Јеһова гәдди әјиләнләрин фәрјадына һај верир
ГӘДИМ Исраилин мүдрик падшаһы Сүлејман јазмышды: «Заман вә фүрсәтдир ки, һәр кәсин габағына чыхыр» (Ваиз 9:11). Һансыса бәдбәхт һадисә вә ја фаҹиә һәјатымызы алт-үст едә биләр. Мәсәлән, аилә үзвләримиздән киминсә гәфил өлүмү бизи сарсыда биләр. Һәфтәләр, ајлар кечдикҹә кәдәр вә чарәсизлик һисси даһа да ҝүҹләнә биләр. Ола билсин, белә вәзијјәтдә инсан һәддиндән артыг чаш-баш галдығы үчүн өзүнү Јеһоваја дуа етмәјә лајиг ҝөрмүр.
Белә вәзијјәтдә олан инсан тәсәллијә, анлајыша вә мәһәббәтә еһтијаҹ дујур. Мәзмурчу Давуд әмин едир: «Рәбб јыхыланларын һамысына дајагдыр, гәдди әјиләнләрин һамысыны галдырыр» (Мәз. 145:14). «Рәббин ҝөзләри јер үзүнү сејр едир ки, үрәји бүтүнлүклә Онунла оланлары гүввәтләндирсин», — дејә Мүгәддәс Китабда јазылыб (2 Салн. 16:9). О, ‘әзилмишләрин үрәјини дирчәлдир’ (Јешаја 57:15). Јеһова белә инсанлара неҹә дајаг олур? Онлара неҹә тәсәлли верир?
Јериндә дејилән сөзләр
Јеһова көмәјә еһтијаҹ дујдуғумуз андаҹа һәмиманлыларымыз васитәсилә дадымыза чатыр. Мүгәддәс Китаб бизи тәшвиг едир: «Гәмҝинләрә тәскинлик верин» (1 Салон. 5:14). Кәдәрли анларымызда бизә ҹаны јанан баҹынын, јахуд гардашын дилиндән бизи севдијини вә бизә ҝөрә нараһат олдуғуну ешитмәк ағрымызы јүнҝүлләшдирир. Бир нечә тәсәлливериҹи сөз белә гәдди әјилмиш инсаны дирчәлдә биләр. Мәсәлән, дүшүнүлмүш вә хош сөзләри вахтилә бизим гаршылашдығымыз чәтинликлә гаршылашан инсанлардан, јахуд да тәҹрүбәли достумуздан ешитмәк олар. Јеһова бу үсуллардан истифадә едәрәк гәдди әјилән инсаны дирчәлдә биләр.
Јығынҹагда ағсаггал кими хидмәт едән Алекс гардаш сағалмаз хәстәлик уҹбатындан ҝөзләнилмәдән һәјат јолдашыны итирди. Онлар тәзәҹә аилә гурмушдулар. Алексин дәрдини баша дүшән бир сәјјар нәзарәтчи онунла сөһбәт едәрәк она тәсәлли верди. Онун да һәјат јолдашы вәфат етмишди, лакин сонрадан о, јенидән аилә гурмушду. Гардаш Алекслә о заман кечирдији һиссләри бөлүшдү. Хидмәтдә вә јығынҹаг ҝөрүшләриндә оларкән онун овгаты јахшылашырды. Отағына ҝириб, гапыны бағлајанда исә өзүнү чох тәнһа һисс едирди. Алекс дејир: «Кечирдијим һиссләрин нормал олдуғуну вә башгаларынын да ејни һиссләр кечирдијини биләндә үрәјим раһат олду». Бәли, јериндә дејилән сөзләр кәдәрли анларда инсана тәсәлли вә ҝүҹ верә биләр (Сүл. мәс. 15:23).
Танышлары арасында дуллар олан бир ағсаггал да Алексә јахынлашыб тәсәлли верди. О, шәфгәтлә вә мәһәббәтлә деди ки, Јеһова кечирдијимиз һиссләрдән аҝаһдыр вә нәјә еһтијаҹ дујдуғумузу чох јахшы билир. Сонра гардаш сөјләди: «Ајлар, илләр өтдүкҹә јанында бир өмүр-ҝүн јолдашынын олмасыны истәсән, бил ки, Јеһова мәһәббәтдән ирәли ҝәләрәк јенидән аилә гурмаға иҹазә верир». Анҹаг етираф етмәк лазымдыр ки, дул галан, сонрадан исә јенидән аилә гурмаг истәјәнләрин һамысынын белә имканы јохдур. Гардашын дедији сөзләр үзәриндә дүшүнәндән сонра Алекс деди: «Әввәлләр мән фикирләширдим ки, ҝәләҹәкдә евләнсәм, мәрһум һәјат јолдашыма вә Јеһованын никаһ гурулушуна хәјанәт етмиш оларам. Амма гардашла сөһбәтдән сонра бу кими мәнфи фикирләрдән азад олдум» (1 Кор. 7:8, 9, 39).
