Мәсиһчи аиләләр, ојаг галын!

«Ојаг галыб ајыг олаг» (1 САЛОН. 5:6).

1, 2. Бүтүн аиләнин руһән ојаг галмасы үчүн онун һәр бир үзвүндән нә тәләб олунур?

«РӘББИН мөһтәшәм вә дәһшәтли ҝүнү»нү нәзәрдә тутараг һәвари Павел Салоникдәки мәсиһчиләрә јазырды: «Гардашлар, сиз... зүлмәтдә дејилсиниз ки, ҝүн ишығы оғруну јахаладығы кими, һәмин о ҝүн дә сизи гәфил јахаласын. Ахы сиз һамыныз нурун вә ҝүндүзүн оғулларысыныз. Биз нә ҝеҹәјә, нә дә зүлмәтә мәхсусуг». Сонра о әлавә етди: «Буна ҝөрә дә ҝәлин башгалары кими јатмајаг, ојаг галыб ајыг олаг» (Јоел 2:31; 1 Салон. 5:4—6).

² Павелин Салоникдәки һәмиманлыларына вердији бу мәсләһәт ‘ахыр заманда’ јашајан биз мәсиһчиләрә хүсусилә аиддир (Дан. 12:4). Бу пис системин сону јахынлашдыгҹа Шејтан вар ҝүҹү илә чалышыр ки, мүмкүн гәдәр чох адамы һәгиги Аллаһдан дөндәрсин. Она ҝөрә дә биз Павелин руһән ајыг галмаг нәсиһәтини гулагардына вурмамалыјыг. Ојаг галмаг үчүн мәсиһчи аиләсинин һәр бир үзвү Мүгәддәс Китабын онун үзәринә гојдуғу вәзифәни виҹданла јеринә јетирмәлидир. Бу, чох ваҹиб мәсәләдир. Бу мәгаләдә биз аиләнин ојаг галмасында әрләрин, арвадларын вә ушагларын ролунун нәдән ибарәт олдуғуну арашдыраҹағыг.

Әрләр, Хејирхаһ чобандан нүмунә ҝөтүрүн

3. Кишинин бир аилә башчысы кими вәзифәси, 1 Тимотејә 5:8 ајәсинә әсасән, нәдән ибарәтдир?

³ Мүгәддәс Китабда дејилир ки, «гадынын башы киши»дир (1 Кор. 11:3). Кишинин бир аилә башчысы кими вәзифәси нәдән ибарәтдир? Биз охујуруг: «Әҝәр кимсә өз јахынларынын, әләлхүсус да аиләсинин гејдинә галмырса, о, иманы инкар едиб вә имансыздан да бетәрдир» (1 Тим. 5:8). Бу ајәдән ҝөрдүјүмүз кими, онун вәзифәләриндән бири аиләсини мадди ҹәһәтдән тәмин етмәкдир. Лакин кишинин вәзифәси јалныз бундан ибарәт дејил. Аиләсинин руһән ојаг галмасыны истәјән аилә башчысы доғмаларыны руһән мөһкәмләндирмәли вә онлара Аллаһла мүнасибәтләрини горумаға көмәк етмәлидир (Сүл. мәс. 24:3, 4). Аилә башчысы буну неҹә едә биләр?

4. Кишијә аиләсини руһән мөһкәмләндирмәјә нә көмәк едәҹәк?

⁴ «Мәсиһ... јығынҹағын башы олдуғу кими, әр дә арвадынын башыдыр». Буна ҝөрә дә о, Исанын јығынҹаға неҹә рәһбәрлик етдијини арашдырмалы вә онун нүмунәсини изләмәлидир (Ефес. 5:23). Ҝәлин Исанын өз давамчылары илә мүнасибәтләрини неҹә тәсвир етдијинә нәзәр салаг. (Јәһја 10:14, 15 ајәләрини оху.) Киши аиләсини руһән неҹә мөһкәмләндирә биләр? Әҝәр о, бу ишдә уғур газанмаг истәјирсә, һөкмән Исанын ‘хејирхаһ чобан’ кими дедикләрини вә етдикләрини тәдгиг етмәли вә ‘онун изи илә ҝетмәлидир’ (1 Пет. 2:21).

5. Хејирхаһ чобан олан Иса өз јығынҹағыны нә дәрәҹәдә јахшы таныјыр?

