајәсиндә Јеһова Аллаһы вә Иса Мәсиһи танымагла (Јәһја 17:3). Анҹаг бу һәлә башланғыҹдыр. Мәсиһчиләр ‘Аллаһын ирадәси’ һагда дәгиг билијә јијәләнмәк истәјирләр (Колослулара 1:9). Бу ишдә Јеһованын Шаһидләринин јығынҹаг ҝөрүшләринә ҝәлмәјин сизә бөјүк көмәји олаҹаг. Бу ҹүр ҝөрүшләрә ҝәлмәк олдугҹа ваҹибдир (Ибраниләрә 10:24, 25). Мүнтәзәм сурәтдә ҝөрүшләрдә олмаг Аллаһ һаггында билијинизин артмасына көмәк едәҹәк.

6. Вәфтизә јарарлы олмаг үчүн һансы биликләрә јијәләнмәк лазымдыр?

⁶ Әлбәттә, вәфтиз олмаг үчүн Мүгәддәс Китабда јазыланларын һамысыны билмәк тәләб олунмур. Һәбәш мәләкәсинин сарај хидмәтчиси мүәјјән биликләрә саһиб олса да, Мүгәддәс Јазыларын бә’зи јерләрини баша дүшмәк үчүн көмәјә еһтијаҹ дујурду (Һәвариләрин ишләри 8:30, 31). Сизин дә өјрәнәҹәјиниз һәлә чох шејләр вар. Әслиндә Аллаһ һаггында билик әлдә етмәк фасиләсиз просесдир (Ваиз 3:11). Лакин, вәфтиз олунмаздан әввәл, сиз Мүгәддәс Китабын әсас тә’лимләрини өјрәнмәли вә гәбул етмәлисиниз (Ибраниләрә 5:12). Мәсәлән, өлүләрин вәзијјәти һаггында һәгигәти, Аллаһын адынын вә Падшаһлығынын нә дәрәҹәдә ваҹиб олдуғуну баша дүшмәлисиниз.

7. Мүгәддәс Китабы өјрәнмәк сизә неҹә тә’сир етмәлидир?

⁷ Анҹаг садәҹә билик әлдә етмәк кифајәт дејил. Ејни заманда иман ҝөстәрмәк дә чох ваҹибдир, чүнки «иман етмәдән Аллаһа мәгбул олмаг... гејри-мүмкүндүр» (Ибраниләрә 11:6). Мүгәддәс Китабда хош хәбәри ешитдикдә ‘иман едиб вәфтиз олан’ гәдим Коринф шәһәринин сакинләри һаггында данышылыр (Һәвариләрин ишләри 18:8). Буна бәнзәр тәрздә, Мүгәддәс Китабы өјрәнмәјин сајәсиндә, онун Аллаһдан илһам алмыш Кәлам олдуғуна сизин дә иманыныз артаҹаг. Сиз, һәмчинин Аллаһын бүтүн вә’дләринин һәгигәт олдуғуна вә Мәсиһин гурбанлығынын хилас бәхш етдијинә иман едәҹәксиниз (Јешуа 23:14; Һәвариләрин ишләри 4:12; 2 Тимотејә 3:16, 17).

МҮГӘДДӘС КИТАБ ҺӘГИГӘТИНИ БАШГАЛАРЫ ИЛӘ БӨЛҮШҮН

8. Алдығыныз биликләри башгалары илә бөлүшмәјә сизи нә тәшвиг едәҹәк?

⁸ Үрәјиниздә иман артдыгҹа, алдығыныз биликләри өзүнүздә сахламаг чәтин олаҹаг (Јеремја 20:9). Сиздә Аллаһ вә Онун нијјәтләри һаггында башгаларына данышмаг үчүн ҝүҹлү истәк јаранаҹаг (2 Коринфлиләрә 4:13).

9, 10. а) Мүгәддәс Китаб һәгигәтләрини киминлә бөлүшмәјә башлаја биләрсиниз? б) Јеһованын Шаһидләринин тәблиғ фәалијјәтиндә иштирак етмәк истәјирсинизсә, нә етмәлисиниз?

