Јаддашлара һәкк олунан тарихи ҝөрүш

«БУ ҜӨРҮШ битәндә сиз: “Доғрудан да, бу, теократијанын тарихиндә ән јаддагалан ҝөрүшләрдән биридир!” — дејәҹәксиниз». Јеһованын Шаһидләринин Рәһбәрлик Шурасынын үзвү олан Стивен Леттин бу сөзләри бөјүк аудиторијанын интизарыны даһа да артырды. Онлар Ҝөзәтчи Гүлләси, Мүгәддәс Китаб вә Трактатлар Ҹәмијјәтинин (Пенсилванија) сајҹа 126-ҹы олан иллик ҝөрүшүнә топлашмышдылар. Ҝөрүш 2010-ҹу ил октјабр ајынын 2-дә Ҹерси-Сити (Нју–Ҹерси штаты, АБШ) шәһәриндәки Јеһованын Шаһидләринин Конгрес Залында кечирилмишди. Ҝәлин бу тарихи ҝөрүшдән бәзи диггәтәлајиг мәгамлара нәзәр салаг.

Илк мәрузә илә чыхыш едән Летт гардаш «Језекел» китабында тәсвир олунан Јеһованын сәмави арабасындан данышды. Онун нитги чох руһландырыҹы иди. Бу нәһәнҝ мөһтәшәм араба Јеһованын там нәзарәти алтында олан тәшкилатыны тәмсил едир. Летт гардаш гејд етди ки, бу тәшкилатын руһани варлыглардан ибарәт олан сәмави һиссәси илдырым сүрәти илә — Јеһованын фикирләринин сүрәти илә һәрәкәт едир. Аллаһын тәшкилатынын јердәки һиссәси дә даима фәалијјәтдәдир вә Летт гардаш өз нитгиндә бурада сон илләрдә баш верән севиндириҹи һадисәләрдән сөз ачды.

Мисал үчүн, бир сыра филиалларын бирләшдирилмәси сајәсиндә орада хидмәт едән бир чох баҹы-гардашларын инди тәблиғ хидмәтиндә даһа чох иштирак етмәк имканы вар. Летт гардаш динләјиҹиләри нөкәр синфини тәмсил едән Рәһбәрлик Шурасынын тәкҹә садиг јох, һәмчинин мүдрик вә ја ағыллы олмасы үчүн даима дуа етмәјә тәшвиг етди (Мат. 24:45—47).

Руһландырыҹы һесабатлар вә үрәкләри исиндирән мүсаһибәләр

Һаитидәки филиалын комитә үзвү Таб Һонсберҝер гардаш 2010-ҹу ил јанварын 12-дә Һаитидә баш верән вә 300 000 нәфәрин һәјатына сон гојан зәлзәләнин нәтиҹәләри барәдә һесабат верди. Гардаш деди: «Кешишләр инсанлара дејирдиләр ки, Аллаһ зәлзәләнин гурбанларыны имансыз олдугларына ҝөрә ҹәзаландырды, јахшы инсанлары исә һифз етди». Лакин минләрлә ҹинајәткарлар зәлзәлә заманы һәбсхана диварлары дағыланда азадлыға чыхдылар. Буна ҝөрә дә бир чох сәмими һаитилиләр јашадығымыз дөврүн нәјә ҝөрә белә әзаб-әзијјәтли олдуғуну өјрәнәндә тәсәлли тапырлар. Һонсберҝер гардаш фәлакәт заманы һәјат јолдашыны итирән садиг һаитили гардашын сөзләрини ситат ҝәтирди: «Индијәдәк ҝөз јашларым гурумајыб вә нә вахтда гәдәр ҝөз јашлары төкәҹәјими билмирәм, амма Јеһованын тәшкилатынын мәһәббәтини һисс етдијим үчүн чох севинирәм. Мәним үмидим вар вә бу үмиди башгалары илә бөлүшмәјә гәти гәрарлыјам».

