Һәјатым боју ҝүҹ мәнбәјим олан вәрдиш

Нәгл етди Марсо Леруа

МӘН отағыма ҝириб ҝизлиҹә охумаға башладым: «Башланғыҹда Аллаһ ҝөјләри вә јери јаратды». Нәјә ҝөрә ҝизлиҹә? Чүнки билирдим ки, гаты атеист олан атамын әлимдәки китабы — Мүгәддәс Китабы ҝөрәси ҝөзү јохдур.

Әввәлләр Мүгәддәс Китабы охумаг мәнә һеч вахт нәсиб олмамышды вә «Јарадылыш» китабынын илк сөзләрини охујанда, елә бил, мәни илдырым вурду. «Мәни һәмишә һејрәтә ҝәтирән физики ганунлар арасындакы һармонијанын сәбәби, сән демә, бу имиш!» — дејә өз-өзүмә фикирләшдим. Бу, мәнә о гәдәр тәсир етмишди ки, ахшам саат 8-дән сәһәр саат 4-ә гәдәр китаб әлимдән дүшмәди. Һәмин ҝүндән етибарән Аллаһын Кәламыны охумаг мәндә вәрдиш һалыны алды. Бу вәрдишин өмрүм боју мәним үчүн ҝүҹ мәнбәји неҹә олдуғуну сизинлә бөлүшмәк истәрдим.

«Ону һәр ҝүн охумалы олаҹагсан»

Мән 1926-ҹы илдә Франсанын шималында, шахтачыларын јашадығы Вермел кәндиндә дүнјаја ҝөз ачмышам. Мән дә шахтада ишләјирдим. Икинҹи Дүнја мүһарибәси заманы көмүр дөвләт әһәмијјәтли мәһсул олдуғу үчүн, бүтүн шахтачылар кими, мән дә һәрби хидмәтдән азад едилмишдим. Бунунла белә, мадди вәзијјәтими јахшылашдырмаг үчүн радиоелектрониканы өјрәнмәјә башладым. Мән физики ганунлар арасында әсил һармонијанын һөкм сүрдүјүнү баша дүшдүм. 21 јашымда груп јолдашларымдан бири мәнә Мүгәддәс Китабы вериб деди: «Бу китабы охумаға дәјәр». Бу, мәним илк Мүгәддәс Китабым олду. Ону охујуб гуртардыгдан сонра әмин олдум ки, о, һәгигәтән дә, Аллаһын Кәламы, Онун бәшәријјәтә үнванладығы хәбәрдир.

Дүшүнүрдүм ки, Мүгәддәс Китабы охумаг гоншуларым үчүн дә мараглы олаҹаг. Буна ҝөрә дә әлавә олараг сәккиз нүсхә Мүгәддәс Китаб әлдә етдим. Амма истеһза вә тәгибләрлә үзләшәндә тәәҹҹүбдән донуб јеримдә галмышдым. Мөвһуматчы гоһум-әгрәбаларым мәнә дедиләр: «Бу китабы охумаға башладынса, ону һәр ҝүн охумалы олаҹагсан». Мән белә дә етдим вә индијәдәк пешман олмамышам. Бу, мәним һәјатымын ајрылмаз бир һиссәси олду.

Мүгәддәс Китаба олан марағымы ҝөрән бәзи гоншуларым мәнә Јеһованын Шаһидләриндән алдыглары нәшрләри вердиләр. «Бир дүнја, бир һөкумәт»a (шәкилдә франсызҹа ҝөстәрилиб) брошүрасында олдуғу кими, диҝәр брошүраларда да изаһ олунурду ки, нәјә ҝөрә Мүгәддәс Китабда Аллаһын Падшаһлығы бәшәријјәт үчүн јеҝанә үмид јери адланыр (Мат. 6:10). Бундан сонра үмидими башгалары илә бөлүшмәк әзмим даһа да артды.

Мүгәддәс Китабы мәндән гәбул едән илк адам ушаглыг достум Ноел иди. О, католик олдуғу үчүн кешиш олмаға һазырлашан бир нәфәрлә бизим үчүн ҝөрүш тәшкил етди. Мән чәкинирдим. Лакин Мәзмур 115:4—8 вә Матта 23:9, 10 ајәләриндән Аллаһын ибадәтдә бүтләрдән истифадә едилмәсини вә кешишләрә дини титулларла мүраҹиәт олунмасыны бәјәнмәдијини билмәк јени етигадымы мүдафиә етмәкдә мәнә ҹәсарәт верди. Һәмин сөһбәтдән сонра Ноел һәгигәти гәбул етди вә та бу ҝүнә гәдәр Јеһоваја сәдагәтлә хидмәт едир.

