Кишиләрә руһән бөјүмәјә көмәк един

«Индән белә дири адам овлајаҹагсан» (ЛУКА 5:10).

1, 2. а) Кишиләр Исанын тәблиғ етдији хош хәбәрә неҹә мүнасибәт ҝөстәрирдиләр? б) Бу мәгаләдә биз нә мүзакирә едәҹәјик?

ИСА шаҝирдләри илә бирҝә Галилејада тәблиғ едирди вә бир ҝүн онлар гајыға миниб сакит бир јерә чәкилмәк истәдиләр. Лакин ҹамаат онларын далынҹа ҝетди. «Гадынлары вә ушаглары һесабламасаг», һәмин ҝүн Исанын јанына ҝәлән «кишиләрин сајы тәхминән беш мин нәфәр иди» (Мат. 14:21). Башга вахт исә чохлу сајда инсан хәстәликләриндән шәфа тапмаг вә тәлимләринә гулаг асмаг үчүн онун јанына ҝәлмишди. «Гадынлары вә ушаглары һесаба алмасаг», бу дәфә онларын арасында «дөрд мин киши» вар иди (Мат. 15:38). Ҝөрдүјүмүз кими, Исанын јанына чохлу кишиләр ҝәлирди вә онлар Исанын тәлимләринә мараг ҝөстәрирдиләр. Лакин о билирди ки, ҝәләҹәкдә бундан да чох адам һәгигәти гәбул едәҹәк. Бу, шаҝирдләринә мөҹүзәви шәкилдә балыг тутмаға көмәк етдикдән сонра Исанын Петерә дедији сөзләрдән бәллидир: «Индән белә дири адам овлајаҹагсан» (Лука 5:10). Шаҝирдләр өз торларыны «бәшәријјәт дәнизинә» атмалы идиләр вә «торларына» чохлу кишиләрин дүшәҹәјинә үмид едә биләрдиләр.

² Бу ҝүн дә кишиләр тәблиғ етдијимиз хош хәбәрә мараг ҝөстәрир вә она һај верирләр (Мат. 5:3). Лакин чохлары Мүгәддәс Китабы өјрәнмәјә башласа да, руһән инкишаф етмирләр. Онлара неҹә көмәк етмәк олар? Иса кишиләрә хүсуси шәкилдә тәблиғ етмәсә дә, онлары нараһат едән мәсәләләрә тохунурду. Бу мәгаләдә Исанын кишиләрә неҹә көмәк етдији вә онун нүмунәсини неҹә изләјә биләҹәјимиз һагда өјрәнәҹәјик. Ҝәлин кишиләри нараһат едән үч саһәјә — 1) пул газанмаг мәсәләсинә, 2) иҹтимаи рәј горхусуна вә 3) өзүнә инамсызлыг һиссинә нәзәр салаг.

Пул газанмаг мәсәләси

3, 4. а) Әксәр кишиләри бу ҝүн ән чох нараһат едән нәдир? б) Нәјә ҝөрә бәзи кишиләр пул газанмағы руһани мәшғулијјәтләрдән үстүн тутурлар?

³ Бир дәфә бир мирзә Исанын јанына ҝәлиб она деди: «Мүәллим, сән һара ҝетсән, мән дә сәнин ардынҹа ҝедәҹәјәм». Иса она: «Инсан Оғлунун башыны гојмаға белә јери јохдур», — дејәндә мирзә өз фикриндән дөндү. Ҝөрүнүр, јемәјини һарада јејәҹәјини, ҝеҹәни һарада кечирәҹәјини билмәмәси онун хошуна ҝәлмәди, чүнки Мүгәддәс Китабын һеч бир јериндә онун Мәсиһин давамчыларына гошулдуғу дејилмир (Мат. 8:19, 20).

