Јеремја кими ајыг-сајыг ол!
«Мән [Јеһова] һәр сөзүмү јеринә јетирмәкдә сајығам» (ЈЕР. 1:12).
1, 2. Нәјә ҝөрә Јеһованын ‘сајыглығы’ бадам ағаҹына бәнзәдилир?
ЛИВАН вә Исраил дағларында илк чичәкләнән ағаҹлардан бири бадам ағаҹыдыр. Јанварын сонунда, јахуд февралын әввәлиндә онун үстүндә ҝөзохшајан чәһрајы вә ја ағ чичәкләр ҝөрмәк олар. Ибрани дилиндә бу ағаҹын ады һәрфән «ојанан» демәкдир.
2 Јеһова Јеремјаны пејғәмбәр тәјин едәндә ваҹиб бир һәгигәти әјани шәкилдә ҝөстәрмәк үчүн бадам ағаҹынын бу ҹәһәтини вурғулады. Хидмәтинин лап әввәлиндә Јеһова ҝөрүнтүдә Јеремјаја бу ағаҹын будағыны ҝөстәрди. Бунунла О, нә демәк истәјирди? Јеһова Өзү изаһ едир: «Мән һәр сөзүмү јеринә јетирмәкдә сајығам» (Јер. 1:11, 12). Еркән чичәк ачан бадам ағаҹы кими, Јеһова да, мәҹази диллә десәк, «еркән» ојаныб пејғәмбәрләрини халгын јанына ҝөндәрирди ки, итаәтсизликләринин аҹы нәтиҹәләри барәдә онлара хәбәрдарлыг етсинләр (Јер. 7:25, «Китабы Мукаддес»). Ағзындан чыхан сөз јеринә јетмәјинҹә О истираһәт етмирди, ‘сајыглығыны’ горујурду. Нә ҝеҹ, нә тез, мәһз тәјин етдији вахтда, ерамыздан әввәл 607-ҹи илдә Јеһова дөнүк Јәһуда халгы үзәриндә һөкмүнү иҹра етди.
3. Јеһова барәдә нәјә әмин ола биләрик?
3 Бизим дөврдә дә Јеһова сајыглығыны горујур вә Өз ирадәсинин јеринә јетирилмәсинә диггәтлә нәзарәт едир. Мүмкүн дејил ки, Јеһова вердији сөзә лагејд јанашсын. Јеһованын ојаг олмасы сәнә неҹә тәсир едир? Инанырсанмы ки, Јеһова нијјәтини јеринә јетирмәк үчүн 2011-ҹи илдә дә ‘сајыглығыны’ горујур? Онун етибарлы вәдләринә даир һәр һансы шүбһәмиз варса вә руһән мүрҝүләмәјә башладығымызы һисс едириксә, инди јухудан ојанмағын әсил вахтыдыр! (Ром. 13:11). Јеремја, Јеһованын тәјин етдији бир пејғәмбәр кими, һеч вахт сајыглығыны итирмирди. Нәјә ҝөрә Јеремја Аллаһын она вердији тапшырығы јеринә јетирәркән сајыглығыны горујурду вә о, буну неҹә едирди? Бу суалы арашдырмаг Јеһованын бизә һәвалә етдији иши мәтанәтлә јеринә јетирмәјә көмәк едәҹәк.
Тәҹили хәбәр
4. Јеремја Аллаһын хәбәрини чатдыраркән һансы чәтинликләрлә үзләширди вә нәјә ҝөрә бу хәбәр олдугҹа тәҹили иди?
4 Јеһова Јеремјаны ҝөзәтчи тәјин едәндә онун тәхминән 25 јашы оларды (Јер. 1:1, 2). Анҹаг о дүшүнүрдү ки, халгын ағсаггаллары илә — јашҹа ондан бөјүк вә јүксәк вәзифәјә саһиб олан инсанларла данышмаг үчүн һәлә ҹавандыр вә бунун үчүн лазыми баҹарығы јохдур (Јер. 1:6). О, Јеһованын сәрт иттиһамларыны вә горхулу һөкмләрини ‘өз јолу’ илә ҝедәнләрә вә ‘даима дөнүклүк едәнләрә’, хүсусилә дә каһинләрә, јаланчы пејғәмбәрләрә вә һөкмдарлара чатдырмалы иди (Јер. 6:13; 8:5, 6). Тәхминән 400 ил һәгиги ибадәтин мәркәзи олан Сүлејманын тикдији мөһтәшәм мәбәд дармадағын едиләҹәкди. Јерусәлим вә Јәһуда виран галаҹаг, халг исә әсир апарылаҹагды. Ајдындыр ки, Јеремјанын чатдыраҹағы хәбәр чох тәҹили иди!
