Инсанлара «јухудан» ојанмаға көмәк ет
«Һансы зәманәдә јашадығымызы вә артыг јухудан ојанмағын вахты ҝәлдијини билирсиниз» (РОМ. 13:11).
ИЗАҺ ЕДӘ БИЛӘРСӘНМИ?
Нәјә ҝөрә мәсиһчиләрин руһән ојаг галмалары ваҹибдир?
Нәјә ҝөрә ајыг-сајыг тәблиғчиләр хидмәтдә гулаг асмалы вә диггәтҹил олмалыдырлар?
Меһрибанлыг вә мүлајимлик хидмәтдә һансы рол ојнајыр?
1, 2. Инсанларын чохуна һансы мәнада ојанмаг лазымдыр?
ҺӘР ИЛ минләрлә инсанлар сүкан архасында мүрҝүләмәләри, һәтта јухуја ҝетмәләри уҹбатындан һәјатла видалашырлар. Башгалары исә сәһәр јатыб галдыглары, јахуд ишдә јатдыглары үчүн ишләрини итирирләр. Анҹаг руһани јухуја ҝедәнләрин агибәти бундан да бетәр ола биләр. Буна ҝөрә бу ваҹиб мәсәлә илә әлагәдар Мүгәддәс Китабда дејилир: «Ојаг [галан]... хошбәхтдир» (Вәһј 16:14—16).
2 Јеһованын бөјүк ҝүнү јахынлашдығы бир вахтда бәшәријјәт, үмуми ҝөтүрдүкдә, руһани мәнада јухуја гәрг олуб. Һәтта Христиан аләминин бәзи рәһбәрләри онларын дининә аид олан инсанлары «јухулајан нәһәнҝләр» адландырмышлар. Бәс руһани јуху нәдир? Нәјә ҝөрә һәгиги мәсиһчиләр үчүн ојаг галмаг һәјати ваҹиб мәсәләдир? Биз белә јухуја ҝедәнләри неҹә ојада биләрик?
РУҺАНИ ЈУХУ НӘДИР?
3. Руһани мәнада јатан инсаны неҹә тәсвир едәрдин?
3 Адәтән, һәрфи мәнада јатан инсан фәалијјәтсиз олур. Руһани мәнада јатан инсан исә чох мәшғул ола биләр, амма онун ҝөрдүјү ишләрин руһани мәсәләләрә һеч бир аидијјәти јохдур. Белә инсанларын фикри-зикри јалныз ҝүндәлик гајғыларда олур, јахуд онлар кеф, шан-шөһрәт вә ја вар-дөвләт далынҹа гачырлар. Башлары бу кими ишләрә гарышдығы үчүн онлар руһани еһтијаҹлары барәдә, демәк олар ки, дүшүнмүрләр. Онлардан фәргли олараг, руһән ојаг олан инсанлар «ахыр ҝүнләрдә» јашадыгларыны дәрк едирләр вә буна ҝөрә дә Аллаһын нијјәтини јеринә јетирмәкдә олдугҹа фәалдырлар (2 Пет. 3:3, 4; Лука 21:34—36).
4. «Ҝәлин башгалары кими јатмајаг» мәсләһәтинин мәғзи нәдир?
4 1 Салоникилиләрә 5:4—8 ајәләрини оху. Бу ајәләрдә һәвари Павел һәмиманлыларыны «башгалары кими» јатмамаға чағырыр. Бунунла о, нә демәк истәјирди? Әҝәр биз Аллаһын әхлаг нормаларына әһәмијјәт вермириксә вә ја аллаһсыз инсанлары мәһв етмәк үчүн Јеһованын тәјин етдији вахтын јахынлашдығына мәһәл гојмуругса, демәли, руһән јатмышыг. Биз Аллаһы сајмајан инсанларын һәрәкәт вә дүшүнҹә тәрзинин тәсири алтына дүшүб-дүшмәдијимизи јохламалыјыг.
5. Руһани јухуја ҝедәнләрә һансы әһвал-руһијјә хасдыр?
5 Бәзи инсанлар дүшүнүрләр ки, онлары мәсулијјәтә ҹәлб едәҹәк Аллаһ мөвҹуд дејил (Мәз. 53:1). Башгалары Аллаһын инсанларла марагланмадығыны вә буна ҝөрә дә Онунла марагланмаға һеч бир сәбәб олмадығыны дүшүнүрләр. Елә инсанлар да вар ки, илин мүәјјән ајларында дини ајинләри иҹра етмәләринин онлара Аллаһын лүтфүнү газанмаға көмәк едәҹәјини фикирләширләр. Белә инсанларын һамысы руһән јатыб. Онлары ојатмаг лазымдыр. Бизим онлара һансы көмәјимиз дәјә биләр?
