Һәјатыныздакы дәјишикликләрә бахмајараг, Аллаһын лүтфүндә галын
ОЛА БИЛСИН, һәјатынызда нә исә дәјишир. Бунунла барышмаг сизә чәтиндирми? Әксәријјәтимиз белә вәзијјәтләрлә үзләшмишик, јахуд да ҝәләҹәкдә үзләшәҹәјик. Кечмишдә баш верән бәзи һадисәләри нәзәрдән кечирсәк, бу кими вәзијјәтләрдә һансы хүсусијјәтләрин көмәји дәјдијини баша дүшә биләрик.
Мәсәлән, ҝөтүрәк Давуду. Онун һәјатында бир чох дәјишикликләр баш вермишди. Шамуел ону ҝәләҹәк падшаһ кими мәсһ едәндә о, ади чобан иди. Һәлә ҝәнҹ икән Давуд көнүллү олараг филиштли Голјатла дөјүшә ҝирди (1 Сам. 17:26—32, 42). Ҝәнҹ Давуду Шаул падшаһын сарајында јашамаға дәвәт етдиләр вә орду башчысы тәјин етдиләр. Давуд нә һәјатында баш верән бу дәјишикликләри, нә дә ҝәләҹәкдә ону нәләрин ҝөзләдијини ағлына белә ҝәтирә билмәзди.
Бир гәдәр вахт кечәндән сонра Давудла Шаулун мүнасибәтләри һәддән артыг писләшди (1 Шам. 18:8, 9; 19:9, 10). Һәјатыны горумаг үчүн Давуд бир нечә ил өз јурд-јувасындан гачаг дүшдү. Һәтта Исраил үзәриндә падшаһлыг едәндә дә онун һәјатында бөјүк дәјишикликләр баш верирди. Хүсусән дә зина етдикдән вә ҝүнаһыны өрт-басдыр етмәк үчүн адам өлдүрдүкдән сонра бу дәјишикликләр гачылмаз олду. Етдији ҝүнаһларын нәтиҹәсиндә Давудун аиләсинә фәлакәтләр үз верирди. Мәсәлән, оғлу Авшалом она гаршы үсјан галдырды (2 Шам. 12:10—12; 15:1—14). Бунунла белә, Давуд зина етдијинә вә адам өлдүрдүјүнә ҝөрә пешман олдугда Јеһова ону бағышлады вә о, јенидән Аллаһын лүтфүнү тапды.
Сизин дә вәзијјәтиниз дәјишә биләр. Сағламлыгла бағлы проблемләр, игтисади чәтинликләр вә ја аилә проблемләри, һәтта өз һәрәкәтләримиз белә һәјатымызда дәјишикликләрин баш вермәсинә сәбәб олур. Бу ҹүр дәјишикликләрин өһдәсиндән ҝәлмәјә һансы кејфијјәтләр көмәк едә биләр?
Тәвазөкарлығын ролу
Тәвазөкарлыг өзүнә итаәткарлығы дахил едир. Әсил тәвазөкарлыг бизә өзүмүзү вә башгаларыны олдуғу кими ҝөрмәјә көмәк едир. Башгаларынын хүсусијјәтләрини вә мүвәффәгијјәтләрини етираф етсәк, онлары вә ҝөрдүкләри ишләри лајигинҹә гијмәтләндирә биләҹәјик. Буна бәнзәр тәрздә, тәвазөкарлыг һансыса бир шејин нә үчүн баш вердијини вә онун өһдәсиндән неҹә ҝәлмәји баша дүшмәјимизә көмәк едир.
Бу саһәдә Шаулун оғлу Јонатан ҝөзәл нүмунәдир. Онун вәзијјәти ҝедишатына тәсир едә билмәдији һадисәләр уҹбатындан дәјишмишди. Шамуел Шаула дејәндә ки, Јеһова падшаһлығы онун әлиндән алаҹаг, Јонатанын падшаһ олаҹағыны сөјләмәди (1 Шам. 15:28; 16:1, 12, 13). Давудун падшаһ сечилмәси илә падшаһ олмаг имканы Јонатанын әлиндән чыхды. Шаулун итаәтсизлији мүәјјән мәнада Јонатанын һәјатына мәнфи тәсир ҝөстәрди. Атасынын етдикләринә ҝөрә мәсулијјәт дашымаса да, о, падшаһлығы мирас алмады (1 Шам. 20:30, 31). Јонатан буна неҹә мүнасибәт ҝөстәрди? Бу имканын әлиндән чыхдығына ҝөрә Давуда пахыллыг едиб, кин сахладымы? Хејр. Јашҹа хејли бөјүк вә даһа тәҹрүбәли олмасына бахмајараг, Јонатан сәдагәтлә Давуда дајаг олду (1 Шам. 23:16—18). Тәвазөкар олдуғу үчүн о, Аллаһын кимә хејир-дуа вердијини баша дүшүр вә ‘өзүнә лүзумундан чох әһәмијјәт вермирди’ (Ром. 12:3). Јонатан Јеһованын ондан нә истәдијини дәрк едир вә Онун бу мәсәләјә даир гәрарыны гәбул едирди.
