Мүгәддәс руһун вердији ҝүҹлә истәнилән сынағын өһдәсиндән ҝәлирик
«Чүнки мәнә гүввәт верәнин сајәсиндә һәр шејә ҝүҹүм чатыр» (ФИЛИП. 4:13).
1. Нәјә ҝөрә Јеһованын хидмәтчиләри чохлу бәдбәхтликләрлә үзләширләр?
ЈЕҺОВАНЫН хидмәтчиләри мүхтәлиф ҹүр бәдбәхтликләрдән сығорталанмајыблар. Сынагларла үзләшмәјимизин сәбәбләриндән бири гејри-камиллик вә ја јашадығымыз бу пис системдир. Диҝәр сәбәб исә Аллаһа хидмәт едәнләрлә етмәјәнләр арасында мөвҹуд олан әдавәтдир (Јар. 3:15). Гәдим заманларда Аллаһ Өз садиг хидмәтчиләринә дини тәгибләрә, инсанлар тәрәфиндән ҝөстәрилән тәзјигә вә мүхтәлиф ҹүр бәдбәхтликләрә таб ҝәтирмәк үчүн көмәк едирди. Онун мүгәддәс руһу бизә дә ҝүҹ верә биләр.
Дини тәгибләр
2. Дини тәгибләрин мәгсәди нәдән ибарәтдир вә бу тәгибләр һансы формада олур?
2 Инсаны дининә ҝөрә тәгиб етмәк она иманына вә ја әгидәсинә ҝөрә гәсдән зүлм етмәк, јахуд хәсарәт јетирмәк демәкдир. Дини тәгибләрин мәгсәди бу етигадларын көкүнү кәсмәк, онун јајылмасынын гаршысыны алмаг вә ја Аллаһа хидмәт едәнләри нөгсансызлыг јолундан дөндәрмәкдән ибарәтдир. Тәгибләр мүхтәлиф ҹүр — ачыг вә ја ҝизли шәкилдә олур. Мүгәддәс Китабда Шејтанын һүҹумлары һәм ҝәнҹ асланын, һәм дә әфи иланын һүҹумлары илә мүгајисә олунур. (Мәзмур 91:13 ајәсини оху.)
3. Шејтан вәһши аслан вә әфи илан кими неҹә һүҹум едир?
3 Вәһши бир аслан кими, Шејтан зоракылыг, һәбсә салынма вә ја гадағалар кими васитәләрә әл атараг бирбаша вә ачыг һүҹума кечир (Мәз. 94:20). Јеһованын Шаһидләринин мүасир фәалијјәтиндән бәһс едән «Иллик мәҹмуә»дә онун бу үсулуна даир чохлу нүмунәләр вар. Вахташыры дүнјанын бир чох јерләриндә Аллаһын халгы фанатик дини вә ја сијаси рәһбәрләр тәрәфиндән гызышдырылан издиһамын һүҹумларына мәруз галыр. Ҝәнҹ асланын һүҹумларына бәнзәјән белә һүҹумлар бәзиләрини Јеһоваја хидмәтләрини дајандырмаға вадар едиб. Инсанларын зеһнини зәһәрләмәк вә онлары өз ирадәсинә табе етдирмәк үчүн Иблис, зәһәрли илан кими, гәфләтән дә һүҹум едә биләр. Бу кими һүҹумларын мәгсәди бизи руһән зәифләтмәк вә ја руһанилијимизи позмагдыр. Лакин Аллаһын мүгәддәс руһу васитәсилә тәгибин һәр ики нөвүнә гаршы дура биләрик.
4, 5. Тәгибләрә һазырлашмағын ән јахшы үсулу һансыдыр вә нәјә ҝөрә? Нүмунә чәкин.