ИЛК НӨВБӘДӘ, ӨЗҮМҮЗ ОЈАГ ОЛМАЛЫЈЫГ
6. Нәјә ҝөрә мәсиһчиләр руһани ҹәһәтдән ојаг галмаға сәј ҝөстәрмәлидирләр?
6 Башгаларыны ојатмаг үчүн илк әввәл өзүмүз ојаг олмалыјыг. Буну неҹә етмәк олар? Аллаһын Кәламында руһани јухуја ҝедәнләрин «зүлмәтин әмәлләрини» иҹра етдикләри дејилир. Бу әмәлләрә сәрхошлуг, гејри-гануни ҹинси әлагә, позғун давраныш, ихтилаф вә пахыллыг дахилдир. (Ромалылара 13:11—14 ајәләрини оху.) Бу ҹүр давраныш тәрзиндән гачынмаг чәтин ола биләр. Ајыг-сајыг олмаг олдугҹа ваҹибдир. Сүкан архасында јухуја ҝетмәјин нә гәдәр тәһлүкәли олдуғуна мәһәл гојмајан сүрүҹү һәјатыны рискә атыр. Руһани мәнада да јухуја ҝетмәк өлүмҹүл ола биләр. Мәсиһчинин буну дәрк етмәси неҹә дә ваҹибдир!
7. Инсанларын сәһв бахышлары бизә неҹә тәсир едә биләр?
7 Мәсәлән, мәсиһчи дүшүнә биләр ки, тәблиғ етдији әразидә инсанларын һамысы хош хәбәри бирдәфәлик рәдд едиб (Сүл. мәс. 6:10, 11). Ола билсин, о, белә дејир: «Әҝәр һеч кәс хош хәбәрә һај вермәјәҹәксә, онда инсанлара баш чәкмәкдә вә ја көмәк етмәкдә ҹанфәшанлыг ҝөстәрмәк нәјә лазымдыр?» Дүздүр, чохлары бу ҝүн руһани ҹәһәтдән бәрк јатырлар. Лакин онларын шәраит вә нөгтеји-нәзәри дәјишә биләр. Һәгигәтән дә, бәзиләри руһани јухудан ојаныб хош хәбәри гәбул едирләр. Әҝәр Падшаһлыг һагда хәбәри мараглы шәкилдә тәгдим етмәк үчүн јени үсуллар ахтарырыгса, демәли, биз руһән ојағыг вә башгаларына көмәк едә биләрик. Ојаг галмаг үчүн биз һәм дә хидмәтимизин нәјә ҝөрә ваҹиб олдуғуну өзүмүзә хатырлатмалыјыг.
ХИДМӘТИМИЗИ ВАҸИБ ЕДӘН АМИЛЛӘР
8. Нәјә ҝөрә тәблиғ хидмәти һәјати ваҹибдир?
8 Јадда сахла ки, инсанларын хош хәбәрә һал-һазыркы мүнасибәтиндән асылы олмајараг, тәблиғ ишимиз Јеһованы шәрәфләндирир вә Онун нијјәтинин јеринә јетмәсинә хидмәт едир. Хош хәбәрә итаәт етмәјәнләр тезликлә һөкмә дүчар олаҹаглар вә буна әсас онларын бизим тәблиғимизә неҹә һај вермәләри олаҹаг (2 Салон. 1:8, 9). Үстәлик, бәзиләри дүшүнүрләр ки, һәм салеһләрин, һәм дә гејри-салеһләрин дирилмәси олаҹағы үчүн хидмәтдә сәј ҝөстәрмәјә дәјмәз. Лакин бу, сәһв фикирдир (Һәв. иш. 24:15). Аллаһын Кәламындан билирик ки, Исанын «кечи» адландыраҹағы кәсләр «әбәдилик мәһв едиләҹәкләр». Бизим тәблиғ ишимиз Аллаһын мәрһәмәтинин тәзаһүрүдүр, чүнки бунун сајәсиндә инсанларын дәјишилиб «әбәди һәјата» говушмаг имканы вар (Мат. 25:32, 41, 46; Ром. 10:13—15). Әҝәр тәблиғ етмәсәк, инсанлар һәјатларыны хилас едә биләҹәк хәбәри неҹә ешидәҹәкләр?
