Ҝөрүшләрин руһландырыҹы шәкилдә кечмәсиндә сәнин пајын вармы?
«Сиз бир јерә јығышанда... елә един ки, һәр шеј јығынҹағын руһән мөһкәмләнмәсинә хидмәт етсин» (1 КОР. 14:26).
1. Коринфлиләрә биринҹи мәктубун 14-ҹү фәслинә әсасән, мәсиһчи ҝөрүшләринин әсас мәгсәдләриндән бири һансыдыр?
«НЕҸӘ дә руһландырыҹы ҝөрүш иди!» Падшаһлыг Залында кечирилән ҝөрүшдән сонра сән дә белә һиссләр кечирмисәнми? Шүбһәсиз ки, кечирмисән! Јығынҹаг ҝөрүшләри, һәгигәтән дә, бизи руһландырыр вә бурада тәәҹҹүблү бир шеј јохдур. Чүнки биринҹи әсрдә олдуғу кими, бу ҝүн дә онларын ваҹиб мәгсәдләриндән бири иштирак едәнләрин һамысыны руһән мөһкәмләндирмәкдир. Һәвари Павелин коринфлиләрә јаздығы биринҹи мәктубунда мәсиһчи ҝөрүшләринин бу мәгсәдә хидмәт етдијини неҹә ҝөстәрдијинә фикир верәк. Һәмин мәктубун 14-ҹү фәслиндә о, дөнә-дөнә вурғулајыр ки, јығынҹаг ҝөрүшләринин һәр бир һиссәси мәһз бу мәгсәдә хидмәт етмәлидир, јәни ‘јығынҹағы руһән мөһкәмләндирмәлидир’. (1 Коринфлиләрә 14:3, 12, 26 ајәләрини охуa.)
2. а) Ҝөрүшләримиз нәјин сајәсиндә руһландырыҹы шәкилдә кечир? б) Биз һансы суалы нәзәрдән кечирәҹәјик?
2 Биз дәрк едирик ки, ҝөрүшләримизин руһландырыҹы вә ја маарифләндириҹи олмасы, илк нөвбәдә, мүгәддәс руһун тәсиринин нәтиҹәсидир. Бу сәбәбдән биз һәр ҝөрүшә Јеһоваја дуа етмәклә башлајыр вә Ондан ҝөрүшүмүзә мүгәддәс руһу илә хејир-дуа вермәсини диләјирик. Биз ону да баша дүшүрүк ки, програмын руһландырыҹы олмасында јығынҹағын һәр бир үзвүнүн пајы ола биләр. Буну нәзәрә алараг, шәхсән һәр биримиз һәфтәлик ҝөрүшләримизин һәмишә руһландырыҹы вә руһән тәравәтләндириҹи кечмәси үчүн нә едә биләрик?
3. Мәсиһчи ҝөрүшләри нә дәрәҹәдә мүһүм әһәмијјәт кәсб едир?
3 Бу суала ҹаваб тапмаг үчүн ҝөрүшләрлә бағлы олан вә ҝөрүшләри кечирән гардашларын јадда сахламалы олдуглары бәзи амилләри нәзәрдән кечирәҹәјик. Биз һәм дә ҝөрүшләрин һәр бир кәс үчүн руһландырыҹы олмасындан өтрү бүтүн јығынҹағын нә едә биләҹәјиндән дә сөз ачаҹағыг. Јығынҹаг ҝөрүшләри мүгәддәс олдуғундан бу, бизим үчүн хүсуси мараг кәсб етмәлидир. Һәгигәтән дә, јығынҹаг ҝөрүшләринә ҝәлмәк вә иштирак етмәк Јеһоваја ибадәтимизин ваҹиб бир һиссәсидир (Мәз. 26:12; 111:1; Јешаја 66:22, 23).