Ҝүнләрин бир ҝүнү бөјүк баҹымҝилә гонаг ҝетдим. Онун һәјат јолдашынын ҹиндарлыгла бағлы китаблары вар иди вә ҹинләр ону нараһат едирди. Әввәл-әввәл өзүмү аҹиз һисс етсәм дә, Ибраниләрә 1:14 ајәси, еләҹә дә бу кими диҝәр ајәләр мәни әмин етди ки, Јеһованын мәләкләри мәни мүдафиә едир. Баҹымын әри Мүгәддәс Китаб принсипләрини тәтбиг едәндә вә сеһрбазлыгла бағлы һәр шеји атанда ҹинләр ону раһат бурахдылар. Онларын һәр икиси Јеһоваја ҹанла-башла хидмәт етмәјә башлады.

1947-ҹи илдә Америкадан олан Артур Емион адында бир гардаш бизә баш чәкди. Севинҹимин һәдди-һүдуду јох иди. Ондан Јеһованын Шаһидләринин ҝөрүшләринин һарада кечирилдијини сорушанда о деди ки, тәхминән 10 километр узаглыгда јерләшән Левен шәһәриндә бир груп вар. Һәмин илләрдә ади велосипед белә алмаг мүшкүл мәсәлә иди. Буна ҝөрә дә бир нечә ај әрзиндә ҝөрүшләрә пијада ҝедиб-ҝәлирдим. 8 ил бизим фәалијјәтимиз дөвләт тәрәфиндән гадаған едилмишди. Өлкәдә ҹәми-ҹүмләтаны 2380 Шаһид вар иди вә онларын әксәријјәти Полшадан ҝәлән мүһаҹирләр иди. Лакин 1947-ҹи ил сентјабрын 1-и Франса һөкумәти Јеһованын Шаһидләрини рәсми олараг јенидән таныды. Парисин Вилла Гибер рајонунда бизим филиалымыз јенидән фәалијјәтә башлады. Һәмин вахт Франсада бир нәфәр дә олсун пионер олмадығы үчүн 1947-ҹи илин декабр сајынын «Информатор» вәрәгәсиндә (һал-һазырда «Бизим Падшаһлыг Хидмәтимиз» адланыр) тәшкилат баҹы-гардашлары даими пионер хидмәтинә башламаға тәшвиг етди. Һәмин илләрдә даими пионер ајда 150 саат тәблиғ едирди. (Анҹаг 1949-ҹу илдә бу норма 100 саата ендирилди.) Исанын Јәһја 17:17 ајәсиндә јазылан «Сәнин сөзүн һәгигәтдир» сөзләринә ујғун олараг, 1948-ҹи илдә вәфтиз олдум, 1949-ҹу илин декабр ајында исә даими пионер хидмәтинә башладым.

Һәбсханадан сонра јенидән Дүнкерк шәһәриндә

Илк тәјинатым Франсанын ҹәнубунда јерләшән Ажен шәһәри иди, лакин бурада хидмәтим чох чәкмәди. Чүнки артыг шахтада ишләмәдијим үчүн мәни һәрби хидмәтә чағырдылар, анҹаг һәрби хидмәтдән имтина етдијимдән һәбсханаја ҝөндәрилдим. Һәбсханада мәнә Мүгәддәс Китаб вермирдиләр. Лакин «Зәбур» китабынын бир нечә мәзмуруну әлдә едә билдим. Онлары охудугҹа руһланырдым. Азадлыға чыхандан сонра сечим гаршысында идим: таммүддәтли хидмәтими давам етдирим, јохса өзүм үчүн шәраит гурум? Бу вәзијјәтдә дә Мүгәддәс Китаб көмәјимә чатды. Мән Павелин Филипилиләрә 4:11—13 ајәләриндә јаздығы: «Мәнә гүввәт верәнин сајәсиндә һәр шејә ҝүҹүм чатыр», — сөзләрини ҝөтүр-гој етдим. Пионер хидмәтини давам етдирмәк гәрарына ҝәлдим вә вахтилә хидмәт етдијим Дүнкерк шәһәринә 1950-ҹи илдә јенидән тәјин олундум.

Шәһәрә ҝәләндә һеч нәјим јох иди. Икинҹи Дүнја мүһарибәси заманы шәһәрә ҹидди зијан дәјмишди вә ев тапмаг мүшкүл мәсәлә иди. Илк дәфә бу шәһәрдә оларкән тәблиғ етдијим бир аиләјә баш чәкмәк гәрарына ҝәлдим. Евин ханымы мәни ҝөрәндә чох севинди вә деди: «О! Ҹәнаб Леруа, сизи бурахыблар! Әрим дејир ки, сизин кими адамлар чох олсајды, һеч вахт мүһарибә олмазды». Онларын кичик меһманханасы вар иди вә турист мөвсүмү башлајанадәк мәнә отагларын бириндә галмағы тәклиф етдиләр. Елә һәмин ҝүн Артур Емионун гардашы Евансb мәнә иш тәклиф етди. О, дәниз лиманында тәрҹүмәчи ишләјирди вә ҝәми үчүн ҝеҹә кешикчиси ахтарырды. Еванс мәни капитанын баш көмәкчиси илә таныш етди. Һәбсханадан чыханда бир дәри, бир сүмүк галмышдым. Еванс бунун сәбәбини изаһ етдикдән сонра капитанын көмәкчиси деди ки, сојудуҹудан өзүмә јемәк ҝөтүрүм. Бир ҝүнүн ичиндә мән галмаға јер, иш вә гида тапдым! Бундан сонра Матта 6:25—33 ајәләриндә јазылан Исанын сөзләринә етибарым даһа да артды.