⁵ Чобанла гојунлар арасындакы мүнасибәт гаршылыглы етибара әсасланыр. Үстәлик, чобан гојунлары һаггында һәр шеји билир, гојунлар да өз чобаныны сәсиндән таныјыр вә она итаәт едирләр. Иса демишди: «Мән... өз гојунларымы таныјырам, гојунларым да мәни таныјыр». Бәли, о, јығынҹағыны јахшы таныјыр. Бурада «таныјырам» кими тәрҹүмә олунан јунан сөзү «шәхсән, јахындан танымаг» мәнасыны верир. Хејирхаһ чобан да һәр бир гојунуну шәхсән таныјыр. О, һәр биринин тәләбатларына, зәиф вә ҝүҹлү ҹәһәтләринә јахшы бәләддир. Бизим үчүн нүмунә олан Исанын нәзәриндән һеч нә гачмыр. Гојунлар да өз Чобаныны таныјыр вә онун рәһбәрлијинә етибар едирләр.

6. Аилә башчысы Хејирхаһ чобан олан Исаны неҹә тәглид етмәлидир?

⁶ Иса кими јахшы чобан олмаг үчүн киши ону тәглид етмәлидир. О, өз аиләсини јахшы танымалыдыр. Бу, мүмкүндүр? Әлбәттә! Бунун үчүн киши аиләсинин бүтүн үзвләри илә сых үнсијјәт етмәли, онлар өз нараһатчылыглары илә бөлүшәндә диггәтлә гулаг асмалы, аилә ишләринә фәал башчылыг етмәлидир. Үстәлик, о, аиләви ибадәт, јығынҹаг ҝөрүшләри, тәблиғ хидмәти вә истираһәт кими мәсәләләрдә гәрарлар вермәји өһдәсинә ҝөтүрмәлидир вә буну виҹданла етмәлидир. Киши мүдрик гәрарлар вермәк вә аиләсинә јахшы нүмунә олмаг мәгсәдилә диггәтлә Аллаһын Кәламыны арашдыранда вә аиләсини јахындан танымаға чалышанда, чох еһтимал ки, онун һәјат јолдашы вә ушаглары бир башчы кими она етибар едәҹәкләр. О да аиләсинин бирлик ичиндә һәгиги Аллаһа ибадәт етдијини ҝөрәндә фәрәһләнәҹәк.

7, 8. Аилә башчылары доғмаларына севҝи вә нәвазиш ҝөстәрмәкдә Хејирхаһ чобан олан Исаны неҹә тәглид етмәлидирләр?

⁷ Хејирхаһ чобан өз гојунларыны севир. Мүгәддәс Китабда Исанын һәјаты вә хидмәти барәдә јазыланлары арашдыранда вә онун шаҝирдләринә неҹә мәһәббәт бәсләдијини ҝөрәндә үрәјимиз миннәтдарлыгла долур. Иса һәтта ‘гојунлары уғрунда ҹаныны фәда етмишди’. Аилә башчылары Исадан нүмунә ҝөтүрәрәк онларын һимајәси алтында оланлары севмәлидирләр. Аллаһы разы салмаг истәјән киши јолдашына зүлм етмәјәҹәк, әксинә, ‘Мәсиһ јығынҹағы севдији’ кими, ону севәҹәк (Ефес. 5:25). Киши һәјат јолдашы илә хејирхаһлыгла вә нәзакәтлә данышмалыдыр, чүнки о, белә һөрмәтә лајигдир (1 Пет. 3:7).

⁸ Ушагларына тәлим-тәрбијә верәркән аилә башчысы Мүгәддәс Китаб принсипләринә ҹидди шәкилдә риајәт етмәлидир. Бунунла белә, ата өз севҝи вә нәвазишини өвладларындан әсирҝәмәмәлидир. Ушаға ҹәза вермәк лазым ҝәләндә о, буну мәһәббәтлә етмәлидир. Ушаглар бир-бирләриндән фәргләндијиндән бәзиләринә онлардан нә тәләб олундуғуну баша дүшмәләри үчүн даһа чох вахт лазымдыр. Белә ушағы олан атаја бөјүк сәбир ҝәрәкдир. Аилә башчылары һәмишә Исанын нүмунәсинә риајәт едәндә евдә сүлһ вә әмин-аманлыг һөкм сүрүр. Онларын доғмалары, мәзмурчунун охудуғу кими, өзләрини руһани тәһлүкәсизликдә һисс едирләр. (Мәзмур 23:1—6 ајәләрини оху.)

9. Нуһ кими, мәсиһчи аилә башчыларынын һансы мәсулијјәти вар вә ону јеринә јетирмәкдә онлара нә көмәк едәҹәк?

