Гој субајлыг илләрин һәдәр ҝетмәсин!

«Бу ҹүр јашамағы баҹаран, гој бу ҹүр јашасын» (МАТ. 19:12).

1, 2. а) Иса, Павел вә диҝәрләри субајлыг барәдә нә дүшүнүрдүләр? б) Нәјә ҝөрә бәзиләринә субајлыға әнам кими бахмаг чәтин ола биләр?

СӨЗСҮЗ КИ, никаһ Аллаһын бәшәријјәтә вердији ән ҝөзәл әнамларындан биридир (Сүл. мәс. 19:14). Лакин бир чох субај мәсиһчиләр дә зәнҝин вә мәмнунедиҹи һәјат сүрүрләр. Индијә кими аилә һәјаты гурмајан 95 јашлы Һаролд адлы бир гардаш дејир: «Башгалары илә вахт кечирмәк вә гонагпәрвәрлик ҝөстәрмәк мәним хошума ҝәлсә дә, тәк оланда да өзүмү һеч вахт тәнһа һисс етмирәм. Әминликлә дејә биләрәм ки, мәндә субајлыг әнамы вар».

² Һәм Иса Мәсиһ, һәм дә Павел субајлыг һагда данышмышды. Павел һәтта субајлығы, никаһ кими, Аллаһын әнамы адландырды. (Матта 19:11, 12; 1 Коринфлиләрә 7:7 ајәләрини оху.) Лакин гејд етмәк лазымдыр ки, субај оланларын һамысы һеч дә өзләри истәдикләри үчүн субај дејилләр. Бәзиләри мүнасиб һәјат јолдашы тапа билмирләр. Диҝәрләри исә ја сонрадан бошандыглары, ја да ки һәјат јолдашлары вәфат етдији үчүн тәк галырлар. Белә исә, субајлыг һансы мәнада әнам ола биләр? Субај мәсиһчиләр субајлыг илләриндән неҹә сәмәрәли истифадә едә биләрләр?

Гејри-ади әнам

3. Субај мәсиһчиләрин һансы үстүнлүкләри вар?

³ Аиләли инсанлардан фәргли олараг, субајларын вахты даһа чохдур вә онлар даһа сәрбәстдирләр (1 Кор. 7:32—35). Субајлығын бу кими үстүн ҹәһәтләри онлара хидмәтләрини ҝенишләндирмәјә, даһа чох инсана мәһәббәт ҝөстәрмәјә вә Јеһова илә мүнасибәтләрини мөһкәмләндирмәјә имкан верир. Буна ҝөрә дә бир чох мәсиһчиләр субајлығын ҝәтирдији фајдалары баша дүшүб онлары гијмәтләндирмиш вә бир мүддәт ‘бу ҹүр јашамаға’ гәрар вермишләр. Еләләри дә вар ки, субај галмаг фикриндә дејилдиләр, амма шәраитләри дәјишәндән сонра өз вәзијјәтләрини ҝөтүр-гој етмиш вә гәрара ҝәлмишләр ки, онлар да Јеһованын көмәји илә субај гала биләрләр. Беләликлә онлар јени вәзијјәтләрини гәбул етмишләр (1 Кор. 7:37, 38).

4. Нәјә ҝөрә субај мәсиһчиләр өзләрини хидмәтә там јарарлы һесаб едә биләрләр?

⁴ Субај мәсиһчиләр јахшы баша дүшүрләр ки, Јеһованын вә Онун тәшкилатынын рәғбәтини газанмаг үчүн евләнмәк шәрт дејил. Аллаһ һәр биримизи ајры-ајрылыгда севир (Мат. 10:29—31). Һеч кәс вә һеч нә бизи Аллаһын мәһәббәтиндән ајыра билмәз (Ром. 8:38, 39). Бизим евли вә ја субај олмағымыздан асылы олмајараг, әмин ола биләрик ки, Јеһова бизи хидмәтә там јарарлы һесаб едир.

5. Субајлыг әнамындан там јарарланмаг үчүн нә тәләб олунур?