Бруклиндә хидмәт едән Марк Сандерсон гардашын һесабаты Филиппин барәдә иди. О, өлкәдә 32 дәфә далбадал Падшаһлығын тәблиғчиләринин ән јүксәк сајынын гејд олундуғу вә Мүгәддәс Китабы өјрәнәнләрин тәблиғчиләрдән сајҹа хејли чох олдуғу барәдә данышанда севинҹдән шөлә сачырды. Әввәлләр онун Филиппиндә филиалын комитә үзвү олдуғуну нәзәрә алсаг, онун белә чыхыш етмәси тәәҹҹүблү дејилди. О, нәвәси гәтлә јетирилмиш Миҝел гардаш барәдә данышды. Миҝел әлиндән ҝәләни етмишди ки, гатил мәсулијјәтә ҹәлб олунсун вә һәбсханаја дүшсүн. Бир дәфә һәмин һәбсханада тәблиғ едәркән Миҝел о гатиллә растлашды. Һәјәҹанлы олмасына бахмајараг, Миҝел онунла мүлајим вә хејирхаһҹасына данышды. Гардаш она Мүгәддәс Китабы өјрәтмәјә башлады. О, өјрәндикләрини үрәкдән гәбул етди вә Јеһованы севди. Һал-һазырда о, вәфтиз олмуш гардашдыр. Миҝел онун јахын достудур вә инди о, јени гардашынын вахтындан әввәл һәбсханадан чыхмасы үчүн чалышырa.

Теократик Мәктәбләр Шөбәсинин тәлиматчысы Марк Нумар үч ҹүтлүкдән — Алекс вә Сара Рајнмүллер, Девид вә Криста Шафер, Роберт вә Кетра Сиранколардан мүсаһибә ҝөтүрдү. Нәшријјат комитәсинә көмәк едән Алекс Рајнмүллер 15 јашында Канадада пионер кими (чох вахт тәк) хидмәт етдији заман һәгигәтин онун үрәјинә неҹә һәкк олдуғундан данышды. Алекс гардашдан Бет-Елдә она ән чох кимин тәсир ҝөстәрдијини сорушанда о, үч садиг гардашын адыны чәкди вә онларын һәр биринин онун руһани ҹәһәтдән инкишаф етмәсинә неҹә көмәк етдијиндән данышды. Онун һәјат јолдашы Сара исә иманына ҝөрә онилликләр әрзиндә Чиндә һәбсдә јатан бир баҹы илә достлуғундан бәһс етди. Сара о баҹынын нүмунәсиндән шәхси дуа васитәсилә Јеһоваја етибар етмәји өјрәндијини сөјләди.

Тәлим комитәсинә көмәк едән Девид Шафер ҝүҹлү иманы олан анасындан вә ағаҹкәсән ишләјән гардашларын она ҝәнҹ јашларында көмәкчи пионер кими хидмәт етмәјә неҹә көмәк етдикләриндән бәһс етди. Онун һәјат јолдашы Криста исә Бет-Ел аиләсинин јашлы үзвләринин она ҝөстәрдији мүсбәт тәсирдән ағыздолусу данышды. О деди ки, бу баҹы-гардашлар һәмишә Исанын Лука 16:10 ајәсиндәки принсипинә әсасән јашајырдылар, јәни онлар хырда ишдә дә садиг идиләр.

Јазы комитәсинә көмәк едән Роберт Сиранко маҹарыстанлы мүһаҹир вә мәсһ едилмиш мәсиһчи олан нәнәләри вә бабалары һагда данышды. 1950-ҹи илләрдә ушаг икән бөјүк конгресләрдә иштирак едәндә вә Јеһованын тәшкилатынын доғма јығынҹағындан гат-гат бөјүк олдуғуну ҝөрәндә бу, она бөјүк тәсир бағышламышды. Онун һәјат јолдашы Кетра мүхтәлиф проблемләрлә үзләшән, еләҹә дә дөнүкләрин тәсиринә мәруз галан јығынҹагда пионер кими хидмәт едәркән неҹә садиг галмағы өјрәндијиндән данышды. О, һәр шејә таб ҝәтирди вә бир мүддәт сонра ону инсанын үрәјини риггәтә ҝәтирән бирлијин һөкм сүрдүјү бир јығынҹаға хүсуси пионер тәјин етдиләр.

Ефиопија барәдә һесабаты Манфред Тонак тәгдим етди. Бу өлкә Мүгәддәс Китабын јазылдығы дөврдә дә мөвҹуд иди вә һал-һазырда бурада тәблиғчиләрин сајы 9000-дән чохдур. Бу тәблиғчиләрин чоху өлкәнин пајтахты Әддис-Әбәбәдә вә ја она јахын олан әразиләрдә јашадығы үчүн уҹгар әразиләрдә тәблиғчиләрин көмәјинә бөјүк еһтијаҹ вар. Бу сәбәбдән башга өлкәләрдә јашајан ефиопијалы Шаһидләр өлкәнин уҹгар әразиләриндә тәблиғ етмәјә дәвәт олундулар. Чағырыша һај верән чох олду, онлар јерли Шаһидләри руһландырдылар вә һәгигәтә мараг ҝөстәрән чохлу инсанлар тапдылар.