⁴ Чох вахт кишиләр пул газанмағы руһани мәшғулијјәтләрдән үстүн тутурлар. Али тәһсил вә јүксәк мәваҹибли иш әксәр кишиләр үчүн ән үмдә мәсәләдир. Онлар дүшүнүрләр ки, ишләјиб пул газанмаг Мүгәддәс Китабы өјрәниб Аллаһла јахын мүнасибәт гурмагдан даһа ваҹибдир вә бунун хејри даһа чохдур. Мүгәддәс Китаб тәлимләри онлары ҹәлб етсә дә, «бу дөврүн гајғылары, вар-дөвләтин алдадыҹы гүввәси» онларда јаранан марағы боға биләр (Марк 4:18, 19). Лакин Иса шаҝирдләринә нәјин даһа ваҹиб олдуғуну баша дүшмәјә көмәк едирди. Биз дә онун нүмунәсини изләјә биләрик.

5, 6. Андреас, Петер, Јагуб вә Јәһјаја тәблиғ ишини пул газанмагдан үстүн тутмаға нә көмәк етди?

⁵ Андреас вә онун гардашы Шимон Петер бирҝә балыгчылыгла мәшғул олурдулар. Јәһја вә Јагуб, еләҹә дә онларын атасы Зебедеј дә балыгчы идиләр. Ишләри јахшы ҝетдији үчүн онларын һәтта муздлу ишчиләри дә вар иди (Марк 1:16—20). Андреас вә Јәһја Иса һаггында илк дәфә Вәфтизчи Јәһјадан ешидәндә Мәсиһи тапдыгларына һеч бир шүбһә етмәдиләр. Андреас бу хәбәри гардашы Шимон Петерә чатдырды вә ола билсин, Јәһја да бу барәдә гардашы Јагуба данышды (Јәһ. 1:29, 35—41). Нөвбәти ајлар әрзиндә онларын дөрдү дә Иса илә бирҝә Галилеја, Јәһудеја вә Самаријада тәблиғ етмишди, лакин сонра әввәлки мәшғулијјәтләринә гајытдылар. Бу шаҝирдләр руһани шејләрә мараг ҝөстәрсәләр дә, хидмәт онларын һәјатында әсас јери тутмурду.

⁶ Бир гәдәр сонра Иса Петерлә Андреасы ону изләмәјә вә «инсан» тутан балыгчылар олмаға дәвәт етди. Гардашлар бу чағырыша неҹә һај вердиләр? «Онлар дәрһал торларыны атыб онун ардынҹа ҝетдиләр». Јагубла Јәһја да ејни ҹүр даврандылар. «Онлар дәрһал гајығы вә аталарыны гојуб Исанын далынҹа ҝетдиләр» (Мат. 4:18—22). Бу инсанлары таммүддәтли хидмәтә башламаға нә тәшвиг етмишди? Онлар бу гәрары һиссләрә гапылараг, дүшүнмәдән вердиләр? Хејр! Әввәлки ајлар әрзиндә онлар Исаны динләмиш, онун мөҹүзәләрини ҝөрмүш, салеһлијә неҹә ҹан јандырдығыны мүшаһидә етмиш вә инсанларын онун тәблиғ етдији хош хәбәрә неҹә һај вердијинин шаһиди олмушдулар. Бунун сајәсиндә онларын Јеһоваја иманы вә етибары даһа да мөһкәмләнмишди.

7. Мүгәддәс Китабы өјрәтдијимиз инсанлара Јеһованын Өз халгынын мадди тәләбатларынын гајғысына галмаг баҹарығына етибар етмәји неҹә өјрәтмәк олар?

⁷ Исанын нүмунәсини тәглид едәрәк Мүгәддәс Китабы өјрәтдијимиз инсанлара Јеһоваја етибар етмәји неҹә өјрәдә биләрик? (Сүл. мәс. 3:5, 6). Бу, бизим онлара неҹә тәлим вермәјимиздән асылыдыр. Онлары өјрәдәркән биз нөвбәти фикри вурғуламалыјыг: Аллаһ вәд едир ки, әҝәр Падшаһлығын марагларыны һәјатымызда биринҹи јерә гојсаг, бизи бол-бол хејир-дуаландыраҹаг. (Малаки 3:10; Матта 6:33 ајәләрини оху.) Мүгәддәс Китабдан Јеһованын Өз халгынын мадди тәләбатларынын гајғысына неҹә галдығыны ҝөстәрмәклә јанашы, биз өз нүмунәмиздән дә истифадә едә биләрик. Өјрәтдијимиз инсанларла өз тәҹрүбәмизи бөлүшмәклә онлара Јеһоваја гаршы етибар инкишаф етдирмәјә көмәк етмиш олаҹағыг. Биз һәмчинин нәшрләримиздән охудуғумуз руһландырыҹы нүмунәләри дә онларла бөлүшә биләрикa.