Турист мөвсүмү башлајанда тәрәф мүгабилим Симон Аполинарски илә бирҝә башга ев ахтармалы олсаг да, хидмәтимизи дајандырмағы һеч ағлымыздан белә кечирмирдик. Бизә көһнә ат төвләсиндә галмаға јер тәклиф етдиләр. Биз орада самандан дүзәлдилмиш дөшәкләрдә јатырдыг. Бүтүн ҝүнүмүз хидмәтдә кечирди. Фүрсәтдән истифадә едиб төвләнин саһибинә тәблиғ етдик вә бир чох инсанлар кими, о да һәгигәти гәбул етди. Бундан бир гәдәр сонра јерли гәзетләрин бириндә Дүнкеркин сакинләрини «бу әразидә Јеһованын Шаһидләринин гызғын фәалијјәти»ндән хәбәрдар едән мәгалә чыхды. Әслиндә исә мәндән, Симондан вә бир нечә тәблиғчидән савајы, бурада башга Шаһидләр јох иди. Чәтинликләрлә үзләшәндә ҝәләҹәјә олан үмидимиз вә Јеһованын гајғымыза неҹә галдығы үзәриндә дүшүнмәк бизи руһландырырды. 1952-ҹи илдә тәјинатым дәјишиләндә Дүнкеркдә тәблиғдә фәал иштирак едән тәхминән 30 тәблиғчи вар иди.

Јеһова мәни јени мәсулијјәтләр үчүн мөһкәмләндирир

Амјен шәһәриндә гыса мүддәт галдыгдан сонра Парисин јахынлығында јерләшән Булон-Бијанкура хүсуси пионер тәјин олундум. Мән бир чох инсанларла Мүгәддәс Китабы өјрәнирдим. Онлардан бәзиләри таммүддәтли хидмәтчи вә миссионер олдулар. Һәгигәти гәбул едәнләрин арасында Гај Мабила адлы бир ҝәнҹ оғлан вар иди. Әввәлҹә рајон, сонра исә вилајәт нәзарәтчиси кими хидмәт едән бу гардаш һал-һазырда Бет-Елин јерләшдији Лувје шәһәриндә (Парисин јахынлығында јерләшир) типографија бинасынын тикинтисинә нәзарәт едирди. Хидмәтдә тез-тез Мүгәддәс Китаб барәдә данышдығым үчүн Аллаһын Кәламы үрәјимин дәринликләриндә һәкк олунурду. Бу, мәнә севинҹ бәхш едирди, өјрәтмәк габилијјәтим исә ҝетдикҹә пүхтәләширди.

Тамамилә ҝөзләнилмәдән 1953-ҹү илдә Елзас-Лотаринҝија вилајәтинә рајон нәзарәтчиси тәјин олундум. 1871—1945-ҹи илләр арасында Алманија ики дәфә бу әразини өз өлкәсинин тәркибинә дахил етмишди. Бу исә о демәк иди ки, мән алман дилини өјрәнмәли идим. Рајон нәзарәтчиси кими хидмәтә тәзә-тәзә башлајанда һәмин әразидә автомобил, телевизор вә чап машыны аз адамда тапыларды, радио вә компүтер исә үмумијјәтлә һеч кәсдә јох иди. Буна бахмајараг, һәјатым нә дарыхдырыҹы, нә дә ки марагсыз кечирди, әксинә, бу, өмрүмүн ән севиндириҹи илләри иди. Мүасир зәманә илә мүгајисәдә диггәти јајындыран шејләр чох аз олдуғу үчүн ҝөзү тох сахламаг вә садә һәјат сүрмәк даһа асан иди (Мат. 6:19—22).

