Аллаһын неҹә рәһбәрлик етдијини дәрк едирсәнми?

НӘ ИСРАИЛЛИЛӘР, нә дә ки мисирлиләр индијә кими белә бир шеј ҝөрмәмишдиләр. Исраил халгы Мисирдән чыхан вахт бир булуд дирәји пејда олуб онлары һәр ҝүн мүшајиәт едирди. Ҝеҹәләр булуд од дирәјинә чеврилирди. Бу, һәгигәтән дә, мөһтәшәм ҝөрүнтү иди! Мүгәддәс Китабда һәм дә сүтун адландырылан бу дирәк һарадан пејда олмушду? О, нәји тәмсил едирди? Тәхминән 3500 ил бундан әввәл јашајан исраиллиләрин ‘од вә булуд дирәјинә’ мүнасибәтиндән биз нә өјрәнирик? (Чых. 14:24).

Аллаһын Кәламында бу дирәјин ким тәрәфиндән вә һансы мәгсәдлә верилдији ачыгланыр. Орада охујуруг: «Рәбб онларын габағы илә ҝүндүз онлара јол ҝөстәрмәк үчүн булуд дирәјиндә, ҝеҹә исә онлара ишыг вермәк үчүн од дирәјиндә ҝедирди ки, ҝүндүз дә, ҝеҹә дә ҝедә билсинләр» (Чых. 13:21, 22). Јеһова халгыны Мисирдән чыхармаг вә сәһрадан кечирмәк үчүн од вә булуд дирәјиндән истифадә етмишди. Онлар јолларыны давам етдирмәјә һәмишә һазыр олмалы идиләр ки, ҝеридә галмасынлар. Аллаһын халгыны тәгиб едән Мисир гошунлары һүҹума кечмәјә һазырлашанда дирәк мисирлиләрлә исраиллиләрин арасына кечиб исраиллиләри мүдафиә етди (Чых. 14:19, 20). Дирәк онлары Вәд едилмиш дијара ән гыса јолла апармаса да, исраиллиләр јалныз ону изләмәклә ора чата биләрдиләр.

Дирәјин һәмишә јанларында олмасы исраиллиләри әмин едирди ки, Јеһова онларладыр. Бу дирәк Јеһованы тәмсил едирди вә һәрдән Јеһова онун ичиндән халгы илә данышырды (Сај. 14:14; Мәз. 99:7). Үстәлик, булуд ҝөстәрирди ки, Аллаһ Мусаны халгы үзәринә башчы тәјин едиб (Чых. 33:9). Булудун ҝөрүнмәси барәдә сонунҹу мәлумат Ганунун тәкрары 31:14, 15 ајәләриндә гәләмә алыныб. О заман Јеһова Јешуаны Мусанын хәләфи тәјин етдијини тәсдигләмишди. Бәли, исраиллиләрин Вәд едилмиш дијара сағ-саламат чатмасы Јеһованын неҹә рәһбәрлик етдијини дәрк етмәләриндән вә она табе олмаларындан асылы иди.

Аллаһын рәһбәрлијинин ајдын әламәтинә мәһәл гојмадылар

Исраиллиләр бу дирәји илк дәфә ҝөрәндә, јәгин, үрәкләриндә Аллаһа гаршы дәрин еһтирам һисси јаранмышды. Амма әфсуслар олсун ки, даима ҝөз габағында олан бу мөҹүзә Јеһоваја мөһкәм етибар едә биләҹәкләри гәдәр онлары һејран етмәмишди. Онлар дәфәләрлә Аллаһын ҝөстәришләрини шүбһә алтына гојурдулар. Мәсәлән, Мисир ордусу онлары тәгиб едәндә исраиллиләр Јеһованын онлары хилас етмәјә гадир олдуғуна инанмадылар. Исраиллиләр Мусанын үстүнә һүҹум чәкиб онлары өлүмә апармагда ҝүнаһландырдылар (Чых. 14:10—12). Гырмызы дәнизин о бири саһилинә кечәндән сонра исә онлар сусузлугдан вә аҹлыгдан өләҹәкләрини дүшүнәрәк Мусаја, Һаруна вә Јеһоваја гаршы ҝилеј-ҝүзар етдиләр (Чых. 15:22—24; 16:1—3; 17:1—3, 7). Бунун үстүндән бир нечә һәфтә кечмәди ки, халг Һаруну гызыл дана дүзәлтмәјә мәҹбур етди. Бир тәсәввүр ет: исраиллиләр дүшәрҝәнин бир тәрәфиндә дуран од вә булуд дирәјини ҝөрә-ҝөрә, диҝәр тәрәфиндә ҹансыз бүтә ибадәт едирдиләр, һалбуки бу дирәк онлары Мисирдән чыхаран Аллаһын онларла олдуғунун мөҹүзәви әламәти иди. Бу аз имиш кими, онлар: «Еј Исраил өвладлары, будур сизи Мисир торпағындан чыхаран аллаһларыныз!» — дејирдиләр. Бу, Аллаһа гаршы неҹә дә «бөјүк күфр» иди! (Чых. 32:4; Неһ. 9:18).

