Субајлыг вә евлиликлә бағлы мүдрик мәсләһәтләр
«Сизи әдәблә давранмаға вә Ағамыза даима јајынмадан хидмәт етмәјә тәшвиг етмәк истәјирәм» (1 КОР. 7:35).
1, 2. Нәјә ҝөрә мәсиһчи субајлыг вә евлиликлә әлагәдар Мүгәддәс Китабын нөгтеји-нәзәрини арашдырмалыдыр?
ӘКС ҸИНСЛӘ мүнасибәтләр бизә ән чох хошбәхтлик ҝәтирән, ејни заманда да нараһатчылыг вә мәјуслуг доғуран саһәләрдән биридир. Бу һиссләрлә баҹармаг үчүн Аллаһын рәһбәрлијинә еһтијаҹымыз вар, анҹаг бу, Онун рәһбәрлијини ахтармағымыз үчүн јеҝанә сәбәб дејил. Субај, лакин өз вәзијјәтләри илә гане олан мәсиһчиләр аилә үзвләри, еләҹә дә достлары тәрәфиндән евләнмәк үчүн тәзјигләрә мәруз гала биләрләр. Диҝәр мәсиһчиләр евләнмәк истәсәләр дә, мүнасиб һәјат јолдашы тапа билмирләр. Бәзиләринә исә әр вә ја арвад мәсулијјәтләринә һазырлашмаг үчүн рәһбәрлик лазымдыр. Үстәлик, һәм субај, һәм дә евли мәсиһчиләр өзләрини ҹинси әхлагсызлыгдан горумалыдырлар.
2 Бу мәсәләләр нәинки хошбәхтлијимизә, ән әсасы Аллаһла мүнасибәтләримизә тәсир ҝөстәрир. Павел «Коринфлиләрә биринҹи мәктуб»унун једдинҹи фәслиндә субајлыг вә никаһла әлагәдар бәзи мәсләһәтләр верир. Онун мәгсәди охуҹуларыны «әдәблә давранмаға вә Ағамыза даима јајынмадан хидмәт етмәјә тәшвиг етмәк» иди (1 Кор. 7:35). Бу ваҹиб мәсәлә илә бағлы Онун вердији мәсләһәтләри арашдырдыгҹа, субај вә ја евли олмағындан асылы олмајараг, өз вәзијјәтинә Јеһоваја даһа јахшы хидмәт етмәк имканы кими бахмаға чалыш.
Ваҹиб шәхси гәрар
3, 4. а) Дост вә ја гоһумлар субај инсаны һансы чәтин вәзијјәтә сала биләрләр? б) Павелин мәсләһәти мәсиһчијә евлилик мәсәләсинә таразлы јанашмаға неҹә көмәк едир?
3 Биринҹи әсрдә јашајан јәһуди халгында адәт олдуғу кими, бу ҝүн дә бир чох мәдәнијјәтләрдә аилә гурмаг ән ваҹиб мәсәлә сајылыр. Әҝәр оғлан вә ја гыз мүәјјән јаш һәддини кечибсә вә һәлә дә аилә гурмајыбса, достлары вә гоһумлары она ҝөрә нараһатчылыг кечирир вә никаһа дахил олмасы үчүн мүхтәлиф мәсләһәтләр вермәјә башлајырлар. Сөһбәт әснасында онлар оғлан вә ја гыза дејә биләрләр ки, һәјат јолдашы ахтармагда даһа фәал олсун вә јахуд да өзләри кимисә мәсләһәт ҝөрүрләр. Бәзиләри һәтта һијләјә әл атараг ики нәфәрин ҝөрүшмәсини дүзүб-гошурлар. Бәзән белә һәрәкәтләр киминсә хәҹаләтли олмасына, достлуг мүнасибәтләринин позулмасына вә гәлбләрин гырылмасына ҝәтириб чыхарыр.