5, 6. а) Јеһова Јеремја синфиндән неҹә истифадә едир? б) Бу мәгаләдә нә арашдыраҹағыг?
5 Мүасир дөврдә Јеһова һөкмләри барәдә дүнјаны хәбәрдар етмәк үчүн ҝөзәтчи ролуну ојнајан мәсһ олунмуш мәсиһчиләрдән истифадә едир. Онилликләр әрзиндә Јеремја синфи бәшәријјәти һансы вахтда јашадығымыза диггәт јетирмәјә чағырыр (Јер. 6:17). Мүгәддәс Китабда вурғуланыр ки, Јеһова һеч вахт ҝеҹикмир; Јеһованын ҝүнү дүз Онун тәјин етдији вахтда — инсанларын ҝөзләмәдији бир вахтда ҝәләҹәк (Сеф. 3:8; Марк 13:33; 2 Пет. 3:9, 10).
6 Јеһованын һәр бир хидмәтчиси Онун тезликлә јени дүнја јарадаҹағыны билир. Беләликлә, онлар баша дүшүрләр ки, тәблиғ етмәк үчүн онлара әлавә вахт верилмәјәҹәк. Аллаһын хәбәрини инсанлара мәһз инди чатдырмаг олдугҹа ваҹибдир. Бәс сәнин һәјатында бу, өзүнү неҹә бүрузә верир? Иса гејд етмишди ки, бүтүн инсанлар Аллаһа хидмәт едиб-етмәјәҹәкләринә гәрар вермәлидирләр. Аллаһдан алдығы тапшырығын тәҹили олдуғуну дәрк етмәјә Јеремјаја һансы үч хүсусијјәт көмәк етмишди? Бу хүсусијјәтләр бизә неҹә көмәк биләр?
Инсанлара мәһәббәт
7. Чәтинликләрә бахмајараг, мәһәббәтин Јеремјаны тәблиғ етмәјә неҹә тәшвиг етдијини изаһ ет.
7 Чәтин шәраитә бахмајараг, Јеремјаны тәблиғ етмәјә нә тәшвиг едирди? Инсанлара мәһәббәт. Јеремја халгын башына ҝәлән бир чох бәлаларда јаланчы чобанларын ҝүнаһы олдуғундан аҝаһ иди (Јер. 23:1, 2). Бу, она тапшырығыны мәһәббәтлә вә шәфгәтлә иҹра етмәјә көмәк едирди. О истәјирди ки, сојдашлары Аллаһын сөзләринә гулаг асыб сағ галсынлар. Јеремја онлар үчүн о гәдәр нараһат олурду ки, үзәрләринә тезликлә ҝәләҹәк фәлакәтә ҝөрә һәтта ағламышды. (Јеремја 8:21; 9:1 ајәләрини оху.) «Мәрсијәләр» китабы Јеремјанын Јеһованын адына вә халгына бәсләдији мәһәббәти вә нараһатчылыгларыны ҹанлы шәкилдә тәсвир едир (Мәрс. 4:6, 9). Сән инсанларын «чобансыз гојунлар кими јазыг вә пәракәндә һалда» олдуғуну ҝөрәндә мәҝәр онлара Аллаһын Падшаһлығы һагда тәсәлливериҹи хәбәри данышмаг истәмирсән? (Мат. 9:36).
8. Әзаб-әзијјәтләрин Јеремјанын үрәјини даша дөндәрмәдијини нә ҝөстәрир?
8 Јеремја көмәк етмәк истәдији инсанларын әлиндән әзаб чәксә дә, нә әвәз чыхмаға чалышды, нә дә гәддар олду. О һәтта пис падшаһ Сидгијаја гаршы чох сәбирли вә хејирхаһ иди. Сидгија онун өлдүрүлмәси үчүн разылыг верәндән сонра да Јеремја она јалварырды ки, Јеһованын сөзләринә һај версин (Јер. 38:4, 5, 19, 20). Сәнин дә инсанлара мәһәббәтин Јеремјанынкы кими ҝүҹлүдүрмү?