⁵ Һәр бир истедад вә ја баҹарыг кими, субајлыг әнамыны да инкишаф етдирмәк лазымдыр ки, ондан там јарарлана биләк. Истәр баҹы, истәр гардаш, истәр ҹаван, истәр јашлы, истәр өз истәјинә ҝөрә, истәрсә дә шәраити уҹбатындан субај олан бүтүн мәсиһчиләр өз вәзијјәтләриндән там неҹә јарарлана биләрләр? Ҝәлин еркән мәсиһчи јығынҹағындан бир нечә руһландырыҹы нүмунәјә нәзәр салаг вә ҝөрәк, онлардан нә өјрәнә биләрик.

Ҝәнҹ јашларында субајлыг

6, 7. а) Филипин дөрд субај гызы хидмәтдә һансы шәрәфә лајиг ҝөрүлмүшдү? б) Тимотеј субајлыг илләриндән неҹә истифадә едирди вә ҝәнҹлик илләриндә Јеһоваја хидмәтдә һазырлыг руһу ҝөстәрдији үчүн һансы хејир-дуалары алмышды?

⁶ Мүждәчи Филипин хидмәтә өзү кими ҹан јандыран дөрд субај гызы вар иди (Һәв. иш. 21:8, 9). О дөврдә пејғәмбәрлик етмәк мүгәддәс руһун мөҹүзәви әнамларындан бири иди. Филипин ҝәнҹ гызлары бу әнамдан истифадә едәрәк Јоел 2:28, 29 ајәләриндә јазылан пејғәмбәрлијин јеринә јетмәсиндә иштирак едирдиләр.

⁷ Ҝәнҹ Тимотеј дә субајлыг илләриндән мүдрикликлә истифадә едирди. Анасы Евники вә нәнәси Лоида «Мүгәддәс Јазылары» она көрпәликдән өјрәтмишдиләр (2 Тим. 1:5; 3:14, 15). Лакин ола билсин, онлар мәсиһчилији тәхминән ерамызын 47-ҹи илиндә, Павелин онларын доғма шәһәри олан Листраја илк дәфә баш чәкдији заман гәбул етмишдиләр. Ики илдән сонра Павел бу шәһәрә икинҹи дәфә ҝәләндә Тимотеј 18—20 јашларында оларды. Ҝәнҹ вә һәгигәтдә тәзә олмасына бахмајараг, Листрада вә гоншу Конјадакы мәсиһчи ағсаггаллар онун «һаггында ағыздолусу данышырдылар» (Һәв. иш. 16:1, 2). Буна ҝөрә дә Павел Тимотеји сәјјар хидмәтдә она гошулмаға дәвәт етди (1 Тим. 1:18; 4:14). Биз Тимотејин һеч вахт евләнмәдијини дәгигликлә дејә билмәрик. Лакин бир шеј дәгиг мәлумдур ки, о, Павелин дәвәтини бөјүк мәмнунијјәтлә гәбул етмиш вә узун илләр әрзиндә субај галараг миссионер вә нәзарәтчи кими хидмәт етмишди (Филип. 2:20—22).

8. Марк ләгәбли Јәһјаја гаршысына руһани мәгсәдләр гојмаға нә көмәк етмишди вә буна ҝөрә о, һансы хејир-дуалары алмышды?