4 Павел һеч вахт һеч кими евләнмәк вә ја субај галмаг үчүн дилә тутмурду (1 Кор. 7:7). О, һәјат јолдашы олмадан Јеһоваја хидмәтдән севинҹ дујса да, башгаларынын евләнмәк һүгугуна һөрмәтлә јанашырды. Бу ҝүн дә һәр бир мәсиһчинин евләнмәк вә ја субај галмаг һүгугу вар. Башгалары онлары бу вә ја диҝәр гәрары вермәјә мәҹбур етмәмәлидирләр.
Субајлыгдан сәмәрәли истифадә ет
5, 6. Нәјә ҝөрә Павел мәсиһчиләрә субај галмағы мәсләһәт ҝөрүрдү?
5 Павелин коринфлиләрә јаздығы мәктубун сәҹијјәви ҹәһәтләриндән бири орада субајлыға даир мүсбәт нөгтеји-нәзәринин әкс олунмасыдыр. (1 Коринфлиләрә 7:8 ајәсини оху.) Павел евли олмаса да, субајлыг андыны ичән Христиан дүнјасынын руһаниләриндән фәргли олараг, өзүнү евли инсанлардан үстүн тутмурду. Әксинә, о, Аллаһын бир чох субај хидмәтчиләринин малик олдуғу үстүнлүкдән бәһс етди. Бу, һансы үстүнлүкдүр?
6 Евли инсанлардан фәргли олараг, субај мәсиһчиләр үчүн Јеһоваја хидмәтлә бағлы тәјинатлар алмаг чох вахт даһа асан олур. Павел «диҝәр халглара ҝөндәрилмиш бир һәвари» кими хүсуси шәрәфә лајиг ҝөрүлмүшдү (Ром. 11:13). «Һәвариләрин ишләри» китабынын 13—20 фәсилләрини оху вә Павелин диҝәр миссионерләрлә бирҝә әразиләри гарыш-гарыш ҝәзиб јени јығынҹаглар тәсис етмәсинә диггәт јетир. Хидмәти заманы Павел бу ҝүн чох аз мәсиһчинин үзләшдији сынагларла үзләшмишди (2 Кор. 11:23—27, 32, 33). Лакин бир чох инсанлара Мәсиһин давамчысы олмаға көмәк етмәкдән дујдуғу севинҹ буна дәјәрди (1 Салон. 1:2—7, 9; 2:19). Әҝәр онун арвады вә ушаглары олсајды, мәҝәр о, бүтүн бунлары едә биләрди? Јәгин ки, јох.
7. Өз вәзијјәтләриндән Падшаһлығын марагларынын ирәлиләмәси үчүн истифадә едән субај баҹы-гардашлардан нүмунә чәк.
7 Бир чох субај мәсиһчиләр индики шәраитләрдән јарарланараг Падшаһлыг ишинин ирәлиләмәси үчүн чох шеј едирләр. Боливијада јашајан Сара вә Лимбаниа адлы субај пионерләр узун илләрдир ки, тәблиғчиләрин ајағы дәјмәдији бир кәндә көчмүшдүләр. Кәнддә електрикин олмамасы онлар үчүн проблем олдуму? Баҹылар дејирләр: «Орада радио вә телевизор олмадығындан ҹамааты әсас мәшғулијјәтләри олан китаб охумагдан һеч нә јајындырмыр». Бәзи сакинләр пионерләрә артыг чап олунмајан, лакин онларын тәкрарән охудуглары нәшрләримизи ҝөстәрдиләр. Һәр гапыда хош хәбәрә мараг бөјүк олдуғундан баҹылар һәмин кәндин бүтүн сакинләринә баш чәкмәкдә чәтинлик чәкирдиләр. Бир јашлы гадын онлара деди: «Әҝәр Јеһованын Шаһидләри бизә ҝәлиб чатыбларса, јәгин ки, сон чох јахындыр». Тезликлә кәндин сакинләриндән бәзиләри јығынҹаг ҝөрүшләриндә иштирак етмәјә башладылар.
8, 9. а) Нәјә ҝөрә Павел Јеһоваја субај галараг хидмәт етмәк барәдә мүсбәт нөгтеји-нәзәрдән данышды? б) Евли олмајан мәсиһчиләрин һансы үстүнлүјү вар?