Програмын диггәтәлајиг мәгамларындан бири дә Русијадакы Јеһованын Шаһидләри вә орада ҝедән мәһкәмә ишләри барәдә мәрузәләр иди. Русијадакы филиалын комитә үзвү Аулис Беридал бу өлкәдә, хүсусилә дә Москвада Шаһидләрин үзләшдији тәгибләрин тарихчәсинә нәзәр салды. Нөвбәти мәрузәни АБШ-дакы филиалын һүгуг шөбәсиндә хидмәт едән Филип Брамли тәгдим етди. О, Авропа Инсан Һүгуглары Мәһкәмәсиндә Јеһованын Шаһидләринә гаршы галдырылан 9 ишлә әлагәдар сон ајлар әрзиндә әлдә олунан мүсбәт нәтиҹәләрдән данышды. Мәһкәмә јекдил гәрарла бу ишләрин биринә дә олсун бахылмасына әсасын олмадығыны билдирди, бәзи һалларда исә бунун сәбәбини әтрафлы шәкилдә изаһ етди. Бу ишин нәтиҹәси һәлә бәлли олмаса да, Брамли гардаш мәһкәмәнин гәрарынын башга өлкәләрдәки мәһкәмә ишләримизә мүсбәт тәсир ҝөстәрәҹәјинә үмид етдијини сөјләди.

Бу севиндириҹи хәбәрдән сонра Летт гардаш елан етди ки, Авропа Инсан Һүгуглары Мәһкәмәси Франса һөкумәти илә Јеһованын Шаһидләри арасында узун мүддәт давам едән верҝи мәсәләси илә бағлы мәһкәмә ишинә бахмаг гәрарына ҝәлди. Бу мөтәбәр мәһкәмә она тәгдим олунан ишләрин чох аз гисминә бахыр. Индијәдәк Авропа Инсан Һүгуглары Мәһкәмәси Јеһованын Шаһидләри илә әлагәдар 39 мәһкәмә ишинә бахыб вә бу ишләрин 37-си бизим хејримизә олуб. Летт гардаш Аллаһын халгыны бу мәсәлә барәдә даима дуа етмәјә тәшвиг етди.

Сон һесабатла Конгрес вә Падшаһлыг Залларында, еләҹә дә башга јерләрдә кечирилән Јығынҹаг Ағсаггаллары үчүн Мәктәбин тәлиматчысы Ричард Морлан чыхыш етди. О, шөвглә мәктәбдән вә орада иштирак едән ағсаггалларын бу мәктәбә ҝөрә нә гәдәр миннәтдар олдугларындан данышды.

Рәһбәрлик Шурасынын үзвләринин сөјләдији диҝәр мәрузәләр

Рәһбәрлик Шурасынын үзвү олан Гај Пирс 2011-ҹи илин иллик ајәсинин: «Јеһованын адына сығынын» сөзләринә әсасланан мәрузә илә чыхыш етди (Сеф. 3:12, ЈД). О гејд етди ки, јашадығымыз дөвр Аллаһын халгы үчүн бир чох сәбәбләрә ҝөрә севиндириҹи вахт олса да, бу һәмчинин ҹидди вә ваҹиб бир вахтдыр. Јеһованын бөјүк ҝүнү јахындыр, лакин инсанлар һәлә дә јалан динә, сијаси тәшкилатлара, вар-дөвләтә сығынырлар, бәзиләри исә реаллыгдан гачмаға чалышырлар. Әҝәр биз әсил сығынаҹаг тапмаг истәјириксә, Аллаһын адыны чағырмалыјыг. Аллаһын адыны чағырмаг бу ады дашыјан Шәхси танымаг, Она еһтирам бәсләмәк, етибар етмәк вә әлимиздә олан һәр шејлә Ону севмәк демәкдир.

Рәһбәрлик Шурасынын үзвү Девид Сплејн «Аллаһын динҹлик ҝүнүнә јетишмисәнми?» адлы дүшүндүрүҹү вә ваҹиб мәрузә илә чыхыш етди. О гејд етди ки, Аллаһын динҹлик ҝүнү дејилдикдә Јеһованын фәалијјәтсиз олмасы нәзәрдә тутулмур, чүнки бу символик ҝүндә Јеһова Оғлу илә бирҝә јер үзүнә даир нијјәтини там һәјата кечирмәк үчүн «индијәдәк ишләјир» (Јәһ. 5:17). Бәс биз Аллаһын динҹлик ҝүнүнә неҹә јетишә биләрик? Биз өзүмүзү ҝүнаһ ишләтмәкдән ҝөзләмәли вә бәһанәләр ахтармамалыјыг. Амма бу һәлә һамысы дејил. Үстәлик, биз иман тәзаһүр етдирмәли, Аллаһын нијјәтини һәмишә јадда сахламалы вә Онун нијјәти илә ајаглашмаг үчүн әлимиздән ҝәләни етмәлијик. Бәзән буну етмәк бизим үчүн хүсусилә чәтин ола биләр, анҹаг буна бахмајараг, биз Јеһованын тәшкилатындан ҝәлән мәсләһәт вә ҝөстәришләрә әмәл етмәлијик. Сплејн гардаш динләјиҹиләри Аллаһын динҹлик ҝүнүнә јетишмәк үчүн вар ҝүҹләри илә чалышмаға тәшвиг етди.

