Охуҹуларымыз сорушур...
Аллаһын башланғыҹы вар?
▪ Мүгәддәс Китаб бирмәналы олараг дејир ки, Аллаһын башланғыҹы јохдур. Аллаһ һәмишә мөвҹуд олуб. Бу һәгигәти анламаг нә гәдәр чәтин олса да, садәҹә буну там баша дүшмәдијимиз үчүн ону инкар етмәк дүзҝүн олмазды.
Мәҝәр биз Аллаһын бүтүн јолларыны баша дүшә биләрик? Аллаһын ҝөркәмли хидмәтчиләриндән бири олан һәвари Павел јазмышды: «Еј Аллаһын зәнҝинлик вә һикмәт вә елминин дәринлији! Онун һөкмләри нә дәрәҹәдә ағласығмаз вә Онун јоллары нә дәрәҹәдә кәшфедилмәздир!» (Ромалылара 11:33). Балаҹа ушаг валидејнләринин етдији һәр шеји ахырадәк анлаја биләрми? Хејр. Биз дә Аллаһын һикмәт вә билијинин дәринлијини там анламаға гадир дејилик. Һәвари Павелин Аллаһдан илһам алараг јаздығы бу сөзләр әсас етибарилә Аллаһын һикмәт вә мәрһәмәтинин мисилсиз олдуғуна ишарә едир. Лакин бурадан белә гәнаәтә ҝәлмәк олар ки, Јеһова Аллаһын шәхсијјәтинин вә ишләринин мүәјјән јөнләри олдугҹа дәрин олдуғундан онлары анламаг бизим үчүн гејри-мүмкүндүр. Сөзсүз, Аллаһын башланғыҹынын олмамасы факты онлардан биридир. Бунунла белә, биз там әмин ола биләрик ки, Мүгәддәс Китабда Аллаһ һаггында дејиләнләрин һамысы һәгигәтдир. Иса Мәсиһ Аллаһын сөзләри һагда демишди: «Сәнин сөзүн һәгигәтдир» (Јәһја 17:17).
Муса пејғәмбәр Јеһова Аллаһа белә дуа етмишди: «Әзәлдән ахырадәк Аллаһ Сәнсән» вә ја башга тәрҹүмәјә әсасән, «Сән һәмишә вар олмусан вә һәмишә олаҹагсан» (Мәзмур 90:2). Бурада Муса пејғәмбәр Аллаһын кечмишдә вә ҝәләҹәкдә мөвҹуд олмасы барәдә данышыр. Ҝәләҹәјә ҝәлдикдә, Јеһова ‘әбәди Јашајан’ Аллаһдыр (Вәһј 4:10). Беләликлә, Аллаһ сонсузадәк мөвҹуд олаҹаг. Кечмишә ҝәлдикдә исә, Аллаһ нә јарадылыб, нә дә ки Онун башланғыҹы олуб. О, һәмишә мөвҹуд олуб.
Чохларымыз мүҹәррәд анлајышлары баша дүшмәкдә чәтинлик чәкирик. Буна нүмунә олараг ријазијјатда мүсбәт вә мәнфи әдәдләр кими мүрәккәб анлајышы ҝәтирмәк олар. Билдијимиз кими, әдәдләр мүсбәт вә мәнфи сонсузлуғадәк артыр вә азалыр. Бәзән буну садәҹә бир факт кими гәбул етмәкдән башга чарәмиз галмыр. Бу нүмунә бизә Аллаһын нә гәдәр вахт мөвҹуд олдуғуну баша дүшмәјә көмәк едир.
Бу сәбәбдән, «әбәдијјәт Падшаһы» (ЈД) титулуну дашымаға јалныз вә јалныз О лајигдир (1 Тимотејә 1:17). Бир дүшүнүн: Иса Мәсиһин, ҝөјдәки сајсыз-һесабсыз мәләкләрин вә јер үзүндә јашајан бүтүн инсанларын башланғыҹы вар, чүнки онлар јарадылыблар (Колослулара 1:15, 16). Лакин Аллаһ һаггында буну демәк олмаз. Јараданын јарадылдығыны иддиа етмәк, әслиндә, ағылсызлыгдыр, чүнки бунунла ортаја «Бәс ону ким јарадыб?» суалы чыхыр. Вә бу «бәс»ләр һеч вахт битмәјәҹәк. Бәли, тәкҹә Јеһова Аллаһ «әбәди олараг мөвҹуддур» (Даниел 6:26). Башга сөзләрлә десәк, Аллаһ «бүтүн әсрләрдән әввәл» мөвҹуд иди (Јәһуда 25).
Бунунла белә, Аллаһын әбәдијјәт боју мөвҹуд олмасы садәҹә гуру факт дејил. Мусанын дуасы үзәриндә дәриндән дүшүнсәк, ајдын олар ки, Аллаһын әбәдијјән мөвҹуд олмасы Онун әбәди һәјата даир бизә вердији ҝөзәл вәдинә инанмағымыза мөһкәм әсас верир. Һәјаты бир ҝөз гырпымында кечиб ҝедән инсанлардан фәргли олараг, Аллаһ нәсилдән-нәслә ‘пәнаһ јеридир’. Гајғыкеш Јараданымыз Јеһова Аллаһ һәмишә Өз халгынын јанында олуб, инди дә вар вә даима олаҹагдыр. Бәли, бу һејрәтамиз һәгигәт бизә әсил тәсәлли верир! (Мәзмур 90:1).