1955-ҹи илдә Парисдә кечирилән «Зәфәр чалан Падшаһлыг» адлы конгрес јаддашымда силинмәз из гојду. Бурада мән ҝәләҹәк һәјат јолдашымла — Ирен Колански илә таныш олдум. О, таммүддәтли хидмәтә мәндән бир ил әввәл башламышды. Иренин валидејнләри полјак идиләр. Онлар узун мүддәт Јеһоваја сәјлә хидмәт едирдиләр. Франсада онлара Адолф Вебер адлы гардаш баш чәкмишди. О, вахтилә Рассел гардашын бағбаны иди вә Авропаја хош хәбәри тәблиғ етмәк үчүн ҝәлмишди. 1956-ҹы илдә евләндикдән сонра сәјјар хидмәти бирҝә давам етдирдик. Ирен о илләр әрзиндә мәнә бөјүк дәстәк олуб!

Ики илдән сонра мәни башга бир сүрприз ҝөзләјирди: мән вилајәт нәзарәтчиси тәјин олундум. Лакин јарарлы гардашлар аз олдуғундан рајон нәзарәтчиси кими бәзи јығынҹаглара баш чәкмәјә давам едирдим. О вахтлар башым ишдән ајылмырды! Һәр ај 100 саат тәблиғ етмәклә јанашы, һәр һәфтә јығынҹагларда мәрузәләрлә чыхыш етмәли, үч китабөјрәнмәјә баш чәкмәли, јығынҹагларын сәнәдләрини јохламалы вә һесабатлар һазырламалы идим. Бәс Аллаһын Кәламыны охумаға вахты неҹә тапырдым? Јеҝанә чыхыш јолуну көһнә бир Мүгәддәс Китабын вәрәгләрини ҹырыб өзүмлә ҝәздирмәкдә вә кимисә ҝөзләдијим мүддәтдә бу сәһифәләри ҝөтүрүб охумагда ҝөрүрдүм. Бу тәравәтвериҹи анлар тәјинатымда галмаг гәтијјәтими мөһкәмләндирирди.

1967-ҹи илдә биз о вахтлар Булон-Бијанкурда јерләшән Бет-Елә дәвәт алдыг. Мәни хидмәти шөбәјә тәјин етдиләр вә 40 илдән чохдур ки, бурада хидмәт едирәм. Хидмәтимдә ән чох хошума ҝәлән мәгамлардан бири Мүгәддәс Китаб суалларына мәктуб васитәсилә ҹаваб вермәкдир. Аллаһын Кәламынын дәринликләринә вармаг вә хош хәбәри мүдафиә етмәк мәнә зөвг верир (Филип. 1:7). Бет-Елдә сәһәр ибадәтини апармаг вә Мүгәддәс Китабы мүзакирә етмәк дә мәним чох хошума ҝәлир. 1976-ҹы илдән бәри исә Франсадакы филиалын комитә үзви кими хидмәт едирәм.

Ән јахшы һәјат јолу

Һәјатымызда чәтинликләр аз олмајыб, амма гоҹалыг вә сәһһәтимиздәки проблемләр хидмәтимизи мәһдудлашдырдығы үчүн демәк олар ки, өмрүмүзүн ән чәтин илләрини јашајырыг. Лакин Мүгәддәс Китабы бирҝә охујуб арашдырмағымызын сајәсиндә ҝәләҹәјә олан үмидимиз әввәлки кими мөһкәмдир. Бу үмиди јығынҹағымызын әразисиндә јашајан инсанларла бөлүшмәк бизим үчүн чох хошдур. Икимизин таммүддәтли хидмәтә сәрф етдијимиз вахты үст-үстә ҝәлсәк, 120 илдән чох едир. Бу тәҹрүбәмиздән ирәли ҝәләрәк хошбәхт, севиндириҹи вә мәналы һәјат сүрмәк истәјән һәр кәсә сәмими-гәлбдән бу јолу тутмағы мәсләһәт ҝөрүрүк. Падшаһ Давуд Мәзмур 37:25 ајәсиндәки сөзләри јазанда артыг гоҹалмышды. Онун кими, мән дә «салеһин тәрк едилдијини» ҝөрмәмишәм.

Јеһова Кәламы васитәсилә һәјатым боју мәни мөһкәмләндириб. 60 ил бундан әввәл гоһумларым демишдиләр ки, Мүгәддәс Китабы охумаға башладымса, бу, өмрүм боју давам едәҹәк. Онлар һаглы идиләр. Мүгәддәс Китабы һәр ҝүн охудуғума ҝөрә һеч вахт пешман олмамышам!

[Һашијәләр]

[5-ҹи сәһифәдәки шәкил]

Симон вә мән

[5-ҹи сәһифәдәки шәкил]

Вилајәт нәзарәтчиси кими хидмәт едәркән

[5-ҹи сәһифәдәки шәкил]

Илк Мүгәддәс Китабыма охшар Мүгәддәс Китаб

[6-ҹы сәһифәдәки шәкил]

Тој ҝүнүмүз

[6-ҹы сәһифәдәки шәкил]

Иренлә мән Мүгәддәс Китабы охујуб арашдырмағы чох севирик