Чәтинликләрлә мүбаризә Јеһоваја етибарымызы мөһкәмләндирди

Нәгл етди Ада Делло Стритто

Ҝүндәлик ајәни индиҹә дәфтәримә көчүрүб гуртардым. 36 јашым олса да, бу бир нечә сәтри јазмаг ики саата баша ҝәлди. Бәс нијә белә чох? Бунун сәбәбини анам изаһ едәҹәк (Ҹоел).

ҺӘЈАТ јолдашымла мән 1968-ҹи илдә Јеһованын Шаһидләри кими вәфтиз олунмушуг. Ики сағлам өвладымыз Давид вә Марк олдугдан сонра үчүнҹү оғлумуз Ҹоел дүнјаја ҝәлди. О, 1973-ҹү илдә Белчиканын пајтахты Брүсселдән 60 километр ҹәнубда јерләшән Бенш шәһәринин хәстәханасында вахтындан әввәл доғулду. Онун чәкиси ҹәми 1 килограм 700 грам иди. Мән хәстәханадан чыханда чәкисинин артмасы үчүн һәкимләр Ҹоели орада сахладылар.

Бир нечә һәфтәдән сонра јахшылыға доғру һеч бир дәјишиклик олмадығындан јолдашым Луиҹи илә ону ушаг һәкиминә ҝөстәрмәк гәрарына ҝәлдик. Һәким Ҹоели мүајинә едиб деди: «Тәәссүф едирәм. Дејәсән, гардашларында олмајан проблемләрин һамысы Ҹоелдә вар». Сонра арамыза дәрин сүкут чөкдү. Һәмин ан анладым ки, көрпәмизин сәһһәтиндә ҹидди проблем вар. Сонра һәким јолдашымы гыраға чәкиб деди: «Сизин ушағынызда трисомија 21 хәстәлији ашкар олунуб». Бу хәстәлик Даун хәстәлији кими дә танынырa.

Һәкимин гојдуғу диагноздан чох кәдәрләндик вә башга мүтәхәссислә мәсләһәтләшмәк гәрарына ҝәлдик. О, бир саата јахын һеч бир сөз демәдән балаҹа Ҹоели мүајинә етди. Бу бир саат гуртармаг билмирди. Нәһајәт, һәким башыны галдырыб деди: «Ушағыныз тамамилә сиздән асылы олаҹаг». Сонра мүлајим сәслә әлавә етди: «Амма Ҹоел хошбәхт олаҹаг, чүнки валидејнләри ону севир!» Һиссләр мәни чулғады. Мән ону еһтијатла гуҹағыма ҝөтүрдүм вә биз ону евә ҝәтирдик. Онда о, икиајлыг иди.

Мәсиһчи ҝөрүшләри вә хидмәт бизи мөһкәмләндирирди

Сонракы мүајинәләр заманы Ҹоелдә ҹидди үрәк гүсуру вә ағыр формалы рахит ашкар олунду. Онун үрәји чох ҝениш олдуғундан ағҹијәрләрини сыхырды вә бу, ону јолухуҹу хәстәликләрә һәссас едирди. О, дөрдајлыг оланда бронхопневмонијаја јолухду, буна ҝөрә дә ону јенидән хәстәханаја гојмалы олдуг. Орада ону карантинә алдылар. Ҹоелин әзабларыны ҝөрмәк чох ағыр иди. Биз ону гуҹағымыза алыб әзизләмәк истәјирдик, анҹаг он һәфтә әрзиндә она бармағымызла белә тохунмаға иҹазә верилмирди. Луиҹи илә мәнә јалныз дуруб бахмаг вә бир-биримизи гуҹаглајыб дуа етмәк галырды.

Бу дәһшәтли сынаға бахмајараг, о вахт 6 вә 3 јашларында олан Давид вә Маркла бирҝә јығынҹаг ҝөрүшләриндә иштирак етмәјә давам едирдик. Бизим үчүн Падшаһлыг Залында олмаг Јеһованын гајғыкеш әлләриндә олмаг кими иди. Бүтүн бу вахт әрзиндә, мәсиһчи баҹы-гардашларымызын әһатәсиндә оланда Јеһованын бизим гајғы јүкүмүзү дашыдығыны һисс едирдик, бу исә бизә мүәјјән гәлб раһатлығы верирди (Мәз. 55:22). Һәтта Ҹоелә бахан тибб баҹылары диггәт јетирмишдиләр ки, мәсиһчи ҝөрүшләриндә иштирак етмәјимиз бизә таразлығы горумаға көмәк едир.

