Руһа ҝөрә һәрәкәт ет вә һәср олунмағына ујғун јаша
«Руһа ҝөрә һәрәкәт един вә сиз ҹисмани тәбиәтин арзусуну әсла иҹра етмәзсиниз» (ГАЛАТ. 5:16).
1. Пентикост ҝүнүндә һансы ики ҹүр вәфтиз баш верди?
ЕРАМЫЗЫН 33-ҹү илинин Пентикост ҝүнүндә Исанын давамчыларынын мүхтәлиф дилләрдә данышмасы мүгәддәс руһла вәфтиз олундугдан сонра мүмкүн олду. Онларда мөҹүзәви шәкилдә руһун әнамлары өзүнү бүрузә вермәјә башлады (1 Кор. 12:4—10). Бу әнамын вә һәвари Петерин сөјләдији нитгин һансы нәтиҹәси олду? Чохларынын «үрәкләринә елә бил ох батды». Петерин тәшвиг етдији кими, онлар төвбә едиб вәфтиз олундулар. Мүгәддәс Јазыларда охујуруг: «Онун сөзүнү севинҹлә гәбул едәнләр вәфтиз олдулар. Вә о ҝүн үч минә јахын адам ҹәмијјәтә гошулду» (Һәв. иш. 2:22, 36—41). Исанын әмр етдији кими, онлар «Ата, Оғул вә Мүгәддәс Руһ исмилә» суда вәфтиз олундулар (Мат. 28:19, И—93).
2, 3. а) Мүгәддәс руһла вәфтиз олунмагла мүгәддәс руһ исмилә вәфтиз олунмаг арасындакы фәрги изаһ един. б) Нәјә ҝөрә бу ҝүн һәгиги мәсиһчи олмаг истәјән һәр кәсдән суда вәфтиз олунмаг тәләб олунур?
2 Бәс мүгәддәс руһла вә мүгәддәс руһун исми илә вәфтиз олунмағын арасында фәрг вармы? Бәли, вар. Мүгәддәс руһла вәфтиз олунанлар Аллаһын руһани оғуллары кими јенидән — руһдан доғулурлар (Јәһ. 3:3). Онлар Аллаһын сәмави Падшаһлығында падшаһ вә каһин олмаг үчүн мәсһ олунурлар; вә Мәсиһин руһани бәдәнинин үзвләридирләр (1 Кор. 12:13; Галат. 3:27; Вәһј 20:6). Демәли, Јеһова Пентикост ҝүнүндә вә ондан сонра инсанлары мүгәддәс руһла вәфтиз етмәклә Мәсиһин һәмварисләрини сечирди (Ром. 8:15—17). Бәс бизим ҝүнләрдә мүнтәзәм олараг Јеһованын халгынын конгресләриндә баш верән вәфтиз — мүгәддәс руһ исмилә вәфтиз барәдә нә демәк олар?
3 Суда вәфтиз — һәгиги мәсиһчиләрин гејдсиз-шәртсиз Јеһова Аллаһа һәср олунмаларынын символудур. Бу, сәмави дәвәти аланлара да аиддир. Лакин суда вәфтиз бу ҝүн јер үзүндә әбәди јашамаға үмид едән милјонларла киши вә гадын үчүн дә ваҹиб аддымдыр. Малик олдуғу үмиддән асылы олмајараг, Аллаһа мәгбул олмаг истәјән һәр кәс мүтләг Ата, Оғул вә мүгәддәс руһ исмилә суда вәфтиз олунмалыдыр. Бу вәфтиздән сонра бүтүн мәсиһчиләрдән ‘Руһа ҝөрә һәрәкәт етмәләри’ ҝөзләнилир. (Галатијалылара 5:16 ајәсини оху.) Сән ‘Руһа ҝөрә һәрәкәт едәрәк’ Аллаһа һәср олунаркән вердијин анда ујғун јашајырсанмы?
‘Руһа ҝөрә һәрәкәт етмәк’ нә демәкдир?