4 Ҝәләҹәкдә баш верә биләҹәк мүхтәлиф тәгибләр барәдә дүшүнмәк онлара һазырлашмаг үчүн јахшы үсул дејил. Чүнки биз билмирик, ҝәләҹәкдә бизи һансы тәгибләр ҝөзләјир, буна ҝөрә дә, ола билсин, һеч вахт баш вермәјәҹәк һадисәләрә ҝөрә габагҹадан нараһатчылыг кечирмәјин һеч бир фајдасы јохдур. Анҹаг бу, бизим тамамилә чарәсиз олдуғумузу ҝөстәрмир. Әксәр инсанлара тәгибләрә синә ҝәрмәкдә Мүгәддәс Јазыларда гәләмә алынан инсанларын садиглик вә нөгсансызлыг нүмунәләри, еләҹә дә Исанын тәлимләри вә шәхси нүмунәси үзәриндә дүшүнмәк көмәк етмишдир. Бунун сајәсиндә онларын Јеһоваја олан мәһәббәти артмышдыр. Белә мәһәббәт исә онлара һәр бир сынаға таб ҝәтирмәјә көмәк етмишдир.
5 Ҝәлин Малавидән олан ики баҹынын нүмунәсинә нәзәр салаг. Азғынлашмыш издиһам баҹылары партија билети алмаға мәҹбур етмәк үчүн онлары дөјдү вә сојундурараг зорламагла һәдәләди. Онлар јаландан баҹылара дедиләр ки, һәтта Бет-Ел аиләсинин үзвләри белә артыг партија билети алыблар. Баҹылар нә ҹаваб вердиләр? Онлар дедиләр: «Биз јалныз вә јалныз Јеһова Аллаһа хидмәт едирик. Бет-Елдәки гардашларын билет алыб-алмамаларынын бизим үчүн һеч бир фәрги јохдур. Бизи өлдүрсәниз белә, биз ҝүзәштә ҝедән дејилик!» Баҹыларын ҹәсарәтини ҝөрән издиһам онлары сәрбәст бурахды.
6, 7. Тәгибләр заманы Јеһова хидмәтчиләринә неҹә ҝүҹ верир?
6 Һәвари Павел гејд етмишдир ки, Салоникдәки мәсиһчиләр ‘бир чох әзијјәтләрлә’ үзләшмәләринә бахмајараг, һәгигәт хәбәрини «мүгәддәс руһун һасил етдији севинҹлә» гәбул етмишдиләр (1 Салон. 1:6). Биринҹи әсрдә вә мүасир дөврдә чохлу тәгибләрлә үзләшән вә онлара таб ҝәтирә билән мәсиһчиләр сынагларынын ән чәтин анында Аллаһын мүгәддәс руһунун бәһрәсинә дахил олан сүлһ, јәни гәлб раһатлығы һисс етмишләр (Галат. 5:22). Гәлб раһатлығы исә онлара үрәкләрини вә зеһинләрини горумагда көмәк етмишдир. Бәли, Јеһова фәал гүввәси васитәсилә хидмәтчиләринә сынаглара таб ҝәтирмәләри үчүн ҝүҹ вә бәдбәхтликләр заманы мүдриклик верирa.
7 Аллаһын хидмәтчиләрини кәнардан мүшаһидә едән инсанлар онларын ән дәһшәтли тәгибләр заманы белә нөгсансызлыгларыны горумаг әзмләринә һејрандырлар. Бу инсанлара елә ҝәлир ки, Јеһованын Шаһидләри гејри-ади ҝүҹә маликдирләр. Онлар јанылмырлар. Һәвари Петер бизи әмин едир: «Әҝәр сизи Мәсиһин адына ҝөрә тәһгир едирләрсә, сиз хошбәхтсиниз, чүнки шөһрәт руһу, јәни Аллаһын руһу үзәриниздәдир» (1 Пет. 4:14). Салеһлик уғрунда тәгиб олунмағымыз ҝөстәрир ки, Јеһова биздән разыдыр (Мат. 5:10—12; Јәһ. 15:20). Буну билмәк бизи чох севиндирир!
Инсанлар тәрәфиндән ҝөстәрилән тәзјиг
8. а) Јешуа вә Калевә сојдашларынын тәзјигинә ујмамаға нә көмәк етмишди? б) Бу ики нәфәрин нүмунәсиндән нә өјрәнирик?