8 Бу да данылмаз фактдыр ки, евли мәсиһчиләр дә чәтин әразиләрдә хош хәбәри бәјан едәрәк јахшы нәтиҹәләр әлдә едирләр. Лакин евли вә ја ушаглары оланлардан фәргли олараг, субај пионерләрә гаршыларында ачылан имканлардан истифадә етмәк даһа асан ола биләр. Павел јығынҹаглара мәктуб јазанда билирди ки, хош хәбәрин тәблиғи илә әлагәдар ҝөрүләси һәлә чох иш вар. О истәјирди ки, һамы онун кими, бу ишдән севинҹ дујсун. Мәһз бу сәбәбдән о, субај галараг Јеһоваја хидмәт етмәк барәдә мүсбәт нөгтеји-нәзәрдән данышырды.
9 Бирләшмиш Штатларда јашајан бир субај пионер баҹы јазыр: «Бәзиләринин фикринҹә, хошбәхтлик субај инсанлар үчүн әлчатмаздыр. Анҹаг мән әмин олдум ки, әсил хошбәхтлик Јеһова илә достлугдан асылыдыр. Субајлыг гурбан олса да, әҝәр инсан ондан јарарланса, бу, ҝөзәл бир әнама чеврилә биләр». Хошбәхтлик барәдә исә о деди: «Субајлыг хошбәхтлијин гаршысыны алан манеә јох, она апаран јол ола биләр. Мән билирәм ки, Јеһова нә субај, нә дә ки евли хидмәтчиләриндән Өз зәриф мәһәббәтини әсирҝәмир». Инди бу баҹы тәблиғчиләрә тәләбат олан әразидә хидмәт едир вә чох хошбәхтдир. Әҝәр субајсанса, өз азадлығындан хидмәтини ҝенишләндирмәк вә башгаларына һәгигәти өјрәтмәк үчүн истифадә едә биләрсәнми? Белә етсән, онда субајлыг Јеһованын сәнин үчүн әнамы ола биләр.
Евләнмәк арзусунда олан субајлар
10, 11. Јеһова евләнмәк арзусунда олан, лакин һәлә мүнасиб һәјат јолдашы тапмајан хидмәтчиләринә неҹә дајаг олур?
10 Бир мүддәт субај галдыгдан сонра Јеһованын бир чох садиг хидмәтчиләри гаршыларына аилә гурмаг мәгсәдини гојурлар. Бу мәсәләдә рәһбәрлијә еһтијаҹларыны дәрк едәрәк Јеһовадан хаһиш едирләр ки, онлара мүнасиб һәјат јолдашы тапмагда көмәк етсин. (1 Коринфлиләрә 7:36 ајәсини оху.)
11 Әҝәр сән Јеһоваја үрәкдән хидмәт етмәк истәјинә шәрик олан бир инсанла аилә гурмаг истәјирсәнсә, бу барәдә даима Јеһоваја дуа ет (Филип. 4:6, 7). Нә гәдәр ҝөзләмәли олсан да, руһдан дүшмә. Әмин ол ки, мәһәббәтли Јараданымыз Јеһова сәнин еһтијаҹларыны билир вә әҝәр Она ҝүвәнсән, О, сәнә көмәк едәҹәк (Ибр. 13:6).
12. Нәјә ҝөрә евләнмәк тәклифи алан мәсиһчи јүз өлчүб бир бичмәлидир?
12 Субај мәсиһчијә руһани ҹәһәтдән елә дә мөһкәм олмајан вә ја Јеһоваја хидмәт етмәјән инсандан евләнмәк тәклифи ҝәлә биләр. Ола билсин, сән дә белә тәклиф алмысан вә аилә гурмаг истәјин чох ҝүҹлүдүр. Лакин јадда сахла ки, никаһла бағлы вердијин сәһв гәрарын аҹы нәтиҹәләри субај оланда кечирдијин тәнһалыг һиссиндән даһа ағыр олаҹаг. Сечимин јахшы вә ја пис олмасындан асылы олмајараг, сән өмрүн боју һәмин инсанла јашамалы олаҹагсан (1 Кор. 7:27). Ҝөзүнү јумуб кимлә ҝәлди аилә гурма, сонра пешман олаҹагсан. (1 Коринфлиләрә 7:39 ајәсини оху.)