⁸ Марк ләгәбли Јәһја да субајлыг илләриндән там јарарланырды. О вә анасы Мәрјәм, еләҹә дә јахын гоһумлары Барнаба Јерусәлим јығынҹағынын илк үзвләриндән идиләр. Маркын аиләсинин һәмин шәһәрдә өз евләринин вә бир гуллугчуларынын олмасындан белә нәтиҹәјә ҝәлмәк олар ки, онлар раһат һәјат сүрүрдүләр (Һәв. иш. 12:12, 13). Лакин бүтүн бунлара бахмајараг, ҝәнҹ Марк нә худбин иди, нә дә ки өз кефи үчүн јашајырды. Бундан әлавә, бир јердә мәскән салыб раһат аилә һәјаты сүрмәк фикри дә ону гане етмирди. Ҝөрүнүр, һәвариләрлә јахын үнсијјәт сајәсиндә онда миссионер хидмәтинә ҝүҹлү һәвәс јаранмышды. Буна ҝөрә дә о, илк миссионер сәјаһәтинә чыхан Павел илә Барнабаја бөјүк мәмнунијјәтлә гошулду вә сәјаһәт боју онларын гуллуғунда дурурду (Һәв. иш. 13:5). Бир мүддәтдән сонра Марк Барнаба илә миссионер сәјаһәтинә чыхды, даһа сонра исә биз онун Петерлә бирҝә Бабилдә хидмәт етдији барәдә охујуруг (Һәв. иш. 15:39; 1 Пет. 5:13). Маркын нә вахта гәдәр субај галдығы барәдә биз һеч нә билмирик. Лакин о, башгаларынын гуллуғунда дурмаға вә Јеһоваја даһа чох хидмәт етмәјә һазыр олан бир инсан кими јахшы ад газанмышды.

9, 10. Субај ҝәнҹ мәсиһчиләрин хидмәтләрини ҝенишләндирмәк үчүн һансы имканлары вар? Нүмунә чәкин.

⁹ Мүасир јығынҹаглардакы бир чох ҹаван баҹы вә гардашлар да севинҹлә ҝәнҹлик илләрини Јеһоваја даһа чох хидмәт етмәјә сәрф едирләр. Марк вә Тимотеј кими, онлар да субајлығын «Ағамыза даима јајынмадан хидмәт етмәјә» јол ачдығыны баша дүшүрләр (1 Кор. 7:35). Бу, бөјүк үстүнлүкдүр! Бу ҝәнҹләрин гаршысында ҝениш гапы ачылыб: пионер хидмәти, тәблиғчиләрә еһтијаҹ олан әразиләрдә хидмәт, хариҹи дил өјрәнмәк, Падшаһлыг Залларынын вә филиалларын тикинтисиндә иштирак етмәк, Хидмәти Тәкмилләшдирмә Мәктәбиндә охумаг вә ја Бет-Елдә хидмәт етмәк. Әҝәр сән ҝәнҹ вә субајсанса, өз имканларындан там истифадә едирсәнми?

¹⁰ Марк адлы гардаш пионер хидмәтинә башлајанда һеч 20 јашы јох иди. О, Хидмәти Тәкмилләшдирмә Мәктәбини битирдикдән сонра дүнјанын бир чох јерләриндә мүхтәлиф тәјинатларла хидмәт етмишди. Инди ҝеријә, таммүддәтли хидмәтдә олдуғу 25 илә нәзәр салараг о дејир: «Мән јығынҹағын бүтүн үзвләрини руһландырмаға чалышырдым, чобан баш чәкмәси едирдим, онларла хидмәтдә олурдум, евимә гонаг дәвәт едирдим вә һәтта бир-биримизи руһән мөһкәмләндирмәк мәгсәдилә достлуг ҝөрүшләри кечирирдим. Бүтүн бунлар мәнә сөзлә ифадәолунмаз севинҹ ҝәтирирди». Маркын сөзләриндән ҝөрдүјүмүз кими, «вермәк» инсана һәјатда ән бөјүк севинҹ ҝәтирир вә мүгәддәс хидмәтдә там иштирак етмәјин сајәсиндә «вермәк» үчүн чохлу имканлар јараныр (Һәв. иш. 20:35). Марагларындан, баҹарыгларындан вә тәҹрүбәләриндән асылы олмајараг, ҝәнҹләр Рәбб үчүн чох иш ҝөрә биләрләр (1 Кор. 15:58).

11. Евләнмәјә тәләсмәмәјин һансы фајдалары вар?

¹¹ Ҝәнҹләрин әксәријјәти әввәл-ахыр аилә гурмаг истәсәләр дә, јахшы оларды ки, тәләсмәсинләр. Павел ҝәнҹләри тәшвиг едир ки, һеч олмаса ‘ҝәнҹлијин баһар чағынын’, јәни ҹинси истәкләрин ән ҝүҹлү олан дөврүнүн өтүб-кечмәсини ҝөзләсинләр (1 Кор. 7:36). Инсанын өзүнү баша дүшмәси вә мүнасиб һәјат јолдашы сечиминдә көмәк едәҹәк һәјат тәҹрүбәси топламасы үчүн вахт лазымдыр. Евлилик анды чох ҹидди мәсәләдир вә инсан она өмүр боју садиг галмалыдыр (Ваиз 5:2—5).