О вахтлар мән һәм дә Јеһоваја јалварырдым ки, тәблиғә ҝетмәк үчүн мәнә ҝүҹ версин. Евдә отуруб ағламаг әвәзинә, мән башгалары илә данышмаг вә хәстәликләрин олмајаҹағы јени дүнјаја даир Аллаһын вәдләринә инанмағымын нәјә ҝөрә мәнә ҝүҹ вердији һагда бөлүшмәк истәјирдим. Һәр дәфә хидмәтдә оланда Јеһованын дуаларыма ҹаваб вердијини ҝөрүрдүм.

«Бу бир мөҹүзәдир!»

Нәһајәт ки, Ҹоели хәстәханадан евә ҝәтирдик. Бу неҹә дә хошбәхт ҝүн иди! Амма сәһәриси ҝүн севинҹимиз кәдәрә чеврилди. Ҹоелин вәзијјәти бир анын ичиндә писләшди вә ону тәҹили јенидән хәстәханаја гајтармалы олдуг. Ону мүајинә етдикдән сонра һәкимләр бизә дедиләр: «Ҹоелин өмрүнә, узағы, алты ај галыб». Ики ај сонра, Ҹоел тәхминән сәккизајлыг оланда онун вәзијјәти писләшдијиндән бизә елә ҝәлирди ки, һәкимләрин дедији дүз чыхыр. Һәким јанымызда отуруб деди: «Чох тәәссүф едирик, амма әлимиздән даһа һеч нә ҝәлмир». Сонра о әлавә етди: «Бу һалда она јалныз Јеһова көмәк едә биләр».

Мән Ҹоелин јанына, палатаја гајытдым. Физики вә емосионал ҹәһәтдән тамамилә әлдән дүшсәм дә, гәрара алдым ки, онун јатағындан бир ан белә ајрылмајым. Луиҹи диҝәр ики оғлумузун гајғысына галан вахтлар бир нечә мәсиһчи баҹы нөвбә илә мәним јанымда галырды. Бир һәфтәдән сонра гәфилдән Ҹоелин үрәктутмасы олду. Тибб баҹылары дәрһал өзләрини Ҹоелин палатасына чатдырдылар, амма она көмәк едә билмәдиләр. Бир нечә дәгигәдән сонра онлардан бири јавашҹа деди: «Чох тәәссүф...» Мән һөнкүр-һөнкүр ағлајараг палатадан чыхдым. Јеһоваја дуа етмәјә чалышдым, амма ағрымы ифадә етмәјә сөз тапмадым. 15 дәгигәдән сонра тибб баҹысы: «О, өзүнә ҝәлир»,— дејәрәк мәни чағырды. О, әлимдән тутуб деди: «Ҝедәк, инди сиз ону ҝөрә биләрсиниз». Ҹоелин јанына гајыданда онун үрәји јенидән дөјүнүрдү. Онун өзүнә ҝәлмәси һагда хәбәр тез јајылды. Ону ҝөрмәјә ҝәлән һәкимләр вә тибб баҹылары: «Бу бир мөҹүзәдир!» — дејирдиләр.

Һејрәтамиз ирәлиләјиш

Ҹоел көрпә оланда ушаг һәкимләри тез-тез дејәрдиләр ки, онун мәһәббәтә бөјүк еһтијаҹы вар. Ҹоел доғуланда Луиҹи илә мән Јеһованын мәһәббәт долу гајғысыны һисс етдијимиз үчүн биз дә оғлумузу бу ҹүр севҝи илә әһатә етмәк истәјирдик. Бунун үчүн чохлу имканларымыз варды, чүнки о, һәр шејдә бизә еһтијаҹ дујурду.