⁹ Башланғыҹ үчүн гоһумларыныза, достларыныза, гоншуларыныза вә иш јолдашларыныза Аллаһ һаггында нәзакәтлә данышараг, онларла Мүгәддәс Китаб һәгигәтләрини бөлүшә биләрсиниз. Вахт кечдикҹә, сиз Јеһованын Шаһидләринин тәшкил олунмуш тәблиғ фәалијјәтиндә иштирак етмәк истәјәҹәксиниз. Истәјиниз барәдә, сизинлә Мүгәддәс Китабы өјрәнән Шаһидә дејә биләрсиниз. Әҝәр лазыми тәләбләрә ҹаваб верирсинизсә, ики нәфәр мәсиһчи ағсаггал сизинлә бирҝә ҝөрүш тәшкил едиб бу мәсәләни мүзакирә едәҹәкләр.

¹⁰ Бу ҹүр ҝөрүш, ‘Аллаһын сүрүсүнү отаран’ мәсиһчи ағсаггаллардан бә’зиләри илә јахындан таныш олмағыныза көмәк едәҹәк (Һәвариләрин ишләри 20:28; 1 Петер 5:2, 3). Әҝәр сиз Мүгәддәс Китабын әсас тә’лимләрини баша дүшүр вә онлара инанырсынызса, һәмчинин Аллаһын принсипләринә ујғун јашајыр вә һәгигәтән дә Јеһованын Шаһиди олмаг истәјирсинизсә, ағсаггаллар сизә хош хәбәрин вәфтиз олунмамыш тәблиғчиси кими хидмәт едә биләҹәјинизи билдирәҹәкләр.

11. Тәблиғ хидмәтиндә иштирак етмәјә јарарлы олмаг үчүн һансы дәјишикликләр тәләб олуна биләр?

¹¹ Диҝәр тәрәфдән, тәблиғ хидмәтиндә иштирак етмәјә јарарлы олмаг үчүн, сиздән һәјат тәрзиниздә вә вәрдишләриниздә мүәјјән дәјишикликләр етмәк тәләб олуна биләр. Мәсәлән, бу, башгаларынын билмәдији, тәрҝитмәли олдуғунуз вәрдишләр ола биләр. Буна ҝөрә дә, вәфтиз олунмамыш тәблиғчи олмаг истәдијинизи хәбәр вермәздән өнҹә, ҹинси әхлагсызлыг, сәрхошлуг вә наркотикләрдән истифадә етмәк кими ағыр ҝүнаһлардан јаха гуртармаг тәләб олунур (1 Коринфлиләрә 6:9, 10; Галатијалылара 5:19-21).

ТӨВБӘ ЕДИН ВӘ ДӨНҮН

12. Төвбә етмәк нәјә ҝөрә ваҹибдир?

¹² Вәфтизә һазыр олмаг үчүн нөвбәти ики аддымы да атмаг лазымдыр. Һәвари Петер демишдир: «Ҝүнаһларынызын силинмәси үчүн төвбә един вә дөнүн» (Һәвариләрин ишләри 3:19, İ–93). Төвбә етмәк — едилән һәр һансы ишә ҝөрә үрәкдән пешман олмаг демәкдир. Анҹаг төвбә етмәк тәкҹә әхлагсыз һәјат тәрзи сүрәнләрдән тәләб олунмур. Нәјә ҝөрә? Она ҝөрә ки, бүтүн инсанлар ҝүнаһлыдыр вә Аллаһын онлары бағышламасына еһтијаҹ дујурлар (Ромалылара 3:23; 5:12). Сиз Мүгәддәс Китабы өјрәнмәздән әввәл Аллаһын ирадәси илә таныш дејилдиниз. Мәҝәр сиз Онун бүтүн нормаларына ујғун јашаја биләрдинизми? Ҝөрдүјүмүз кими, төвбә етмәк һәр бир кәсдән, һәтта ҹидди ҝүнаһ ишләтмәјәнләрдән белә тәләб олунур.

13. Дөнмәк нә демәкдир?

¹³ Төвбәдән сонра атылмалы олан аддым дөнмәкдир. Едилән ишләрә ҝөрә садәҹә пешманчылыг һисси кечирмәк кифајәт дејил. Әввәлки һәјат тәрзини инкар етмәк вә бундан сонра дүзҝүн давранмаға гәти гәрарлы олмаг лазымдыр. Төвбә етмәк вә дөнмәк, вәфтиздән габаг атылмалы олан аддымлардыр.

ҺӘСР ОЛУНМА

14. Вәфтиз олунмаздан габаг даһа һансы ваҹиб аддымы атмаг лазымдыр?

¹⁴ Вәфтиз олунмаздан габаг даһа бир ваҹиб аддым атмаг лазымдыр. Инсан өзүнү Јеһова Аллаһа һәср етмәлидир.