Мүгәддәс Китабы өјрәнмәк үчүн нәзәрдә тутулан ҝөрүш
4, 5. «Ҝөзәтчи Гүлләси»нин өјрәнилмәсинин мәгсәди нәдир?
4 Һәр биримиз «Ҝөзәтчи Гүлләси»нин һәфтәлик өјрәнилмәсиндән фајда әлдә етмәк истәјирик. Лакин бу ҝөрүшүн әсас мәгсәдини ајдын баша дүшмәк үчүн ҝәлин «Ҝөзәтчи Гүлләси» журналы вә өјрәнмә мәгаләләри илә бағлы едилән бәзи дәјишикликләрә нәзәр салаг.
5 «Ҝөзәтчи Гүлләси»нин 2008-ҹи ил 15 јанвар сајындан, јәни илк тәлим нәшриндән етибарән онун үз габығына ваҹиб бир шеј әлавә едилиб. Сән буна фикир вермисән? Һал-һазырда әлиндә тутдуғун журналын үз габығына диггәтлә бах. Гүлләнин алтында ачыг Мүгәддәс Китаб ҝөрәҹәксән. Бу дәјишиклик «Ҝөзәтчи Гүлләси»нин өјрәнилмәсинин мәгсәдини вурғулајыр. Онун мәгсәди бу журналын көмәјилә Мүгәддәс Китабы өјрәнмәкдир. Бәли, «Ҝөзәтчи Гүлләси»нин һәфтәлик өјрәнилмәсиндә Аллаһын Кәламы ‘охунуб ајдынлашдырылыр’ вә гәдимдә јашамыш Неһемјанын ҝүнләриндә олдуғу кими, ‘мәнасы’ изаһ олунур (Неһ. 8:8; Јешаја 54:13).
6. а) «Ҝөзәтчи Гүлләси»нин өјрәнилмәси илә әлагәдар һансы дәјишиклик едилмишдир? б) Јанында «оху» јазылан ајәләрлә бағлы нәји јадда сахламалыјыг?
6 Мүгәддәс Китаб бизим әсас дәрслијимиз олдуғуна ҝөрә «Ҝөзәтчи Гүлләси»нин өјрәнилмәсинә дә дәјишиклик едилмишдир. Өјрәнмә мәгаләләриндә бәзи ајәләрин јанында «оху» јазылыб. Ҝөрүш заманы бу ајәләр охунанда һамымыз онлары өз Мүгәддәс Китабымызда изләмәјә тәшвиг олунуруг (Һәв. иш. 17:11). Бу, нәјә ҝөрә ваҹибдир? Чүнки өз Мүгәддәс Китабымызда Аллаһын мәсләһәтләрини ҝөрәндә бу, бизә даһа бөјүк тәсир бағышлајыр (Ибр. 4:12). Буна ҝөрә дә бу ајәләр уҹадан охунмаздан әввәл ҝөрүшү апаран гардаш залда әјләшәнләрә кифајәт гәдәр вахт вермәлидир ки, онлар да һәмин ајәләри тапыб изләјә билсинләр.
Иманымызы ифадә етмәјә вахтымыз инди даһа чохдур
7. «Ҝөзәтчи Гүлләси»нин өјрәнилмәси заманы инди һансы имканымыз вар?
7 «Ҝөзәтчи Гүлләси»нин өјрәнмә мәгаләләринә едилән диҝәр дәјишиклик исә онларын һәҹми илә бағлыдыр. Әввәлки илләрә нисбәтән инди мәгаләләр даһа гысадыр. Абзасларын охунмасына даһа аз вахт ҝетдијиндән шәрһ вермәк имканымыз даһа чохдур. Инди ҝөрүшдә иштирак едән даһа чох инсанын чап олунмуш суаллара ҹаваб вермәклә, ајәләри тәтбиг етмәклә, Мүгәддәс Китаб принсипләринә риајәт етмәјин мүдриклик олдуғуну ҝөстәрән гыса әһвалат данышмагла иманыны ачыгҹа ифадә етмәк имканы вар. Шәкилләрин мүзакирәсинә дә вахт ајрылмалыдыр. (Мәзмур 22:22; 35:18; 40:9 ајәләрини оху.)
