Охуҹуларын суаллары
Јеһова бүтпәрәстлији гадаған етдији һалда, нәјә ҝөрә гызыл дана дүзәлтдији үчүн Һаруну ҹәзаландырмады?
«Чыхыш» китабынын 32-ҹи фәслиндә јазылдығы кими, Һарун гызыл дана дүзәлтмәклә Аллаһын бүтпәрәстлијә гадаға гојан ганунуну позду (Чых. 20:3—5). Бунун нәтиҹәсиндә, ‘Рәбб Һаруна һиддәтләнмишди. Ону да јох етмәк истәјирди. О ан [Муса] Һарун үчүн јалварды’ (Ганун. т. 9:19, 20). Салеһ инсан Мусанын Һарун үчүн дуа етмәсинин ‘тәсири’ олдуму? (Јаг. 5:16). Бәли, ҝөрүнүр, Јеһова Мусанын дуасына ҹаваб верди вә Һаруну бу вә ән азы башга ики сәбәбә ҝөрә ҹәзаландырмады.
Еһтимал ки, сәбәбләрдән бири Һарунун о вахта гәдәр Аллаһа сәдагәтлә хидмәт етмәси иди. Аллаһ Мусаја фиронун һүзуруна ҝетмәји вә исраиллиләри Мисирдән чыхармағы тапшыранда әмр етмишди ки, Һарун Мусаны мүшајиәт етсин вә онун адындан данышсын (Чых. 4:10—16). Онлар итаәткарлыг ҝөстәрәрәк дәфәләрлә Мисир падшаһынын һүзуруна ҝетдиләр вә онун инадкарлығы илә үзләшдиләр. Ҝөрдүјүмүз кими, Һарун һәлә Мисирдә икән Јеһованын гаршысында сәдагәтли вә мәтанәтли хидмәтчи адыны газанмышды (Чых. 4:21).
Ҝәлин ҝөрәк, Һаруну гызыл дана дүзәлтмәјә нә тәһрик етмишди? Муса 40 ҝүн иди ки, Сина дағында иди. «Халг Мусанын дағдан енмәкдә ҝеҹикдијини ҝөрәрәк» Һаруну дилә тутду ки, онлар үчүн бүт дүзәлтсин. Һарун онларла разылашыб гызыл дана дүзәлтди (Чых. 32:1—6). Лакин Һарунун сонракы һәрәкәтләри үрәјиндә бүтпәрәстлији дәстәкләмәдијини ҝөстәрди. Белә гәнаәтә ҝәлмәк олар ки, о, тәзјиг алтына дүшмүшдү. Муса бүтпәрәстлик мәсәләсини һәлл етмәк үчүн гәти тәдбирләр ҝөрәндә бүтүн Леви оғуллары, о ҹүмләдән Һарун гәтијјәтлә Јеһованын тәрәфини тутдулар. Бүтпәрәстлијә ҝөрә әсас мәсулијјәти дашыјан 3 000 инсан һәлак олду (Чых. 32:25—29).
Бундан сонра Муса халга деди: «Сиз бөјүк ҝүнаһа батдыныз» (Чых. 32:30). Беләликлә, бу ҝүнаһа ҝөрә башгаларынын да үзәринә мүәјјән дәрәҹәдә мәсулијјәт дүшүрдү. Јеһова һәм Һаруна, һәм дә халга бөјүк мәрһәмәт ҝөстәрди.
Бу һадисәдән сонра Јеһова әмр етди ки, Һарун баш каһин тәјин олунсун. О, Мусаја деди: «Һаруна мүгәддәс ҝејимләр ҝејиндир. Ону мәсһ едиб тәгдис ет ки, Мәнә каһинлик етсин» (Чых. 40:12, 13). Ҝөрүнүр, Јеһова Һарунун зәифлијини бағышлады. Үрәјиндә Һарун үсјанкар бүтпәрәст дејил, һәгиги ибадәтин садиг тәрәфдары иди.