Ибраһим ҹәсарәт нүмунәси
Ибраһим аиләси вә нөкәрләринин Кәнан торпағына көчмәк үчүн ҝөрдүкләри һазырлыг ишләрини мүшаһидә едир (Јарадылыш 12:1—5). О, јахшы баша дүшүр ки, һимајәсиндә олан инсанларын ҝүзәранынын мәсулијјәт јүкү онун үзәриндәдир. Ҝөрәсән, јад мәмләкәтдә онлары доландыра биләҹәкми? Бәлкә, ҝениш отлаглары, бәрәкәтли торпаглары вә бол сују олан Ур шәһәриндә буну етмәк даһа асан оларды? Бирдән о, јад елдә хәстәләнсә вә ја өлсә, онда неҹә? Онун аиләсинә ким бахаҹаг? Ибраһими бу кими суаллар нараһат етсә дә, горху һиссинин әлини ишдән сојутмасына јол вермәди. О, һәр неҹә олса да, ирәли ҝетмәјә, Аллаһын әмрләринә табе олмаға гәтијјәтли иди. Бу, әсил ҹәсарәт иди!
ҸӘСАРӘТ НӘДИР? Бу, горхаглығын әкси олан ҝүҹүн, ҹәсурлуғун вә иҝидлијин тәзаһүрүдүр. Ҹәсарәтли олмаг о демәк дејил ки, инсан һеч вахт горхмур. Әксинә, мүәјјән горхулары олса да, Аллаһдан алдығы ҹәсарәтлә һәрәкәт едир.
ИБРАҺИМ ҸӘСАРӘТИ НЕҸӘ ҜӨСТӘРИРДИ? Ибраһим чохлуға гаршы ҝетмәкдән горхмурду. О, инсанларын бир чох танрылара вә бүтләрә ибадәт етдикләри мүһитдә бөјүмүшдү. Лакин јол вермирди ки, башгаларынын фикри ону дүзҝүн сандығы ишдән чәкиндирсин. Ибраһим тәк Аллаһа — Һагг-Таала Јеһоваја ибадәти үстүн тутмагла ҹәсарәт ҝөстәриб башгаларындан фәргли һәјат тәрзи сүрүрдү (Јарадылыш 14:21, 22).
Ибраһим һәгиги Аллаһа ибадәти дүнја малындан үстүн тутурду. О, Ур шәһәриндә раһат һәјатыны тәрк едиб чөллүкдә јашамаға һазыр иди. Јеһованын мүтләг онун гејдинә галаҹағына инанырды. Тәбии ки, илләр өтдүкҹә, Ибраһим Ур шәһәриндәки раһат шәраитли һәјатыны вахташыры хатырлаја биләрди. Лакин Ибраһим Јеһованын онун вә аиләсинин гајғысына галаҹағына әмин иди. О, Јеһова Аллаһы һәјатында биринҹи јерә гојдуғу үчүн Онун әмрләринә риајәт етмәјә ҹәсарәт тапырды.
БУНДАН НӘ ӨЈРӘНӘ БИЛӘРИК? Һәтта башгалары Јеһоваја итаәт етмәсәләр дә, Ибраһимдән нүмунә ҝөтүрәрәк ҹәсарәтлә Аллаһа итаәт едә биләрик. Мәсәлән, Мүгәддәс Китабда дејилир ки, Јеһова Аллаһа иман ҝәтирән инсан онун јахшылығыны истәјән достлары вә гоһумларынын мүгавимәтинә туш ҝәлә биләр (Јәһја 15:20). Јеһова һаггында биликләримизә әминлијимиз нә гәдәр ҝүҹлү олса, етигадымызы да бир о гәдәр һөрмәтҹил тәрздә мүдафиә едәҹәјик (1 Петер 3:15).
Биз һәмчинин Аллаһын Она иман ҝәтирәнләрин гајғысына галаҹағы вәдинә етибар едә биләрик. Бу етибар бизә ҹәсарәт верир ки, һәјат гајғыларыны дејил, руһани ишләри һәјатымызда биринҹи јерә гојаг (Матта 6:33). Ҝәлин ҝөрәк бир аилә буну неҹә етмишди.
Даг вә Беки ҹүтлүјүнүн беш вә икијашлы оғуллары варды. Буна бахмајараг, онлар хош хәбәрин тәблиғчиләринә даһа чох тәләбат олан өлкәјә көчмәк истәјирдиләр. Онлар дуа едиб һәр шеји өлчүб-бичдикдән сонра нијјәтләринә ујғун даврандылар. Даг дејир: «Һәр шејин неҹә олаҹағыны билмәдән балаҹа ушагларла башга өлкәјә көчмәк ҹәсарәт тәләб едирди. Бу фикрә дүшәндә Ибраһимлә Саранын нүмунәсини мүзакирә етдик. Онларын Јеһоваја ҝүвәнмәләри вә өз нөвбәсиндә, Јеһованын онлара дајаг олмасы, һәгигәтән дә, бизә көмәк етди».