4. ‘Руһа ҝөрә һәрәкәт етмәк’ әсас етибарилә нә демәкдир?
4 ‘Руһа ҝөрә һәрәкәт етмәк’ мүгәддәс руһун бизә тәсир етмәсинә, башга сөзлә десәк, ҝүндәлик һәјатымыза истигамәт вермәсинә јол вермәк демәкдир. «Галатијалылара мәктуб»ун 5-ҹи фәслиндә мүгәддәс руһун вә ҹисмани тәбиәтин тәсири алтында олмаг арасындакы тәзад ҝөстәрилир. (Галатијалылара 5:17, 18 ајәләрини оху.)
5. Мүгәддәс руһун бизә тәсир етмәсинә јол вермәк һансы әмәлләрдән чәкинмәк демәкдир?
5 Мүгәддәс руһун бизә тәсир етмәсинә јол вермәклә биз ҹисмани тәбиәтин әмәлләриндән чәкинмәјә чалышырыг. Ҹисмани тәбиәтин әмәлләри дедикдә, «зина, ҹинси әхлагсызлыг, мурдарлыг, сәфаһәт, бүтпәрәстлик, сеһрбазлыг, дүшмәнчилик, мүнагишә, һәсәд, гәзәб, еһтираслылыг, нифаг, тәфригәләр, пахыллыг, гатиллик, сәрхошлуг, ејш-ишрәтләр» вә бу кими диҝәр шејләр нәзәрдә тутулур (Галат. 5:19—21). Биз, демәк олар ки, ‘бәдәнин мәнфи әмәлләрини Руһ васитәсилә мәһв едирик’ (Ром. 8:5, 13). Бу, ҹисмани арзуларын бизә һаким кәсилмәсинә јол вермәк әвәзинә, диггәтимизи руһани ишләрә ҹәмләмәјә вә онун рәһбәрлијинә риајәт етмәјә көмәк едәҹәк.
6. Мүгәддәс руһун сәмәрәсини инкишаф етдирмәк үчүн нә ҝәрәкдир? Нүмунә чәкин.
6 Мүгәддәс руһ бизә тәсир етдикҹә, Аллаһа мәгбул кејфијјәтләр, ‘руһун сәмәрәсини’ тәзаһүр етдиририк (Галат. 5:22, 23). Амма баша дүшүрүк ки, бунун үчүн биздән бөјүк сәј тәләб олунур. Нүмунә үчүн торпағы беҹәрән әкинчини ҝөтүрәк. Әлбәттә, ҝүнәшин вә сујун ролу бөјүкдүр; бунларсыз мәһсулун олмасы гејри-мүмкүндүр. Мүгәддәс руһу ҝүнәш шүалары илә мүгајисә етмәк олар. О, руһун сәмәрәсини тәзаһүр етдирмәк үчүн ҝәрәкдир. Бәс әҝәр әкинчи зәһмәт чәкмәсәјди, нәјәсә наил ола биләрдими? (Сүл. мәс. 10:4). Бәли, үрәјимизин торпағыны неҹә беҹәрмәјимиз биздә олан мүгәддәс руһун сәмәрәсинин кејфијјәтинә вә кәмијјәтинә тәсир едир. Буна ҝөрә өзүмүздән сорушмалыјыг: «Мүгәддәс руһла әмәкдашлыг едәрәк өзүмдә онун сәмәрәсини јетишдирмәјә јол верирәмми?»
7. Мүгәддәс руһун сәмәрәсини өзүмүздә јетишдирмәк истәјириксә, нәјә ҝөрә арашдырма апармаг вә дүшүнмәк олдугҹа ваҹибдир?
