Нәјә ҝөрә бизә мүгәддәс руһ бәләдчилик етмәлидир?
«Мәним Аллаһым Сәнсән. Сәнин Руһун јахшыдыр, дүз јер үчүн мәнә јол ҝөстәр» (МӘЗ. 143:10).
1. Ҝөзәҝөрүнмәз гүввәнин инсана неҹә истигамәт вердијини изаһ един.
ҺАНСЫ јолла ҝетмәли олдуғуну мүәјјән етмәк үчүн нә вахтса компасдан истифадә етмисиниз? Компас магнитләшдирилмиш әгрәби шималы ҝөстәрән садә бир ҹиһаздыр. Компасын әгрәбини һәрәкәтә ҝәтирән ҝөзәҝөрүнмәз гүввә магнетизм адланыр. Әсрләр бојунҹа тәдгигатчылар вә сәјаһәтчиләр суда вә гуруда истигамәти мүәјјән етмәк үчүн компасдан истифадә едирдиләр.
2, 3. а) Јеһова милјард илләр бундан әввәл һансы гүввәдән истифадә етмишди? б) Нәјә ҝөрә биз Аллаһын фәал гүввәсинин һәјатымыза тәсир ҝөстәрәҹәјини ҝөзләмәлијик?
2 Бизә һәјат јолунда рәһбәрлик едән бундан да ваҹиб ҝөзәҝөрүнмәз гүввә мөвҹуддур. Бунун һансы гүввә олдуғуну Мүгәддәс Јазыларын илк ајәләри ачыглајыр. «Јарадылыш» китабында Јеһованын милјард илләр бундан әввәл етдикләри барәдә охујуруг. Орада дејилир: «Башланғыҹда Аллаһ ҝөјләри вә јери јаратды». Нөвбәти ајәдә гејд олундуғу кими, бунун үчүн О, гүдрәтли гүввәсиндән истифадә етмишди: «Аллаһын Руһу суларын үзәриндә долашырды» (Јар. 1:1, 2). Бурада сөһбәт һансы гүввәдән ҝедир? Аллаһын фәал гүввәси олан мүгәддәс руһдан. Бүтүн инсанлар, еләҹә дә әтрафымызда олан һәр шеј мәһз Јеһованын бу гүввәдән истифадә етмәси сајәсиндә мөвҹуддур (Әјј. 33:4; Мәз. 104:30).
3 Аллаһ бизә һәјат вердикдән сонра да Онун фәал гүввәсинин һәјатымыза тәсир ҝөстәрәҹәјини ҝөзләмәлијикми? Бәли. Буну Аллаһын Оғлу да билирди, буна ҝөрә дә шаҝирдләринә демишди: «Һәгигәт руһу... һәгигәти там дәрк етмәјинизә көмәк едәҹәк» (Јәһ. 16:13). Мүгәддәс руһ нәдир? Нәјә ҝөрә онун бизә бәләдчилик етмәсини истәмәлијик?
Мүгәддәс руһ нәдир?
4, 5. а) Үч үгнума етигад едәнләр арасында мүгәддәс руһ барәдә һансы сәһв фикир мөвҹуддур? б) Мүгәддәс руһ нәдир? Изаһ един.
4 Бәзән хидмәтдә Үч үгнума етигад едән инсанларла растлашырыг. Онлар сәһвән дүшүнүрләр ки, мүгәддәс руһ Аллаһа бәрабәр олан руһани шәхсијјәтдир (1 Кор. 8:6). Бу сәбәбдән Мүгәддәс Китабын бир чох тәрҹүмәләриндә «мүгәддәс руһ» ифадәси бөјүк һәрфләрлә верилиб. Лакин гејд етмәк лазымдыр ки, бәзи тәрҹүмәчиләр бу ифадәни кичик һәрфләрлә јазмаг гәрарына ҝәлибләр. Бунун сәбәби одур ки, онлар һәмин ифадәнин шәхсијјәтә аид олмадығыны билирләрa.
