Ҝәлин бирҝә севинәк!
ХОШБӘХТЛИЈӘ наил олмаг вә севинмәк ҝет-ҝедә чәтинләшир. Чохлары үчүн башгалары илә мүсбәт емосијаларла бөлүшмәк демәк олар ки, гејри-мүмкүндүр. Мүасир һәјат тәрзи — хүсусилә дә бөјүк шәһәрләрдә — инсанларын өзләринә гапанмаларына вә өзләрини башгаларындан тәҹрид етмәләринә сәбәб олур.
Психобиолоҝија үзрә профессор Алберто Оливерио гејд едир: «Тәнһалыг ади һала чеврилиб... Шүбһә јохдур ки, бөјүк шәһәрләрдәки һәјат тәрзи инсанларын өзләрини башгаларындан тәҹрид етмәләринә сәбәб олур. Чох вахт исә бу, иш јолдашларымыза, гоншуларымыза вә тез-тез алыш-вериш етдијимиз супермаркетин ишчиләринә лагејдлик ҝөстәрмәјимизә ҝәтириб чыхарыр». Инсанларын өзләрини башгаларындан тәҹрид етмәләри чох вахт депрессијаја јол ачыр.
Мәсиһчиләрин вәзијјәти, еләҹә дә әһвал-руһијјәси тамам фәрглидир. Һәвари Павел јазмышды: «Һәмишә севинин» (1 Салон. 5:16). Истәр тәк, истәрсә дә баҹы-гардашларымызла бирҝә оларкән севинмәк үчүн чохлу сәбәбләримиз вар. Биз Уҹа Аллаһ Јеһоваја ибадәт едирик; Мүгәддәс Китабдакы һәгигәтләри баша дүшүрүк; бизим хилас олуб әбәди һәјата говушмаг үмидимиз вар вә башгаларына бу хејир-дуалары алмаға көмәк едә биләрик (Мәз. 106:4, 5; Јер. 15:16; Ром. 12:12).
Севинмәк вә киминсә севинҹинә шәрик олмаг һәгиги мәсиһчиләри башгаларындан фәргләндирән ҹәһәтләрдән биридир. Буна ҝөрә дә Павел Филипидәки һәмиманлыларына нөвбәти сөзләри демишди: «Мән чох шадам вә сизинлә бирликдә севинирәм. Сиз дә мәнимлә баһәм севиниб шадланын» (Филип. 2:17, 18). Бурада о, дүз ики дәфә хошбәхт олмаг вә башгалары илә бирҝә севинмәк барәдә јазды.
Мәсиһчиләр еһтијатлы олмалыдырлар ки, өзләрини башгаларындан тәҹрид етмәсинләр. Һәмиманлыларындан кәнар ҝәзән мәсиһчи һеч вахт онларла бирҝә севинә билмәз. Белә исә, Павелин «Рәббә хидмәтдән [гардашларла бирҝә] һәмишә севинҹ дујун» нәсиһәтинә неҹә әмәл едә биләрик? (Филип. 3:1).
Һәмиманлыларымызла бирҝә севинәк
Ҝөрүнүр, Павел филипилиләрә мәктуб јазанда тәблиғ фәалијјәтинә ҝөрә Ромада һәбсдә иди (Филип. 1:7; 4:22). Буна бахмајараг, онун хидмәтдә ҝөстәрдији сәј азалмамышды. Әксинә, о, шәраитинин јол вердији гәдәр Јеһоваја хидмәт етмәкдән вә «хидмәтин үзәринә шәраб тәгдими кими» төкүлмәкдән севинҹ дујурду (Филип. 2:17). Павелин нүмунәси ҝөстәрир ки, севинҹ шәраитдән асылы дејил. Һәбсдә олмасына бахмајараг, о деди: «Мән бундан сонра да севинәҹәјәм» (Филип. 1:18).
Филипидәки јығынҹағы Павел тәсис етдијиндән бурадакы гардашлара хүсуси мәһәббәт бәсләјирди. О билирди ки, Јеһоваја хидмәтдә дујдуғу севинҹини онларла бөлүшсә, онлары руһландырмыш олаҹаг. Буна ҝөрә дә о јазмышды: «Гардашлар, истәјирәм ки, буну да биләсиниз: башыма ҝәләнләр хош хәбәрин јајылмасына хидмәт етмишдир. Бәли, мәһз јајылмасына, әксинә јох. Белә ки, Мәсиһ уғрунда һәбс олундуғум һамыја, о ҹүмләдән император гвардијасына да мәлум олуб» (Филип. 1:12, 13). Павелин бу руһландырыҹы мәлуматы Филипидәки һәмиманлылары илә бөлүшмәси она бөјүк севинҹ ҝәтирди вә о, онларла бирҝә севинди. Филипилиләр дә, өз нөвбәсиндә, онунла бирҝә севинмәли вә Павелин һәбсдә олмасына ҝөрә руһдан дүшмәмәли идиләр. Әксинә, онлар Павелдән нүмунә ҝөтүрмәли идиләр (Филип. 1:14; 3:17). Үстәлик, онлар Павел үчүн дуа етмәјә, еләҹә дә имканлары дахилиндә јардым ҝөстәрмәјә вә дәстәк олмаға давам едә биләрдиләр (Филип. 1:19; 4:14—16).