Аилә һәјатынын ҝерчәкликләринә һазыр олмаг
13-15. Евләнмәмишдән габаг ҹүтлүкләр ҝәләҹәкдә јарана биләҹәк һансы чәтинликләри мүзакирә етмәлидирләр?
13 Павел аилә гурмадан Јеһоваја хидмәт етмәји төвсијә етсә дә, евләнмәк гәрарыны верәнләрә јухарыдан ашағы бахмырды. Әксинә, онун вердији мәсләһәтләр евләнмәк истәјән мәсиһчиләрә аилә һәјатынын реаллыгларына һазырлашмаға, еләҹә дә евлилијин өмүрлүк олмасы үчүн нә етмәк лазым олдуғуну өјрәнмәјә көмәк едирди.
14 Бәзи ҹүтлүкләрә ҝәләҹәк аилә һәјатлары илә бағлы тәсәввүрләрини дәјишмәк лазымдыр. Ҝөрүшдүкләри мүддәтдә онлара елә ҝәлә биләр ки, араларындакы севҝи гејри-ади, надир вә ҝәләҹәк хошбәхтликләринин зәманәтидир. Онлар бу хүлјаларла никаһа дахил олурлар вә инанырлар ки, һеч нә онларын сәадәтини поза билмәз. Бу ҹүр дүшүнҹә тәрзинин реаллыгла һеч бир әлагәси јохдур. Аилә һәјатынын романтик тәрәфи нә гәдәр севиндириҹи олса да, лакин бу, һәр бир никаһын ајрылмаз һиссәси олан чәтинликләрин өһдәсиндән ҝәлмәк үчүн кифајәт дејилa. (1 Коринфлиләрә 7:28 ајәсини оху.)
15 Тәзәҹә тојлары олмуш бир чох оғлан вә гызлар ваҹиб мәсәләләрә даир бахышларынын фәргли олдуғуну ҝөрәндә тәәҹҹүбләнирләр вә һәтта мәјус олурлар. Пулларыны неҹә хәрҹләмәјә, асудә вахтларыны неҹә кечирмәјә, һарада јашамаға вә валидејнләринә нә гәдәр вахтдан бир баш чәкмәјә даир мәсәләләрдә фикирләри үст-үстә дүшмәјә биләр. Үстәлик, һәр биринин хасијјәтиндә чатышмајан ҹәһәтләрин олмасы гаршы тәрәфи гыҹыгландыра биләр. Ола билсин, ҝөрүшдүкләри мүддәтдә онлар фикирләширләр ки, бу мәсәләләр барәдә данышмаг елә дә ваҹиб дејил. Лакин бу, аилә гурдугдан сонра мүнасибәтләриндә проблемләрин јаранмасына ҝәтириб чыхара биләр. Она ҝөрә дә ҹүтлүкләр белә мәсәләләри евләнмәмишдән габаг мүзакирә етмәлидирләр.
16. Нәјә ҝөрә ҹүтлүкләр аилә һәјатларында јаранаҹаг проблемләри неҹә һәлл едәҹәкләринә даир ортаг мәхрәҹә ҝәлмәлидирләр?
16 Аилә һәјатларынын хошбәхт вә уғурлу олмасы үчүн ҹүтлүкләр чәтинликләрә бирҝә синә ҝәрмәлидирләр. Онлар ушагларын тәрбијәси вә гоҹа валидејнләринин гајғысына галмаг мәсәләләриндә ортаг мәхрәҹә ҝәлмәлидирләр. Онлар јол вермәмәлидирләр ки, аиләдәки чәтинликләр һәрәсини бир тәрәфә чәксин. Мүгәддәс Китаб принсипләрини тәтбиг едәрәк онлар бир чох проблемләри һәлл едә, һәлл олунмајанлара исә таб ҝәтирә вә бирҝә һәјатларыны севинҹлә давам етдирә биләрләр (1 Кор. 7:10, 11).