15, 16. Өзүнү Аллаһа һәср етмәк нә демәкдир вә буну етмәјә бизи нә тәшвиг етмәлидир?

¹⁵ Инсанын өзүнү сәмими дуада Јеһова Аллаһа һәср етмәси, Она даим хүсуси сәдагәт ҝөстәрәҹәјинә сөз вермәси демәкдир (Ганунун тәкрары 6:15). Буну етмәјә инсаны нә тәшвиг етмәлидир? Тәсәввүр едәк ки, ҝәнҹ оғлан хошуна ҝәлән гызла јахындан таныш олмаг гәрарына ҝәлир. Ону даһа јахшы таныдыгҹа вә ҝөзәл кејфијјәтләрини ҝөрдүкҹә, она олан мәһәббәти даһа да артыр. Тәбии ки, бир гәдәр вахтдан сонра о гыза евләнмә тәклиф едәҹәк. Әлбәттә, евлилик онун үзәринә әлавә мәс’улијјәтләр гојаҹаг. Анҹаг гыза олан мәһәббәти ону бу ваҹиб аддымы атмаға тәшвиг едәҹәк.

¹⁶ Јеһованы таныдыгҹа вә Она мәһәббәтиниз артдыгҹа, сиз бүтүн үрәкдән Она хидмәт етмәк вә Онун ирадәсини шәртсиз јеринә јетирмәк истәјәҹәксиниз. Аллаһын Оғлу Иса Мәсиһин ардынҹа ҝетмәк истәјәнләр ‘өзләрини инкар етмәлидирләр’ (Марк 8:34). Өзүнү инкар етмәк — һәр шејдә Аллаһа итаәт етмәк, шәхси арзу вә мәгсәдләримизин буна мане олмасына јол вермәмәк демәкдир. Ајдын олдуғу кими, Јеһованын ирадәсини һәјата кечирмәк, вәфтиз олунмаздан өнҹә сизин һәјатынызда әсас јери тутмалыдыр (1 Петер 4:2).

УҒУРСУЗЛУГ ГОРХУСУНА ҮСТҮН ҜӘЛИН

17. Нәјә ҝөрә бә’зиләри өзләрини Аллаһа һәср етмәјә ҹүр’әт етмирләр?

¹⁷ Бә’зиләри өзләрини Јеһоваја һәср етмәјә ҹүр’әт етмирләр, чүнки онлар бу ҹидди аддымы атмагдан горхурлар. Ола билсин, онлары горхудан, өзләрини бир мәсиһчи кими Аллаһа һәср етмәјин үзәрләринә гојдуғу мәс’улијјәтдир. Белә инсанлар уғурсузлугдан вә Јеһованын үмидини боша чыхармагдан горхараг, өзләрини Она һәср етмәмәјин даһа јахшы олдуғуну дүшүнә биләрләр.

18. Өзүнүзү Јеһоваја һәср етмәјә сизи нә тәшвиг едәҹәк?

¹⁸ Әҝәр сиз үрәјиниздә Јеһоваја мәһәббәт инкишаф етдирмисинизсә, өзүнүзү Она һәср етмәк вә һәср олунманыза ујғун јашамаг истәјәҹәксиниз (Ваиз 5:4). Аллаһа һәср олундугдан сонра, сиз ‘Рәббә лајиг шәкилдә һәрәкәт едиб, Ону һәр ҹәһәтдән разы салмаға’ ҹан атаҹагсыныз (Колослулара 1:10). Әҝәр Аллаһы севирсинизсә, Онун ирадәсини јеринә јетирмәк сизә чох чәтин ҝөрүнмәјәҹәк. Сиз һәвари Јәһјанын сөзләри илә разылашаҹагсыныз: «Аллаһы севмәк, Аллаһын әмрләринә риајәт етмәк демәкдир. Онун әмрләри исә ағыр дејилдир» (1 Јәһја 5:3).

19. Нәјә ҝөрә өзүнүзү Аллаһа һәср етмәкдән горхмамалысыныз?

¹⁹ Өзүнүзү Аллаһа һәср етмәк үчүн сиздән камиллик тәләб олунмур. Јеһова имканларынызы јахшы билир вә баҹардығыныздан артығыны тәләб етмир (Мәзмур 103:14). О сизин јахшылығынызы истәјир вә сизә көмәк едәҹәјинә вә дәстәк олаҹағына сөз верир (Јешаја 41:10). Әмин ола биләрсиниз ки, бүтүн гәлбинизлә Јеһоваја ҝүвәнсәниз, О ‘сизин јолларынызы дүзәлдәҹәк’ (Сүлејманын мәсәлләри 3:5, 6).