Павелдәки әһвал-руһијјә биздә дә вармы? Һәјатымыздакы вә хидмәтимиздәки мүсбәт мәгамлары ҝөрмәјә чалышырыгмы? Һәмиманлыларымызла бирҝә оларкән тәблиғдә баш верән јахшы һадисәләри бөлүшәрәк бирҝә севинә биләрик. Бунун үчүн хидмәтдә башымыза гејри-ади һадисәләрин ҝәлмәсини ҝөзләмәмәлијик. Ола билсин, еффектив тәгдимә вә ја јүрүтдүјүмүз мүлаһизә сајәсиндә кимдәсә Падшаһлыг һагда хош хәбәрә мараг ојада билдик. Бәлкә дә, габагҹадан сечдијимиз ајә әсасында ев саһиби илә јахшы сөһбәтимиз алыныб. Јахуд да саһәмиздә бизим Јеһованын Шаһиди олдуғумузу билдиләр вә бунун өзү артыг ҝөзәл шаһидлик олду. Бу кими һадисәләри һәмиманлыларымызла бөлүшмәк онларла бирҝә севинмәјимиз үчүн сәбәбдир.
Кечмишдә олдуғу кими, бу ҝүн дә Јеһованын бир чох хидмәтчиләри хош хәбәри тәблиғ етмәк уғрунда чох шејләриндән кечирләр. Пионерләр, сәјјар нәзарәтчиләр, бет-еллиләр, миссионерләр, бејнәлхалг програм хидмәтчиләри сәјлә хидмәт едирләр вә бундан севинҹ дујурлар. Биз дә онларла бирҝә севинирикми? Онда ҝәлин онларын зәһмәтини вә «Аллаһын падшаһлығы уғрунда» әмәкдаш олдуғумузу гијмәтләндирдијимизи ҝөстәрәк (Колос. 4:11). Јығынҹагда вә бөјүк конгресләрдә онлары руһландыра, еләҹә дә онлар кими хидмәтдә сәј ҝөстәрә биләрик. Бу баҹы-гардашлары наһара дәвәт едәрәк гонагпәрвәрлик ҝөстәрә, бунунла да хидмәтләриндә баш верән һадисәләри бөлүшмәләри вә руһланмағымыз үчүн шәраит јарада биләрик (Филип. 4:10).
Сынагларла үзләшәнләрлә бирҝә севинин
Павел сынаг вә тәгибләрә таб ҝәтирәндә һәм мөһкәмләнирди, һәм дә онун Јеһоваја садиг галмаг гәтијјәти артырды (Колос. 1:24; Јаг. 1:2, 3). О билирди ки, Филипидәки гардашлар ејнән онун үзләшдији сынаглара мәруз гала биләрләр. Сынаглара таб ҝәтирмәси сајәсиндә гардашларыны руһландыраҹағыны билмәк она севинҹ ҝәтирирди. Буна ҝөрә о јазды: «Мәсиһә иман ҝәтирмәклә јанашы, сизә онун уғрунда әзијјәт чәкмәк шәрәфи дә нәсиб олуб. Сиз мәним апардығым мүбаризәни ҝөрмүсүнүз вә инди дә онун һаггында ешидирсиниз. Өзүнүз дә һал-һазырда белә мүбаризә апарырсыныз» (Филип. 1:29, 30).
Ејнилә бу ҝүн дә мәсиһчиләр тәблиғ етдикләри үчүн мүгавимәтләрлә үзләширләр. Бәзән бу мүгавимәтләр шиддәтли, чох вахт исә ҝизли шәкилдә олур. Бәзән исә дөнүкләр бизи јаландан иттиһам едә, аилә үзвләримиз әдавәт бәсләјә, јахуд да иш вә ја синиф јолдашларымыз бизи әлә сала биләрләр. Иса габагҹадан хәбәрдарлыг етди ки, бу сынаглар бизи нә тәәҹҹүбләндирмәли, нә дә ки руһдан салмалыдыр. Әксинә, бунлар севинмәјимиз үчүн сәбәбдир. О демишди: «Мәнә ҝөрә инсанлар сизи тәһгир вә тәгиб едәндә, сизин һаггынызда һәр ҹүр јалан вә пис сөз данышанда сиз неҹә дә хошбәхтсиниз. Севинин вә шадланын, чүнки ҝөјдә сизи бөјүк мүкафат ҝөзләјир» (Мат. 5:11, 12).
Башга өлкәләрдә һәмиманлыларымызын шиддәтли тәгибләрә мәруз галдыгларыны ешидәндә бу, бизи горхутмамалы вә ја дәһшәтә салмамалыдыр. Биз севинмәлијик ки, онлар бу сынаглара дөзүрләр. Онлар үчүн дуа едиб Јеһовадан иманларыны горумаға вә сынагларына таб ҝәтирмәләринә көмәк етмәсини хаһиш едә биләрик (Филип. 1:3, 4). Бу әзиз баҹы-гардашларымыз үчүн чох шеј едә билмәсәк дә, өз јығынҹагларымызда сынагларла үзләшән һәмиманлыларымыза көмәк әлимизи узатмаг имканымыз вар. Биз онларын рифаһы илә мараглана вә онлара дәстәк ола биләрик. Бу баҹы-гардашлары вахташыры аиләви ибадәт ахшамына дәвәт едәрәк, онларла хидмәтә чыхараг, бирҝә истираһәт едәрәк бәрабәр севинә биләрик.
Бәли, севинмәјимиз үчүн бизим чохлу сәбәбләримиз вар. Ҝәлин бу дүнјанын инсанлары кими өзүмүзү башгаларындан тәҹрид едәрәк дүнјанын руһуна ујмајаг. Онда јығынҹагда мәһәббәт вә бирлијин олмасында бизим дә пајымыз олаҹаг вә үмумдүнја гардашлығынын үзви олмаг бизә бөјүк севинҹ бәхш едәҹәк (Филип. 2:1, 2). Беләликлә, ҝәлин Павелин сөзләрини јадымызда сахлајаг: «Рәббин јолунда һәмишә севинин. Бәли, севинин!» (Филип. 4:4).
[6–ҹы сәһифәдәки шәкил]
Globe: Courtesy of Replogle Globes