8 Шејтанын даһа һијләҝәр тәләси исә инсанларын ҝөстәрдији тәзјигдир. Јеһованын руһу бу дүнјанын руһундан гат-гат ҝүҹлү олдуғу үчүн биз мәсиһчиләр бизә ришхәнд едән, барәмиздә јаланлар јајан вә ја бизи өз әхлаг нормалары чәрчивәсинә салмаға чалышан инсанлара гаршы дура биләрик. Јешуа вә Калевин нүмунәсинә нәзәр салаг. Бу ики нәфәри онларла бирҝә Кәнан торпағыны ҝәзиб-долашмаг үчүн ҝөндәрилән он кәшфијјатчынын фикри илә разылашмамаға нә тәшвиг етмишди? Мүгәддәс руһ онларын дахилиндә тамамилә башга бир «руһ» вә ја дүшүнҹә тәрзи һасил етмишди. (Сајлар 13:30; 14:6—10, 24 ајәләрини оху.)
9. Нәјә ҝөрә мәсиһчиләр башгаларындан фәргләнмәјә һазыр олмалыдырлар?
9 Мүгәддәс руһ Исанын һәвариләринә чохларынын һәгиги динин мүәллимләри кими һөрмәт етдији инсанлара јох, Аллаһа итаәт етмәјә ҝүҹ вермишди (Һәв. иш. 4:21, 31; 5:29, 32). Әксәр инсанлар мүбаһисә вә гаршыдурмалардан гачмаг үчүн чохлуғун ардынҹа ҝетмәјә үстүнлүк верирләр. Һәгиги мәсиһчиләр исә дүзҝүн һесаб етдикләри шејләрә ҝөрә чох вахт гәти мөвге тутмалы олурлар. Һәтта бу кими һалларда онлар башгаларындан фәргләнмәјә горхмурлар, чүнки Аллаһын фәал гүввәси онлара ҝүҹ верир (2 Тим. 1:7). Ҝәлин јалныз бир саһәјә нәзәр салаг.
10. Бәзи мәсиһчиләр һансы сечим гаршысында дурур?
10 Бәзи ҝәнҹләр достларынын Мүгәддәс Китаба зидд олан һәрәкәтләри барәдә хәбәр тутанда билмирләр, нә етсинләр. Онлар дүшүнә биләрләр ки, јығынҹаг ағсаггалларындан көмәк истәмәк доста гаршы хәјанәтә бәрабәрдир вә буна ҝөрә дә сусмаг гәрарына ҝәлирләр. Ҝүнаһ ишләдән ҝәнҹ һәтта достуна тәзјиг ҝөстәрәрәк ондан ҝүнаһы барәдә һеч кәсә данышмамағы хаһиш едә биләр. Әлбәттә, бу кими проблемләрлә тәкҹә ҝәнҹләр үзләшмир. Бәзи бөјүкләр дә ағсаггаллара аилә үзвләринин вә ја достларынын ҝүнаһ ишләтдикләрини демәкдән чәкинирләр. Бәс һәгиги мәсиһчиләр белә тәзјиглә үзләшәндә неҹә давранмалыдырлар?
11, 12. Јығынҹағын үзвү сәндән өз ҝүнаһы барәдә ағсаггаллара демәмәји хаһиш едирсә, нә етмәлисән вә нәјә ҝөрә?