8, 9. «Ҝөзәтчи Гүлләси»нин өјрәнилмәсини апаран гардашын ролу нәдән ибарәтдир?
8 Јалныз гыса шәрһләр верилдији вә ҝөрүшү апаран гардашын чох данышмадығы тәгдирдә шәрһ вермәк имканы даһа чох олаҹаг. Буна ҝөрә дә ҝөрүш һамы үчүн руһландырыҹы шәкилдә кечсин дејә ҝөрүшү апаран гардаш өзүнүн вә динләјиҹиләрин вердији шәрһләр арасында таразлығы неҹә ҝөзләмәлидир?
9 Бу суала ҹаваб вермәк үчүн бир нүмунәјә бахаг. Јахшы кечирилән «Ҝөзәтчи Гүлләси»нин өјрәнилмәсини ҝөзохшајан ҝүл дәстәсинә бәнзәтмәк олар. Бөјүк ҝүл дәстәси ајры-ајры чичәкләрдән ибарәт олдуғу кими, «Ҝөзәтчи Гүлләси»нин өјрәнилмәси дә чохлу мүхтәлиф шәрһләрдән ибарәтдир. Ҝүлләр өлчүсүнә вә рәнҝинә ҝөрә бир-бириндән фәргләндији кими, шәрһләр дә һәҹминә вә верилмә тәрзинә ҝөрә бир-бириндән фәргләнир. Бәс бу нүмунәдә ҝөрүшү апаран гардашын шәрһләрини нәјә бәнзәтмәк олар? Онун һәрдәнбир вердији шәрһләри бәзәк мәгсәдилә ҝүл дәстәсинә гојулан јашыл јарпаглара вә будаглара бәнзәтмәк олар. Ҝүлләрлә мүгајисәдә онларын сајы аздыр. Онлар ҝүл дәстәсинә гурулуш верир вә ону тамамлајыр. Ејнилә, ҝөрүшү апаран гардаш јадда сахламалыдыр ки, онун ролу һәддән артыг чох гејдләр етмәк јох, јығынҹағын тәгдим етдији мәдһ гурбанларыны, јәни шәрһләри тамамламагдыр. Бәли, јығынҹаг чохлу вә мүхтәлиф шәрһләр верәндә, ҝөрүшү апаран гардаш исә јериндә олан бир нечә гејдләр едәндә бүтүн иштиракчыларын зөвгүнә охшајан ҝөзәл бир сөз дәстәси әрсәјә ҝәлир.
‘Ҝәлин һәр заман Аллаһа мәдһ гурбаны тәгдим едәк’
10. Еркән мәсиһчиләр јығынҹаг ҝөрүшләринә неҹә јанашырдылар?
10 Павелин коринфлиләрә јаздығы биринҹи мәктубунун 14-ҹү фәслинин 26—33-дәк ајәләриндән биринҹи әсрдә јығынҹаг ҝөрүшләринин неҹә кечирилдијини ҝөрмәк олар. Бир Мүгәддәс Китаб алими бу ајәләрә шәрһ верәрәк демишди ки, биринҹи әсрдә ибадәт үчүн кечирилән мәсиһчи ҝөрүшләриндә «диггәтәлајиг мәгам, демәк олар ки, һәр кәсин ҝөрүшләрә төһфә вермәји өзүнә шәрәф вә борҹ билмәси иди. Инсан јалныз пассив динләјиҹи гисминдә орада иштирак етмирди: онун мәгсәди јалныз ҝөрүшдән нә исә ҝөтүрмәк јох, һәм дә вермәк иди». Һәгигәтән дә, еркән мәсиһчиләр үчүн јығынҹаг ҝөрүшләри иманларыны ифадә етмәјә бир фүрсәт иди (Ром. 10:10).