Башына чохлу бәлалар ҝәлән мәзмурчу Давуд дејирди: «Рәббин ҝөзү салеһләрин үзәриндәдир, гулаглары онларын фәрјадларына ачыгдыр» (Мәз. 34:15). Әминликлә дејә биләрик ки, Јеһова гәлби сызлајан инсанларын фәрјадына дүз вахтында һај верир вә О, буну јеткин, шәфгәтли мәсиһчиләрин анлајыш долу сөзләри васитәсилә едир. Белә көмәк, һәгигәтән дә, чох дәјәрли вә еффективдир.
Мәсиһчи јығынҹағынын тәгдим етдији көмәк
Мәјуслуға гапылмыш инсан мәнфи шејләр барәдә дүшүнмәјә мејилли олдуғундан өзүнү башгаларындан тәҹрид едә биләр. Лакин Сүлејманын мәсәлләри 18:1 ајәси бизи бундан чәкиндирәрәк дејир: «Тәнһалығы севән нијјәтинин ардынҹа дүшүр, сағлам шүура зидд ҝедир». Алекс етираф едир: «Инсан һәјат јолдашыны итирәндә онун башында чохлу мәнфи фикирләр долашыр». О, дәфәләрлә өзүндән сорушурду: «Башга нә исә едә биләрдимми? Даһа диггәтли вә анлајышлы ола биләрдимми? Мән тәк-тәнһа галмаг истәмирдим. Бу ҹүр фикирләрдән јаха гуртармаг чох чәтиндир, чүнки һәр ҝүн тәк олмағын реаллығы илә үз-үзә дурурсан».
Руһән әзҝин инсанларын үнсијјәтә һәмишәкиндән даһа чох еһтијаҹы вар. Белә үнсијјәти мәсиһчи јығынҹагларында тапмаг олар. Орада биз Аллаһын руһландырыҹы фикирләрини ешидирик.
Мәсиһчи ҝөрүшләри вәзијјәтимизә дүзҝүн јанашмаға көмәк едир. Мүгәддәс Китабдан охунан фикирләрә гулаг асанда вә онларын үзәриндә дүшүнәндә диггәтимиз јалныз өз дәрдимизә јох, олдугҹа ваҹиб олан бир мәсәләјә — Јеһованын али һөкмранлығынын бәраәт газанмасына вә Онун адынын тәгдис олунмасына јөнәлир. Үстәлик, ҝөрүшләрдә ешитдијимиз фикирләрин сајәсиндә биз даһа да әмин олуруг ки, башгалары вәзијјәтимиздән бихәбәр олсалар, јахуд нәләр кечирдијимизи баша дүшмәсәләр дә, Јеһова һәр шејдән хәбәрдардыр вә бизи анлајыр. О билир ки, «үрәјин кәдәри көнлү сындырар» (Сүл. мәс. 15:13). Һәгиги Аллаһ бизә көмәк етмәк истәјир. Буну билмәк биздә јашамаг истәји ојадыр вә һәјатымызы давам етдирмәк үчүн ҝүҹ верир (Мәз. 27:14).
Дүшмәнләрин дәһшәтли һүҹумуна мәруз галан падшаһ Давуд Аллаһа фәрјад едирди: «Руһдан дүшмүшәм, бу дәһшәт гәлбими сарсытды» (Мәз. 143:4). Бәдбәхтликләр чох вахт инсаны емосионал вә физики ҹәһәтдән үзүр, һәтта онун сарсынты кечирмәсинә сәбәб олур. Инсан ади вә ја узун сүрән хәстәлик уҹбатындан бу ҹүр һала дүшә биләр. Әмин ола биләрик ки, Јеһова таб ҝәтирмәјимиз үчүн бизә көмәк едәҹәк (Мәз. 41:1—3). Аллаһ бу ҝүн һеч кәсә мөҹүзәли шәкилдә шәфа вермәсә дә, әзијјәт чәкән инсана мүдриклик верә вә чәтинлијә дөзмәси үчүн ону мөһкәмләндирә биләр. Ҝәлин унутмајаг ки, Давуд дара дүшәндә Јеһоваја үз тутарды. О охујурду: «Гәдим дөврләр јадыма дүшүр, Сәнин бүтүн ишләрини дәриндән дүшүнүрәм, әмәлләрин барәдә һеј фикирләширәм» (Мәз. 143:5).