Сонрадан аилә гурмајанлар

12. а) Анна дул галандан сонра бу вәзијјәтиндән неҹә истифадә етди? б) О, һансы шәрәфә лајиг ҝөрүлмүшдү?

¹² «Луканын мүждәси»ндә хатырланан Анна аилә гурандан 7 ил сонра гәфләтән јолдашыны итирәндә, әлбәттә ки, чох кәдәрләнмишди. Онларын ушагларынын олуб-олмадығыны вә Аннанын сонрадан аилә һәјаты гурмаг барәдә дүшүнүб-дүшүнмәдијини биз билмирик. Лакин Мүгәддәс Китабда дејилир ки, 84 јашында о һәлә дә дул иди. Мүгәддәс Китабда јазыланлардан белә нәтиҹәјә ҝәлирик ки, о, јаранан јени вәзијјәтиндән Јеһоваја јахынлашмаг үчүн истифадә едирди. О, «һеч вахт мәбәддән ајрылмыр, оруҹ тутуб дуа етмәклә ҝеҹә-ҝүндүз ибадәт едирди» (Лука 2:36, 37). Беләликлә, Аллаһа ибадәт онун һәјатында һәмишә биринҹи јердә дурурду. Бунун үчүн әсил әзм вә сәј тәләб олунурду. Лакин онун мүкафаты бөјүк олду. О, көрпә Исаны ҝөрмәк шәрәфинә лајиг ҝөрүлдү вә бу көрпәнин ҝәләҹәкдә Мәсиһ олуб инсанлара азадлыг бәхш едәҹәји һаггында шаһидлик етди (Лука 2:38).

13. а) Табитанын јығынҹагда фәал олдуғу нәдән бәллидир? б) Табитанын хејирхаһлығы неҹә мүкафатландырылды?

¹³ Биринҹи әсрдә Јерусәлимдән шимал-гәрбдә, дәниз саһилиндә јерләшән Јаффа шәһәриндә Табита адында бир гадын јашајырды. Мүгәддәс Китабда онун әри олдуғу дејилмәдији үчүн, чох ҝүман ки, о, һәмин вахт субај иди. Табита «чох хејирхаһ иди вә касыблара һәмишә әл тутурду». О, касыб дул гадынлар вә башгалары үчүн палтар тикирди, һамы да ону чох севирди. Буна ҝөрә дә о, гәфләтән хәстәләниб вәфат едәндә бүтүн јығынҹаг Петери чағыртдырыб әзиз баҹыларыны дирилтмәји хаһиш етди. Онун дирилмәси барәдә хәбәр бүтүн Јаффа шәһәринә јајыланда бир чохлары һәгигәти гәбул етди (Һәв. иш. 9:36—42). Ола билсин, Табитанын өзү дә хејирхаһлыг ҝөстәрәрәк онларын бәзиләринә һәгигәтә ҝәлмәјә көмәк етмишди.

14. Субај мәсиһчиләри Јеһоваја јахынлашмаға нә тәшвиг едир?

¹⁴ Анна вә Табита кими, Аллаһын бир чох мүасир хидмәтчиләри, јеткин јашларында олмаларына бахмајараг, субајдырлар. Ола билсин, бәзиләри мүнасиб һәјат јолдашы тапа билмәјибләр. Диҝәрләри ја бошаныб, ја да ки онларын һәјат јолдашлары вәфат едиб. Јанларында етибар едә биләҹәкләри инсан олмадығы үчүн субај мәсиһчиләр Јеһоваја даһа чох бел бағламағы өјрәнирләр (Сүл. мәс. 16:3). 38 илдән чохдур ки, Бет-Елдә хидмәт едән Силвија адлы субај бир баҹы буну хејир-дуа һесаб едир. О етираф едир: «Бәзән ҝүҹлү олмагдан јорулурам. Һәмин ан: “Ҝөрәсән, ким мәни руһландыраҹаг?” — дејә үрәјимдә фикирләширәм». О әлавә едир: «Мән Јеһоваја етибар едирәм вә билирәм ки, О, мәним үчүн нәјин даһа јахшы олдуғуну мәндән јахшы билир. Бунун сајәсиндә өзүмү Она даһа јахын һисс едирәм. О, мәни һәмишә руһландырыр, бәзән дә һеч ҝөзләмәдијим тәрздә». Биз Јеһоваја јахынлашанда О, һәр заман ән шәфгәтли вә ганеедиҹи тәрздә ҹаваб верир.