8. а) Нәјә ҝөрә Мүгәддәс Китабы өјрәнән инсан Јеһованын хејирхаһ Аллаһ олдуғуна шәхсән өзү әмин олмалыдыр? б) Биз Мүгәддәс Китабы өјрәнән инсана Јеһованын хејирхаһ Аллаһ олдуғуну баша дүшмәјә неҹә көмәк едә биләрик?

⁸ Мүгәддәс Китабы өјрәнән инсанын иманы мөһкәм олсун дејә јалныз Јеһованын башгаларыны неҹә хејир-дуаландырдығы һагда охумағы вә ешитмәји кифајәт дејил. О, Јеһованын хејирхаһ Аллаһ олдуғуну өз шәхси тәҹрүбәсиндән дә ҝөрмәлидир. Мәзмурчу охујурду: «Дадын, ҝөрүн Рәбб нә гәдәр шириндир [јәни хејирхаһдыр], нә бәхтијардыр Она пәнаһ ҝәтирәнләр!» (Мәз. 34:8). Биз нә етмәлијик ки, өјрәтдијимиз инсан Јеһованын, һәгигәтән дә, хејирхаһ Аллаһ олдуғуну баша дүшсүн? Туталым, о адамын малијјә проблемләри вар вә бунунла јанашы, о, һансыса пис вәрдишин, мәсәлән, сигарет чәкмәјин, гумар ојнамағын вә ја әјјашлығын дашыны атмаға чалышыр (Сүл. мәс. 23:20, 21; 2 Кор. 7:1; 1 Тим. 6:10). Биз она пис вәрдишинин өһдәсиндән ҝәлмәси үчүн дуада Јеһовадан көмәк диләмәји өјрәдә биләрик. Мүгәддәс Китабы өјрәнәнин һәјаты јахшылашанда о, Јеһованын хејирхаһ Аллаһ олдуғуна әмин олаҹаг. Сонра биз ону Јеһоваја ибадәти һәјатында биринҹи јерә гојмаға тәшвиг етмәлијик. Бунун үчүн биз она һәр һәфтә Мүгәддәс Китабы арашдырмағы, јығынҹаг ҝөрүшләринә һазырлашмағы вә онларда иштирак етмәји өјрәтмәлијик. Бәс бу, һансы бәһрәләри ҝәтирәҹәк? О, Јеһованын онун сәјләринә хејир-дуа вердијини ҝөрәндә иманы ҝет-ҝедә мөһкәмләнәҹәк!

Иҹтимаи рәј горхусу

9, 10. а) Нәјә ҝөрә Никодим вә ариматејалы Јусиф Исанын шаҝирди олдугларыны ҝизли сахлајырдылар? б) Нәјә ҝөрә бу ҝүн бәзи кишиләр Мәсиһин ардынҹа ҝетмәјә тәрәддүд едирләр?

⁹ Бәзи кишиләрин Мәсиһи там шәкилдә изләмәмәләринә сәбәб иҹтимаи рәј горхусудур. Мәсәлән, Никодим вә ариматејалы Јусиф Исанын шаҝирди олдугларыны ҝизли сахлајырдылар, чүнки диҝәр јәһудиләрин бу барәдә өјрәндикләри тәгдирдә онлара дејәҹәкләри вә едәҹәкләри шејләрдән горхурдулар (Јәһ. 3:1, 2; 19:38). Онларын горхусу әсассыз дејилди. Дин хадимләринин Исаја нифрәти о гәдәр бөјүк иди ки, онлар она иман едән һәр кәси синагогдан говурдулар (Јәһ. 9:22).