Дүздүр, һәрдән дәјишикликләр уҹбатындан мүхтәлиф чәтинликләр јараныр. Мәсәлән, бир мүддәт әрзиндә Јонатан она јахын олан ики адамын арасында галмышды. Онлардан бири Јеһованын тәјин етдији ҝәләҹәк падшаһ, досту Давуд иди. Диҝәри исә Јеһова тәрәфиндән рәдд олунан, амма һәлә ки тахтда отуран атасы Шаул иди. Бу вәзијјәтдә Јеһованын лүтфүнү горумаға чалышан Јонатан, јәгин ки, мәнәви сарсынты кечирирди. Гаршылашдығымыз дәјишикликләр биздә нараһатчылыг вә горху јарада биләр. Лакин биз Јеһованын нөгтеји-нәзәрини анламаға чалышсаг, дәјишикликләрә таб ҝәтирәрәк Она сәдагәтлә хидмәт едә биләҹәјик.
Тәвазөкарлығын ваҹиблији
Тәвазөкарлыг һәмчинин инсанын өз имканларынын мәһдуд олдуғуну баша дүшмәси демәкдир. Давуд тәвазөкар иди. Јеһова ону падшаһ кими сечсә дә, о, бир нечә ил әрзиндә тахта чыха билмәди. Илк бахышдан елә тәәссүрат ојанырды ки, Јеһова вәдини јеринә јетирмәјә ҝеҹикир. Лакин Мүгәддәс Китабын һеч бир јериндә Јеһованын бунунла бағлы Давуда изаһат вердији јазылмајыб. Гырагдан үмидләри боша чыхмыш кими ҝөрүнсә дә, бу вәзијјәт Давуду һеч нараһат етмирди. О, имканларынын мәһдуд олдуғуну дәрк едир вә анлајырды ки, һәр шеј бу вәзијјәтин давам етмәсинә јол верән Јеһованын нәзарәти алтындадыр. Буна ҝөрә дә, һәтта һәјатыны гуртармаг хатиринә белә, Давуд нә өзү Шаулу өлдүрдү, нә дә јолдашы Авишаја буну етмәјә изин верди (1 Шам. 26:6—9).
Ола биләр, һәрдән јығынҹағымызда јаранан вәзијјәти баша дүшмүрүк вә ја бизим фикримизҹә, һансыса мәсәлә јахшы, јахуд тәшкил олунмуш сурәтдә һәлл олунмур. Белә олан һалда, Иса Мәсиһин јығынҹағын башы олдуғуну вә онун башчылыг етмәјә тәјин олунмуш ағсаггаллар васитәсилә рәһбәрлик етдијини тәвазөкарлыгла гәбул едәҹәјикми? Јеһованын лүтфүндә галмаг үчүн Онун Иса Мәсиһ васитәсилә мәсәләнин һәллинә рәһбәрлик едәҹәјинә инанмағын лазым ҝәлдијини баша дүшәрәк тәвазөкарлыг ҝөстәрәҹәјикми? Һәтта чәтин олса белә, тәвазөкарлыгла сәбир едиб ҝөзләјәҹәјикми? (Сүл. мәс. 11:2).
Һәлимлик мүсбәт әһвал-руһијјәни горумаға көмәк едир
Һәлимлик јумшаг хасијјәт демәкдир. Онун сајәсиндә биз һагсызлыға сәбирлә, әсәбиләшмәдән, инҹимәдән вә кин сахламадан таб ҝәтиририк. Һәлим олмаг асан дејил. Мүгәддәс Китабда ишләдилән һәлимлик сөзү тәвазөкарлыгла әлагәлидир, лакин о, өзүнә јахшылыг, хејирхаһлыг кими башга кејфијјәтләри дә дахил едир. Мараглыдыр ки, Мүгәддәс Китабын бир ајәсиндә Аллаһ ‘һәлим үрәклиләри’ ‘тәвазөкарлыға мејл салмаға’ дәвәт едир (Сеф. 2:3, Мүгәддәс Китаб—2004). Һәлим инсан тәлим вә нәсиһәти гәбул едир, буна ҝөрә дә руһани ҹәһәтдән инкишаф едир.
Һәлимлик һәјатымыздакы дәјишиклијә ујғунлашмаға неҹә көмәк едә биләр? Јәгин фикир вермисиниз ки, чохлары дәјишикликләрә мәнфи мүнасибәт бәсләјирләр. Әслиндә исә бунлар Јеһовадан тәлим алмағымыз үчүн фүрсәт ола биләр. Мусанын һәјаты буна әјани нүмунәдир.
