Јеһованын тәшкилаты илә таныш олмагда ушагларыныза көмәк един

УШАГЛАР өјрәнмәјә мејиллидирләр. Ола билсин, илк Пасха ахшамы Мисирдә олан исраилли ушаглар валидејнләринә белә суаллар верирдиләр: «Атам гузуну нәјә ҝөрә кәсди? Нијә гапынын дирәкләринә ган сүртдү? Биз һара ҝедирик?» Јеһованын бу кими суаллары бәјәндији исраилли аталара вердији әмрдән бәллидир. Аллаһ ҝәләҹәкдә гејд едәҹәкләри Пасха бајрамы илә әлагәдар онлара демишди: «Өвладларыныз сиздән “Бу ибадәтин мәнасы сизин үчүн нәдир?” дејә сорушдуглары заман онлара сөјләјин: “Бу, Мисирлиләри бәлаја салдығы заман Мисирдә Исраил өвладларынын евләри јанындан кечиб хилас едән Рәбб үчүн Пасха гурбаныдыр”» (Чых. 12:24—27). Сонралар Јеһова исраилли валидејнләрә Онун бујурдуғу ‘гајда вә һөкмләрә’ даир өвладларынын вердији суаллара ҹаваб вермәләринин ваҹиблијини хатырлатды (Ганун. т. 6:20—25).

Бурадан ҝөрүрүк ки, Јеһова ушагларын ибадәтлә бағлы суалларына ганеедиҹи ҹаваблар — Јеһованы онларын Аллаһы вә Хиласкары кими севмәјә көмәк едәҹәк ҹаваблар алмаларыны истәјирди. Бизим ҝүнләрдә дә Јеһова ҝәнҹләр үчүн ејни шеји арзулајыр. Валидејнләр оғул вә гызларына Аллаһа вә Онун халгына сәмими мәһәббәти неҹә ашылаја биләрләр? Үсуллардан бири онлары Јеһованын тәшкилаты илә таныш етмәк вә онун бизә ҝәтирдији фајдалары баша салмагдыр. Буна ҝөрә дә ҝәлин ушагларымыза Аллаһын тәшкилаты илә јахындан таныш олмаға неҹә көмәк едә биләҹәјимизи нәзәрдән кечирәк.

Јығынҹаг

Ушагларынызы аид олдуғунуз јығынҹагла таныш етмәк лазымдыр. Бунун үчүн сиз валидејнләр онлары бүтүн мәсиһчи ҝөрүшләринә өзүнүзлә апармалысыныз. Бунунла Јеһованын исраилли валидејнләрә вердији әмрә ујғун һәрәкәт етмиш олурсунуз. О демишди: «Халгын киши, гадын вә ушагларыны... топлајын. Гој һамы ешидиб өјрәнсин вә Аллаһыныз Рәбдән горхуб, Ганунун бүтүн сөзләринә диггәтлә әмәл етсин. Гој гануну билмәјән ушаглар да ешитсинләр вә... Аллаһыныз Рәбдән горхмағы өјрәнсинләр» (Ганун. т. 31:12, 13).

Ушаглар Јеһованын Кәламыны көрпә јашларындан өјрәнә биләрләр. Һәвари Павел Тимотеј барәдә јазмышды: «Мүгәддәс Јазылары көрпәликдән билирсән» (2 Тим. 3:15). Падшаһлыг Залында кечирилән ҝөрүшләрдән һәтта лап балаҹа ушаглар белә фајдалана вә Падшаһлыг нәғмәләри илә таныш олмаға башлаја биләрләр. Бурада онлар Мүгәддәс Китабдан вә она әсасланан нәшрләрдән неҹә истифадә етмәји вә онлара һөрмәтлә јанашмағы өјрәнирләр. Үстәлик, ҝөрүшләримиздә онлар Мәсиһин һәгиги давамчыларынын сәҹијјәви хүсусијјәти олан сәмими мәһәббәти дујурлар. Иса демишди: «Сизә јени бир әмр верирәм: бир-биринизи севин. Мән сизи севдијим кими, сиз дә бир-биринизи севин. Аранызда мәһәббәт олса, һамы биләҹәк ки, сиз мәним шаҝирдимсиниз» (Јәһ. 13:34, 35). Падшаһлыг Залында һөкм сүрән сәмими мәһәббәт вә әсил тәһлүкәсизлик өвладларыныза дәрин тәәссүрат бағышлајаҹаг вә бунун сајәсиндә мәсиһчи ҝөрүшләри онларын һәјатларынын ајрылмаз һиссәсинә чевриләҹәк.