¹⁰ Бизим ҝүнләрдә бәзи әразиләрдә киши Аллаһа, Мүгәддәс Китаба, јахуд динә бөјүк мараг ҝөстәрәндә иш јолдашлары, достлары вә ја гоһумлары ону тәнгид едир вә ја манечилик төрәдирләр. Диҝәр јерләрдә исә кишинин динини дәјишмәси барәдә данышмасы белә һәјаты үчүн тәһлүкә јарадыр. Һәрбичи, сијасәтчи вә ја јүксәк вәзифә саһиби олан кишиләр үчүн хүсусилә чәтиндир. Мәсәлән, Алманијада јашајан бир киши етираф едир: «Сиз Шаһидләрин Мүгәддәс Китабдан тәблиғ етдикләриниз һәгигәтдир. Лакин әҝәр мән бу ҝүн Јеһованын Шаһиди олсам, сабаһ һәр кәс бундан хәбәр тутаҹаг. Иш јолдашларым, гоншуларым вә аиләмин мәнсуб олдуғу клубун үзвләри мәним барәмдә нә фикирләшәҹәкләр? Буну өзүмә сығышдыра билмәрәм».

11. Иса шаҝирдләринә инсан горхусунун өһдәсиндән ҝәлмәјә неҹә көмәк едирди?

¹¹ Исанын һәвариләринин һамысынын ҹәсарәтли олмаларына бахмајараг, бәзән онлар да инсан горхусу илә мүбаризә апармалы олурдулар (Марк 14:50, 66—72). Инсанларын әдавәтли мөвгеләринә рәғмән Иса онлара һәгигәтдә инкишаф етмәјә неҹә көмәк едирди? О, өз шаҝирдләрини ҝәләҹәкдә үзләшәҹәкләри тәгибләрә һазырлајырды. О демишди: «Инсан Оғлундан өтрү адамлар сизә нифрәт едәндә, сизи гованда, тәһгир едәндә вә адынызы бәднам едәндә сиз неҹә дә хошбәхтсиниз» (Лука 6:22). Иса шаҝирдләрини хәбәрдар етмишди ки, онлар «инсан Оғлундан өтрү» тәһгирләрә мәруз галаҹаглар. Ејни заманда Иса онлары әмин етди ки, әҝәр Јеһоваја ҝүвәнсәләр, Ондан көмәк вә ҝүҹ истәсәләр, Јеһова онлара дајаг олаҹаг (Лука 12:4—12). Үстәлик, Иса онун ардынҹа тәзәҹә ҝетмәјә башлајан инсанлары шаҝирдләри илә сәрбәст шәкилдә үнсијјәт вә достлуг етмәјә чағырырды (Марк 10:29, 30).

12. Јениләрә инсан горхусунун өһдәсиндән ҝәлмәјә неҹә көмәк етмәк олар?

¹² Биз дә Мүгәддәс Китабы өјрәтдијимиз кәсләрә инсан горхусунун өһдәсиндән ҝәлмәјә көмәк етмәлијик. Адәтән, инсан нә илә үзләшәҹәјини биләндә она даһа асан олур (Јәһ. 15:19). Мәсәлән, биз она иш јолдашларынын вә диҝәр инсанларын вердији суаллара, еләҹә дә етиразлара садә, мүдрик вә Мүгәддәс Китаба әсасланан ҹаваблар һазырламагда өз көмәјимизи ҝөстәрә биләрик. Ола билсин, биз Мүгәддәс Китабы өјрәтдијимиз инсанла достлуг едирик, лакин ејни заманда, ону јығынҹағын диҝәр үзвләрилә, хүсусилә дә вәзијјәтләри вә ја мараглары онунла ејни олан баҹы-гардашларла таныш етмәк олар. Ән ваҹиби исә биз она үрәкдән вә мүнтәзәм шәкилдә дуа етмәји өјрәтмәлијик. Бу, она Јеһоваја јахынлашмаға вә Ону өзү үчүн Сығынаҹаг вә Гаја һесаб етмәсинә көмәк едәҹәк. (Мәзмур 94:21—23; Јагуб 4:8 ајәләрини оху.)