15. Субај мәсиһчиләр мәһәббәт ҝөстәрмәкдә неҹә ‘ҝенишләнә’ биләрләр?

¹⁵ Субајлыг мәһәббәт ҝөстәрмәкдә ‘ҝенишләнмәк’ үчүн хүсуси имкан јарадыр. (2 Коринфлиләрә 6:11—13 ајәләрини оху.) 34 илдир ки, таммүддәтли хидмәтчи олан Солин адлы субај баҹы дејир: «Бу илләр әрзиндә мән јалныз өз һәмјашыдларымла јох, бүтүн инсанларла достлуг мүнасибәтләри гурмаға чалышырдым. Субајлыг Јеһоваја, аиләмә, баҹы-гардашларыма вә јахынларыма “вермәк” үчүн чох ҝөзәл имкан јарадыб. Јаша долдугҹа субај олдуғума ҝөрә даһа чох севинирәм». Јығынҹагдакы јашлы баҹы-гардашлар, ушагларыны тәк бөјүдән валидејнләр, ҝәнҹләр вә башгалары субај мәсиһчиләрин онлара ҝөстәрдији көмәји јүксәк гијмәтләндирирләр. Һәгигәтән дә, башгаларына мәһәббәт ҝөстәрәндә өзүмүзү даһа јахшы һисс едирик. Сән дә башгаларына мәһәббәт ҝөстәрмәкдә ‘ҝенишләнә’ биләрсәнми?

Өмүр боју субај галанлар

16. а) Нәјә ҝөрә Иса һеч вахт аилә гурмамышды? б) Павелин субајлыг илләриндән мүдрикликлә истифадә етдији нәдән ҝөрүнүр?

¹⁶ Иса һеч вахт аилә гурмамышды; о, Аллаһын она һәвалә етдији хидмәтә һазырлашмалы вә ону јеринә јетирмәли иди. О, чохлу сәјаһәт едирди, сәһәр тездән ҝеҹәјә гәдәр иш башында олурду вә сонда өз һәјатыны бәшәријјәт уғрунда гурбан верди. Буна ҝөрә Иса үчүн субај олмаг үстүнлүк иди. Һәвари Павел исә тәблиғ едә-едә минләрлә километр гәт едир вә бөјүк чәтинликләрлә үзләширди (2 Кор. 11:23—27). Ола билсин, Павел нә вахтса евли олуб, лакин һәвари тәјин едилдикдән сонра гәрара алды ки, аилә гурмасын (1 Кор. 7:7; 9:5). Һәм Иса, һәм дә Павел башгаларына, әҝәр мүмкүндүрсә, хидмәт наминә онларын нүмунәләрини тәглид етмәји мәсләһәт ҝөрүрдү. Лакин онларын һеч бири Јеһованын хидмәтчиси олмаг истәјәнләр үчүн субајлығы мүтләг тәләб кими гојмамышды (1 Тим. 4:1—3).

17. Бу ҝүн бәзи мәсиһчиләр Исаны вә Павели неҹә тәглид едирләр вә нәјә ҝөрә биз әмин ола биләрик ки, Јеһова бу ҹүр гурбанлары гијмәтләндирир?

