Ибраһим мәһәббәт нүмунәси
Ибраһим бөјүк кәдәр ичиндәдир. Севимли һәјат јолдашы өлүм јухусуна ҝедиб. Сараны дәфн едән аһыл јашлы Ибраһимин ағлындан онунла бағлы чохсајлы хатирәләр кечир. Үрәјиндә гәм-гүссә артдыгҹа ҝөз јашлары төкүр (Јарадылыш 23:1, 2). Бу ҝөз јашлары зәифлијин дејил, Ибраһимин ән ҝөзәл хүсусијјәтләриндән бири олан мәһәббәтин әламәтидир.
МӘҺӘББӘТ НӘДИР? Мәһәббәт кимә вә ја нәјәсә дәрин бағлылыг һиссидир. Севән адам, мүәјјән гурбанлар тәләб олунса да, севдији адама мәһәббәтини әмәлләри илә ифадә едир.
ИБРАҺИМ МӘҺӘББӘТИ НЕҸӘ ҜӨСТӘРИРДИ? Ибраһим өз аиләсини севдијини ҝөстәрирди. Тәбии, онун иши башындан ашырды. Амма о, һеч заман аиләсинин емосионал вә руһани тәләбатларына етинасыз јанашмырды. Јеһованын Өзү вурғуламышды ки, Ибраһим, аилә башчысы кими, Аллаһа ибадәтдә һәмишә рәһбәрлији үзәринә ҝөтүрүрдү (Јарадылыш 18:19). Бундан башга, Јеһова Ибраһимин мәһәббәтини хүсусилә вурғулады: онунла данышанда, Исһагы Ибраһимин севимли оғлу адландырды (Јарадылыш 22:2).
Һәмчинин өмүр-ҝүн јолдашы Саранын өлүмү илә бағлы кечирдији һиссләриндән дә Ибраһимин она олан дәрин мәһәббәти ҝөрүнүр. Ибраһим онун үстүндә һөнкүр-һөнкүр ағлајырды. Ҝүҹлү вә ҹәсарәтли олса да, кәдәрини ҝөстәрмәкдән чәкинмирди. О, ҝүҹ вә нәҹиблик кими хүсусијјәтләри ҝөзәл әкс етдирирди.
Ибраһим Аллаһы севдијини ҝөстәрирди. Онун бүтүн һәјаты Аллаһа мәһәббәтлә бағлы иди. Нәјә ҝөрә белә демәк олар? Мүгәддәс Китабдан 1 Јәһја 5:3 ајәсини јадымыза салаг: «Аллаһы севмәк Онун әмрләринә риајәт етмәк демәкдир». Бу сөзләрдән белә гәнаәтә ҝәлмәк олар ки, Ибраһим Аллаһа мәһәббәт бәсләмәкдә тәгдирәлајиг нүмунә гојуб.
Јеһова Ибраһимә һәр дәфә мүәјјән бир ҝөстәриш верәндә о, дәрһал она әмәл едирди (Јарадылыш 12:4; 17:22, 23; 21:12—14; 22:1—3). Тапшырығын чәтин вә ја асан олмасы, һәмчинин нәјә ҝөрә мәһз она верилмәси Ибраһим үчүн әсас мәсәлә дејилди. Аллаһын бујурдуғу һәр шеји ҹанла-башла јеринә јетирирди. Ибраһим Аллаһын һәр ҝөстәришини Она олан мәһәббәтини сүбут етмәк үчүн бир фүрсәти кими дәјәрләндирирди.
БУНДАН НӘ ӨЈРӘНӘ БИЛӘРИК? Башгаларына, хүсусилә дә аилә үзвләримизә мәһәббәт ҝөстәрмәклә Ибраһими тәглид едә биләрик. Һеч вахт јол вермәјәҹәјик ки, һәјат гајғылары севдијимиз инсанлара ајырдығымыз вахты оғурласын.
Биз һәмчинин Јеһоваја сәмими мәһәббәт јетишдирмәлијик. Белә мәһәббәт бизи һәрәкәтә тәшвиг едән бөјүк гүввә ола биләр. Мәсәлән, бу мәһәббәт бизи Аллаһы разы салмаг үчүн дүшүнҹә тәрзимиздә, нитгимиздә вә давранышымызда дәјишикликләр етмәјә тәшвиг едә биләр (1 Петер 1:14—16).
Етираф етмәк лазымдыр ки, Јеһованын ҝөстәришләринә табе олмаг һәмишә асан дејил. Лакин Ибраһимә дајаг олан вә ону «достум» адландыран Уҹа Аллаһын мүтләг бизә дә көмәк едәҹәјинә әмин ола биләрик (Јешаја 41:8). Аллаһ Өз Кәламында сөз верир ки, бизи «гәтијјәтли едәҹәк вә гүввәтләндирәҹәк» (1 Петер 5:10). Бу, Ибраһимин етибарлы Достунун, һәгигәтән дә, үрәји риггәтә ҝәтирән вәдидир!
[11-ҹи сәһифәдәки чәрчивә]
Кишијә ағламаг јарашармы?
Чохлары буна «јох» дејә ҹаваб верәрди. Јәгин, белә дүшүнәнләр үчүн мараглы олаҹаг ки, Мүгәддәс Китабда ҝүҹлү вә иманлы кишиләрин кәдәрли анларда ҝөз јашы төкдүјүндән бәһс олунур. Ибраһим пејғәмбәр дә онлардан биридир. Бундан савајы, Јусиф, Давуд, һәвари Петер, Ефес јығынҹағынын ағсаггаллары вә һәтта Иса да ҝөз јашларыны ҝизләтмәмишди (Јарадылыш 50:1; 2 Шамуел 18:33; Лука 22:61, 62; Јәһја 11:35; Һәвариләрин ишләри 20:36—38). Беләликлә, Аллаһын Кәламы кишинин ағламасынын гәбаһәт олмадығыны ҝөстәрир.