5 Бәс онда мүгәддәс руһ әслиндә нәдир? Јарадылыш 1:2 ајәсиндә ибрани дилиндән «руһ» кими тәрҹүмә олунан сөзүн «күләк» мәнасы да вар. Биз күләји ҝөрмәсәк дә, онун тәсирини һисс едирик. Аллаһын руһу да ҝөзәҝөрүнмәздир, анҹаг тәсири ајдын ҝөрүнүр. Аллаһын руһу Онун ирадәсинин һәјата кечирилмәси үчүн инсанлара вә әшјалара јөнәлдилән вә онлара тәсир ҝөстәрән енержидир. Сизҹә, бу мөһтәшәм гүввәнин мүгәддәс Мәнбәјинин Күлли-Ихтијар Аллаһ олдуғуна инанмаг чәтиндир? Гәтијјән! (Јешаја 40:12, 13 ајәләрини оху.)
6. Давуд дуасында Јеһовадан нә диләмишди?
6 Јеһова һәјат јолунда бизә бәләдчилик етмәк үчүн Өз руһундан истифадә едирми? О, мәзмурчу Давуда вәд етмишди: «Сәнә тәлим верәҹәјәм, ҝедәҹәјин јолу өјрәдәҹәјәм» (Мәз. 32:8). Бәс Давудун өзү буну истәјирди? Бәли, чүнки о, бу барәдә Јеһоваја јалварырды: «Мәнә Сәнин ирадәнә әмәл етмәји өјрәт, чүнки мәним Аллаһым Сәнсән. Сәнин руһун јахшыдыр, дүз јер үчүн мәнә јол ҝөстәр» (Мәз. 143:10). Аллаһын руһунун бизә бәләдчилик етмәсини биз дә арзуламалыјыг вә онун рәһбәрлијинә табе олмаға һазыр олмалыјыг. Нәјә ҝөрә? Ҝәлин бунун дөрд сәбәбини арашдыраг.
Өзүмүзә бәләдчилик етмәк игтидарында дејилик
7, 8. а) Нәјә ҝөрә биз Аллаһдан асылы олмадан өзүмүзә истигамәт вермәк игтидарында дејилик? б) Нәјә ҝөрә бу пис системдә Аллаһын бизә бәләдчилик етмәсинә еһтијаҹ дујдуғумузу нүмунә әсасында изаһ един.
7 Нәјә ҝөрә биз Аллаһын руһунун бизә бәләдчилик етмәсини истәмәлијик? Биринҹи сәбәби одур ки, биз өзүмүзә бәләдчилик етмәк баҹарығына малик дејилик. «Бәләдчилик етмәк» «истигамәтләндирмәк, јол ҝөстәрмәк» мәнасыны верир. Лакин Јеһова бизи үмумијјәтлә, хүсусилә дә гејри-камил вәзијјәтдә өзүмүзә истигамәт вермәк баҹарығы илә јаратмајыб. Пејғәмбәр Јеремја јазмышды: «Ја Рәбб, билирәм ки, инсанын өмрү өз әлиндә дејил. Аддымларыны дүзәлтмәк [«истигамәтләндирмәк», ЈД] ҝедән адамын иши дејил» (Јер. 10:23). Нәјә ҝөрә? Инсанын дахили аләминә бәләд олан Јеһова бунун сәбәбини Јеремјаја изаһ етмишди: «Инсан үрәји һәр шејдән һијләҝәрдир, чарәси јохдур. Ону ким баша дүшә биләр?» (Јер. 17:9; Мат. 15:19).