ВӘФТИЗ, ҺӘСР ОЛУНМАНЫЗЫН СИМВОЛУДУР

20. Өзүнүзү Јеһоваја һәср етмәјиниз нәјә ҝөрә башгаларына ашкар олмалыдыр?

²⁰ Јухарыда дејиләнләрин үзәриндә дүшүнмәклә, еһтимал ки, шәхси дуанызда өзүнүзү Јеһоваја һәср етмәк истәјәҹәксиниз. Лакин Аллаһы һәгигәтән севәнләр хилас олмаг үчүн, һәмчинин иманларыны ‘ачыгҹа сөјләмәлидирләр’ (Ромалылара 10:10, İ–93). Буну неҹә етмәк олар?

21, 22. Иманынызы ‘ачыгҹа’ неҹә сөјләјә биләрсиниз?

²¹ Әҝәр вәфтиз олмаг истәјирсинизсә, бу һагда јығынҹағынызын сәдрлик едән нәзарәтчисинә хәбәр верин. О гајғы ҝөстәрәҹәк ки, ағсаггаллар сизинлә Мүгәддәс Китабын әсас тә’лимләрини тәкрарласынлар. Ағсаггаллар вәфтиз үчүн тәләбләрә ҹаваб вердијиниз гәнаәтинә ҝәлсәләр, имкан јаранан кими вәфтиз олуна биләрсинизa. Адәтән һәмин ҝүн вәфтизин мә’насыны изаһ едән мә’рузә сөјләнилир. Сонра мә’рузәчи вәфтиз олунанлардан ики садә суала ҹаваб вермәләрини хаһиш едир. Бу, онларын өз иманларыны ‘ачыгҹа сөјләмәләринә’ имкан верир.

²² Вәфтиз олунмагла биз өзүмүзү Аллаһа һәср етдијимизи вә артыг Јеһованын Шаһиди олдуғумузу һамыја ҝөстәририк. Вәфтиз олунан адамын Јеһоваја һәср олундуғуну ҝөстәрмәк үчүн ону тамамилә суја батырырлар.

ВӘФТИЗИН МӘ’НАСЫ

23. «Ата, Оғул вә Мүгәддәс Руһ наминә» вәфтиз олунмаг нә демәкдир?

²³ Иса шаҝирдләринин «Ата, Оғул вә Мүгәддәс Руһ наминә» вәфтиз олунаҹагларыны демишдир (Матта 28:19). Бу о демәкдир ки, вәфтиз олунан кәс Јеһова Аллаһын вә Иса Мәсиһин һакимијјәтини гәбул едир (Мәзмур 83:18; Матта 28:18). О, һәмчинин Аллаһын мүгәддәс руһунун, јә’ни фәал гүввәсинин ролуну да баша дүшмәлидир (Галатијалылара 5:22, 23; 2 Петер 1:21).

24, 25. а) Вәфтиз нәјин символудур? б) Һансы суал диггәтәлајигдир?

²⁴ Анҹаг вәфтиз садәҹә суја батырылмагдан даһа артыг мә’на дашыјыр. Вәфтиз, ваҹиб бир аддымын символудур. Тамамилә суја батырылмаг, мәсиһчинин әввәлки һәјат тәрзи үчүн өлдүјүнү ҝөстәрир. Судан чыхдығы заман о, Аллаһын ирадәсини јеринә јетирмәк үчүн санки јенидән һәјата гајыдыр. Унутмајын ки, сиз өзүнүзү һансыса ишә, инсана вә ја тәшкилата јох, Јеһова Аллаһа һәср етмисиниз. Сизин һәср вә вәфтиз олунманыз Аллаһла јахын мүнасибәтләрин — әсл вә мөһкәм достлуғун башланғыҹыдыр (Сүлејманын мәсәлләри 3:32).

²⁵ Лакин вәфтиз хиласа зәманәт вермир. Һәвари Павел јазмышдыр: «Өз хиласынызы баша чатдырмаг үчүн горху вә ләрзә илә һәрәкәт един» (Филипилиләрә 2:12). Вәфтиз јалныз бир башланғыҹдыр. Бәс Аллаһын мәһәббәтиндә галмаг үчүн сиз нә едә биләрсиниз? Бу һагда сиз сонунҹу фәсилдән өјрәнәҹәксиниз.