11. а) Ҝөрүшләримиз нәјин сајәсиндә руһландырыҹы шәкилдә кечир вә нәјә ҝөрә? б) Һансы мәсләһәтләр шәрһләримизи јахшылашдырмагда бизә көмәк едә биләр? (Һашијәјә бах.)
11 Биз иманымызы ифадә едәндә, доғрудан да, ‘јығынҹаг руһән мөһкәмләнир’. Јәгин, разылашаҹагсан ки, јығынҹаг ҝөрүшләриндә нә вахтдан иштирак етмәјимиздән асылы олмајараг, баҹы-гардашларын вердији шәрһләри динләмәк чох хошдур. Јашлыларын, садиг һәмиманлыларымызын сидг-үрәкдән вердикләри шәрһләр бизи риггәтә ҝәтирир; гајғыкеш ағсаггалларын сөјләдији дәрин фикирләр бизи руһландырыр; балаҹа ушаг исә Јеһоваја саф мәһәббәтини үрәкдән ифадә едәндә үзүмүздә тәбәссүм доғур. Ҝөрдүјүмүз кими, ҝөрүшләрин руһландырыҹы шәкилдә кечмәсиндә һәр кәсин пајы варb.
12. а) Муса илә Јеремјанын нүмунәсиндән нә өјрәнә биләрик? б) Дуалар шәрһ вермәјимиздә һансы ролу ојнајыр?
12 Утанҹаг адамлар үчүн шәрһ вермәк әсил мүбаризәдир. Әҝәр сән дә ҹаваб вермәјә утанырсанса, јадда сахла ки, белә вәзијјәтлә гаршылашан тәкҹә сән дејилсән. Бу, сәнә көмәк едә биләр. Һәтта Муса вә Јеремја кими Аллаһын садиг хидмәтчиләри белә ҹамаат гаршысында данышмагдан чәкиндикләрини сөјләмишдиләр (Чых. 4:10; Јер. 1:6). Лакин Јеһова халг гаршысында Она һәмд етмәләри үчүн гәдимдә јашамыш бу хидмәтчиләринә көмәк етдији кими, сәнә дә мәдһ гурбаныны тәгдим етмәјә көмәк едәҹәк. (Ибраниләрә 13:15 ајәсини оху.) Шәрһ вермәк горхусунун өһдәсиндән ҝәлмәк үчүн Јеһовадан неҹә көмәк ала биләрсән? Илк нөвбәдә, ҝөрүшләрә јахшы һазырлаш. Сонра, Падшаһлыг Залына ҝетмәздән өнҹә Јеһоваја дуа ет вә Ондан шәрһ вермәјин үчүн ҹәсарәт дилә (Филип. 4:6). Хаһишин Онун «ирадәсинә мүвафиг» олдуғуна ҝөрә әмин ола биләрсән ки, О, дуаларыны ҹавабсыз гојмајаҹаг (1 Јәһ. 5:14; Сүл. мәс. 15:29).
‘Руһән мөһкәмләндирән, үрәкләндирән вә тәсәлли ҝәтирән’ ҝөрүшләр
13. а) Ҝөрүшләр бүтүн иштиракчылара неҹә тәсир бағышламалыдыр? б) Һансы суалын үзәриндә ағсаггаллар хүсусилә ҹидди фикирләшмәлидирләр?
13 Павел ҝөрүшләрин ваҹиб бир мәгсәдә хидмәт етдијини вурғулајыр. Онун сөзләринә әсасән, ҝөрүшләр иштиракчылары ‘руһән мөһкәмләндирмәли, үрәкләндирмәли вә онлара тәсәлли ҝәтирмәлидир’c (1 Кор. 14:3). Бу ҝүн ағсаггаллар неҹә әмин ола биләрләр ки, онларын тәгдим етдији бәндләр, һәгигәтән дә, баҹы-гардашлары руһландырыр вә онлара тәсәлли верир? Бу суала ҹаваб вермәк үчүн ҝәлин Исанын дирилдикдән аз сонра кечирдији ҝөрүшә нәзәр салаг.