17. «Дүнјаја мәхсус шејләр»лә бағлы ҹүтлүкләрин һансы нараһатчылыглары олаҹаг?
17 Павел 1 Коринфлиләрә 7:32—34 ајәләриндә аилә һәјатынын диҝәр реаллығыны да гејд едир. (Ајәләри оху.) Евли инсанлар истәр-истәмәз һәјатымызын руһани саһәсинә аид олмајан гида, ҝејим, ев вә «дүнјаја мәхсус» олан бу кими диҝәр шејләр барәдә дүшүнүрләр. Мәсәлән, гардаш субај оланда, ола билсин, бүтүн ҝүнүнү хидмәтдә кечирирди. Анҹаг евләндикдән сонра о, вахтынын вә ҝүҹүнүн мүәјјән гисмини арвадынын гејдинә галмаг вә ону мәмнун етмәк үчүн сәрф етмәлидир. Ејни шеји гадын барәдә дә демәк олар. Бизим мүдрик Аллаһымыз Јеһова буну баша дүшүр. О билир ки, аилә һәјатында хошбәхт олмаг үчүн әрлә арвад субај оланда Она хидмәтә сәрф етдикләри вахт вә ҝүҹләринин мүәјјән һиссәсини инди бир-бирләринә ајырмалыдырлар.
18. Истираһәт вә диҝәр мәшғулијјәтләрлә әлагәдар евли инсанлар һансы дәјишикликләри етмәлидирләр?
18 Лакин мәсәлә бунунла битмир. Әҝәр ҹүтлүк бир-бирләринин гејдинә галмаг үчүн евләндикдән сонра Јеһоваја хидмәтә сәрф етдикләри вахты вә ҝүҹү азалтмалы олубларса, мәҝәр буну әјләнҹә вә диҝәр мәшғулијјәтләрә дә аид етмәмәлидирләр? Әҝәр киши әввәлки гәдәр достлары илә идманла мәшғул олурса, онун арвады өзүнү неҹә һисс едәҹәк? Јахуд да гадын вахтынын бөјүк гисмини севимли мәшғулијјәтләринә вә рәфигәләринә сәрф едирсә, бу, онун әринә неҹә тәсир ҝөстәрәҹәк? Һәјат јолдашынын диггәтиндән мәһрум олан тәрәф өзүнү тәнһа, бәдбәхт вә севилмәдијини һисс едир. Әҝәр әр вә арвад мүнасибәтләрини мөһкәмләндирмәк үчүн әлләриндән ҝәләни етсәләр, бу баш вермәјәҹәк (Ефес. 5:31).
Јеһованын тәләби: әхлаги тәмизлик
19, 20. а) Нәјә ҝөрә евли инсанлар белә әхлагсызлыгдан сығорталанмајыблар? б) Әрлә арвад узун мүддәт бир-бирләриндән ајры галарса, бу, онларын никаһларында һансы фәсадлары төрәдә биләр?
19 Јеһованын хидмәтчиләри әхлаги ҹәһәтдән тәмиз галмаға гәти гәрарлыдырлар. Бәзиләри бу саһәдә проблемләрдән гачмаг үчүн евләнирләр. Лакин евлилик инсаны автоматик олараг ҹинси натәмизликдән горумур. Нүмунә үчүн гәдим заманларда мөвҹуд олан истеһкамлы шәһәрләри ҝөтүрәк. Инсанлар јалныз онун ичәрисиндә галдыглары заман мүхтәлиф тәһлүкәләрдән горуна биләрдиләр. Лакин шәһәрин әтрафында гулдур вә сојғунчуларын долашдыглары вахт шәһәрдән чыхардыларса, онлары соја, һәтта өлдүрә биләрдиләр. Ејнилә евли инсанлар јалныз Јараданымызын аилә һәјаты илә әлагәдар тәсис етдији ганунлар чәрчивәсиндән чыхмадыглары тәгдирдә ҹинси әхлагсызлыгдан мүдафиә олуна биләрләр.