8 Тәҹрүбәсиз инсанын компас ҝөтүрмәдән вә јанында бәләдчи олмадан инсан ајағы дәјмәјән тәһлүкәли сәһра илә тәкбашына ҝетмәси нә дәрәҹәдә ағыллы һәрәкәт оларды? Әҝәр о, сәрт шәраитдә неҹә сағ галмағын вә ҝедәҹәји јерә сағ-саламат чатмағын јолуну билмирсә, мәҝәр һәјатыны тәһлүкәјә атмыш олмур? Ејнилә Аллаһын рәһбәрлији олмадан бу пис дүнјада өзүнә бәләдчилик едә биләҹәјини дүшүнән инсан һәјатыны тәһлүкәјә атыр. Бу дүнјадан кечән јолумузу сағ-саламат баша вурмағын јеҝанә үсулу Давуд кими Јеһоваја јалвармагдыр: «Гој Сәнин јолунда аддымлајым, бу јолда һеч вахт сәндәләмәјим» (Мәз. 17:5, ЈД; 23:3). Бу рәһбәрлији неҹә ала биләрик?
9. Аллаһын руһу бизим үчүн етибарлы бәләдчи неҹә ола биләр? 17-ҹи сәһифәдәки шәклә бахын.
9 Әҝәр биз тәвазөкар олсаг вә Јеһовадан асылы олдуғумузу гәбул етсәк, О, бизә Өз мүгәддәс руһундан верәҹәк ки, бизә дүз јолу ҝөстәрсин. Бу фәал гүввә бизә неҹә көмәк едәҹәк? Иса шаҝирдләринә изаһ етмишди: «Көмәкчи, јәни Атанын мәним адым наминә ҝөндәрәҹәји мүгәддәс руһ һәр шеји сизә өјрәдәҹәк вә сизә дедијим бүтүн сөзләри јадыныза салаҹаг» (Јәһ. 14:26). Мәсиһин дедији бүтүн сөзләр дә дахил олмагла, дуа едәрәк вә мүнтәзәм шәкилдә Мүгәддәс Китабы арашдырсаг, Аллаһын ирадәсини даһа дәгиг јеринә јетирмәјимиз үчүн мүгәддәс руһ Онун дәрин һикмәтини бизә даһа ајдын баша дүшмәјә көмәк едәҹәк (1 Кор. 2:10). Үстәлик, һәјата апаран јолда ҝөзләнилмәдән «дөнҝәләрә» раст ҝәлсәк, мүгәддәс руһ бизә јол ҝөстәрәҹәк. Бу руһ бизә вахтилә арашдырдығымыз Мүгәддәс Китаб принсипләрини хатырладаҹаг вә нөвбәти аддымы атаркән онлары неҹә тәтбиг етмәји баша дүшмәјимизә көмәк едәҹәк.
Мүгәддәс руһ Исаја бәләдчилик едирди
10, 11. Иса мүгәддәс руһдан нә ҝөзләјирди вә бу руһ она неҹә көмәк етди?
10 Мүгәддәс руһун бизә бәләдчилик етмәсини истәмәли олдуғумузун икинҹи сәбәби одур ки, Аллаһ Өз Оғлуна бу руһ васитәсилә рәһбәрлик верирди. Аллаһын јеҝанә Оғлу јер үзүнә ҝәлмәздән өнҹә онун һаггында дејилән бу пејғәмбәрлији билирди: «Рәббин Руһу, һикмәт вә анлајыш руһу, өјүд-нәсиһәт вә гүдрәт руһу, билик вә Рәбб горхусу руһу онун үзәриндә олаҹаг» (Јешаја 11:2). Исанын јер үзүндә дүшдүјү мүһити нәзәрә алсаг, тәсәввүр едирсиниз, о, Аллаһын руһунун она көмәк етмәсини нә дәрәҹәдә истәјирди?
11 Јеһованын сөзләри јеринә јетди. Мүждәләрдә Иса вәфтиз оландан дәрһал сонра нә баш вердији һагда јазылыб: «Иса мүгәддәс руһла долараг Иордан чајыны тәрк етди вә Аллаһын руһу ону чөллүјә апарды» (Лука 4:1). Бурада олдуғу мүддәтдә Иса оруҹ тутур, дуа едир вә дәриндән дүшүнүрдү. Ҝөрүнүр, бу заман Јеһова она ҝөстәришләр верир, еләҹә дә ҝәләҹәкдә үзләшәҹәји һадисәләр барәдә мәлуматландырырды. Аллаһын фәал гүввәси Исанын зеһни вә үрәји васитәсилә онун дүшүнҹәсини истигамәтләндирирди вә гәрарларына тәсир едирди. Бунун сајәсиндә Иса һәр вәзијјәтдә неҹә давранмағы билирди вә Атасынын ирадәсини там дәгиглији илә јеринә јетирирди.