14. а) Исанын кечирдији ҝөрүшдән әввәл һансы һадисәләр баш вермишди? б) Нәјә ҝөрә Исанын шаҝирдләринә јахынлашараг сөһбәт етмәси онлары үрәкләндирди?
14 Әввәла, һәмин ҝөрүшдән габаг баш верән һадисәләрә нәзәр салаг. Исанын өлүмүндән бир аз өнҹә һәвариләр «ону гојуб гачдылар» вә әввәлҹәдән дејилдији кими, ‘евләринә дағылышдылар’ (Марк 14:50; Јәһ. 16:32). Иса дирилдикдән сонра исә мәјуслуға гапылмыш һәвариләрини хүсуси ҝөрүшә дәвәт етдиd. «Он бир шаҝирд Галилејаја, Исанын дедији даға ҝәлди». Онлар ораја чатанда ‘Иса јахынлашыб шаҝирдләри илә’ сөһбәт етди (Мат. 28:10, 16, 18). Илк аддымы Исанын атдығыны ҝөрән һәвариләрин неҹә дә үрәкләндијини бир анлыға тәсәввүрүнә ҝәтир! Иса онларла нә һагда данышды?
15. а) Иса шаҝирдләри илә нә һагда данышды вә о, нә етмәди? б) Һәмин ҝөрүш һәвариләрә неҹә тәсир бағышлады?
15 Иса ҝөрүшә еланла башлады: «Ҝөјдәки вә јердәки бүтүн һакимијјәт мәнә верилиб». Сонра онлара бир тапшырыг верди: «Буна ҝөрә дә ҝедин вә бүтүн милләтләрин ичиндә шаҝирд һазырлајын». Сонда онлары бир дост кими әмин едәрәк деди: «Мән бу дөврүн јекунуна кими һәмишә сизинләјәм» (Мат. 28:18—20). Сәнҹә, Иса нә етмәди? О, һәвариләринә ирад тутмады; һәмин ҝөрүш заманы нә онларын нијјәтләринә шүбһә етдијини ҝөстәрди, нә дә ки ани иман зәифликләринә истинад едәрәк виҹдан әзабы чәкән шаҝирдләринин јарасына дуз сәпди. Әксинә, Иса шаҝирдләринә ваҹиб тапшырыг һәвалә едәрәк онлары бир даһа өзүнүн вә Атасынын мәһәббәтинә әмин етди. Бу, һәвариләрә неҹә тәсир бағышлады? Онлар о гәдәр мөһкәмләниб үрәкләндиләр ки, бу ҝөрүшдән бир гәдәр сонра јенидән ‘хош хәбәри бәјан етмәјә’ башладылар (Һәв. иш. 5:42).
16. Ағсаггаллар Исаны тәглид едәрәк ҝөрүшләрин тәравәтләндириҹи шәкилдә кечмәси үчүн нә едирләр?