¹⁷ Бу ҝүн дә бәзиләри даһа чох вә даһа јахшы хидмәт етмәк үчүн субај галмаг гәрарына ҝәлмишләр. Мәгаләнин әввәлиндә хатырланан Һаролд гардаш 56 илдән чохдур ки, Бет-Елдә хидмәт едир. О дејир: «Бет-Елдә хидмәт етдијим илк 10 ил әрзиндә мән хәстәлик уҹбатындан вә ја јашлы валидејнләринә бахмаг зәрурәти јарандығындан Бет-Ели тәрк едән чохлу әр-арвад ҝөрмүшдүм. Мәним валидејнләримин һәр икиси вәфат етмишди. Анҹаг мән Бет-Ел хидмәтини о гәдәр чох севирдим ки, евләнмәклә бу үстүнлүјү тәһлүкә алтына атмаг истәмирдим». Узун мүддәт пионер кими хидмәт едән Маргарет адлы бир баҹы бир нечә ил бундан әввәл буна бәнзәр фикир сөјләмишди: «Һәјатымда аилә гурмаг имканларым олса да, бундан ваз кечдим. Субај вә сәрбәст олдуғум үчүн фәал шәкилдә хидмәт етмәк имканым вар иди вә бу, мәнә бөјүк хошбәхтлик ҝәтирирди». Биз әмин ола биләрик ки, һәгиги ибадәт наминә бу ҹүр гурбан верәнләри Јеһова һеч вахт унутмајаҹаг. (Јешаја 56:4, 5 ајәләрини оху.)

Шәраитиндән мүдрикликлә истифадә ет

18. Башгалары субај мәсиһчиләри неҹә руһландыра вә онлара неҹә дәстәк ола биләрләр?

¹⁸ Јеһоваја ҹанла-башла хидмәт едән бүтүн субај мәсиһчиләр сәмими тәрифә лајигдирләр вә һамымыз онлары руһландырмалыјыг. Биз онларын һәр бирини севир, ҝөзәл хүсусијјәтләрини вә јығынҹаг үчүн етдији һәр шеји гијмәтләндиририк. Әҝәр биз, һәгигәтән дә, онларын ‘баҹы-гардашлары, аналары, ушаглары’ олсаг, онлар һеч заман өзләрини тәнһа һисс етмәјәҹәкләр. (Марк 10:28—30 ајәләрини оху.)

19. Субајлыг әнамындан мүдрикликлә неҹә истифадә едә биләрсән?

¹⁹ Өз истәјинә ҝөрә, јахуд да шәраит уҹбатындан субај олмағындан асылы олмајараг, нәзәрдән кечирдијимиз һәм Мүгәддәс Китабдакы, һәм дә мүасир нүмунәләр гој сәни бир даһа әмин етсин ки, субај олсан да, хошбәхт вә сәмәрәли һәјат сүрә биләрсән. Бәзи һәдијјәләри сәбирсизликлә ҝөзләдијимиз һалда, диҝәрләри тамамилә ҝөзләнилмәз олур. Бәзи һәдијјәләри биз дәрһал гијмәтләндиририк, диҝәрләринин дәјәрини исә сонрадан баша дүшүрүк. Субајлыг да беләдир. Чох шеј бизим мүнасибәтимиздән асылыдыр. Субајлыг әнамындан мүдрикликлә неҹә истифадә едә биләрсән? Јеһоваја јахынлашмагла, Рәббин ишиндә сәјлә чалышмагла вә мәһәббәт ҝөстәрмәкдә ҝенишләнмәклә. Никаһ кими, субајлыг да әсил хејир-дуа ола биләр, амма бир шәртлә: биз бу әнама Јеһованын нөгтеји-нәзәри илә бахмалы вә ондан мүдрикликлә истифадә етмәлијик.

Јадыныздадырмы?

• Субајлыг һансы мәнада әнам ола биләр?

• Ҝәнҹлик илләриндә субај олмаг һансы фајдалары ҝәтирир?

• Субај мәсиһчиләрин Јеһоваја јахынлашмаг вә мәһәббәт ҝөстәрмәкдә ҝенишләнмәк үчүн һансы имканлары вар?

[18-ҹи сәһифәдәки шәкилләр]

Јеһоваја хидмәтдә имканларындан там истифадә едирсәнми?