7 Бол мәһсул јығмаг үчүн әкинчи тарласыны сувармалыдыр. Ејнилә, бизә дә руһун сәмәрәсини өзүмүздә јетишдирмәк үчүн Мүгәддәс Китаб вә мәсиһчи јығынҹағы васитәсилә тәгдим олунан һәгигәт сулары ҝәрәкдир (Јешаја 55:1). Јәгин, сиз бир чохларына Аллаһын Кәламынын мүгәддәс руһун мәһсулу олдуғу барәдә данышмысыныз (2 Тим. 3:16). Һәмчинин садиг вә ағыллы гул синфи Мүгәддәс Китабдакы саф һәгигәт суларынын баша дүшүлмәси үчүн чох ваҹиб олан изаһат тәгдим едир (Мат. 24:45—47). Нүмунәдән ајдындыр ки, мүгәддәс руһун бизә тәсир етмәси үчүн биз Аллаһын Кәламыны охумалы вә үзәриндә дүшүнмәлијик. Белә етмәклә биз ‘арашдырма вә тәдгигатлар’ апаран пејғәмбәрләрин ҝөзәл нүмунәсини изләмиш олуруг. Диггәтәлајигдир ки, һәтта мәләкләр дә вәд олунмуш Өвлад вә мәсһ олунмушларын мәсиһчи јығынҹағы илә бағлы руһани һәгигәтләрә бөјүк мараг ҝөстәрирдиләр. (1 Петер 1:10—12 ајәләрини оху.)
Мүгәддәс руһ неҹә тәсир ҝөстәрир?
8. Нәјә ҝөрә Јеһовадан мүгәддәс руһ диләмәк ваҹибдир?
8 Садәҹә Мүгәддәс Јазылары арашдырыб үзәриндә дүшүнмәк кифајәт дејил. Биз һәмишә Јеһовадан көмәк вә рәһбәрлик диләмәлијик. О, ‘хаһиш етдијимиздән, јахуд дүшүндүјүмүздән артыг етмәјә гадирдир’ (Ефес. 3:20; Лука 11:13). Әҝәр кимсә: «Аллаһ ‘нәләрә еһтијаҹымыз олдуғуну биз Ондан диләмәздән әввәл билирсә’, онда диләмәк нәјә лазымдыр?» — дејә сорушарса, сән она нә ҹаваб верәҹәксән? (Мат. 6:8). Илк нөвбәдә, мүгәддәс руһ үчүн дуа етмәклә биз Јеһоваја етибар етдијимизи ҝөстәририк. Мәсәлән, әҝәр кимсә сәндән көмәк истәјәрсә, сән әлиндән ҝәлән көмәји ондан әсирҝәмәјәҹәксән, ахы о, етибар етдији үчүн сәнә үз тутуб. (Сүлејманын мәсәлләри 3:27 ајәси илә мүгајисә ет.) Ејнилә, биз Јеһовадан мүгәддәс руһ диләјәндә Онун хошуна ҝәлир вә О, һеч вахт бизим хаһишимизи јерә салмајаҹаг (Сүл. мәс. 15:8).
9. Аллаһын мүгәддәс руһунун сәнә тәсир етмәсиндә мәсиһчи ҝөрүшләриндә иштирак етмәјин һансы ролу вар?
9 Јәгин, сән ајдын баша дүшүрсән ки, Аллаһын руһунун бизә тәсир етмәсиндә јығынҹагларын вә конгресләрин дә ролу данылмаздыр. Бу ҝөрүшләрдә иштирак етмәк вә гулаг асмаг зәруридир. Бу, сәнә «Аллаһын дәрин дүшүнҹәләрини» анламаға көмәк едир (1 Кор. 2:10). Мүнтәзәм олараг шәрһ вермәк дә фајдалыдыр. Сон дөрд һәфтә әрзиндә иштирак етдијин јығынҹаг ҝөрүшләри барәдә фикирләш. Иманыны ифадә етмәк үчүн әлини нечә дәфә галдырмысан? Сәнҹә, бу саһәдә дәјишиклик етмәјинә еһтијаҹ вармы? Әҝәр варса, нөвбәти һәфтәләрдә нә етмәли олдуғуну мүәјјән ет. Ҝөрүшләрдә иштирак етмәк истәјин Јеһованын диггәтиндән јајынмајаҹаг вә О, ҝөрүшләрдән даһа чох фајда әлдә етмәјин үчүн сәнә мүгәддәс руһундан верәҹәк.