16 Ағсаггаллар Исаны тәглид едирләр вә онлар үчүн јығынҹаг ҝөрүшләри һәмиманлыларыны Јеһованын Өз халгына бәсләдији мәһәббәтин түкәнмәз олдуғуна әмин етмәјә бир фүрсәтдир (Ром. 8:38, 39). Буна ҝөрә дә ағсаггаллар өз бәндләрини тәгдим едәркән баҹы-гардашларын мәнфи јох, мүсбәт ҹәһәтләринә тохунурлар. Онлар һәмиманлыларынын нијјәтләрини шүбһә алтына алмырлар. Бунун әвәзинә, ағсаггалларын сөзләриндән бәлли олур ки, онлар һәр бир һәмиманлынын Јеһованы севдијинә вә дүзҝүн оланы етмәк истәдијинә инанырлар (1 Салон. 4:1, 9—12). Әлбәттә, бәзән ағсаггаллара бүтүн јығынҹаға дүзәлиш вермәк лазым ҝәлир. Лакин јалныз бир нечә нәфәрә мәсләһәт вермәк лазым оланда, јахшы оларды ки, бу, тәкликдә едилсин (Галат. 6:1; 2 Тим. 2:24—26). Бүтүн јығынҹаға мүраҹиәт едәндә ағсаггаллар, әҝәр мүнасибдирсә, јығынҹағы тәрифләмәлидирләр (Јешаја 32:2). Онлар елә данышмалыдырлар ки, ҝөрүшүн сонунда бүтүн иштиракчылар тәравәт вә ҝүҹ әлдә етсинләр (Мат. 11:28; Һәв. иш. 15:32).
Тәһлүкәсиз сығынаҹаг
17. а) Нәјә ҝөрә мәсиһчи ҝөрүшләримизин тәһлүкәсиз сығынаҹаг олмасы инди даһа ваҹибдир? б) Шәхсән сән ҝөрүшләрин руһландырыҹы шәкилдә кечмәси үчүн нә едә биләрсән? («Ҝөрүшләри һәм өзүмүз, һәм дә башгалары үчүн руһландырыҹы етмәјин он үсулу» адлы чәрчивәјә бах.)
17 Јашадығымыз Шејтан дүнјасы ҝүнү-ҝүндән гәддарлашдығындан биз мәсиһчи ҝөрүшләримизин тәһлүкәсиз сығынаҹаг — һамы үчүн ҝүҹ-гүввә мәнбәји олсун дејә әлимиздән ҝәләни етмәлијик (1 Салон. 5:11). Һәјат јолдашы илә бирҝә бөјүк сынагларла үзләшән бир баҹы бир нечә ил бундан әввәл демишди: «Бизим үчүн Падшаһлыг Залында олмаг Јеһованын гајғыкеш әлләриндә олмаг кими иди. Бүтүн бу вахт әрзиндә, мәсиһчи баҹы-гардашларымызын әһатәсиндә оланда Јеһованын бизим гајғы јүкүмүзү дашыдығыны һисс едирдик, бу исә бизә мүәјјән гәлб раһатлығы верирди» (Мәз. 55:22). Гој ҝөрүшләримиз һәр кәси бу ҹүр руһландырсын вә тәсәлли версин. Буна ҝөрә дә ҝәлин ҝөрүшләримизин руһландырыҹы шәкилдә кечмәси үчүн өз төһфәмизи әсирҝәмәјәк!
[Һашијәләр]
a Мүгәддәс Китабда пејғәмбәрлик едилмишди ки, мәсиһчи ҝөрүшләри илә бағлы бәзи дәјишикликләр едиләҹәк. Мәсәлән, бу ҝүн биз нә ‘әҹнәби дилләрдә данышыр’, нә дә «пејғәмбәрлик» едирик (1 Кор. 13:8; 14:5). Буна бахмајараг, Павелин ҝөстәришләриндән мәсиһчи ҝөрүшләрини неҹә кечирмәли олдуғумуза даир фајдалы мәлуматлар әлдә едә биләрик.
b Јығынҹаг ҝөрүшләриндә вердијимиз шәрһләри неҹә јахшылашдыра биләҹәјимизә даир мәсләһәтләри «Ҝөзәтчи Гүлләси»нин 2003-ҹү ил 1 сентјабр сајынын 19—22 сәһифәләриндә (рус.) тапмаг олар.
c «Вајнын Әһди-Әтиг вә Әһди-Ҹәдидин сөзләринә даир изаһлы лүғәти»ндә изаһ олунур ки, ‘үрәкләндирмәк’ сөзүндән фәргли олараг, ‘тәсәлли ҝәтирмәк’ кими тәрҹүмә едилән јунан сөзүндә нәвазиш даһа чох һисс олунур («Vine’s Expository Dictionary of Old and New Testament Words»). (Јәһја 11:19 ајәси илә мүгајисә ет.)
d Чох еһтимал ки, һәвари Павел Исанын ‘беш јүздән чох гардаша ҝөрүндүјүнү’ дејәндә мәһз бу һадисәјә истинад едирди (1 Кор. 15:6).