Өзүнә инамсызлыг һисси

13. Өзүнә инамсызлыг һисси бәзиләрини руһани ишләрлә мәшғул олмагдан неҹә чәкиндирир?

¹³ Кишиләрин бәзиләри јахшы охуја вә фикирләрини сәлис ифадә едә билмәдикләриндән, јахуд да садәҹә утандыгларындан руһани ишләрлә мәшғул олмагдан чәкинирләр. Диҝәрләри исә иҹтимаи јерләрдә фикир вә һиссләрини бөлүшмәји хошламырлар. Арашдырма апармаг, мәсиһчи ҝөрүшләриндә шәрһ вермәк вә ја иманлары барәдә башгалары илә данышмаг фикри онлары вәлвәләјә салыр. Бир гардаш етираф едир: «Ҝәнҹ оланда гапыја тез јахынлашыб өзүмү елә ҝөстәрирдим ки, ҝуја зәнҝи басырам. Сонра һеч кимин мәни ешитмәјәҹәјинә вә ҝөрмәјәҹәјинә үмид едәрәк јавашҹа орадан узаглашырдым... Евдән-евә тәблиғ етмәк барәдә дүшүнмәк белә ҹаныма үшүтмә салырды».

14. Нәјә ҝөрә Исанын шаҝирдләри ҹинә тутулмуш оғланы сағалда билмәмишдиләр?

¹⁴ Исанын шаҝирдләри ҹинә тутулмуш оғланы сағалда билмәјәндә кечирдикләри һиссләри тәсәввүр етмәјә чалышын. Чох ҝүман ки, онлар өзләринин јарарсыз олдугларыны дүшүнүрдүләр. Оғланын атасы Исаја јахынлашыб деди: «Балам хәстәдир, үрәкҝетмәси, тутмалары олур, ҝаһ суја дүшүр, ҝаһ да ода јыхылыр. Ону сәнин шаҝирдләринин јанына ҝәтирдим, амма онлар ушағы сағалда билмәдиләр». Иса ҹини говду вә ушаг сағалды. Бир гәдәр сонра шаҝирдләр Исанын јанына ҝәлиб сорушдулар: «Биз ҹини нијә гова билмәдик?» Иса онлара ҹаваб верди: «Иманынызын аз олдуғундан. Әмин олун ки, иманыныз хардал тохуму бојда олса, бу даға: “Бурадан о тәрәфә чәкил”, — дејәҹәксиниз, о да чәкиләҹәк. Сизин үчүн гејри-мүмкүн шеј олмајаҹаг» (Мат.17:14—20). Дағабәнзәр манеәләри ашмаг үчүн инсан ҝәрәк Јеһоваја иман етсин. Бәс әҝәр инсан буну нәзәрдән гачырыб диггәтини чатышмајан ҹәһәтләринә јөнәлтсә, онда нә баш верәҹәк? О, уғурсузлуға дүчар олаҹаг вә Јеһоваја хидмәт етмәк үчүн лазыми баҹарыгларынын олмадығыны дүшүнәҹәк.

15, 16. Мүгәддәс Китабы өјрәнән инсана өзүнә инамсызлыг һиссинин өһдәсиндән ҝәлмәјә неҹә көмәк етмәк олар?

¹⁵ Өзүнә инамсызлыг һисси илә мүбаризә апаран инсана көмәк етмәјин јахшы үсулларындан бири ону диггәтини өзүнә јох, Јеһоваја јөнәлтмәјә тәшвиг етмәкдир. Петер јазмышды: «Тәвазөкар олуб гүдрәтли Аллаһа бојун әјин. Вахты ҝәләндә О, сизи уҹалдаҹаг. Бүтүн гајғыларынызы Онун үзәринә гојун» (1 Пет. 5:6, 7). Бунун үчүн биз Мүгәддәс Китабы өјрәтдијимиз адама руһанилијини инкишаф етдирмәкдә көмәјимизи әсирҝәмәмәлијик. Руһани бахышлары олан инсан үчүн руһани дәјәрләр чох гијмәтлидир. О, Аллаһын Кәламыны севир вә «Руһун бәһрәси»ни һәјатында тәзаһүр етдирир (Галат. 5:22, 23). Дуа онун һәјатынын ајрылмаз һиссәсидир (Филип. 4:6, 7). Бундан әлавә, о баша дүшүр ки, истәнилән вәзијјәтә синә ҝәрмәк, еләҹә дә истәнилән тапшырығы мүвәффәгијјәтлә јеринә јетирмәк үчүн лазыми ҹәсарәти вә ҝүҹү она Јеһова верәҹәк. (2 Тимотејә 1:7, 8 ајәләрини оху.)