12. Нәјә ҝөрә Аллаһдан мүгәддәс руһу илә бизә бәләдчилик етмәсини истәмәк ваҹибдир?
12 Аллаһын руһунун һәјатында нә дәрәҹәдә әһәмијјәтли рол ојнадығыны дәрк едән Иса шаҝирдләринә Аллаһдан бу руһу диләмәјин вә рәһбәрлијинә табе олмағын ваҹиблијини ашылајырды. (Лука 11:9—13 ајәләрини оху.) Нәјә ҝөрә бизим бу руһа бөјүк еһтијаҹымыз вар? Чүнки бу руһ дүшүнҹә тәрзимизи дәјишәрәк бизә Мәсиһин дүшүнҹә тәрзинә јијәләнмәјә көмәк едә биләр (Ром. 12:2; 1 Кор. 2:16). Әҝәр биз Аллаһын руһунун бизә бәләдчилик етмәсинә јол версәк, Иса кими дүшүнәҹәк вә онун нүмунәсини тәглид едәҹәјик (1 Пет. 2:21).
Дүнјанын руһу бизи аздырмаға чалышыр
13. Дүнјанын руһу нәдир вә бу руһ инсанлары нәјә тәһрик едир?
13 Үчүнҹү сәбәб одур ки, әҝәр бизә Аллаһын руһу рәһбәрлик етмәсә, бу ҝүн әксәр инсанлара тәсир ҝөстәрән дүнјанын мурдар руһу бизи дә аздыраҹаг. Бу дүнјаны идарә едән ҝүҹлү гүввә Аллаһын руһунун бизә ҝөстәрдији јола тамамилә зидд олан јолу тутмаға тәһрик едир. Бу гүввә инсанлары Мәсиһ кими јох, дүнјаны идарә едән Шејтан кими дүшүнмәјә вә һәрәкәт етмәјә тәшвиг едир. (Ефеслиләрә 2:1—3; Титус 3:3 ајәләрини оху.) Инсан дүнјанын руһуна ујанда вә ҹисмани арзуларынын далынҹа дүшмәјә башлајанда бунун нәтиҹәси чох пис олур вә белә адам Аллаһын Падшаһлығыны мирас алмајаҹаг (Галат. 5:19—21).
14, 15. Дүнјанын руһуна уғурла мүгавимәт ҝөстәрмәјә бизә нә көмәк едәҹәк?
14 Дүнјанын руһуна мүгавимәт ҝөстәрә билмәјимиз үчүн Јеһова бизә лазым олан һәр шеји вериб. Һәвари Павел мәсләһәт ҝөрүрдү ки, «дар ҝүндә мүгавимәт ҝөстәрмәк» үчүн «Рәббә ҝүвәниб Онун ҝүҹүнүн әзәмәти илә» даима мөһкәмләнәк (Ефес. 6:10, 13). Јеһова руһу илә бизә ҝүҹ верир ки, бизи аздырмаға чалышан Шејтана гаршы дура биләк (Вәһј 12:9). Дүнјанын руһу чох ҝүҹлүдүр вә онун тәсириндән тамамилә гачынмаг гејри-мүмкүндүр. Лакин биз јол вермәмәлијик ки, бу руһ бизи позсун. Мүгәддәс руһ дүнјанын руһундан гат-гат ҝүҹлүдүр вә о, бизә көмәк едәҹәк!