Ҹоелин једди јашы олана гәдәр биз һәр ил ејни проблемләрлә мүбаризә апармалы олурдуг. Октјабр—март ајларында о, дәгигәдә бир хәстәләнирди вә биз ону хәстәханаја апарыб-ҝәтирирдик. Мән һәм дә Давидлә Марка мүмкүн гәдәр чох вахт ајырмаға чалышырдым. Өз нөвбәсиндә, онлар да Ҹоелә көмәк етмәк үчүн әлләриндән ҝәләни едирдиләр вә бу, һејрәтамиз бәһрәләр ҝәтирди. Мәсәлән, бир нечә һәким Ҹоелин һеч вахт јеријә билмәјәҹәјини сөјләмишди. Ҝүнләрин бир ҝүнү исә, онун дөрд јашы оланда Марк ону өзүнә тәрәф чағырыб деди: «Ҝәл, балаҹа, ҝәл, гој ана ҝөрсүн ки, сән буну едә биләрсән!» Ҝөзләримә инанмадым — Ҹоел илк аддымыны атды! Севинҹимиздән јерә-ҝөјә сығмырдыг вә аиләликҹә Јеһоваја дуада үрәкдән миннәтдарлығымызы билдирдик. Вә Ҹоел бир балаҹа ирәлиләјиш едәндә һәмишә ону сәмими-гәлбдән тәрифләјирдик.

Көрпәликдән Рәбб јолунда тәрбијә етмәјин ҝәтирдији бәһрәләр

Мүмкүн олдуғу гәдәр биз Ҹоели јығынҹаг ҝөрүшләринә апармаға чалышырдыг. О, тез хәстәләнирди, буна ҝөрә дә ону микроблардан горумаг үчүн шәффаф пластик өртүјү олан хүсуси ушаг арабасында ҝәтирирдик. Анҹаг өртүк алтында олмасы она јығынҹагла бирҝә олмаға мане олмурду.

Мәсиһчи баҹы-гардашларын бизи мәһәббәтлә әһатә етмәси вә көмәкләрини әсирҝәмәмәси бизи мөһкәмләндирирди. Бир гардаш тез-тез бизә Јешаја 59:1 ајәсиндәки сөзләри хатырладырды: «Рәббин әли гыса дејил ки, хилас едә билмәсин, гулағы кар дејил ки, ешидә билмәсин». Бу тәсәлливериҹи сөзләр бизә Јеһоваја даһа чох бел бағламаға көмәк едирди.

Ҹоел бөјүдүкҹә әлимиздән ҝәләни едирдик ки, Јеһоваја хидмәт онун һәјатында әсас јери тутсун. Һәр фүрсәтдән истифадә едәрәк онунла Јеһова һаггында данышмаға чалышырдыг ки, сәмави Атасы илә онун арасында сых мәһәббәт телләри јарансын. Јеһовадан өвладымызы Онун тәрбијәси илә бөјүтмәк сәјимизи хејир-дуаландырмасыны диләјирдик.

Јенијетмә оланда Ҹоелин Мүгәддәс Китаб һәгигәтләрини бөјүк мәмнунијјәтлә башгалары илә бөлүшмәсини ҝөрмәк бизә чох хош иди. 14 јашында кечирдији ағыр ҹәрраһијјә әмәлијјатындан сонра өзүнә ҝәләндә мәндән сорушду: «Анаҹан, олар һәкимә “Јер үзүндәки Ҹәннәтдә әбәдијјән јашаја биләрсиниз” китабыны верим?» Буну ешидәндә чох севиндим. Бир нечә илдән сонра Ҹоел бир даһа әмәлијјат олунду. Биз анлајырдыг ки, о, әмәлијјатдан сағ чыхмаја биләр. Әмәлијјатдан әввәл Ҹоел һәкимләрә бирликдә јаздығымыз мәктубу верди. Орада онун гана даир мөвгеји изаһ олунурду. Ҹәрраһ Ҹоелдән сорушду: «Сән бурада јазыланларла разысан?» О, гәтијјәтлә ҹаваб верди: «Бәли, һәким». Биз фәхр едирдик ки, оғлумуз Јараданына бел бағлајыр вә Ону разы салмаға гәти гәрарлыдыр. Хәстәхана һејәтинин бизә бөјүк көмәји дәјди вә буна ҝөрә биз онлара чох миннәтдарыг.

Ҹоелин руһани инкишафы

Ҹоел 17 јашында Аллаһа һәср олунмасыны суда вәфтиз олунмагла символизә етди. Бу неҹә дә унудулмаз ҝүн иди! Онун руһани наилијјәтләрини ҝөрмәк бизә бөјүк севинҹ бәхш едирди. О вахтдан бәри онун Јеһоваја олан мәһәббәти вә хидмәтдә ҝөстәрдији сәји зәифләмәјиб. О, гаршылашдығы һәр адама: «Һәгигәт мәним һәјатымдыр!» — демәји хошлајыр.