⁹ Нуһ гәдим дүнјанын сонунун астанасында јашајырды. Лакин Јеһова ‘аллаһсызларла долу гәдим дүнјаны дашгында мәһв едәндә Нуһу вә онунла бәрабәр једди нәфәри хилас етди’ (2 Пет. 2:5). Аиләсинә Үмумдүнја дашгындан сағ чыхмаға көмәк етмәк онун вәзифәсинә дахил иди. Мәсиһчи олан аилә башчыларынын да бу сон ҝүнләрдә белә вәзифәси вар (Мат. 24:37). Буна ҝөрә дә онлар ‘хејирхаһ чобанын’ нүмунәсини арашдырыб ону изләмәлидирләр.

Гадынлар, һикмәтли олун

10. Гадынын аиләдәки вәзифәси нәдән ибарәтдир?

¹⁰ Һәвари Павел јазырды: «Гој арвадлар Ағаја табе олур кими, әрләринә табе олсунлар» (Ефес. 5:22). Бу сөзләр гадынын аиләдәки вәзифәсинин ашағы олдуғуну ҝөстәрмир. Илк гадын олан Һәвваны јаратмаздан өнҹә Јеһова демишди: «Инсанын тәк олмасы јахшы дејил, Мән она мүнасиб олан бир көмәкчи јарадаҹағам» (Јар. 2:18). «Мүнасиб... көмәкчи» олмаг, јәни аиләнин гајғысына галан әрә һәр бир ишиндә дајаг олмаг чох шәрәфли вәзифәдир.

11. Нүмунәви гадын өз евини неҹә ‘гурур’?

¹¹ Нүмунәви гадын аиләсинин јахшылығыны истәјир. (Сүлејманын мәсәлләри 14:1 ајәсини оху.) Башчылыг принсипинә мәһәл гојмајан «сәфеһ гадын»дан фәргли олараг, һикмәтли гадын бу гурулуша һөрмәтлә јанашыр. Дүнјаја хас олан итаәтсизлик вә өзбашыналыг тәзаһүр етдирмәк әвәзинә, белә гадын әринә итаәт едир (Ефес. 2:2). Сәфеһ гадын әри барәдә пис данышмагдан чәкинмир, һикмәтли гадын исә чалышыр ки, ушагларынын вә башгаларынын ҝөзүндә әринин һөрмәтини артырсын. Һикмәтли гадын ҝеҹә-ҝүндүз дејинәрәк вә әри илә мүбаһисә едәрәк аиләнин башы кими ону һөрмәтдән салмыр. Пул мәсәләсинә ҝәлдикдә, сәфеһ гадын әринин ағыр зәһмәтлә газандығы пуллары һара ҝәлди хәрҹләјир. Әринә дәстәк олан гадын исә малијјә мәсәләләриндә онунла әмәкдашлыг едир. О, ағыллы вә гәнаәтҹилдир. Белә гадын әринә даһа чох ишләмәси үчүн тәзјиг ҝөстәрмир.

12. Гадын аиләсинә руһән ‘ојаг галмаға’ неҹә көмәк едә биләр?

¹² Ушаглара Јеһова барәдә өјрәтмәкдә әринә дајаг олан нүмунәви гадын аиләсинә руһән ‘ојаг галмаға’ көмәк едир (Сүл. мәс. 1:8). О, фәал шәкилдә аиләви ибадәти дәстәкләјир. Үстәлик, әри ушагларына мәсләһәт верәндә вә ја онлары ҹәзаландыранда онун тәрәфини тутур. О, ушаглары физики вә руһани ҹәһәтдән әзијјәт чәкән сәфеһ гадындан неҹә дә фәргләнир!

13. Нәјә ҝөрә гадын јығынҹаг ишләриндә фәал иштирак едән јолдашына һәмишә дәстәк олмалыдыр?

¹³ Әҝәр әри јығынҹаг ишләриндә фәал иштирак едирсә, һикмәтли гадынын буна мүнасибәти неҹә олаҹаг? Әлбәттә ки, о севинәҹәк! Јолдашынын хидмәти көмәкчи, ағсаггал, јахуд Хәстәханаларла әлагә вә ја Падшаһлыг Залынын истисмар комитәсинин үзвү олмасы ону севиндирир. Сөздә вә әмәлдә әринә һәмишә дәстәк олмаг үчүн ондан бөјүк фәдакарлыг тәләб олунур. Лакин о баша дүшүр ки, әринин теократик ишләрлә фәал шәкилдә мәшғул олмасы бүтүн аиләјә руһән ојаг галмаға көмәк едир.

14. а) Әринә дәстәк олмаг истәјән гадын һансы чәтинликлә үзләшә биләр вә онун бу вәзијјәтдә неҹә давранмасы мәсләһәтдир? б) Нүмунәви гадын бүтүн аиләнин фираванлығынын гајғысына неҹә галыр?