Неҹә ҹаваб верәрдиниз?
• Мәсиһчи ҝөрүшләри нә дәрәҹәдә ваҹибдир?
• Нәјә ҝөрә ҝөрүшләрдә верилән шәрһләр ‘јығынҹағын руһән мөһкәмләнмәсинә хидмәт едир’?
• Исанын давамчылары илә ҝөрүшүндән нә өјрәнмәк олар?
[22 вә 23-ҹү сәһифәләрдәки чәрчивә/шәкил]
ҜӨРҮШЛӘРИ ҺӘМ ӨЗҮМҮЗ, ҺӘМ ДӘ БАШГАЛАРЫ ҮЧҮН РУҺЛАНДЫРЫҸЫ ЕТМӘЈИН ОН ҮСУЛУ
[22 сәһифәдәки шәкил]
Габагҹадан һазырлаш. Падшаһлыг Залында мүзакирә едиләҹәк материала габагҹадан һазырлашанда ҝөрүш сәнә даһа мараглы олур вә даһа дәрин тәсир бағышлајыр.
Мүнтәзәм иштирак ет. Башгалары кими, сәнин дә ҝөрүшләрә мүнтәзәм ҝәлмәјин әһәмијјәт кәсб едир.
Вахтында ҝәл. Әҝәр програм башламаздан әввәл јерини тутсан, онда јығынҹагла бирҝә илк нәғмәни охујаҹаг вә дуада иштирак едәҹәксән. Бунлар Јеһоваја ибадәтимизин бир һиссәсидир.
Лазым олан һәр шеји өзүнлә ҝәтир. Өзүнлә Мүгәддәс Китабы вә ҝөрүшдә истифадә олунаҹаг вәсаитләри ҝөтүр ки, мүзакирә олунан материалы изләјә вә ону даһа јахшы баша дүшә биләсән.
Фикринин јајынмасына јол вермә. Мәсәлән, телефонуна ҝәлән месажлары ҝөрүш вахты јох, ондан сонра оху. Онда јығынҹағын өз јери, шәхси ишләрин дә өз јери олаҹаг.
Мүзакирәләрдә иштирак ет. Шәрһләр нә гәдәр чох олса, бир о гәдәр јахшыдыр. Чүнки башга-башга инсанларын өз иманыны ифадә етмәси даһа чох инсаны руһландыраҹаг вә мөһкәмләндирәҹәк.
Гој шәрһләрин гыса олсун. Бунун сајәсиндә башгаларына да шәрһ вермәјә имкан верәҹәјик.
Тапшырыгларыны јеринә јетир. Теократик Хидмәт Мәктәбиндә тапшырығын варса вә ја Хидмәти ҝөрүшдә һансыса бәндлә чыхыш едәҹәксәнсә, онда јахшы һазырлаш, мәшг ет вә чалыш ки, сонрадан имтина етмәјәсән.
Иштирак едәнләри тәрифлә. Бәндләрлә чыхыш едәнләрә вә ја шәрһ верәнләрә онларын әмәјини нә гәдәр гијмәтләндирдијини сөјлә.
Үнсијјәт ет. Ҝөрүшә ҝәләнләри ҝөрүшдән әввәл вә ја сонра достҹасына саламламаг вә онларла меһрибанҹасына үнсијјәт етмәк ҝөрүшү даһа ҝөзәл вә фајдалы едир.