15 Биринҹи әсрдә һәгигәти тәрк едәнләр барәдә һәвари Петер демишди: «Бу адамлар дүз јолу гојуб әјри јола гәдәм басдылар» (2 Пет. 2:15). Биз неҹә дә миннәтдарыг ки, «дүнјанын руһуну јох, Аллаһдан ҝәлән руһу алдыг» (1 Кор. 2:12). Аллаһын руһунун көмәјилә, еләҹә дә бизим дүзҝүн руһани јолда галмағымыз үчүн Јеһованын вердији һәр шејдән там јарарланмагла биз Шејтанын пис дүнјасына һаким кәсилән руһа уғурла мүгавимәт ҝөстәрә биләрик (Галат. 5:16).
Мүгәддәс руһ дахилимиздә ҝөзәл бәһрә јетишдирир
16. Мүгәддәс руһ биздә һансы бәһрәни һасил едир?
16 Дөрдүнҹү сәбәб исә ондан ибарәтдир ки, бу руһ онун рәһбәрлијинә табе олан инсанларда ҝөзәл бәһрә јетишдирир. (Галатијалылара 5:22, 23 ајәләрини оху.) Мәҝәр арамызда даһа чох мәһәббәт, севинҹ, сүлһ хүсусијјәтләринә јијәләнмәк истәјән јохдур? Бизләрдән ким истәмир ки, сәбир, јахшылыг вә хејирхаһлыг хүсусијјәтләрини даһа чох тәзаһүр етдирсин? Һансымыза иман, һәлимлик, тәмкинлик хүсусијјәтләрини даһа чох инкишаф етдирмәк зәрәр ҝәтирәҹәк? Аллаһын руһу биздә һәм өзүмүзә, һәм дә ки бирҝә јашадығымыз вә хидмәт етдијимиз инсанлара фајда ҝәтирән хүсусијјәтләр һасил едир. Руһун бәһрәси һәјатымызда ајдын ҝөрүнсүн дејә биз даима үзәримиздә ишләмәлијик. Бизә руһун бәһрәсиндән нә гәдәр лазымдыр? Ону нә дәрәҹәдә өзүмүздә инкишаф етдирә биләрик? Мүгәддәс Китаб буна мәһдудијјәт гојмур.
17. Мүгәддәс руһун бәһрәсинә дахил олан хүсусијјәтләри даһа чох неҹә инкишаф етдирә биләрик?
17 Јахшы оларды ки, өзүмүздән сорушаг: «Данышыг вә әмәлләримиз бизә Аллаһын руһунун истигамәт вердијини вә дахилимиздә онун бәһрәсини јетишдирдијимизи ҝөстәрирми?» (2 Кор. 13:5а; Галат. 5:25). Әҝәр руһун бәһрәсинә дахил олан мүәјјән хүсусијјәтләри инкишаф етдирмәјә еһтијаҹ олдуғуну ҝөрүрүксә, онда мүгәддәс руһун көмәјилә онларын үзәриндә сәјлә ишләмәлијик. Бунун үчүн биз Мүгәддәс Китабда вә нәшрләримиздә һәмин хүсусијјәтләр барәдә јазыланлары арашдырмалыјыг. Онда биз һәмин хүсусијјәтләри һәјатымызда неҹә тәзаһүр етдирмәли олдуғумузу баша дүшә, сонра исә өјрәндикләримизи даһа јахшы тәтбиг едә биләҹәјикb. Өзүмүзүн, еләҹә дә һәмиманлыларымызын һәјатында мүгәддәс руһун рәһбәрлијинин бәһрәсини ајдын ҝөрәндә нәјә ҝөрә бу руһун бизә бәләдчилик етмәли олдуғуну баша дүшүрүк.
Руһун сәнә бәләдчилик етмәсинә јол верирсәнми?
18. Аллаһын руһунун рәһбәрлијини гәбул етмәкдә Иса бизә һансы ҝөзәл нүмунәни гојуб?