¹⁴ Туталым ки, гадын әринин һәр һансы бир гәрары илә разы дејил. Белә олан һалда она аиләдәки вәзифәсини јеринә јетирмәк, јәни әринә дәстәк олмаг чәтин ола биләр. Һикмәтли гадын һәтта белә һалларда «сакит вә һәлим» руһ тәзаһүр етдирәҹәк вә әринә гәрарыны һәјата кечирмәјә көмәк едәҹәк (1 Пет. 3:4). Јахшы гадын кечмишдә јашајан гадынларын, мәсәлән, Сара, Рут, Авигаил вә Исанын анасы Мәрјәмин ҝөзәл нүмунәсини тәглид етмәјә чалышыр (1 Пет. 3:5, 6). О һәм дә «мөминләрә јарашан тәрздә» давранан мүасир јашлы баҹылардан өзүнә нүмунә ҝөтүрүр (Тит. 2:3, 4). Нүмунәви гадын әринә һөрмәт едир вә она мәһәббәт ҝөстәрир. Бунунла о, өз никаһыны мөһкәмләндирир вә бүтүн аиләнин фираванлығынын гајғысына галыр. Онун евиндә сүлһ вә әмин-аманлыг һөкм сүрүр. Руһани киши үчүн белә гадын әсил хәзинәдир! (Сүл. мәс. 18:22).

Ушаглар, диггәтиниз «ҝөзлә ҝөрүнмәјән шејләр»дә олсун

15. Ушаглар бүтүн аиләнин руһани ҹәһәтдән ојаг олмасы үчүн валидејнләринә неҹә көмәк едә биләрләр?

¹⁵ Бәс сиз, ушаглар, бүтүн аиләнин руһани ҹәһәтдән ојаг олмасы үчүн валидејнләринизә неҹә көмәк едә биләрсиниз? Јеһованын сизин үчүн һазырладығы мүкафат барәдә бир дүшүнүн. Ола билсин, сиз лап балаҹа оланда валидејнләриниз сизә Ҹәннәтин тәсвир олундуғу шәкилләр ҝөстәрибләр. Анҹаг сиз бөјүдүкҹә, јәгин, онлар јени дүнјада һәјатын неҹә олаҹағыны сизә тәсәввүр етмәјә көмәк етмәк үчүн Мүгәддәс Китабдан вә она әсасланан нәшрләрдән истифадә етмишләр. Әҝәр сиз диггәтинизи Јеһоваја хидмәтә јөнәлтсәниз вә һәјатынызы Онун ирадәсинә ујғун гурсаныз, бу, сизә ојаг галмаға көмәк едәҹәк.

16, 17. Һәјат уғрунда гачышда мүвәффәгијјәт газанмаг үчүн ушаглардан нә тәләб олунур?

¹⁶ Ушаглар, һәвари Павелин 1 Коринфлиләрә 9:24 ајәсиндәки сөзләри үзәриндә ҹидди дүшүнүн. (Ајәни оху.) О, Јеһоваја хидмәти гачыша, әбәди һәјаты исә мүкафата бәнзәтмишди. Буна ҝөрә дә һәјат үчүн гачышда гәләбә газанмаг мәгсәдилә иштирак един. Елә јол сечин ки, әбәди һәјат мүкафатыны ала биләсиниз. Бир чохлары вар-дөвләт һәрислијинә ујараг ҝөзләрини мүкафатда сахлаја билмәмишләр. Бу неҹә дә бөјүк сәфеһликдир! Пул, мал-мүлк топламаг үчүн јашамаг инсана әсил хошбәхтлик ҝәтирә билмәз. Пулла алынан шејләр ҝәлди-ҝедәрдир. Гој сизин ҝөзүнүз «ҝөзлә ҝөрүнмәјән» шејләрдә олсун. Нәјә ҝөрә? Чүнки «ҝөзлә ҝөрүнмәјән шејләр... әбәдидир» (2 Кор. 4:18).

¹⁷ «Ҝөзлә ҝөрүнмәјән шејләр»ә Падшаһлығын ҝәтирәҹәји хејир-дуалар дахилдир. Буна ҝөрә дә һәјатынызы елә гурун ки, бу хејир-дуалары ала биләсиниз. Һәгиги Аллаһ олан Јеһоваја хидмәт етмәк инсана әсил хошбәхтлик ҝәтирир. Сиз бу јолда гаршыныза һәм бөјүк, һәм дә бу бөјүк мәгсәдләрә чатмагда сизә көмәк едәҹәк кичик мәгсәдләр гоја биләрсинизa. Реал руһани мәгсәдләрә ҹан атмаг сизә диггәтинизи Јеһоваја хидмәтә вә әбәди һәјат мүкафатына ҹәмләмәјә көмәк едәҹәк (1 Јәһ. 2:17).