10. Руһа ҝөрә һәрәкәт етмәк башгаларына һансы дәвәти чатдырмағы өзүнә дахил едир?
10 Руһа ҝөрә һәрәкәт етмәк Вәһј 22:17 ајәсиндәки «Руһ вә ҝәлин дә дејирләр: “Ҝәл!” Гој ешидән дә десин: “Ҝәл!” Сусајан гој ҝәлсин, арзу едән гој һәјат сујуну мүфтә ҝөтүрсүн» дәвәтинә һај вермәји өзүнә дахил едир. Мәсһ олунмуш ҝәлин синфи васитәсилә фәалијјәт ҝөстәрән руһ һәјат сујуну мүфтә ҝөтүрмәк дәвәтини чатдырыр. Әҝәр сән «ҝәл» дәвәтини гәбул етмисәнсә, онда бу дәвәти башгаларына чатдырмагда гәрарлысанмы? Бу хиласедиҹи ишдә иштирак етмәк неҹә дә бөјүк шәрәфдир!
11, 12. Мүгәддәс руһун тәблиғ ишиндә ролу нәдән ибарәтдир?
11 Бу ваҹиб иш мүгәддәс руһун рәһбәрлији алтында һәјата кечирилир. Биз Мүгәддәс Китабдан мүгәддәс руһун биринҹи әсрдә миссионерләрин јени әразиләрдә тәблиғ етмәләри үчүн неҹә имканлар ачдығы барәдә охујуруг. Мүгәддәс руһ һәвари Павели вә онун әмәкдашларыны ‘Асија әјаләтиндә кәламы тәблиғ етмәјә гојмамышды’; мүгәддәс руһ онлара Битинијаја ҝетмәјә дә иҹазә вермәмишди. Биз руһун онларын һәмин јерләрә ҝетмәсинә неҹә мане олдуғуну дәгиг билмирик, лакин ајдындыр ки, руһ Павели ҝениш саһәси олан Авропаја јөнәлтмишди. О, алдығы ҝөрүнтүдә бир македонијалынын ондан көмәк диләдијини ҝөрдү (Һәв. иш. 16:6—10).
12 Ејнилә, бу ҝүн дә Јеһованын руһу үмумдүнја тәблиғ ишинә рәһбәрлик едир. Бунун үчүн Јеһова мөҹүзәли шәкилдә ҝөрүнтү вермир, әксинә, мүгәддәс руһу илә мәсһ олунмушлары јөнәлдир. Руһ баҹы-гардашлары тәблиғ вә тәлим ишиндә әлләриндән ҝәләни етмәјә тәшвиг едир. Шүбһә јохдур ки, бу ваҹиб ишдә сәнин дә пајын вар. Бу ҝөзәл ишдә севинҹини артыра биләрсәнми?
13. Мүгәддәс руһун рәһбәрлијинә табе олдуғумузу неҹә ҝөстәрә биләрик? Нүмунә чәкин.
