Аллаһын Кәламындан нә өјрәнирик?

Нәјә ҝөрә Аллаһдан өјрәнмәлијик?

Бу мәгалә сизи марагландыран суаллара тохунур вә онларын ҹавабыны Мүгәддәс Китабынызда тапмаға көмәк едир. Јеһованын Шаһидләри сизинлә бу суаллары мәмнунијјәтлә мүзакирә едәҹәкләр.

1. Нәјә ҝөрә Аллаһдан өјрәнмәлијик?

Аллаһын бәшәријјәтә хош хәбәри вар. Бу хәбәр Мүгәддәс Китабын сәһифәләриндә ачыгланыр. Мүгәддәс Китабы севән Јараданымызын мәктубу илә мүгајисә етмәк олар. (Јеремја 29:11 ајәсини оху.)

2. Аллаһ бизә һансы хош хәбәри чатдырыр?

Бәшәријјәт јахшы һөкумәтә мөһтаҹдыр. Һәлә елә бир инсан һакимијјәти олмајыб ки, инсанлары зоракылыгдан, әдаләтсизликдән, хәстәлик вә өлүмдән азад етсин. Анҹаг сизи севиндирмәк истәјирик. Аллаһ бәшәријјәтә јахшы һөкумәт бәхш едәҹәк. Бу һөкумәт әзаб-әзијјәтин бүтүн сәбәбләрини арадан галдыраҹаг. (Даниел 2:44 ајәсини оху.)

3. Нәјә ҝөрә Аллаһдан өјрәнмәк чох ваҹибдир?

Тезликлә Аллаһ јер үзүнү әзаб-әзијјәтләр төрәдән инсанлардан тәмизләјәҹәк. Бу арада О, милјонларла һәлимүрәкли инсанлара мәһәббәтә әсасланмыш ән јахшы һәјат јолу илә ҝетмәји өјрәдир. Инсанлар Аллаһын Кәламындан һәјатда гаршылашдыглары проблемләрин өһдәсиндән ҝәлмәјин, һәгиги хошбәхтлији тапмағын вә Аллаһы разы салмағын јолларыны өјрәнирләр. (Сефанја 2:3 ајәсини оху.)

4. Мүгәддәс Китабын мүәллифи кимдир?

Мүгәддәс Китаб 66 балаҹа китабдан ибарәтдир. Онлар 40 нәфәр киши тәрәфиндән јазылыб. Илк беш китабы Муса пејғәмбәр тәхминән 3500 ил бундан әввәл гәләмә алыб. Ахырынҹы китабы исә, тәхминән 1900 ил бундан әввәл һәвари Јәһја јазмышдыр. Лакин Мүгәддәс Китабы јазанлар өзләринин јох, Аллаһын фикирләрини јазырдылар. Буна ҝөрә дә, демәк олар ки, Мүгәддәс Китабын мүәллифи Аллаһдыр. (2 Тимотејә 3:16; 2 Петер 1:21 ајәләрини оху.)

Мүгәддәс Китабын Аллаһдан олдуғуна әминик, чүнки орада ҝәләҹәкдә баш верәҹәк шејләр тәфәррүаты илә дәгиг тәсвир олунур. Һеч бир инсан буна гадир дејил (Јешаја 46:9, 10). Һәмчинин Мүгәддәс Китабда Аллаһын неҹә шәхсијјәт олдуғу ачыгланыр. Аллаһын Кәламы инсанларын һәјатыны јахшылыға доғру дәјишмәк гүввәсинә маликдир. Бу фактлар милјонларла инсаны Мүгәддәс Китабда јазыланларын Аллаһын сөзү олдуғуна әмин етмишдир. (Јешуа 23:14; 1 Салониклиләрә 2:13 ајәләрини оху.)

5. Мүгәддәс Китабы анламагда сизә нә көмәк едә биләр?

Иса пејғәмбәр Аллаһын Кәламынын мүәллими кими танынырды. Сөһбәт етдији инсанларын Мүгәддәс Китабла јахындан таныш олмаларына бахмајараг, Кәламы баша дүшмәк үчүн онларын көмәјә еһтијаҹы вар иди. Иса онлары баша салмаг үчүн Аллаһын Кәламындан ајәләр ситат ҝәтирир вә «Мүгәддәс Јазыларын мәнасыны» изаһ едирди. Сизә көмәк етмәк үчүн «Аллаһын Кәламындан нә өјрәнирик?» рубрикасында да ејни үсулдан истифадә олунаҹаг. (Лука 24:27, 45 ајәләрини оху.)

Һәјатын мәнасы барәдә Аллаһдан өјрәнмәк сизин үчүн чох мараглы ола биләр. Лакин бәзи инсанлар сизин Мүгәддәс Китабы охумағыныза севинмәјәҹәк. Руһдан дүшмәјин. Сизин әбәди һәјата үмидиниз Аллаһ һаггында даима өјрәнмәјиниздән асылыдыр. (Матта 5:10—12; Јәһја 17:3 ајәләрини.)

[17 сәһифәдәки шәкил]

Әлавә мәлумат алмаг үчүн Јеһованын Шаһидләри тәрәфиндән нәшр олунан «Мүгәддәс Китаб әслиндә нә өјрәдир?» китабынын 2-ҹи фәслинә баха биләрсиниз.