20 Павел бу чәрчивә барәдә 1 Коринфлиләрә 7:2—5 ајәләриндә јазыб. Әри илә ҹинси мүнасибәтдә олмаг ихтијары јалныз онун арвадына мәхсусдур. Ејнилә арвады илә ҹинси мүнасибәтдә олмаг ихтијары јалныз онун әринә мәхсусдур. Онларын һәр бириндән бир-бирләринин ҹинси мүнасибәтләрә даир «еһтијаҹыны» өдәмәси ҝөзләнилир, чүнки евли инсанын бу еһтијаҹа һаггы вар. Лакин бәзи әр вә арвадлар бир-бирләриндән ајры чох вахт кечирирләр. Мәсәлән, бу, ишләрилә әлагәдар вә ја мәзунијјәтә ајры-ајрылыгда чыхдыглары үчүн ола биләр вә бунунла да онлар бир-бирләрини әр-арвадлыг һаггындан мәһрум едирләр. Инсанын Шејтанын тәзјигинә таб ҝәтирмәјиб нәфсинә һаким ола билмәмәси уҹбатындан һәјат јолдашына хәјанәт етмәсинин нә гәдәр бөјүк фаҹиә олдуғуну бир тәсәввүр ет. Јеһова никаһлары үчүн тәһлүкә јаратмадан аиләләринин мадди тәләбатларынын гајғысына галан аилә башчыларыны хејир-дуаландырыр (Мәз. 37:25).
Мүгәддәс Китаб мәсләһәтләринә әмәл ет
21. а) Нәјә ҝөрә субајлыг вә ја евлиликлә бағлы гәрарлар вермәк чох чәтиндир? б) «Коринфлиләрә биринҹи мәктуб»ун 7-ҹи фәслиндәки мәсләһәтләр нәјә ҝөрә фајдалыдыр?
21 Субајлыг вә евлиликлә бағлы верилән гәрарлар ән чәтин гәрарлардан биридир. Инсанларын мүнасибәтләриндәки әксәр проблемләрин көкү гејри-камилликдир, бу да бүтүн инсанларда вар. Буна ҝөрә дә һәтта Јеһованын рәғбәтини газанмыш инсанлар үчүн, субај вә ја евли олмаларындан асылы олмајараг, мәјуслугдан тамамилә гачынмаг гејри-мүмкүндүр. «Коринфлиләрә биринҹи мәктуб»ун 7-ҹи фәслиндәки мүдрик мәсләһәтләрә әмәл етмәјин сајәсиндә бу проблемләри хејли азалдаҹагсан. Евли вә ја субај олмағындан асылы олмајараг, Јеһованы разы сала биләрсән. (1 Коринфлиләрә 7:37, 38 ајәләрини оху.) Аллаһын рәғбәтини газанмаг сәнин чата биләҹәјин ән али мәгсәддир. Онун лүтфү сајәсиндә сән ҝәләҹәк јени дүнјада јашаја биләҹәксән. Орада киши вә гадын арасындакы мүнасибәтләр индики һәјатын проблемләриндән азад олаҹаг.
[Һашијә]
a «Аилә хошбәхтлијинин сирри» китабынын 2-ҹи фәслинин 16—19 абзасларына бах.
Ҹаваб верә биләрсиниз?
• Нәјә ҝөрә һеч кәс субајлары евләнмәјә мәҹбур етмәмәлидир?
• Субај мәсиһчиләр өз вахтларындан ән јахшы шәкилдә Јеһоваја хидмәтдә неҹә истифадә едә биләрләр?
• Евләнмәјә һазырлашан ҹүтлүк никаһда јаранан чәтинликләрә неҹә һазырлаша биләр?
• Нәјә ҝөрә евлилик инсаны автоматик олараг ҹинси әхлагсызлыгдан горумур?
[14–ҹү сәһифәдәки шәкил]
Вахтларыны хидмәтләрини ҝенишләндирмәк үчүн сәрф едән субај мәсиһчиләр севинҹ тапырлар
[16–ҹы сәһифәдәки шәкил]
Бәзиләри евләндикдән сонра һансы дәјишикликләри етмәлидирләр?