Аллаһын Кәламындан нә өјрәнирик?
Аллаһ кимдир?
Бу мәгалә сизи марагландыран суаллара тохунур вә онларын ҹавабыны Мүгәддәс Китабынызда тапмаға көмәк едир. Јеһованын Шаһидләри сизинлә бу суаллары мәмнунијјәтлә мүзакирә едәҹәкләр.
1. Аллаһ кимдир?
Аллаһ һәр шејин Јараданыдыр. Мүгәддәс Китабда О, «әбәдијјәт Падшаһы» адланыр, бу да о демәкдир ки, Онун нә башланғыҹы вар, нә дә сону (Вәһј 15:3). Һәјат мәнбәји Аллаһдыр вә биз јалныз Она ибадәт етмәлијик. (Вәһј 4:11 ајәсини оху.)
2. Аллаһы тәсвир етмәк мүмкүндүрмү?
Аллаһы һеч вахт һеч ким ҝөрмәмишдир, чүнки О, ҝөзәҝөрүнмәз Руһдур. Руһ јер үзүндә јашајан физики варлыглардан даһа үстүн һәјат формасыдыр (Јәһја 1:18; 4:24). Аллаһын хүсусијјәтләри Онун јаратдыгларындан ајдын ҝөрүнүр. Мәсәлән, биз ҹүрбәҹүр мејвәләри вә ҝүлләри сејр едәндә Аллаһын мәһәббәт вә мүдриклијини ҝөрүрүк. Уҹсуз-буҹагсыз Каинат бизә Онун ҝүҹүндән хәбәр верир. (Ромалылара 1:20 ајәсини оху.)
Биз Мүгәддәс Китабдан Аллаһ һаггында чох шеј өјрәнә биләрик. Орада Аллаһын нәји бәјәниб-бәјәнмәдији, јаратдығы бәндәләрлә неҹә рәфтар етдији, еләҹә дә мүхтәлиф вәзијјәтләрдә неҹә даврандығы барәдә данышылыр. (Мәзмур 103:7—10 ајәләрини оху.)
3. Аллаһын ады вармы?
Иса пејғәмбәр белә дуа едирди: «Сәмави Атамыз, гој адын мүгәддәс тутулсун» (Матта 6:9). Аллаһын чохлу титулларынын олмасына бахмајараг, Онун јалныз бир ады вар. Бу ад һәр дилдә мүхтәлиф ҹүр тәләффүз олунур. Азәрбајҹан дилиндә исә «Јеһова» вә ја бәзән «Јаһве» кими тәләффүз едилир. (Матта 4:10 вә Јарадылыш 3:15 ајәсиндәки һашијәни оху.)
Јеһованын ады Мүгәддәс Китабын бир чох тәрҹүмәләриндә «Рәбб» вә ја «Аллаһ» кими титулларла әвәз олунуб. Анҹаг Мүгәддәс Китабын орижинал мәтниндә бу ада тәхминән 7000 дәфә раст ҝәлинирди. Иса Мәсиһ Мүгәддәс Китабы изаһ едәркән Аллаһын адыны инсанлара бәјан едирди. О, инсанларын Аллаһы танымаларына көмәк едирди. (Јәһја 17:26 ајәсини оху.)
4. Аллаһ бизим гајғымыза галырмы?
Јеһова Аллаһ дуаларымызы динләмәклә бизимлә марагландығыны ҝөстәрир (Мәзмур 65:2). Бәс дүнјада бу гәдәр әзаб-әзијјәтин мөвҹуд олмасы о демәкдирми ки, Аллаһ бизим гајғымыза галмыр? Бәзиләри иддиа едирләр ки, Аллаһ инсанлара әзаб вермәклә онлары сынаға чәкир, лакин бу, һәгигәт дејил. Мүгәддәс Китабда дејилир: «Мәҝәр Аллаһ пислик едәрми?» (Әјјуб 34:10; Јагуб 1:13 ајәсини оху.)
Аллаһ инсана ирадә азадлығы вермәклә ону шәрәфә лајиг ҝөрүб. Биз бу азадлығымыздан Аллаһа хидмәт етмәк үчүн истифадә етмәли дејиликми? (Јешуа 24:15). Бир чохлары башгаларына пислик етдикләри үчүн дүнјада изтираблар баш алыб ҝедир. Бу ҹүр һагсызлыглары ҝөрмәк Аллаһ үчүн чох ағырдыр. (Јарадылыш 6:5, 6 ајәләрини оху.)
Тезликлә Јеһова Аллаһ Иса Мәсиһ васитәсилә бүтүн изтираблары вә пислик төрәдәнләри јох едәҹәк. Бунунла белә, Аллаһын мүвәггәти олараг әзаблара јол вермәсинин әсаслы сәбәбләри вар. Бу журналын нөвбәти сајларындан бириндә Аллаһын әзаблара нә үчүн јол вермәсинин сәбәбләри изаһ олунаҹаг. (Јешаја 11:4 ајәсини оху.)
5. Аллаһ биздән нә ҝөзләјир?
Јеһова Аллаһ бизи Ону таныјыб севмәк баҹарығы илә јарадыб. Аллаһ истәјир ки, биз Онун һаггында һәгигәти өјрәнәк (1 Тимотејә 2:4). Мүгәддәс Китабы өјрәнмәклә биз Ону бир дост кими таныја биләрик. (Сүлејманын мәсәлләри 2:4, 5 ајәләрини оху.)
Һәјаты бизә Јеһова бәхш етдији үчүн һамыдан чох Ону севмәлијик. Аллаһы севдијимизи дуада Она демәклә вә бујурдугларына әмәл етмәклә ҝөстәрә биләрик (Сүлејманын мәсәлләри 15:8). Јеһова Аллаһ бизим башгалары илә мәһәббәтлә рәфтар етмәјимизи истәјир. (Марк 12:29, 30; 1 Јәһја 5:3 ајәләрини оху.)
Даһа чох мәлумат әлдә етмәк үчүн Јеһованын Шаһидләри тәрәфиндән дәрҹ олунан «Мүгәддәс китаб әслиндә нә өјрәдир?» китабынын 1-ҹи фәслинә бахын.
[17-ҹи сәһифәдәки шәкил]
Мүвәггәти олараг әзаб-әзијјәтләрә јол вермәјин әсаслы сәбәбләри ола биләрми?