Исраиллиләрин дәфәләрлә һөрмәтсизлик ҝөстәрәрәк Јеһованын рәһбәрлијинә гаршы үсјан галдырмаларына адам мәәттәл галыр. Проблемин көкү онларын руһани ҝөзләринин кор олмасында иди. Исраиллиләр сүтуну өз ҝөзләри илә ҝөрсәләр дә, артыг онун мәнасыны дәрк етмирдиләр. Онлар әмәлләри илә ‘Исраилин Мүгәддәсинин хәтринә дәјирдиләр’. Буна бахмајараг, Вәд едилмиш дијара чатанаҹан Јеһова бу дирәк васитәсилә мәрһәмәтлә онлара рәһбәрлик едирди (Мәз. 78:40—42, 52—54; Неһ. 9:19).

Аллаһ бу ҝүн неҹә рәһбәрлик едир?

Бизим ҝүнләрдә дә Јеһова халгына ајдын шәкилдә рәһбәрлик едир. Аллаһ исраиллиләрдән Вәд едилмиш дијары өзләринин тапаҹагларыны ҝөзләмәдији кими, биздән дә јени дүнјаја өзүмүзүн јол тапаҹағымызы ҝөзләмир. Јеһова Иса Мәсиһи јығынҹағын Рәһбәри тәјин едиб (Мат. 23:10; Ефес. 5:23). О, руһла мәсһ едилмиш садиг мәсиһчиләрдән ибарәт садиг нөкәр синфинә бәзи сәлаһијјәтләр һәвалә едиб. Бу нөкәр синфи исә, өз нөвбәсиндә, бүтүн јығынҹагларда нәзарәтчиләр тәјин едир (Мат. 24:45—47; Тит. 1:5—9).

Садиг нөкәр вә ја нөкәрбашы синфини неҹә мүәјјән етмәк олар? Исанын бу синиф барәдә дедикләринә диггәт јетирәк: «Өз гуллугчуларына вахтлы-вахтында јемәк пајларыны вермәк үчүн онларын үзәриндә ағанын гојаҹағы садиг вә ағыллы нөкәрбашы кимдир? Ағасы ҝәләндә иш башында олан нөкәр неҹә дә хошбәхтдир!» (Лука 12:42, 43).

Иса нөкәрбашы синфини «садиг» адландырды, јәни о, һеч вахт Јеһоваја, Исаја вә Аллаһын халгына хәјанәт етмәјәҹәк вә Мүгәддәс Китаб һәгигәтләринә һәмишә садиг галаҹаг. Онун «ағыллы» олмасы ҝөстәрир ки, бу синиф ‘Падшаһлыг һаггындакы хош хәбәри’ тәблиғ етмәк вә ‘бүтүн милләтләр ичиндә шаҝирд һазырламаг’ кими ән ваҹиб ишә рәһбәрлик едәрәк сағламдүшүнҹәлилик тәзаһүр етдирир (Мат. 24:14; 28:19, 20). Нөкәрбашы синфи итаәткарлыгла «вахтлы-вахтында» сағлам вә бәсләјиҹи руһани гида пајлајыр. Јеһова нөкәрбашыдан разыдыр. Бу, Онун хидмәтчиләринин сајынын ҝүнү-ҝүндән артмасындан, ваҹиб гәрарлар вериләркән Јеһованын рәһбәрлик етмәсиндән, Мүгәддәс Китаб һәгигәтләрини даһа јахшы баша дүшмәјә бизә көмәклик ҝөстәрмәсиндән, дүшмәнләрә халгыны тамамилә мәһв етмәјә јол вермәмәсиндән вә бизә гәлб раһатлығы бәхш етмәсиндән ҝөрүнүр (Јешаја 54:17; Филип. 4:7).

Аллаһын рәһбәрлијинә һај вер

Аллаһын рәһбәрлијини гијмәтләндирдијимизи неҹә ҝөстәрә биләрик? Һәвари Павел демишди: «Сизә рәһбәрлик едәнләрә итаәт един вә табе олун» (Ибр. 13:17). Лакин бу ајәдә јазылдығы кими давранмаг һәмишә асан олмур. Өзүнү Мусанын ҝүнләриндәки исраиллиләрин јеринә гој. Тәсәввүр ет ки, бир мүддәт сәһрада долашдыгдан сонра дирәк нөвбәти дајанаҹаг јеринә чатыр. О, бурада нә гәдәр дураҹаг? Бир ҝүн, бир һәфтә, јохса бир нечә ај? «Бүтүн әшјаларымы чыхарым-чыхармајым?» — дејә өз-өзүнә фикирләширсән. Ола билсин, сән әввәлҹә ән лазыми әшјалары чыхарырсан. Лакин бир нечә ҝүндән сонра әшјаларыны ешәләмәкдән безиб һамысыны чыхармаг гәрарына ҝәлирсән. Ишини гуртарана јахын бир дә ҝөрүрсән ки, дирәк галхыр вә сән јенә дә әшјаларыны јығмалысан. Әлбәттә, бу, асан олмазды. Буна бахмајараг, исраиллиләр булуд «галхан заман», јәни дәрһал јола дүшмәли идиләр (Сај. 9:17—22).