13 Аллаһын халгына верилән ҝөстәришләрә риајәт етмәклә биз мүгәддәс руһун рәһбәрлијинә табе олдуғумузу ҝөстәририк. Јапонијадан олан ҝәнҹ Миһоконун нүмунәсинә нәзәр салаг. Пионер хидмәтинә јени башламыш бу баҹы һисс едирди ки, тәкрар башчәкмәләр етмәји баҹармыр вә ев саһибини марагландыра билмир. Елә һәмин вахтлар «Бизим Падшаһлыг Хидмәтимиз» вәрәгәсиндә гыса тәкрар башчәкмәләр етмәк барәдә практики мәсләһәтләр чап олунду. Сонра «Һәјатда мәмнунлуғу неҹә тапмаг олар?»a брошүрасы чыхды. Һәмин брошүра хүсусилә дә јапон саһәси үчүн фајдалы иди. Миһоко брошүранын истифадәсинә, хүсусилә дә гыса тәкрар башчәкмәләр етмәјә даир верилән мәсләһәтләри тәтбиг етди. Тезликлә о, әкс тәгдирдә имтина едәҹәк инсанларла Мүгәддәс Китабы өјрәнмәјә башлады. Баҹы дејир: «Мән дүз 12 нәфәрлә Мүгәддәс Китабы өјрәнмәјә башладым вә чатдырмадығым үчүн бир нечә нәфәрдән хаһиш етдим ки, бир аз ҝөзләсинләр». Һәгигәтән дә, Јеһованын Өз хидмәтчиләринә вердији рәһбәрлији тәтбиг едәрәк руһа ҝөрә һәрәкәт едәндә бол хејир-дуалар бичирик.
Аллаһын руһуна бел бағла
14, 15. а) Гејри-камил инсанлар һәср олунмаларына ујғун неҹә јашаја биләрләр? б) Сән ән јахшы достлары неҹә тапа биләрсән?
14 Аллаһын тәјин олунмуш хидмәтчиси кими, бизә хидмәти иҹра етмәк һәвалә олунуб (Ром. 10:14). Ола билсин, сән дүшүнүрсән ки, белә мәсулијјәтли иш үчүн јарамырсан. Лакин мәсһ олунмушлар кими, сәни дә бу хидмәтә јарарлы едән Јеһовадыр. (2 Коринфлиләрә 3:5 ајәсини оху.) Сән әлиндән ҝәләни етмәклә вә Аллаһын руһуна бел бағламагла һәср олунаркән вердијин анда ујғун јашаја биләрсән.
15 Дүздүр, гејри-камил олан бизләрә камил Аллаһ Јеһоваја һәср олунмағымыза ујғун јашамаг асан дејил. Чәтинликләрдән бири одур ки, јени һәјат тәрзин вахтилә үнсијјәт етдијин инсанлары чашдыра биләр, буна ҝөрә дә онлар сәни тәһгирамиз сөзләрлә ‘сөјә’ биләрләр (1 Пет. 4:4). Лакин унутма ки, о вахтдан бәри сән јени достлар газанмысан, анҹаг Јеһова вә Иса Мәсиһлә достлуг ән ваҹиб достлугдур. (Јагуб 2:21—23 ајәләрини оху.) Үмумдүнја гардашлығын бир һиссәси олан јығынҹағындакы баҹы-гардашларла таныш олмаг да ваҹибдир (1 Пет. 2:17; Сүл. мәс. 17:17). Сән Јеһованын руһунун көмәјилә өзүнә мүсбәт тәсир ҝөстәрән достлар тапаҹагсан.
16. Нәјин сајәсиндә, Павел кими, сән дә ‘зәиф олмагдан һәзз ала’ биләрсән?
16 Јығынҹагда һәмишә көмәк етмәјә һазыр олан достларын олса да, ҝүндәлик проблемләрин өһдәсиндән ҝәлмәк сәнин үчүн чәтин ола биләр. Гаршылашдығын чәтинликләр бәзән сәни лап тагәтдән сала биләр, санки, проблемләрлә долу батаглыгдан чыхмысан. Бу, Јеһоваја үз тутуб Ондан мүгәддәс руһ диләмәјин әсил вахтыдыр. Һәвари Павел јазмышдыр: «Мән зәиф олдуғум заман, гүввәтлијәм». (2 Коринфлиләрә 4:7—10; 12:10b ајәләрини оху.) Павел билирди ки, Аллаһын руһу истәнилән инсан зәифлијинин әвәзини өдәмәјә гадирдир. Беләликлә, зәифләјәндә вә ја көмәјә еһтијаҹ дујанда Аллаһын фәал гүввәси сәни мөһкәмләндирә биләр. Павел јазырды ки, ‘зәиф олмагдан һәзз алыр’. О мәһз зәиф олдуғу һалларда мүгәддәс руһун она көмәк етдијини һисс едирди. Сән дә ејни һиссләри кечирә биләрсән! (Ром. 15:13).