11 Белә бир вәзијјәти тәсәввүр едәк. Фуад адында ҝәнҹ бир гардаш хәбәр тутур ки, јығынҹагдакы досту Азәр порнографијаја бахмағы вәрдиш едиб. Фуад Азәрә буна ҝөрә чох нараһат олдуғуну дејир. Лакин Азәр онун сөзләрини гулагардына вурур. Фуад тәкидлә достуна ағсаггалларла сөһбәт етмәји мәсләһәт ҝөрүр. Амма Азәр дејир ки, әҝәр ону, һәгигәтән дә, өзүнә дост билирсә, ҝедиб ағсаггаллара хәбәрчилик етмәјәҹәк. Фуад достуну итирәҹәјиндән горхмалыдырмы? Азәр һәр шеји инкар едәҹәји тәгдирдә ағсаггалларын кимә инанаҹаглары суалы Фуады нараһат едә биләр. Анҹаг Фуад сусуб бу мәсәлә барәдә һеч нә демәсә, вәзијјәт дүзәлмәјәҹәк. Бу һәтта Азәрин Јеһова илә мүнасибәтләрини итирмәсинә ҝәтириб чыхара биләр. Фуад унутмамалыдыр ки, «инсандан горхан өзүнү тәләјә салар, амма Рәббә ҝүвәнән архајын јашар» (Сүл. мәс. 29:25). Фуад даһа нә едә биләр? О, јенидән Азәрә јахынлашыб меһрибанҹасына, лакин ачыг шәкилдә онун проблеми барәдә данышмалыдыр. Бунун үчүн ҹәсарәт лазымдыр. Ола билсин, бу дәфә Азәр өз проблемини мүзакирә етмәјә даһа һәвәсли олаҹаг. Фуад јенә дә Азәри ағсаггаллара јахынлашмаға тәшвиг етмәлидир вә она демәлидир ки, әҝәр мүәјјән вахт әрзиндә буну етмәсә, ҝедиб өзү онларла сөһбәт едәҹәк (Лев. 5:1).
12 Әҝәр сән дә белә вәзијјәтә дүшмүсәнсә, бәлкә дә, достун илк әввәл сәнин она көмәк етмәк сәјләрини гијмәтләндирмәди. Лакин сонрадан, ола билсин, о баша дүшәҹәк ки, сән онун хејри үчүн чалышырсан. Әҝәр ҝүнаһ ишләдән достун она ҝөстәрилән көмәји гәбул едәрсә, ҹәсарәт вә садиглик ҝөстәрдијинә ҝөрә һәмишә сәнә миннәтдар олаҹаг. Анҹаг сәнә гаршы кин сахламаға давам едәрсә, истәјәрдинми ки, бу ҹүр инсан сәнин достун олсун? Ән бөјүк Достумузу, Јеһованы разы салмаг һәмишә дүзҝүндүр. Јеһованы биринҹи јерә гојанда, Ону севәнләр садиглијимизә ҝөрә бизә һөрмәт едәҹәк вә бизим әсил достларымыз олаҹаглар. Биз һеч вахт мәсиһчи јығынҹағында Иблисә јер вермәмәлијик. Әкс тәгдирдә, Јеһованын мүгәддәс руһуну кәдәрләндирәҹәјик. Мәсиһчи јығынҹағыны тәмиз сахламаға чалышмагла биз бу руһа ујғун давранырыг (Ефес. 4:27, 30).
Һәр ҹүр бәдбәхтликләр
13. Јеһованын хидмәтчиләри илә һансы бәдбәхтликләр баш верә биләр вә нәјә ҝөрә бу кими шејләр чох ҝениш јајылыб?
13 Бәдбәхтликләр мүхтәлиф ҹүр олур. Мисал үчүн, мадди чәтинлик, ишин итирилмәси, тәбии фәлакәт, әзиз адамын өлүмү, сәһһәтин писләшмәси. Биз ‘ағыр зәманәдә’ јашадығымыз үчүн ҝеҹ-тез бу вә ја диҝәр сынагларла үзләшәҹәјимизлә разылашмалыјыг (2 Тим. 3:1). Белә һалларда ән ваҹиби тәлаша дүшмәмәкдир. Мүгәддәс руһун вердији ҝүҹ сајәсиндә биз истәнилән сынаға таб ҝәтирмәјә гадирик.
14. Әјјуб бәдбәхтликләрә таб ҝәтирмәк үчүн һарадан ҝүҹ алырды?