Бәс биз Аллаһдан ҝөстәришләр аланда онлары дәрһал јеринә јетиририк? Јохса вәрдиш етдијимиз кими давранмаға давам едирик? Инсанлара Мүгәддәс Китабы неҹә өјрәтмәјә, әҹнәбиләрә шаһидлик вермәјә, мүнтәзәм олараг аиләви ибадәтдә иштирак етмәјә, конгресдә әдәбли давраныша вә Хәстәханаларла әлагә комитәси илә әмәкдашлыг етмәјә даир верилән ән сон ҝөстәришләрлә танышыгмы? Мәсләһәтләри гәбул етмәјимиз дә Аллаһын рәһбәрлијинә ҝөрә миннәтдар олдуғумузу ҝөстәрир. Ваҹиб гәрарлар вермәли оланда биз өз ағлымыза архаланмырыг, әксинә, Јеһовадан вә Онун тәшкилатындан ҝөстәриш ҝөзләјирик. Балаҹа ушаг гасырға заманы валидејнләринә сығындығы кими, биз дә бу кешмәкешли дүнјада проблемләрлә үзләшәндә Јеһованын тәшкилатына сығынырыг.

Јеһованын тәшкилатынын јердәки һиссәсиндә рәһбәрлик едән инсанлар гејри-камилдирләр. Һеч Муса да камил дејилди. Бунунла белә, дирәк даима хатырладырды ки, Аллаһ ону Өз халгы үзәринә башчы тәјин едиб вә ондан разыдыр. Гејд етмәк лазымдыр ки, халгын нә заман јола дүшәҹәјини мүәјјән етмәк сәлаһијјәти һеч бир исраиллијә верилмәмишди. Халг ‘Муса васитәсилә вердији әмрә ҝөрә Рәббин бујурдуғуна риајәт едирди’ (Сај. 9:23). Беләликлә, халгын нә заман јола дүшәҹәјини Аллаһ мәһз Муса васитәсилә билдирирди.

Аллаһын мүасир халгы үчүн, мәҹази диллә десәк, јола дүшмәк вахты ҝәләндә Јеһованын нөкәрбашы синфи ајдын ишарә верир. Нөкәрбашы буну неҹә едир? «Ҝөзәтчи Гүлләси»ндә вә «Бизим Падшаһлыг Хидмәтимиз»дә чыхан мәгаләләр, јени нәшрләр вә конгресләрдә сәсләнән мәрузәләр васитәсилә. Ҝөстәришләр һәмчинин јығынҹаглара баш чәкән сәјјар нәзарәтчиләр, мәктублар вә ја јығынҹагда мәсулијјәтләри олан гардашларын иштирак етдији теократик мәктәбләр васитәсилә верилир.

Сән Аллаһын бизә неҹә рәһбәрлик етдијини ајдын ҝөрүрсәнми? Бу сон ҝүнләрдә Јеһова тәһлүкәли сәһраја охшајан Шејтанын бу пис дүнјасында халгы олан бизләрә тәшкилаты васитәсилә рәһбәрлик едир. Бунун сајәсиндә арамызда бирлик, мәһәббәт вә тәһлүкәсизлик һөкм сүрүр.

Исраил халгы Вәд едилмиш дијара чатанда Јешуа деди: «Бүтүн гәлбинизлә вә варлығынызла билирсиниз ки, Аллаһыныз Рәббин һаггынызда дедији бүтүн јахшы шејләрдән һеч бири боша чыхмады. Һамысы сизин үчүн јеринә јетди» (Јешуа 23:14). Биз зәррә гәдәр дә шүбһә етмирик ки, Аллаһын мүасир халгы да вәд едилмиш јени дүнјаја дахил олаҹаг. Амма бизим орада олмағымыз ваҹиб бир амилдән — Аллаһын бүтүн ҝөстәришләринә тәвазөкарлыгла риајәт етмәјимиздән асылыдыр. Буна ҝөрә дә ҝәлин һәмишә Јеһованын бизә неҹә рәһбәрлик етдијини ҝөрәк вә она риајәт едәк!

[5-ҹи сәһифәдәки шәкилләр]

Јеһованын тәшкилатынын бу ҝүн бизә рәһбәрлик етмәсинин үсуллары:

Јени нәшрләр

Теократик мәктәбләр

Тәблиғ хидмәти үчүн ҝөрүшләрдә алдығымыз тәлимләр