Муса 40 јашында оланда артыг ҝөзәл кејфијјәтләрә малик иди. О, Аллаһын халгынын еһтијаҹларыны дујур вә фәдакарлыг руһу тәзаһүр етдирирди (Ибр. 11:24—26). Бунунла белә, Јеһова она Исраили Мисирдән чыхармағы тапшырмаздан әввәл Муса дәјишикликләрлә үзләшмәли олду. Бу дәјишикликләрин сајәсиндә о, даһа да һәлим олду. Ҹаныны гуртармаг үчүн Муса Мисирдән гачыб 40 ил Мидјан дијарында јашады вә чобанлыг етди. Бурада әввәлки ҹаһ-ҹалалдан әсәр-әламәт белә јох иди. Бунун нәтиҹәси нә олду? Бүтүн бу дәјишикликләр онун даһа јахшы инсан кими формалашмасына көмәк етди (Сај. 12:3). О, руһани мараглары шәхси мәнафејиндән үстүн тутмағы өјрәнди.
Мусанын һәлимлијинә нүмунә олараг, ҝәлин ҝөрәк Јеһова дикбаш халгы рәдд едиб Мусанын өвладларындан гүдрәтли бир халг јаратмағы сөјләјәндә о нә етди (Сај. 14:11—20). Муса халг үчүн јалварыб-јахармаға башлады. Сөзләриндән ҝөрүнүр ки, онун үчүн ән ваҹиби Аллаһын ады вә өзүнүн дејил, гардашларынын рифаһы иди. Васитәчи вә халгын рәһбәри вәзифәсинә һәлим инсан ҝәрәк иди. Бир дәфә Мәрјәмлә Һарун Мусаја гаршы дејинмишди. Лакин Мүгәддәс Китабда дејилир ки, «Муса јер үзүндә јашајан бүтүн адамлардан даһа һәлим бир инсан иди» (Сај. 12:1—3, МК—04, 9—15). Ҝөрүнүр, Муса һәлимликлә онларын тәһгирләринә дөзмүшдү. Тәсәввүр едирсиниз, Муса һәлим олмасајды, нә баш верәрди?
Башга бир һалда Јеһованын руһу бәзи адамларын үзәринә енмиш вә онлар пејғәмбәрлик етмәјә башламышдылар. Мусанын хидмәтчиси Јешуанын фикринҹә, онлар дүзҝүн давранмырдылар. Муса исә һәлимлик ҝөстәрәрәк баш верәнләрә Јеһованын ҝөзү илә бахыр вә сәлаһијјәтини итирәҹәјиндән горхмурду (Сај. 11:26—29). Һәлим олмасајды, Муса Јеһованын етдији бу дәјишиклији гәбул едәрдими?
Һәлимлијин сајәсиндә Муса бөјүк сәлаһијјәтиндән вә Аллаһын она һәвалә етдији мөвгедән дүзҝүн истифадә едирди. Јеһова она Хорев дағына галхмағы тапшырды. Муса Аллаһын нүмајәндәси кими даға галхдыгда Аллаһ мәләк васитәсилә онунла данышды вә ону әһдин васитәчиси тәјин етди. Мусанын һәлимлији она бу бөјүк сәлаһијјәти гәбул едиб, ејни заманда Аллаһын лүтфүнү горумаға көмәк етди.
Бәс бизим һаггымызда нә демәк олар? Һәлимлик формалашмағымыз үчүн сон дәрәҹә ваҹиб хүсусијјәтдир. Аллаһын халгы арасында сәлаһијјәт вә мәсулијјәти олан һәр кәс һәлим олмалыдыр. Һәлимлијин сајәсиндә биз дәјишикликләрлә үзләшләндә тәкәббүрлү олмајаҹаг вә бу ҹүр вәзијјәтләрә дүзҝүн јанашаҹағыг. Дәјишиклијә неҹә мүнасибәт ҝөстәрмәјимиз олдугҹа ваҹибдир. Вәзијјәтлә барышаҹағыгмы? Она даһа да јахшы олмаг үчүн бир фүрсәт кими бахаҹағыгмы? Бәлкә дә бу, һәлим олмағы өјрәнмәк үчүн јеҝанә фүрсәт олаҹаг!
Һәјатымызда дәјишикликләр һәмишә олаҹаг. Һәрдән баш верәнләрин сәбәбини анламырыг. Имканларымызын мәһдуд олмасы вә мәнәви ҝәрҝинлик баш верәнләрә Јеһованын ҝөзү илә бахмаға мане ола биләр. Бунунла белә, тәвазөкарлыг вә һәлимлик кими хүсусијјәтләр дәјишикликләрлә барышмаға вә Јеһованын лүтфүнү горумаға бизә көмәк едәҹәк.
[4-ҹү сәһифәдәки јазы]
Әсил тәвазөкарлыг бизә өзүмүзү олдуғумуз кими ҝөрмәјә көмәк едир
[5-ҹи сәһифәдәки јазы]
Һәлимлик формалашмағымыз үчүн сон дәрәҹә ваҹиб хүсусијјәтдир
[5-ҹи сәһифәдәки шәкил]
Муса үзләшдији дәјишикликләрин сајәсиндә даһа да һәлим олду