Падшаһлыг Залына тез ҝәлмәјә вә ҝөрүш битдикдән сонра бир аз галыб үнсијјәт етмәјә вәрдиш етсәниз, ушагларынызын дост тапмаг имканы олаҹаг. Тәкҹә ушагларла үнсијјәт етмәјә иҹазә вермәкдәнсә, нәјә ҝөрә онлары һәр јашда олан баҹы-гардашларла таныш етмәјәсиниз? Өвладларыныз онлардан јашҹа бөјүк оланларла таныш олсалар, өзләри үчүн зәнҝин тәҹрүбә вә һикмәт хәзинәси ашкар едә биләрләр. Гәдимдә Зәкәријјә ҝәнҹ Јәһуда падшаһы Уззијаја ‘Аллаһдан горхмағы өјрәдәрәк’ она јахшы тәсир бағышладығы кими, бу ҝүн дә Јеһоваја узун илләр сәдагәтлә хидмәт едән мәсиһчиләр онун халгы арасындакы ҝәнҹләрә мүсбәт тәсир бағышлајырлар (2 Салн. 26:1, 4, 5). Падшаһлыг Залында сиз һәмчинин ушагларынызы јығынҹағын китабханасы, еланлар лөвһәси вә диҝәр шејләрлә таныш едә биләрсиниз.

Үмумдүнја тәшкилат

Ушаглар билмәлидирләр ки, аид олдуғунуз јығынҹаг бүтүн дүнјада сајы 100 000-дән чох олан јығынҹагдан биридир. Ушагларыныза бу тәшкилатын сәҹијјәви хүсусијјәтләрини, онун неҹә фәалијјәт ҝөстәрдијини вә һәјата кечирдији ишә онларын неҹә дәстәк ола биләҹәкләрини баша салын. Онлара рајон вә вилајәт конгресләрини, һәмчинин рајон нәзарәтчисинин јығынҹағыныза баш чәкдији вахты нәјә ҝөрә сәбирсизликлә ҝөзләдијинизи изаһ един. (28-ҹи сәһифәдә јерләшән «Аиләви ибадәт үчүн мөвзулар» адлы чәрчивәјә бахын.)

Имкан јаранан кими сәјјар нәзарәтчиләрини, миссионерләри, бет-еллиләри вә таммүддәтли хидмәтдә олан диҝәр мәсиһчиләри наһара дәвәт един. Фикирләшмәјин ки, онларын ушаглара вахты јохдур. Онлар һәмишә ушаглары севинҹлә гаршылајан вә онларла үнсијјәт едән Исаны тәглид етмәјә чалышырлар (Марк 10:13—16). Јеһованын бу хидмәтчиләринин данышдығы әһвалатлары ешидәндә вә онларын мүгәддәс хидмәтдән севинҹ дујдугларыны ҝөрәндә сизин ушагларыныз да гаршыларына таммүддәтли хидмәтчи олмаг мәгсәдини гоја биләрләр.

Ушагларынызын Јеһованын тәшкилаты илә даһа јахындан таныш олмалары үчүн башга нә едә биләрсиниз? Мәсәлән, аиләви өјрәнмә заманы «Јеһованын Шаһидләри — Аллаһын Падшаһлығынын мүждәчиләри» китабыны (рус.) арашдырмаг олар. Онларын диггәтини Јеһованын хидмәтчиләринин тәвазөкарлығына вә Јеһоваја олан садигликләринә јөнәлдин. Хош хәбәрин бүтүн дүнјада бәјан едилмәси үчүн Јеһованын онлардан неҹә истифадә етдијини ҝөстәрин. Јеһованын тәшкилатынын бурахдығы видеофилмләрин көмәјилә ушагларыныза кечмишдә вә мүасир зәманәдә баш верән һадисәләрдән ваҹиб дәрсләр өјрәдин. Имкан варса, өз өлкәниздә ја да хариҹдә јерләшән Бет-Елләрә баш чәкин. Бунун сајәсиндә өвладларыныз, ерамызын биринҹи әсриндә олдуғу кими, бу ҝүн дә садиг вә ағыллы нөкәрин рәһбәрлији алтында фәалијјәт ҝөстәрән Јеһованын тәшкилатынын јер үзүндәки һиссәсинин бүтүн дүнјадакы баҹы-гардашлара руһани гида вә рәһбәрлији неҹә тәгдим етдијини өз ҝөзләри илә ҝөрәҹәкләр (Мат. 24:45—47; Һәв. иш. 15:22—31).