Гүрбәтдәки һәјатлары барәдә Даг дејир: «Бу, бизим үчүн бөјүк хејир-дуа олду. Садә һәјат сүрдүјүмүздән бир аилә кими ҝүнүн чох һиссәсини бирҝә кечиририк: тәблиғә чыхырыг, үнсијјәт едирик вә ушагларымызла ојнајырыг. Бу исә аиләмизин һәр бир үзвүнә сөзлә ифадә едилмәјән хошбәхтлик ҝәтирир».
Әлбәттә, һәр кәс бу ҹүр дәјишиклик етмәк имканында дејил. Бунунла белә, һәр биримиз Аллаһын бизи дәстәкләјәҹәјинә әмин олуб Она ибадәти һәјатымызда биринҹи јерә гојмагла Ибраһимин нүмунәсини изләјә биләрик. Белә етмәклә биз Мүгәддәс Китабын бу сөзләринә ујғун давранмыш олуруг: «Ҹәсарәтлә дејирик: “Јеһова мәнә дајагдыр, әсла горхмарам”» (Ибраниләрә 13:5, 6).
[7-ҹи сәһифәдәки јазы]
Инсанын мүәјјән горхулары олса да, Аллаһдан алдығы ҹәсарәтлә һәрәкәт едир
[8-ҹи сәһифәдәки чәрчивә/шәкил]
Аллаһдан горхан гадын вә ҝөзәл һәјат јолдашы
Сара мөһтәшәм имана саһиб олан инсанла аилә гурмушду. Лакин бу садиг гадынын өзү дә тәгдирәлајиг нүмунә гојмушду. Мүгәддәс Китабда онун ады үч дәфә чәкиләрәк башгалары үчүн ибрәтамиз нүмунә олдуғу вурғуланыр (Јешаја 51:1, 2; Ибраниләрә 11:11; 1 Петер 3:3—6). Мүгәддәс Јазыларда бу ҝөзәл гадын һагда чох аз мәлумат верилсә дә, онун јахшы хүсусијјәтләри олдуғуну ҝөрә биләрик.
Мисал үчүн, Ибраһим Ур шәһәриндән чыхмаг барәдә Аллаһдан тапшырыг алдығыны дејәндә Саранын илк реаксијасыны дүшүнүн. Һара вә нә үчүн ҝедәҹәкләринә тәәҹҹүбләндими? Ҝүзәранлары үчүн бәрк нараһат олдуму? Достлары вә гоһумларыны јенидән ҝөрүб-ҝөрмәјәҹәјини билмәсә дә, онлардан ајрылмаг фикринә кәдәрләндими? Шүбһәсиз ки, бу ҹүр фикирләр онун ағлындан кечирди. Һәр неҹә олса да, Сара Јеһованын онун итаәткарлығына хејир-дуа верәҹәјинә әмин иди вә буна ҝөрә дә көнүллү олараг доғма торпағындан чыхды (Һәвариләрин ишләри 7:2, 3).
Сара Аллаһын итаәткар хидмәтчиси олмагла јанашы, һәм дә јахшы һәјат јолдашы иди. О, аилә ишләриндә рәһбәрлији өз әлинә кечирмәјә чалышмырды, әксинә, мәһәббәтлә әринин башчылығыны дәстәкләјәрәк она сәмими һөрмәт бәсләјирди. Белә давраныш Сараны, бир инсан кими, даһа да ҝөзәл едирди (1 Петер 3:1—6).
Бу ҹүр хүсусијјәтләр мүасир гадынлар үчүн дә фајдалы ола биләрми? «Саранын нүмунәси мәнә өз фикирләрими сәрбәст вә ачыг шәкилдә әримә сөјләмәји өјрәтди», — дејә 30 илдән чох хошбәхт аилә һәјаты јашајан Ҹил дејир. О әлавә едир: «Әлбәттә, сон гәрары вермәк мәсулијјәтини аилә башчысы кими һәјат јолдашым дашыјыр. О, бир гәрар аланда әлимдән ҝәләни едирәм ки, онун гәрары һәјата кечсин».
Сарадан өјрәнә биләҹәјимиз ән тәсирли ибрәт исә будур: чох ҝәшәнҝ гадын олса да, заһири ҝөзәллијинин ону мәғрур етмәсинә јол вермирди (Јарадылыш 12:10—13). О, бирҝә јашадыглары јахшы вә пис анларда һәлимликлә Ибраһимә дәстәк олурду. Шүбһә јохдур ки, Ибраһимлә Сара садиг, тәвазөкар вә севән әр-арвад — сөзүн әсил мәнасында бир-бири үчүн хејир-дуа олан ҹүтлүк идиләр.