Аиләви ибадәт вә шәхси өјрәнмә үчүн тәклифләр

ЈЕҺОВАНЫН ШАҺИДЛӘРИНИН јығынҹаг ҝөрүшләринин ҹәдвәлиндә 2009-ҹу илин әввәлиндә дәјишиклик едилмишдир. Һәфтәарасы ҝүнләрдә кечирилән ики ҝөрүш бирләшдирилиб бир ҝүндә кечирилмәјә башлады вә һамы јаранан бош вахты аиләви ибадәтә вә ја шәхси өјрәнмәјә һәср етмәјә тәшвиг олунду. Бу јенилијә неҹә јанашырсан? Ондан там фајдаланырсанмы?

Бәзиләри аиләви ибадәт заманы мүзакирә едиләҹәк материалы сечмәкдә чәтинлик чәкирләр. Рәһбәрлик Шурасынын бүтүн аиләләр үчүн бир гајда тәсис етмәк фикри јохдур. Шәраитләрин фәргли олдуғуну нәзәрә алсаг, һәр аилә вә ја Јеһованын ајры-ајры хидмәтчиси бу ахшамы неҹә сәмәрәли кечирә биләҹәјини өзү үчүн мүәјјән етмәлидир.

Бәзиләри јығынҹаг ҝөрүшләринә һазырлашырлар, лакин аиләви ибадәти јалныз бу ҹүр кечирмәк шәрт дејил. Башгалары Мүгәддәс Китабы охујуб ону мүзакирә едир, балаҹа ушаглары олан аиләләр исә һәтта охудуглары парчалары сәһнәләшдирирләр. Аиләви ибадәти, јығынҹаг ҝөрүшләримиздә олдуғу кими, һәмишә суал-ҹаваб шәклиндә кечирмәјә еһтијаҹ јохдур, һәтта мәсләһәт дә дејил. Сәрбәст шәраит руһландырыҹы мүзакирә вә фикир мүбадиләси үчүн даһа мүнасибдир. Бу ҹүр хош аб-һава јарадыҹылыг габилијјәтини ишә салмаг үчүн ҝөзәл шәраит јарадыр. Онда аиләви ибадәт һамы үчүн унудулмаз вә севиндириҹи кечәҹәк.

Үч ушаг атасы олан бир гардаш јазыр: «Чох вахт биз аиләви ибадәт заманы Мүгәддәс Китабы охујуруг. Һәр биримиз охујаҹағымыз фәслә габагҹадан һазырлашырыг. Ушаглар өзләри үчүн бәзи фикирләри сечиб онлары арашдырырлар, сонра исә өјрәндикләрини бизимлә бөлүшүрләр. Оғлум Мајкл [7 јашы вар] тез-тез шәкил чәкир вә ја абзаслары өз сөзләри илә јазыр. Девид вә Кетлин [13 вә 15 јашлары вар] исә Мүгәддәс Китаб һекајәләрини мүшаһидәчинин нөгтеји-нәзәриндән јазырлар. Мисал үчүн, бир дәфә биз Јусифин фиронун чөрәкчисинин вә сагисинин ҝөрдүкләри јухулары јозмасы барәдә охумушдуг. Кетлин буну мүшаһидә едән дустағын нөгтеји-нәзәриндән инша јазмышды» (Јар., фәс. 40).

Артыг гејд олундуғу кими, шәраитләр фәргләнир вә бу тәбиидир. Бир аилә вә ја адам үчүн мүнасиб олан шејләр диҝәрләри үчүн мүнасиб олмаја биләр. Бурада ҝәтирилән чәрчивәдә шәхси өјрәнмә вә аиләви ибадәт үчүн бир чох тәклифләр вар. Үмидварыг ки, онларын чоху сизин үчүн јарарлы олаҹаг.

[6 вә 7–ҹи сәһифәләрдәки чәрчивә/шәкил]

Јенијетмә ушаглары олан аиләләр үчүн:

• «Ҝәнҹләрин суаллары. Практики мәсләһәтләр» (рус.) китабыны охујун вә мүзакирә един.

• Өзүнүзү Мүгәддәс Китабда гәләмә алынан һадисәләрин иштиракчысы кими тәсәввүр един. («Ҝөзәтчи Гүлләси»нин 1996-ҹы ил 15 мај сајынын 14-ҹү сәһифәсиндәки 17-ҹи вә 18-ҹи абзаслара бахын, рус.)

• Индики вә ҝәләҹәк мәгсәдләриниз барәдә данышын.

• Вахташыры олараг тәшкилатын видеофилмләринә бахын вә онлары мүзакирә един.

• «Ҝөзәтчи Гүлләси»ндәки «Ҝәнҹ охуҹуларымыз үчүн» рубрикасыны нәзәрдән кечирин.

Ушаглары олмајан ҹүтлүкләр үчүн:

• «Аилә хошбәхтлијинин сирри» китабындан 1, 3, 11—16-ҹы фәсилләри мүзакирә един.

• Мүгәддәс Китабы охујаркән вә ја арашдырма заманы тапдығыныз фикирләри бир-биринизлә бөлүшүн.

• Јығынҹағын Мүгәддәс Китаб өјрәнмәсинә вә ја «Ҝөзәтчи Гүлләси»нә һазырлашын.

• Бирҝә хидмәти неҹә ҝенишләндирә биләҹәјиниз һагда данышын.

Субај баҹы вә гардашлар, еләҹә дә аилә үзвләри иманларына шәрик олмајанлар үчүн:

• Вилајәт конгресиндә чыхан јени нәшрләри арашдыр.

• «Иллик мәҹмуә»ләрин јени вә көһнә бурахылышларыны оху.

• Сизин әразиниздә актуал олан суаллары арашдыр.

• Тәблиғ хидмәти үчүн тәгдимәләр һазырла.

Балаҹа ушаглары олан аиләләр үчүн:

• Мүгәддәс Китабдакы һадисәләри сәһнәләшдирин.

• Јаддашы итиләмәјә көмәк едән ојунлар ојнајын. Мәсәлән, «Ојанын!» журналынын 30 вә 31-ҹи сәһифәләринә (рус.) бахмаг олар.

• Вахташыры ушагларын фантазијасыны инкишаф етдирән нә исә един. («Ојанын!» журналынын 1996-ҹы ил 8 март сајынын 16—19-ҹу сәһифәләриндә јерләшән «Мүгәддәс Китабы зоопаркда өјрәнин!» адлы мәгаләјә бахын (рус.)).

• «Ҝөзәтчи Гүлләси»ндәки «Ушагларынызы өјрәдин» рубрикасыны мүзакирә един.