9. Хош хәбәрин тәблиғиндә иштирак етмәк сәнә вә башгаларына һансы фајданы ҝәтирир?
9 Хош хәбәри тәблиғ етмәк өзүмүзә дә фајда ҝәтирир. (1 Тимотејә 4:16 ајәсини оху.) Јәгин, разылашаҹагсан ки, малик олдуғун үмид вә Јеһова барәдә данышмаг сәнин иманыны вә Аллаһа олан мәһәббәтини мөһкәмләндириб. Мәҝәр хидмәт сәнә мәсиһчи хүсусијјәтләрини инкишаф етдирмәјә көмәк етмәјиб? Јахуд Аллаһа садиг олдуғуну тәблиғ васитәсилә ҝөстәрмәк сәнин севинҹини артырмыр? Башгаларына һәгигәти өјрәтмәк шәрәфинә лајиг ҝөрүләнләрин чохуна Аллаһын мүгәддәс руһунун бу инсанлара һәјат тәрзләрини јахшылыға доғру дәјишмәјә неҹә көмәк етдијини ҝөрмәк севинҹи нәсиб олуб.
ДИГГӘТҸИЛ ОЛ
10, 11. а) Исанын вә Павелин хидмәтдә ајыг-сајыг вә диггәтҹил олдуғу нәдән ҝөрүнүр? б) Ајыг-сајыг вә диггәтҹил олмаг хидмәтимизи неҹә јахшылашдыра биләр? Нүмунә чәк.
10 Инсанларын хош хәбәрә марағыны мүхтәлиф ҹүр ојатмаг олар. Бунун үчүн биз хидмәтдә диггәтҹил олмалыјыг. Бу саһәдә Иса бизә ҝөзәл нүмунә гојуб. О, камил олдуғу үчүн фәрисејин үрәјиндә она аҹыгландығыны, ҝүнаһлы гадынын сәмими-гәлбдән төвбә етдијини вә дул гадынын фәдакарлығыны ҝөрмүшдү (Лука 7:37—50; 21:1—4). Иса онларын һәр биринин руһани тәләбатыны билдији үчүн онлара көмәк етмәјә гадир иди. Анҹаг бу, о демәк дејил ки, Аллаһын хидмәтчиси диггәтҹил олмаг үчүн камил олмалыдыр. Буну һәвари Павелин нүмунәсиндән ҝөрүрүк. О, тәгдимәләрини мүхтәлиф груп вә фәргли бахышлары олан инсанлара ујғунлашдырырды (Һәв. иш. 17:22, 23, 34; 1 Кор. 9:19—23).
11 Әҝәр биз дә Иса вә Павел кими ајыг-сајыг вә диггәтҹил олсаг, хидмәтдә гаршылашдығымыз инсанларын марағыны ојатмағын ән јахшы үсулуну биләҹәјик. Мәсәлән, инсанларын мәдәнијјәтиндән, мараг вә ја аилә вәзијјәтиндән хәбәр верән әламәтләрә диггәт јетир. Ола билсин, сән онларын һәмин вахт нә ишлә мәшғул олдуғуну ҝөрүб нәзакәтлә буна тохунараг сөһбәтә башлаја билдин.
12. Тәблиғ заманы әмәкдашымызла сөһбәт етмәклә әлагәдар нәји јадда сахламалыјыг?
12 Ајыг-сајыг вә диггәтҹил тәблиғчи хидмәт заманы нәјинсә онун диггәтини јајындырмасына јол вермир. Дүздүр, тәблиғ заманы әмәкдашымызла сөһбәт етмәк руһландырыҹы ола биләр. Лакин биз јадда сахламалыјыг ки, хидмәтә чыхмағымызын мәгсәди башгаларына тәблиғ етмәкдир (Ваиз 3:1, 7). Буна ҝөрә дә биз диггәтли олмалыјыг ки, бир гапыдан о бири гапыја кечәндә сөһбәтимиз хидмәтимизә манечилик төрәтмәсин. Марагланан инсанла бөлүшмәк истәдијимиз фикирләри арамызда мүзакирә етмәк диггәтимизи мәгсәдимиздә сахламаға көмәк едән јахшы үсуллардан биридир. Бундан әлавә, мобил телефонларын хидмәтимизә бәзән фајдасы дәјсә дә, биз чалышмалыјыг ки, зәнҝләр ев саһиби илә сөһбәтимизи кәсмәсин.