Бу кими һиссләрин Аллаһын Кәламында јазылмасы ҝөстәрир ки, Јеһова бизим һиссләримизи баша дүшүр. Бу сөзләр Онун јалварышларымызы ҹавабсыз гојмајаҹағына зәманәт верир. Биз Јеһованын көмәјини гәбул етсәк, О, бизә ‘дајаг олар’ (Мәз. 55:22).
«Даима дуа един»
Јагуб 4:8 ајәсиндә дејилир: «Аллаһа јахынлашын, О да сизә јахынлашаҹаг!» Аллаһа јахынлашмағын үсулларындан бири дуадыр. Һәвари Павел бизи ‘даима дуа етмәјә’ тәшвиг едир (1 Салон. 5:17). Һиссләримизи ифадә етмәјә сөз тапмајанда «руһ ифадә едә билмәдијимиз аһларла бизим әвәзимизә Аллаһа јалварыр» (Ром. 8:26, 27). Јеһова бизим һансы һиссләри кечирдијимизи чох јахшы билир.
Јеһова илә бу ҹүр етибарлы мүнасибәти олан Моника адлы баҹы дејир: «Дуанын, Мүгәддәс Китабы охумағын вә шәхси өјрәнмәнин сајәсиндә Јеһованын мәним ән јахын достум олдуғуну һисс етдим. О, мәним үчүн о гәдәр реалдыр ки, даим Онун гајғысыны һәјатымда һисс едирәм. Һиссләрими ифадә етмәк үчүн сөз тапмајанда мәни баша дүшдүјүнү билмәк чох тәсәлливериҹидир. Мән билирәм ки, Онун хејирхаһлығы вә хејир-дуалары түкәнмәздир».
Ҝәлин һәмиманлыларымызын мәһәббәтли вә тәсәлливериҹи сөзләрини диггәтлә динләјәк, мәсиһчи ҝөрүшләриндә сәсләнән ҝөзәл мәсләһәтләри вә иманы мөһкәмләндирән хатырлатмалары тәтбиг едәк вә дуада дәрдимизи Јеһоваја сөјләјәк. Бунлар Јеһованын гајғымыза галдығына дәлаләт едир. Алекс өз тәҹрүбәсиндән дејир: «Руһән мөһкәм галмағымыз үчүн Јеһованын тәгдим етдији һәр шејдән фајдаланаг дејә Онун бүтүн тәләбләрини јеринә јетирмәлијик. Онда истәнилән сынағын өһдәсиндән ҝәлмәјимиз үчүн ‘инсан ҝүҹүндән үстүн олан гүдрәтимиз’ олаҹаг» (2 Кор. 4:7).
[18-ҹи сәһифәдәки чәрчивә/шәкил]
Гәдди әјиләнләрә тәсәлли
«Зәбур» китабы инсанларын кечирдији мүхтәлиф һиссләри тәсвир етмәклә јанашы, бизи дөнә-дөнә әмин едир ки, Јеһова мәнәви сарсынты уҹбатындан гәдди әјилән инсанын фәрјадына һај верир. Нөвбәти ајәләрә фикир верин:
«Әзаб ичиндә Рәббә јалвардым, Аллаһыма фәрјад гопардым. О, мәбәдиндән сәсими ешитди, фәрјадымса һүзуруна, Онун гулағына јетди» (Мәз. 18:6).
«Рәбб гәлбисыныглара јахындыр, О, руһән әзилмишләри гуртарыр» (Мәз. 34:18).
«О, [Јеһова] сыныг гәлбләрә шәфа верәр, јараларыны сарыјар» (Мәз. 147:3).
[17-ҹи сәһифәдәки шәкил]
Бәдбәхтлик үз верәндә «јериндә» дејилән сөзләр инсана тәсәлли верә биләр