Тәхминән 18—20 јашы оланда Ҹоел јазыб-охумағы өјрәнди. Бунун үчүн бөјүк сәј тәләб олунурду. Јаздығы һәр бир сөз онун үчүн әсил гәләбә иди. О вахтдан бәри о, һәр сәһәрини «Мүгәддәс Јазыларын ҝүндәлик арашдырылмасы» брошүрасындан ҝүндәлик ајәни арашдырмагла башлајыр. Сонра о, ајәни сәјлә өз дәфтәринә көчүрүр; инди бу дәфтәрләрин сајы-һесабы јохдур.

Јығынҹаг ҝүнләри Ҹоел Падшаһлыг Залына тез ҝетмәјимизи истәјир ки, зала ҝәлән һәр кәси саламласын. О, шәрһ вермәји вә сәһнәҹикләрдә иштирак етмәји хошлајыр. О һәмчинин микрофон дашыјыр вә башга тапшырыглары да јеринә јетирир. Сағламлығы јол верәндә һәр һәфтә бизимлә хидмәтә чыхыр. 2007-ҹи илдә јығынҹағымызда Ҹоелин хидмәти көмәкчи тәјин олундуғу елан едилди. Севинҹдән ҝөз јашларымызы сахлаја билмәдик. Бу неҹә дә ҝөзәл хејр-дуадыр!

Дар ҝүнүмүздә Јеһова һәмишә бизә дајаг олуб

1999-ҹу илдә аиләмиз даһа бир сынагла үзләшди. Бир еһтијатсыз сүрүҹү уҹбатындан машынымыз гәзаја уғрады вә Луиҹи ҹидди хәсарәт алды. Онун бир ајағыны ампутасија етмәк лазым ҝәлди вә онурғасы үзәриндә бир нечә ағыр әмәлијјат кечирилди. Амма јенә дә үмидимизи Јеһоваја бағладыг вә Онун дарда олан хидмәтчиләринә вердији гүввәни үзәримиздә һисс етдик (Филип. 4:13, И—93). Луиҹи шикәст галса да, биз вәзијјәтимизин мүсбәт тәрәфләрини ҝөрмәјә чалышырыг. Ишләјә билмәдији үчүн инди онун Ҹоелә бахмаға вахты даһа чохдур. Бунун сајәсиндә мән руһани ишләрә даһа чох вахт ајыра билирәм. Үстәлик, Луиҹи аиләмизин, еләҹә дә, ағсаггаллар шурасынын координатору кими, јығынҹағын руһани еһтијаҹларына даһа чох диггәт ајырыр.

Аиләмизин вәзијјәти гејри-ади олдуғундан бирҝә чох вахт кечиририк. Вахт кечдикҹә биз таразлы олмағы вә мүмкүн олмајан шејләри ҝөзләмәмәји өјрәндик. Руһдан дүшдүјүмүз анларда үрәјимизи дуада Јеһоваја бошалдырыг. Әфсуслар олсун ки, Давид вә Марк бөјүјүб евдән ҝедәндә тәдриҹән Јеһоваја хидмәт етмәји дајандырдылар. Биз үмид едирик ки, бир ҝүн онлар Јеһоваја дөнәҹәкләр (Лука 15:17—24).

Илләр әрзиндә биз Јеһованын көмәјини һисс етмиш вә һәр сынагда она бел бағламағы өјрәнмишик. Јешаја 41:13 ајәсиндә јазылан сөзләр бизим үчүн хүсусилә әзиздир: «Сәнин сағ әлиндән тутуб “Горхма, сәнә көмәк едәҹәјәм” дејән Аллаһын Рәбб Мәнәм». Јеһованын әлимиздән тутдуғуну билмәк бизә тәсәлли верир. Биз әминликлә дејә биләрик ки, гаршылашдығымыз сынаглар сәмави Атамыз Јеһоваја етибарымызы даһа да мөһкәмләндириб.

[Һашијә]

[16-ҹы сәһифәдәки шәкил]

Ҹоел вә анасы Ада

[18-ҹи сәһифәдәки шәкил]

Ада, Ҹоел вә Луиҹи

[19-ҹу сәһифәдәки шәкил]

Ҹоел Падшаһлыг Залында баҹы-гардашлары саламлајыр