ШӘХСИ МАРАГ ҜӨСТӘР
13, 14. а) Инсан үчүн нәјин мараглы олдуғуну неҹә өјрәнмәк олар? б) Инсанларын руһани шејләрә марағыны нә ојада биләр?
13 Ојаг вә ајыг-сајыг тәблиғчиләр һәмсөһбәтләринә диггәтлә гулаг асырлар. Саһәндә јашајан инсанын өз фикирләрини ифадә етмәси үчүн һансы суаллары верә биләрдин? Бәлкә, ону динләрин чохлуғу, зоракылығын артмасы вә инсан һөкумәтинин уғурсузлуғу нараһат едир? Ҹанлыларын әсрарәнҝиз гурулушу барәдә бир фикир сөјләмәклә вә ја Мүгәддәс Китаб мәсләһәтләринин нә гәдәр практики олдуғуну ҝөстәрмәклә һәмсөһбәтинин руһани мөвзулара марағыны ојада биләрсәнми? Демәк олар ки, дуа һәр мәдәнијјәтдән олан инсанлары, һәтта бәзи атеистләри белә марагландырыр. Чохлары фикирләширләр ки, ҝөрәсән, онларын дуаларыны ешидән вармы. Башгаларыны исә бу суаллар нараһат едир: «Аллаһ дуаларын һамысыны ешидир? Әҝәр белә дејилсә, Онун бизи ешитмәси үчүн нә етмәлијик?»
14 Биз тәҹрүбәли тәблиғчиләри мүшаһидә етмәклә сөһбәтә башламаг мәһарәти барәдә чох шеј өјрәнә биләрик. Инсанлары сорғу-суала тутмадан вә ја јерсиз суаллар вермәдән онларла неҹә сөһбәт етдикләринә диггәт јетир. Онларын сәс тону вә үз ифадәләри ев саһибинин фикирләрини баша дүшмәјә чалышдыгларыны неҹә ҝөстәрир? (Сүл. мәс. 15:13).
МҮЛАЈИМЛИК ВӘ МӘҺАРӘТ
15. Нәјә ҝөрә мүлајимлик хидмәтимизин сәҹијјәви ҹәһәти олмалыдыр?
15 Сәни гәфләтән дәрин јухудан ојатсајдылар, өзүнү неҹә һисс едәрдин? Бу, чохларынын хошуна ҝәлмир вә онлар истәјәрдиләр ки, онлары еһмалҹа ојатсынлар. Руһани јухуја ҝетмиш инсанлары ојатмаг барәдә дә ејни шеји демәк олар. Туталым, ев саһиби сәнин ҝәлишинә аҹыгланыб. Белә һалда вәзијјәтдән ән јахшы чыхыш јолу нә ола биләр? Мүлајим ол, онун һиссләринә һөрмәт етдијини ҝөстәр вә сакитҹә ораны тәрк ет (Сүл. мәс. 15:1; 17:14; 2 Тим. 2:24). Сәнин мүлајим олмағын һәмин инсаны она нөвбәти дәфә баш чәкән тәблиғчијә хош мүнасибәт ҝөстәрмәјә тәшвиг едә биләр.
16, 17. Хидмәтдә неҹә дәрракәли ола биләрик?
16 Мүәјјән һалларда исә һәмсөһбәтимизин билдирдији етиразы мүзакирәјә чевирмәк олар. Кимсә: «Сағ олун, амма мәним өз диним вар» вә ја «Бу, мәним үчүн мараглы дејил», — дејә биләр, чүнки бу, сөһбәти битирмәјин ән асан јолудур. Мәһарәт вә мүлајимликлә тәкид ҝөстәрмәклә сән ев саһибинин руһани шејләрә марағыны ојада биләҹәк тәсирли бир суал верә биләрсән. (Колослулара 4:6 ајәсини оху.)
17 Бәзән инсанлар дүшүнә биләрләр ки, һәддән артыг мәшғул олдуглары үчүн бизә гулаг асмаға вахтлары јохдур. Белә һалларда ән јахшысы вәзијјәти баша дүшүб ораны тәрк етмәкдир. Бәзи вәзијјәтләрдә исә, ола билсин, сән гысаҹа олараг мараглы бир шеј демәјин мүнасиб олдуғу гәнаәтинә ҝәлдин. Мәсәлән, бәзи тәблиғчиләр хош хәбәри бир дәгигәдән дә аз вахт әрзиндә тәгдим едирләр: онлар ајә охујурлар вә ҝетмәздән өнҹә, бир суал галдырыб нөвбәти башчәкмә заманы она ҹаваб верәҹәкләрини дејирләр. Бу кичик тәгдимә бәзи инсанларда бөјүк мараг ојадыр вә онлар гыса сөһбәт етмәк үчүн о гәдәр дә мәшғул олмадыгларыны баша дүшүрләр. Мүнасиб вәзијјәт јарананда сән дә белә едә биләрсәнми?