17. Мүгәддәс руһ сәнә ҝетдијин јерә чатмаға неҹә көмәк едә биләр?
17 Аллаһа һәср олунмағымыза ујғун јашамаг үчүн биз Онун руһуна еһтијаҹ дујуруг. Тәсәввүр ет ки, јелкәнли ҝәминин капитанысан. Мәгсәдин Јеһоваја әбәдијјән хидмәт етмәкдир. Мүгәддәс руһу ҝетдијин јерә сағ-саламат чатмаг үчүн сәмтини тутмаг истәдијин күләјә бәнзәтмәк олар. Әлбәттә, Шејтан дүнјасынын руһунун сәни ора-бура сүрүкләмәсини истәмирсән (1 Кор. 2:12). Белә десәк, сән күләјин, јәни мүгәддәс руһун дүзҝүн сәмтини мүәјјән етмәли вә ону тутмалысан. Мүгәддәс руһ сәнә Аллаһын Кәламы вә Онун руһла идарә олунан тәшкилаты васитәсилә дүзҝүн истигамәтдә һәрәкәт етмәјә көмәк едәҹәк.
18. Сән нә етмәјә гәти гәрарлысан вә нәјә ҝөрә?
18 Әҝәр сән Јеһованын Шаһидләри илә Мүгәддәс Китабы өјрәнир вә онларла үнсијјәтдән зөвг алырсанса, лакин һәлә дә өзүнү Аллаһа һәср етмәк вә вәфтиз олунмаг кими ваҹиб аддымлары атмамысанса, өзүндән соруш: «Мән нәјә ҝөрә тәрәддүд едирәм?» Әҝәр сән бу ҝүн Јеһованын ирадәсинин јеринә јетирилмәсиндә мүгәддәс руһун ролуну гәбул едир вә ону гијмәтләндирирсәнсә, онда өјрәндијин дүзҝүн аддымлары ат. Јеһова сәни бол-бол хејир-дуаландыраҹаг. О, сәнә сәхавәтлә Өз мүгәддәс руһундан верәҹәк. Әҝәр артыг бир нечә ил, јахуд онилликләрдир ки, вәфтиз олунмусанса, демәли, мүгәддәс руһун тәсирини артыг өз үзәриндә һисс етмисән. Шәхсән өзүн әмин олмусан ки, Јеһова Өз мүгәддәс руһу илә инсаны мөһкәмләндирмәјә гадирдир. Бу, әбәдијјәт боју давам едә биләр. Буна ҝөрә дә руһа ҝөрә һәрәкәт етмәк гәтијјәтиндән дөнмә.
[Һашијәләр]
a Бир чох дилләрдә нәшр олунур.
b 2 Коринфлиләрә 12:10 (ЈД): «Буна ҝөрә дә Мәсиһ уғрунда зәиф олмагдан, тәһгирләрә, јохлуға, тәгибләрә вә чәтинликләрә гатлашмагдан һәзз алырам. Чүнки мән мәһз зәиф оланда ҝүҹлүјәм».
Јадыныздадырмы?
• Руһа ҝөрә һәрәкәт етмәк нә демәкдир?
• Даима ‘руһа ҝөрә һәрәкәт етмәкдә’ сәнә нә көмәк едә биләр?
• Сән Аллаһа һәср олунмағына ујғун неҹә јашаја биләрсән?
[15-ҹи сәһифәдәки шәкил]
Үрәјимизин торпағыны беҹәрмәк үчүн сәј тәләб олунур
[16 вә 17-ҹи сәһифәләрдәки шәкилләр]
Аллаһын руһунун сәнә тәсир етмәсинә јол верирсәнми?