Аллаһын вердији ҹәсарәт
9. Һарадан билирик ки, Јеремјадакы ҹәсарәт Аллаһдан иди?
9 Јеһова илк дәфә Јеремјаја тапшырыг верәндә о, бундан бојун гачырмаға чалышды. Бурадан бәлли олур ки, сонрадан хидмәтдә ҝөстәрдији ҹәсарәт вә мәтанәт онда анаданҝәлмә дејилди. Јеремја пејғәмбәр кими хидмәт етдији мүддәтдә Јеһоваја там ҝүвәндији үчүн гејри-ади ҝүҹә малик иди. Һәгигәтән дә, Јеһова «иҝид бир дөјүшчү кими» Јеремјаја дәстәк олурду вә тапшырығыны јеринә јетирә билсин дејә она ҝүҹ верирди (Јер. 20:11). Јеремја ҹәсарәтли адам кими елә бир ад газанмышды ки, Иса јер үзүндә оларкән һәтта бәзиләри онун дирилмиш Јеремја олдуғуну һесаб едирдиләр! (Мат. 16:13, 14).
10. Јер үзүндә јашајан мәсһ олунмушлар һансы мәнада «милләтләр вә өлкәләр» үзәриндә тәјин олунублар?
10 «Милләтләрин Падшаһы» Јеһова Јеремјаја халглара вә падшаһлыглара һөкм хәбәрини чатдырмағы тапшырмышды (Јер. 10:6, 7). Јер үзүндә јашајан мәсһ олунмушлар һансы мәнада «милләтләр вә өлкәләр» үзәриндә тәјин олунублар? (Јер. 1:10). Онун кими, Јеремја синфи Каинатын Али Һөкмдарындан тапшырыг алыб. Онлара бүтүн дүнјада милләтләрә вә өлкәләрә гаршы Күлли-Ихтијар Аллаһын һөкмләрини бәјан етмәк сәлаһијјәти верилиб. Јеремја синфи Онун Кәламындакы саф дилдән истифадә едәрәк бәјан едир ки, буҝүнкү милләтләр вә өлкәләр Онун тәјин етдији вахтда вә мүәјјән етдији үсулла тамамилә мәһв едиләҹәк (Јер. 18:7—10; Вәһј 11:18). Бу синиф Јеһованын һөкм хәбәрини бүтүн дүнјада тәблиғ етмәк тапшырығыны јеринә јетирмәкдә сәјини азалтмаг нијјәтиндә дејил.
11. Чәтинликләрлә үзләшәндә бизә дурмадан тәблиғ етмәјә нә көмәк едәҹәк?
11 Тәгибләр, лагејдлик вә ја чәтинликләр уҹбатындан һәрдән руһдан дүшмәјимиз тәбиидир (2 Кор. 1:8). Анҹаг ҝәлин Јеремјанын нүмунәсини тәглид едәк вә һеч вахт тәслим олмајаг. Ҝәлин руһдан дүшмәјәк, әксинә, Јеһовадан дуада сәјлә көмәк диләјәрәк, Она бел бағлајаг вә ‘ҹәсарәтли’ олаг (1 Салон. 2:2). Аллаһын һәгиги хидмәтчиләри кими, биз сајыглығымызы горујараг Онун тапшырығыны јеринә јетирмәјә давам етмәлијик. Биз дөнүк Јерусәлимлә тәмсил олунан Христиан аләминин мәһви барәдә дурмадан тәблиғ етмәлијик. Јеремја синфи јалныз «Рәббин лүтф илини» јох, Онун «гисас ҝүнүнү» дә бәјан етмәлидир (Јешаја 61:1, 2; 2 Кор. 6:2).
Үрәкдән ҝәлән севинҹ
12. Һарадан билирик ки, Јеремја севинҹини горуду вә о, буна неҹә наил олду?