Һәр бир өвладынызын тәләбатыны нәзәрә алын

Ушагларынызы өјрәдәркән Исанын һәвариләринә неҹә тәлим вердијини јадда сахлајын. Бир дәфә о, һәвариләринә демишди: «Сизә һәлә дејиләси чох сөзүм вар, анҹаг инди онлары баша дүшмәзсиниз» (Јәһ. 16:12). Иса өз шаҝирдләрини мәлуматларла јүкләмирди. Әксинә, о, ваҹиб һәгигәтләри тәдриҹән ачыглајырды ки, шаҝирдләри онлары мәнимсәјә билсинләр. Сиз дә ушагларынызы һәддән артыг јүкләмәјин. Онлара тәшкилат һаггында аз-аз, лакин мүнтәзәм шәкилдә өјрәдәрәк марагларыны горујуб сахлаја биләрсиниз. Белә етдијиниз тәгдирдә мәсиһчи јығынҹағы барәдә өјрәнмәк онлара хош олаҹаг. Ушагларынызын тәләбатлары дәјишдикҹә онларын артыг билдији шејләри тәкрарлаја вә биликләрини артыра биләрсиниз.

Мәсиһчи јығынҹағы руһани ҝүҹ-гүввә мәнбәји олдуғундан онун фәалијјәтиндә сәјлә иштирак едән ҝәнҹләр Шејтан дүнјасынын тәсиринә даһа јахшы мүгавимәт ҝөстәрирләр (Ром. 12:2). Биз әминик ки, сиз валидејнләр өвладларынызы Јеһованын тәшкилаты илә таныш етмәкдән севинҹ дујаҹагсыныз. Гој Онун хејир-дуасы сајәсиндә өвладларыныз бу тәшкилата вә хидмәт етдијимиз севән Аллаһа бағлансынлар!

[28-ҹи сәһифәдәки чәрчивә/шәкил]

Аиләви ибадәт үчүн мөвзулар

Бу чәрчивәдә Јеһованын тәшкилаты илә бағлы бәзи мөвзулар јер алыб. Нәјә ҝөрә аиләви ибадәт заманы онлары бирҝә мүзакирә етмәјәсиниз?

▪ Аид олдуғунуз јығынҹағын тарихчәсини нәзәрдән кечирин. О, нә вахт вә неҹә јараныб? Јығынҹағыныз һансы Падшаһлыг Залларындан истифадә едиб? Јахшы оларды ки, узун илләр јығынҹағыныза ҝәлән бир баҹы вә ја гардашы ушагларынызын суалларына ҹаваб вермәси үчүн евинизә гонаг дәвәт едәсиниз.

▪ Јығынҹаг вә даһа бөјүк ҝөрүшләрин мәгсәдини, еләҹә дә онлардан неҹә фајда әлдә едә биләҹәкләрини ушагларыныза изаһ един.

▪ Јеһованын тәшкилатында фәалијјәт ҝөстәрән мүхтәлиф мәктәбләрин мәгсәдини нәзәрдән кечирин. Бу мәктәбләрин мәзунларынын әлдә етдикләри ҝөзәл наилијјәтләр барәдә әһвалатлар данышын.

▪ Ушагларыныза хош хәбәри мүнтәзәм шәкилдә тәблиғ етмәјин ваҹиблијини баша дүшмәјә көмәк един. «Јеһованын Шаһидләринин иллик мәҹмуәси»ндә (рус.) дәрҹ олунан үмумдүнја һесабатына өз төһфәләрини неҹә верә биләҹәкләрини изаһ един.

▪ Јеһованын тәшкилатында ҝәнҹләр үчүн әлчатан олан таммүддәтли хидмәтин мүхтәлиф нөвләрини нәзәрдән кечирин. «Јеһованын ирадәсини јеринә јетирмәк үчүн тәшкил олунмушуг» китабынын 10-ҹу фәслиндән (рус.) бунунла бағлы фајдалы мәлумат әлдә едә биләрсиниз.

▪ Өвладларыныза јығынҹагда һәјата кечирилән мүәјјән тәдбирләрин мәгсәдини баша салын. Нәјә ҝөрә ән хырда мәсәләләрдә белә Јеһованын тәшкилатынын рәһбәрлијинә зидд давранмалы олмадыгларыны онлара изаһ един. Ағсаггалларын рәһбәрлијинә риајәт едәрәк јығынҹагда низам-интизамын горунмасына неҹә көмәк едә биләҹәкләрини ҝөстәрин.

[Шәкил]

Јеһоваја узун мүддәт хидмәт едәнләрлә достлуг етмәјин өвладларыныза мүсбәт тәсири олаҹаг

[26-ҹы сәһифәдәки шәкилләр]

Гәдим Исраилдә олдуғу кими, бу ҝүн дә валидејнләр Јеһованын тәшкилаты илә бағлы ушагларынын вердији суаллара ганеедиҹи ҹаваблар верирләр