Охуҹуларын суаллары

Нәјә ҝөрә Надавла Авиһу өләндән сонра Мусанын Һарунун диҝәр оғулларына — Елеазарла Итамара гәзәби тутду вә онун гәзәбинин сојумасына нә сәбәб олду? (Лев. 10:16—20).

Мүгәддәс мәскәндә хидмәтләрин иҹра едилмәси үчүн каһинлијин тәсис олунмасындан аз сонра Јеһова Һарунун оғуллары Надавла Авиһуну Онун өнүндә «һарам од» ҝәтирдикләри үчүн мәһв етди (Лев. 10:1, 2). Муса әмр етди ки, Һарунун диҝәр ики оғлу гардашлары үчүн јас тутмасын. Бу һадисәнин үстүндән чох кечмәмиш Мусанын Елеазарла Итамара гәзәби тутду, чүнки онлар ҝүнаһ гурбаны олан тәкәни јемәмишдиләр (Лев. 9:3). Бәс нә үчүн Муса буна ҝөрә гәзәбләнди?

Јеһованын Муса васитәсилә вердији гануна әсасән, ҝүнаһ гурбаныны тәгдим едән каһин бу гурбанын бир һиссәсини Һүзур чадырынын һәјәтиндә јемәли иди. Бу, гурбаны тәгдим едән инсанларын ҝүнаһларына ҝөрә каһинин мәсулијјәт дашыдығынын рәмзи һесаб олунурду. Гурбан ҝәтирилән һејванын ганы Мүгәддәс јерә, јәни Һүзур чадырынын илк отағына дахил едилдији тәгдирдә ону јемәк олмазды; о јандырылмалы иди (Лев. 6:24—26, 30).

Ҝөрүнүр, баш верән фаҹиәли һадисәдән сонра Муса Јеһованын бүтүн әмрләринә риајәт олунуб-олунмадығыны јохламаг гәрарына ҝәлди. Ҝүнаһ тәгдими кими ҝәтирилән тәкәнин јандырылдығыны ҝөрәндә (гурбанын ганы Јеһованын өнүндә Мүгәддәс јердә тәгдим олунмамышды) Муса гәзәблә Елеазарла Итамардан сорушду ки, нәјә ҝөрә онлар гурбан әтини әмр едилдији кими јемәдиләр (Лев. 10:17, 18).

Мусанын суалына Һарун ҹаваб верди, чүнки, ҝөрүнүр, Елеазарла Итамар онун сөзүнә әсасән белә давранмышдылар. Јеһованын Надавла Авиһуну мәһв етмәсини нәзәрә алараг, јәгин, Һарун фикирләшди ки, нә о, нә дә ки оғуллары һәмин ҝүн тәмиз виҹданла ҝүнаһ гурбаныны јејә билмәзләр. Ола билсин, Һарун дүшүнүрдү ки, Надавла Авиһунун ҝүнаһына ҝөрә бүтүн аилә, гисмән дә олса, мәсулијјәт дашыјыр. Јәгин, елә буна ҝөрә о, онларын бу гурбан әтиндән јемәләринин Јеһоваја мәгбул олмајаҹағы гәнаәтинә ҝәлди (Лев. 10:19).

Хүсусилә дә, ола билсин, Һарун фикирләширди ки, каһинлик вәзифәсини иҹра етмәк шәрәфи илк дәфә онун аилә үзвләринә верилдији үчүн онлар чох еһтијатлы олмалы вә Јеһованын бүтүн әмрләринә хырдалығына гәдәр әмәл етмәли идиләр. Анҹаг Надавла Авиһу Јеһованын адына ләкә ҝәтирән һәрәкәт етдиләр вә онлара гаршы Аллаһын гәзәби аловланды. Јәгин, бу сәбәбдән Һарун дүшүндү ки, белә бир ҝүнаһын төрәдилдији каһин аиләсинин үзвләри мүгәддәс тәгдимләрдән јемәмәлидирләр.

Гардашынын вердији ҹаваб Мусанын үрәјинҹә иди, чүнки Мүгәддәс Китабда дејилир: «Муса буну ешидиб разылашды» (Лев. 10:20). Ҝөрүнүр, Һарунун ҹавабындан Јеһова да разы галды.