14 Әјјубун башына далбадал бир нечә бәдбәхтлик ҝәлди. О, вар-дөвләтини, өвладларыны, достларыны вә сағламлығыны итирди. Үстәлик, арвадынын Јеһоваја олан етибары сарсылды (Әјј. 1:13—19; 2:7—9). Бунунла белә, Елиһу Әјјуб үчүн әсил тәсәлли мәнбәји олду. Онун вә Јеһованын она дедији сөзләрин мәғзи бундан ибарәт иди: «Бир дајан, Аллаһын һејрәтамиз ишләриндән дүшүн» (Әјј. 37:14). Әјјуб нәјин сајәсиндә сынаглара таб ҝәтирә билди? Бәс биз буну неҹә едә биләрик? Бунун үчүн Јеһованын Өз ҝүҹүнү неҹә тәзаһүр етдирдијини вә мүгәддәс руһу васитәсилә ҝөрдүјү ишләрини јадда сахламалы вә үзәриндә дүшүнмәлијик (Әјј. 38:1—41; 42:1, 2). Јәгин ки, Аллаһын шәхсән бизә мараг ҝөстәрдији анлары хатырлајырыг. О, инди дә бизә гаршы лагејд дејил.
15. Сынаглара таб ҝәтирмәк үчүн һәвари Павел ҝүҹү һарадан алды?
15 Иманына ҝөрә һәвари Павел бир чох тәһлүкәләрлә үзләшмишди (2 Кор. 11:23—28). Белә чәтин вәзијјәтләрдә таразлығы вә руһ јүксәклијини горумаға она нә көмәк етмишди? Дуа вә Јеһоваја олан етибары. Әзаблы өлүмлә нәтиҹәләнән сынаг заманы о јазмышды: «Ағамыз јанымда дуруб мәнә ҝүҹ верирди ки, тәблиғ иши мәним васитәмлә там јеринә јетирилсин вә бүтүн милләтләр бу хош хәбәри ешитсин. Беләҹә, мән ширләрин ағзындан гуртулдум» (2 Тим. 4:17). Буна ҝөрә дә шәхси тәҹрүбәсинә әсасланараг, Павел һәмиманлыларыны әмин едә биләрди ки, нәјә ҝөрәсә ‘нараһат олмаға’ дәјмәз. (Филипилиләрә 4:6, 7, 13 ајәләрини оху.)
16, 17. Јеһова бу ҝүн Өз халгына бәдбәхтликләрин өһдәсиндән ҝәлмәк үчүн неҹә ҝүҹ верир? Нүмунә чәкин.
16 Рәксанә адлы пионер баҹы Јеһованын Өз халгынын гајғысына галдығына шәхсән өзү әмин олмушду. Конгресә ҝетмәк үчүн мүдириндән бир нечә ҝүнлүк иҹазә истәјәндә мүдир гәзәблә деди ки, әҝәр конгресә ҝетсә, ону ишдән чыхараҹаг. Буна бахмајараг, баҹы ҝетмәк гәрарындан дөнмәди вә сәјлә дуа едирди ки, ишини итирмәсин. Дуадан сонра о, гәлб раһатлығы һисс етди. Мүдир өз сөзүнә әмәл едәрәк конгресдән сонра, базар ертәси Рәксанәни ишдән говду. Баҹы чох мәјус олмушду. Бу иш азмәваҹибли олса да, Рәксанәнин она еһтијаҹы варды, чүнки о, аиләсини доландырмалы иди. О, јенә дә дуа етди вә фикирләшди ки, әҝәр Јеһова конгресдә онун руһани еһтијаҹларыны тәмин етдисә, демәли, физики еһтијаҹларыны да унутмајаҹаг. Рәксанә евә ҝедәркән ҝөзләри «Ишчи тәләб олунур!» еланына саташды. Бурада тәҹрүбәли истеһсал тикиш машыны оператору тәләб олунурду. О, ичәри дахил олуб иш үчүн бланкы долдурду. Рәксанәнин бу саһәдә тәҹрүбәсинин олмамасына бахмајараг, мүдир ону ишә ҝөтүрдү. Үстәлик, бурада алдығы мәваҹиб, демәк олар ки, әввәлки иш јериндә алдығы мәваҹибдән ики дәфә чох иди. Рәксанә ҝөрдү ки, Јеһова онун дуаларыны ҹавабсыз гојмады. Ән бөјүк хејир-дуа исә иш јолдашларына хош хәбәри тәблиғ етмәси олду. Бунун сајәсиндә, ону ишә ҝөтүрән мүдир дә дахил олмагла, беш нәфәр һәгигәти гәбул едиб вәфтиз олду.