18, 19. Ҝәнҹләр һәгигәти ахырадәк дәрк едиб-етмәдикләрини неҹә мүәјјән едә биләрләр?

¹⁸ Сиз ҝәнҹләр, илк нөвбәдә, һәгигәти мәнимсәмәли, јәни Јеһова илә шәхси мүнасибәтләр гурмалысыныз. Бәс сән бу аддымы атыбсан? Өзүндән соруш: «Мән руһани инсанам, јохса һәгиги ибадәтдә иштирак етмәјим валидејнләримдән асылыдыр? Аллаһа мәгбул олмаг үчүн Онун хошуна ҝәлән хүсусијјәтләрә јијәләнирәм? Һәгиги ибадәтә аид олан ишләрдә мүнтәзәм олмаг үчүн сәј ҝөстәрирәмми? Мәсәлән, даима дуа едирәм? Мүнтәзәм олараг шәхси өјрәнмә кечирирәм? Јығынҹаг ҝөрүшләриндә вә тәблиғ хидмәтиндә һәмишә иштирак едирәм? Аллаһла шәхси мүнасибәтими мөһкәмләндирәрәк Она јахынлашырам?» (Јаг. 4:8).

¹⁹ Мусанын нүмунәси үзәриндә дүшүн. Башга мәдәнијјәтдә бөјүјүб боја-баша чатмасына бахмајараг, Муса истәјирди ки, ону фиронун гызынын оғлу кими јох, Јеһованын хидмәтчиси кими танысынлар. (Ибраниләрә 11:24—27 ајәләрини оху.) Ҝәнҹләр, сиз Јеһоваја сәдагәтлә хидмәт етмәјә гәти гәрарлы олмалысыныз. Онда сиз әсил хошбәхтлији тапаҹагсыныз, ән јахшы һәјат тәрзи сүрәҹәксиниз вә ‘әсил һәјатдан бәрк-бәрк јапышмыш’ олаҹагсыныз (1 Тим. 6:19).

20. Һәјат уғрунда гачышда кимләр мүкафат алаҹаглар?

²⁰ Гәдим заманларда кечирилән гачыш јарышларында јалныз бир нәфәр галиб ҝәлирди. Амма һәјат уғрунда гачышда һәр шеј тамамилә башга ҹүрдүр. Аллаһын ирадәси одур ки, «һәр ҹүр инсан хилас олуб һәгигәт барәсиндә дәгиг билијә јијәләнсин» (1 Тим. 2:3, 4). Сиздән әввәл гачанлар бу јарышы уғурла баша вурублар, сизинлә јан-јана гачан бир чохлары да бу јарышда мүвәффәгијјәтлә иштирак едирләр (Ибр. 12:1, 2). Тәслим олмајанларын һамысы әбәди һәјат мүкафатыны алаҹаг. Буна ҝөрә дә финишә чатмагда гәти гәрарлы ол!

21. Нөвбәти мәгаләдә сөһбәт нәдән ҝедәҹәк?

²¹ «Рәббин бөјүк вә дәһшәтли ҝүнү» гачылмаздыр (Мал. 4:5). Мәсиһчи аиләләр һазыр олмалыдырлар ки, о ҝүн онлары гәфләтән јахаламасын. Буна ҝөрә дә аиләнин һәр бир үзвү Мүгәддәс Јазыларын онун үзәринә гојдуғу вәзифәјә ҹидди јанашмалыдыр. Руһән ајыг галмаг вә Аллаһла мүнасибәтләринизи мөһкәмләндирмәк үчүн сиз даһа нә едә биләрсиниз? Нөвбәти мәгаләдә бүтүн аиләнин руһани фираванлығына тәсир едән үч амил арашдырылаҹаг.

[Һашијә]

Нә өјрәндиниз?

• Нәјә ҝөрә мәсиһчи аиләләр ‘ојаг галмалыдырлар’?

• Әр Хејирхаһ чобандан һансы нүмунәни ҝөтүрә биләр?

• Нүмунәви гадын өз әрини неҹә дәстәкләмәлидир?

• Ушагларын бүтүн аиләнин руһән ојаг галмасында һансы ролу вар?

[9-ҹу сәһифәдәки шәкил]

Руһани киши үчүн она дајаг олан һәјат јолдашы әсил хәзинәдир