¹⁶ Мүгәддәс Китабы өјрәнән инсанларын бәзиләринин охумаг, үнсијјәт етмәк вә данышыг габилијјәтләрини јахшылашдырмагда көмәјә еһтијаҹлары вар. Бәзиләринин исә Јеһова барәдә өјрәнмәмишдән әввәл әмәлләри пис олдуғу үчүн өзләрини Она хидмәт етмәјә лајиг билмирләр. Белә вәзијјәтләрдә бизим онлара гаршы мәһәббәт вә сәбир ҝөстәрмәјимиз еһтијаҹ дујдуглары көмәк ола биләр. Иса демишди: «Сағлам адамларын һәкимә еһтијаҹы олмур, һәкимә хәстәләр мөһтаҹдыр» (Мат. 9:12).

Кишиләрә даһа чох тәблиғ един

17, 18. а) Даһа чох кишијә тәблиғ етмәк үчүн нә етмәлијик? б) Нөвбәти мәгалә нә һагдадыр?

¹⁷ Јалныз Мүгәддәс Китабдакы хош хәбәр инсана әсил хошбәхтлик ҝәтирир, буна ҝөрә дә биз истәјирик ки, мүмкүн гәдәр чох киши һәгигәти гәбул етсин (2 Тим. 3:16, 17). Бунун үчүн нә етмәк лазымдыр? Биз чалышмалыјыг ки, әксәр кишиләрин евдә олдуглары вахт, јәни ахшамлар, истираһәт вә бајрам ҝүнләриндә тәблиғ едәк. Тәблиғ едәркән гапыны аиләнин диҝәр үзвү ачарса, мүмкүндүрсә, биз ондан аиләнин башчысыны чағырмағы хаһиш едә биләрик. Һәмчинин ҝәлин гејри-рәсми шәкилдә киши иш јолдашларымыза вә иманларына шәрик олмајан баҹыларымызын әрләринә тәблиғ етмәк үчүн һәр фүрсәтдән истифадә едәк.

¹⁸ Биз гаршымыза чыхан һәр бир инсана тәблиғ едириксә, әмин ола биләрик ки, бу хәбәрә мүсбәт һај верән инсанлары тапаҹағыг. Ҝәлин һәгигәтә сәмими мараг ҝөстәрән бүтүн инсанлара сәбирлә көмәклик ҝөстәрәк. Бәс јығынҹагдакы вәфтиз олунмуш кишиләрә даһа чох мәсулијјәтләрә ҹан атмаға вә гојулан тәләбләрә ҹаваб вермәләринә неҹә көмәк едә биләрик? Бу суалын ҹавабы нөвбәти мәгаләдәдир.

[Һашијә]

Неҹә ҹаваб верәрдиниз?

• Кишиләрә руһани мәшғулијјәтләрин даһа ваҹиб олдуғуну дәрк етмәјә неҹә көмәк едә биләрик?

• Јениләрә инсанларын пис мүнасибәтинин өһдәсиндән ҝәлмәјә неҹә көмәк етмәк олар?

• Өзүнә инамсызлыг һиссинин өһдәсиндән ҝәлмәкдә кишиләрә нә көмәк едәҹәк?

[25–ҹи сәһифәдәки шәкил]

Хош хәбәри кишиләрә чатдырмаг үчүн һәр фүрсәтдән истифадә едирсәнми?

[26–ҹы сәһифәдәки шәкил]

Мүгәддәс Китабы өјрәтдијин адама онун үзләшәҹәји чәтинликләрә һазырлашмаға неҹә көмәк едә биләрсән?