17 Бәзән бизә елә ҝәлә биләр ки, дуаларымыз ҹавабсыз галыр, јахуд да ҹаваб ҝеҹикир вә ја алдығымыз ҹаваб бизи гане етмир. Әҝәр беләдирсә, әмин ола биләрик ки, бунун үчүн әсаслы сәбәб вар. Бу сәбәб Јеһоваја мәлумдур вә биз буну, ола билсин, јалныз ҝәләҹәкдә биләҹәјик. Лакин бир шејә биз шүбһә етмәмәлијик — Јеһова һеч вахт Өз садиг бәндәләрини тәрк етмир (Ибр. 6:10).
Сынаглар заманы дәстәк
18, 19. а) Нәјә ҝөрә биз мүхтәлиф сынагларла гаршылашырыг? б) Онлара неҹә таб ҝәтирмәк олар?
18 Јеһованын халгы мүхтәлиф сынагларла — ширникдириҹи тәсирләрлә, руһ дүшкүнлүјү илә, тәгибләрлә вә инсанларын тәзјиги илә үзләшәндә буна тәәҹҹүбләнмир. Дүнја үмумиликдә бизә гаршы әдавәтли мүнасибәт бәсләјир (Јәһ. 15:17—19). Лакин мүгәддәс руһ бизә Јеһоваја хидмәтдә үзләшдијимиз һәр бир чәтинлијин өһдәсиндән ҝәлмәјә көмәк едә биләр. Јеһова ҝүҹүмүздән артыг сынанмағымыза һеч вахт јол вермәјәҹәк (1 Кор. 10:13). О, һеч вахт бизи тәрк етмәјәҹәк (Ибр. 13:5). Онун мүгәддәс руһунун тәсири алтында јазылан Кәламына риајәт етмәјимиз бизи мүдафиә едәҹәк вә мөһкәмләндирәҹәк. Үстәлик, Аллаһын руһу һәмиманлыларымызы ән чох еһтијаҹ дујдуғумуз анларда бизә көмәк етмәјә тәшвиг едә биләр.
19 Ҝәлин дуа етмәклә вә Мүгәддәс Јазылары арашдырмаға давам етмәклә мүгәддәс руһун көмәјини ахтараг вә ‘ахыра гәдәр дөзмәк вә севинҹлә сәбир етмәк үчүн [Аллаһын] шанлы гүдрәти сајәсиндә даима ҝүҹләнәк’ (Колос. 1:11).
[Һашијә]
a Нүмунә үчүн «Ҝөзәтчи Гүлләси»нин 2001-ҹи ил 1 ијул сајынын 22-ҹи сәһифәсинә вә «Ојанын!» журналынын 1993-ҹү ил 8 март сајынын 21, 22-ҹи сәһифәләринә (рус.) бахын.
Неҹә ҹаваб верәрдиниз?
• Тәгибләрә неҹә һазырлаша биләрик?
• Кимсә биздән ҝүнаһы барәдә ағсаггаллара демәмәји хаһиш едәндә нә етмәлијик?
• Мүхтәлиф бәдбәхтликләрлә үзләшәндә нәјә әмин ола биләрсән?
[28-ҹи сәһифәдәки шәкил]
Јешуа вә Калевдән нә өјрәнирик?
[29-ҹу сәһифәдәки шәкил]
Ҝүнаһ ишләдән достумуза неҹә көмәк едә биләрик?