Рәһбәрлик Шурасынын үзвү Ентони Морис «Биз нәји ҝөзләјирик?» адлы сонунҹу мәрузә илә чыхыш етди. Морис гардаш там ҹиддијјәтлә вә ата гајғысы илә динләјиҹиләрә Аллаһын һәр бир садиг хидмәтчисинин јеринә јетмәсини һәсрәтлә ҝөзләдији пејғәмбәрликләри хатырлатды. Бу пејғәмбәрликләрдән бәзиләри «сүлһ вә тәһлүкәсизлик» бәјанаты вә јалан динин мәһв едилмәсидир (1 Салон. 5:2, 3; Вәһј 17:15—17). Морис гардаш хәбәрдарлыг едәрәк деди ки, бу пејғәмбәрликләрин јеринә јетмәси илә бағлы олмајан хәбәрләрдәки һадисәләри ҝөрәндә: «Бу Һар-Маҝедондур», — демәјәк. О, Микеја 7:7 ајәсиндә гејд олундуғу кими, севинҹлә вә сәбирлә ҝөзләмәји мәсләһәт ҝөрдү. Лакин ејни заманда о, һамыны Рәһбәрлик Шурасы илә «сыраларыны сыхлашдырмаға», јәни дөјүшүн мәркәзинә дахил олан әсҝәр ордусу кими, бир-биринә јахын олмаға тәшвиг етди. О деди: «Еј Рәббә үмид бағлајан бүтүн инсанлар,.. мөһкәм олун!» (Мәз. 31:24).

Сонда бир нечә севиндириҹи вә тарихи еланлар сәсләнди. Рәһбәрлик Шурасынын үзвү Ҹефри Ҹексон елан етди ки, инҝилис дилини јахшы билмәјәнләр үчүн сынаг мүддәти әрзиндә садә инҝилис дилиндә «Ҝөзәтчи Гүлләси» чыхаҹаг. Стивен Летт исә Рәһбәрлик Шурасынын АБШ-да хидмәт едән вилајәт нәзарәтчиләри вә онларын һәјат јолдашлары үчүн ағсаггал башчәкмәләри тәшкил едәҹәјини билдирди. Сонра о, Хидмәти Тәкмилләшдирмә Мәктәбинин бундан сонра Субај Гардашлар үчүн Мүгәддәс Китаб Мәктәби адланаҹағыны елан етди. Тезликлә Мәсиһчи Әр-арвадлар үчүн Мүгәддәс Китаб Мәктәбинин дә олаҹағы ҝөзләнилир. Бу мәктәбдә алдыглары әлавә тәлим сајәсиндә ҹүтлүкләр Јеһованын тәшкилатында даһа јарарлы ола биләрләр. Летт гардаш һәмчинин елан етди ки, Сәјјар Нәзарәтчиләр вә Һәјат Јолдашлары үчүн Мәктәбин, еләҹә дә Филиал Комитәләринин Үзвләри вә Һәјат Јолдашлары үчүн Мәктәбин Патерсонда илдә ики синфи кечириләҹәк, үстәлик, әввәлләр бу мәктәбләри кечәнләрин онлары јенидән кечмәк имканы олаҹаг.

Програмын сонунда узун мүддәт Рәһбәрлик Шурасынын үзвү олан 97 јашлы Ҹон Баррb гардашын тәвазөкарҹасына вә сәмими-гәлбдән дуа етмәси һамынын үрәјини риггәтә ҝәтирди. Һәгигәтән дә, бу иллик ҝөрүш һәр кәсин јаддашында тарихи ҝөрүш кими галды.

[Һашијә]

[19 сәһифәдәки шәкил]

Танышлыг мәгсәдилә ҝөтүрүлән мүсаһибәләр һамынын хошуна ҝәлди

[20 сәһифәдәки шәкил]

Јеһова Ефиопијадакы тәблиғ хидмәтини хејир-дуаландырыр