12 Јеремја хидмәтиндән севинҹ дујурду. О, Јеһоваја демишди: «Сөзләрини тапыб једим, сөзләрин мәнә севинҹ вә үрәјимә шадлыг ҝәтирди. Чүнки Сәнә мәхсусам, еј Ордулар Аллаһы Рәбб!» (Јер. 15:16). Јеһованын тәмсилчиси олмаг вә Онун сөзүнү тәблиғ етмәк Јеремја үчүн бөјүк шәрәф иди. Мараглыдыр ки, Јеремја инсанларын она ришхәнд етдикләри барәдә фикирләшәндә севинҹини итирмишди. Лакин диггәтини чатдырмалы олдуғу хәбәрин ҝөзәллијинә вә ваҹиблијинә јөнәлдәндә јенидән севинҹ дујмаға башлады (Јер. 20:8, 9).
13. Нәјә ҝөрә севинҹимизи горумаг үчүн дәрин руһани һәгигәтләрлә гидаланмалыјыг?
13 Биз дә хидмәтдә севинҹимизи горумаг үчүн «бәрк гида» илә — Аллаһын Кәламындакы дәрин һәгигәтләрлә гидаланмалыјыг (Ибр. 5:14). Аллаһын Кәламыны дәриндән арашдырмаг иманымызы мөһкәмләндирир (Кол. 2:6, 7). Бунун сајәсиндә биз һәрәкәтләримизин Јеһованын үрәјинә неҹә тәсир етдијини даһа јахшы баша дүшүрүк. Әҝәр биз Мүгәддәс Китабы охујуб арашдырмаг үчүн вахт тапмагда чәтинлик чәкириксә, ҹәдвәлимизә јенидән нәзәр салмалыјыг. Һәтта ҝүндә бир нечә дәгигә әрзиндә Мүгәддәс Китабы арашдырыб үзәриндә дүшүнмәк бизи Јеһоваја даһа да јахынлашдыраҹаг вә Јеремјанын һадисәсиндә олдуғу кими, севинҹимизи артыраҹаг.
14, 15. а) Јеремјанын алдығы тапшырығы сәдагәтлә иҹра етмәси һансы бәһрәләри ҝәтирди? б) Аллаһын халгы тәблиғ иши илә әлагәдар нәји дәрк едир?
14 Јеремја дурмадан Јеһованын һөкм хәбәрләрини бәјан етсә дә, о ‘әкиб тикмәјә’ дә ҹан атырды (Јер. 1:10). Онун әкиб тикмәк иши бәһрә ҝәтирди. Ерамыздан әввәл 607-ҹи илдә Јерусәлим мәһв едиләндә бәзи јәһудиләр, һәмчинин диҝәр милләтләрдән олан инсанлар сағ галдылар. Биз билирик ки, онларын арасында рекавлылар, Евед-Мелек вә Барук да варды (Јер. 35:19; 39:15—18; 43:5—7). Аллаһ горхусуна малик олан Јеремјанын бу садиг достлары бу ҝүн Јеремја синфинә дәстәк олан ‘бөјүк издиһамы’ тәмсил едир. Јеремја синфи онларын иманыны мөһкәмләндирмәкдән бөјүк севинҹ дујур (Вәһј 7:9). Ејнилә, мәсһ олунмушларын садиг һәмкарлары бөјүк мәмнунијјәтлә сәмими инсанлара һәгигәти өјрәнмәјә көмәк едирләр.
15 Биз дәрк едирик ки, хош хәбәри тәблиғ етмәклә јалныз инсанлара хидмәт етмирик, бу һәмчинин ибадәтимизин бир һиссәдир. Инсанлар гулаг асса да, асмаса да, тәблиғ етмәклә Аллаһ гаршысында мүгәддәс хидмәти иҹра етмәк бизә бөјүк севинҹ ҝәтирир. (Мәз. 71:23; Ромалылара 1:9 ајәсини оху.)
Тапшырығынын ваҹиблијини даима јадда сахла!
16, 17. Вәһј 17:10 вә Һабаггуг 2:3 ајәләри Аллаһын һөкм ҝүнүнүн астанасында јашадығымызы неҹә ҝөстәрир?
16 Һәгигәтән дә Аллаһын һөкм ҝүнүнүн астанасында јашадығымызы Вәһј 17:10 ајәсиндәки пејғәмбәрликдән ҝөрмәк олар. Једдинҹи падшаһ олан Инҝилтәрә—Америка дүнја империјасы артыг пејда олуб. Онун барәсиндә биз охујуруг: «[Једдинҹи дүнја империјасы] ҝәләндә чох галмајаҹаг». Она верилән вахт артыг битмәк үзрәдир. Һабаггуг пејғәмбәрин бу пис системин сону барәдә дедији сөзләр бизә әминлик верир: «Бу ҝөрүнтү мүәјјән вахт үчүндүр... Ҝеҹикмиш кими ҝөрүнсә дә, ҝөзләјин, һөкмән ҝәләҹәк, ҝеҹикмәјәҹәк» (Һаб. 2:3).