18 Јеһова каинаты јараданда Онун јанында «маһир уста» олан Иса инсанлара истигамәти мүәјјән етмәкдә көмәк едән Јерин магнит саһәси барәдә һәр шеји билир (Сүл. мәс. 8:30, ЈД; Јәһ. 1:3). Лакин Мүгәддәс Китабын һеч бир јериндә дејилмир ки, о, јер үзүндә јашајаркән аддымларына истигамәт вермәк үчүн бу гүввәдән истифадә едирди. Әксинә, орада дејилир ки, онун һәјатына ән бөјүк тәсир ҝөстәрән Аллаһын мүгәддәс руһу иди. Иса руһун рәһбәрлијини гәбул едирди вә бу руһ ону һансыса аддымы атмаға тәшвиг едәндә онун рәһбәрлијинә ујғун давранырды (Марк 1:12, 13; Лука 4:14). Буну сизин барәниздә дә демәк олармы?
19. Мүгәддәс руһун һәјатда бизә бәләдчилик етмәси үчүн нә етмәлијик?
19 Аллаһын фәал гүввәси бу ҝүн дә онун рәһбәрлијини гәбул едән инсанларын үрәкләринә вә зеһинләринә тәсир едир. Бу руһун сизи дә дүзҝүн истигамәтдә апармасына неҹә јол верә биләрсиниз? Даима Аллаһа дуа един ки, сизә мүгәддәс руһ версин вә онун рәһбәрлијинә табе олмаға көмәк етсин. (Ефеслиләрә 3:14—16 ајәләрини оху.) Бу руһун бәһрәси олан Мүгәддәс Китабда мәсләһәтләр ахтармагла дуаларыныза ујғун давранын (2 Тим. 3:16, 17). Онун мүдрик ҝөстәришләринә табе олун вә мүгәддәс руһун рәһбәрлијини гәбул един. Буну етмәклә сиз ҝөстәрәҹәксиниз ки, Јеһованын бу пис дүнјада сизә ән јахшы јолу ҝөстәрмәк габилијјәтинә етибар едирсиниз.
[Һашијәләр]
a Мисал үчүн, мәшһур јунан профессору Ҹоан Мира Мүждәләри тәрҹүмә едәркән нәјә ҝөрә бу ифадәни кичик һәрфләрлә јазмаг гәрарына ҝәлдијини изаһ етмишди. Китабын ҝиришиндә о јазмышды: «Икинҹи вә үчүнҹү әсрдә јашајан охуҹулар һеч ағылларына белә ҝәтирмирдиләр ки, бу руһ... Атадан вә Оғулдан асылы олмајан вә сәрбәст шәкилдә мөвҹуд олан руһани шәхсијјәт ола биләр, чүнки о вахт Үч үгнум еһкамы һәлә мөвҹуд дејилди».
b Мүгәддәс руһун бәһрәсинә дахил олан хүсусијјәтләр «Ҝөзәтчи Гүлләси»нин ашағыдакы сајларында мүзакирә олунур: 2007-ҹи ил 1 август, 11—14 сәһифәләр; 2004-ҹү ил 1 феврал, сәһифә 9; 2003-ҹү ил 1 мај, сәһифә 7; 2003-ҹү ил 1 ијун, сәһифә 19 вә 22—24; 2003-ҹү ил 1 сентјабр, сәһифә 6; 2002-ҹи ил 1 март, сәһифә 14 вә 15; 2002-ҹи ил 1 апрел, сәһифә 25; 2001-ҹи ил 1 јанвар, сәһифә 26.
Әсас фикирләри изаһ едә биләрсинизми?
• Мүгәддәс руһ һәјатымыза неҹә тәсир ҝөстәрә биләр?
• Мүгәддәс руһун бизә бәләдчилик етмәсини истәмәли олдуғумузун дөрд сәбәбини садалајын.
• Мүгәддәс руһун рәһбәрлијиндән там фајдаланмағымыз үчүн биздән нә тәләб олунур?
[15–ҹи сәһифәдәки шәкил]
Мүгәддәс руһ Исанын һәјатына тәсир едән ән бөјүк гүввә иди
[17–ҹи сәһифәдәки шәкил]
Аллаһын руһу онларын зеһинләринә вә үрәкләринә тәсир ҝөстәрмәклә онлара рәһбәрлик едир