17 Буна ҝөрә дә өзүндән соруш: «Һәјат тәрзим һансы вахтда јашадығымы дәрк етдијими вә сонун тезликлә ҝәләҹәјинә инандығымы ҝөстәрирми? Јохса гәрарларым вә үстүнлүк вердијим шејләр сонун тезликлә ҝәләҹәјинә инанмадығымы, јахуд да онун үмумијјәтлә ҝәләҹәјинә шүбһә етдијими үзә чыхарыр?»
18, 19. Нәјә ҝөрә инди хидмәтдә сәјимизи азалтмағын вахты дејил?
18 Ҝөзәтчи синфинин иши һәлә битмәјиб. (Јеремја 1:17—19 ајәләрини оху.) Һәлә ки јер үзүндә јашајан мәсһ олунмушларын «дәмир сүтун» вә «галалы шәһәр» кими мөһкәм вә сарсылмаз олдугларыны ҝөрмәк неҹә дә фәрәһләндириҹидир! Онлар белләринә «һәгигәт гуршағыны» бағлајыблар, јәни нә гәдәр ки тапшырыглары битмәјиб, Аллаһын Кәламынын онлары мөһкәмләндирмәсинә јол верирләр (Ефес. 6:14). Бөјүк издиһамын үзвләри Јеремја синфинин алдығы тапшырығы јеринә јетирмәкдә она фәал шәкилдә көмәк ҝөстәрмәклә ејни гәтијјәти нүмајиш етдирирләр.
19 Инди хидмәтдә сәјимизи азалтмағын вахты дејил. Ҝәлин Јеремја 12:5 ајәсиндә јазылан сөзләрин мәнасына диггәт јетирәк. (Ајәни оху.) Һәр биримиз сынагларла үзләширик вә онлара таб ҝәтирмәк бизим борҹумуздур. Бу сынаглары бирликдә гачмалы олдуғумуз «пијадаларла» мүгајисә етмәк олар. Лакин «бөјүк мүсибәт» јахынлашдыгҹа чәтинликләр артаҹаг (Мат. 24:21). Габагда бизи ҝөзләјән даһа бөјүк чәтинликләрлә мүбаризәни исә «атларла... јарыша» бәнзәтмәк олар. Сүрәтлә гачан атларла ајаглашмаг үчүн инсана даһа чох ҝүҹ вә тәһәммүл ҝәрәкдир. Буна ҝөрә дә ҝәлин индики сынаглара дөзәк ки, гаршыдакы чәтинликләрә һазыр олаг.
20. Сән нә етмәк әзминдәсән?
20 Һамымыз Јеремјанын нүмунәсини изләјә вә тәблиғ етмәк тапшырығымызы мүвәффәгијјәтлә јеринә јетирә биләрик! Мәһәббәт, ҹәсарәт вә севинҹ кими хүсусијјәтләр сајәсиндә Јеремја 67 ил әрзиндә Јеһоваја сәдагәтлә хидмәт едә билмишди. Ҝөзәл бадам ағаҹынын чичәк ачмасы бизә хатырладыр ки, Јеһова ‘сөзүнү јеринә јетирмәкдә сајыгдыр’. Биз дә Онун кими давранмалыјыг. Јеремја сајыглығыны горуја билди. Биз дә буну баҹараҹағыг!
Јадыныздадырмы?
• Мәһәббәт Јеремјаја сајыг галмаға вә тапшырығыны јеринә јетирмәјә неҹә көмәк етмишди?
• Нәјә ҝөрә бизә Аллаһын вердији ҹәсарәт лазымдыр?
• Јеремјаја севинҹини горумаға нә көмәк етмишди?
• Нәјә ҝөрә сән сајыг олмаг истәјирсән?
[31-ҹи сәһифәдәки шәкилләр]
Мүгавимәтләрә бахмајараг, тәблиғ етмәјә давам едәҹәксәнми?