18. Гејри-формал шәкилдә шаһидлик вермәк ишиндә даһа еффектив олмаг үчүн биз нә едә биләрик?
18 Әҝәр биз һәр ан шаһидлик вермәјә һазырыгса, ҝүндәлик ишләримизлә мәшғул оларкән гаршымыза чыхан инсанларын хош хәбәрә марағыны ојада биләрик. Мәсәлән, бир чох баҹы-гардашлар ҹибләриндә вә ја чанталарында нәшрләримизи ҝәздирирләр. Үстәлик, онлар конкрет бир ајә һазырлајырлар ки, имкан јаранан кими ону кимәсә охусунлар. Буну неҹә етмәји өјрәнмәк үчүн јығынҹағыныздакы хидмәт нәзарәтчиси вә ја пионерләрлә сөһбәт едә биләрсән.
ГОҺУМЛАРЫМЫЗЫ ЕҺМАЛҸА ОЈАДЫРЫГ
19. Нәјә ҝөрә биз гоһумларымыза тәблиғ етмәк ҹәһдләримизә сон гојмамалыјыг?
19 Әлбәттә, биз истәјирик ки, гоһумларымыза хош хәбәри гәбул етмәјә көмәк едәк (Јешуа 2:13; Һәв. иш. 10:24, 48; 16:31, 32). Әҝәр илк ҹәһдимиз боша чыхыбса, бу, һәвәсимизи өлдүрә биләр. Ола билсин, биз дүшүнүрүк ки, нә етмәјимиздән вә ја нә демәјимиздән асылы олмајараг, онларын нөгтеји-нәзәрини дәјишмәк мүмкүн дејил. Лакин еһтимал вар ки, һансыса һадисә гоһумларынын һәјатыны вә ја фикрини дәјишсин. Јахуд һәгигәти баша салмаг габилијјәтин даһа да јахшылашдығына ҝөрә, ола билсин, бу дәфә тамамилә башга нәтиҹә әлдә етдин.
20. Гоһумларымызла данышаркән нәзакәтли олмаг нәјә ҝөрә ваҹибдир?
20 Биз гоһумларымызын һиссләринә һөрмәтсизлик ҝөстәрмәкдән гачынмалыјыг (Ром. 2:4). Мәҝәр тәблиғдә гаршылашдығымыз инсанларла мүлајим данышдығымыз кими, онларла да бу ҹүр данышмалы дејилик? Гоһумларынла сөһбәт едәркән меһрибан вә һөрмәтҹил ол. Онлара моизә охумаг әвәзинә, һәгигәтин сәндә һансы мүсбәт дәјишикликләр етдијини ҝөстәр (Ефес. 4:23, 24). Гој онлар Јеһованын тәлимләри сајәсиндә һәјатынын неҹә јахшылашдығыны ҝөрсүнләр (Јешаја 48:17). Өз нүмунәнлә әсил мәсиһчинин неҹә олдуғуну ҝөстәр.
21, 22. Гоһумларымыза руһани ҹәһәтдән көмәк етмәк ҹәһдләринә сон гојмамағын ваҹиб олдуғуну ҝөстәрән бир нүмунә даныш.
21 Бу јахынларда бир баҹы јазмышды: «Мәним 13 доғма баҹы-гардашым вар вә мән һәмишә сөз вә һәрәкәтләримлә онлара тәблиғ етмәјә чалышырам. Елә ил олмајыб ки, онларын һәр биринә мәктуб јазмајым. Бунунла белә, 30 ил әрзиндә аиләмиздә јеҝанә мәсиһчи мән идим».
22 Баҹы сөзүнә давам едир: «Ҝүнләрин бир ҝүнү мәндән јүзләрлә километр узагда јашајан баҹыларымын биринә зәнҝ етмишдим. Баҹым мәнә деди ки, өз килсәләринин кешишиндән Мүгәддәс Китабы она өјрәтмәсини дәфәләрлә хаһиш етмәсинә бахмајараг, о, бундан имтина етди. Она мәмнунијјәтлә көмәк едәҹәјими сөјләјәндә баҹым мәнә: “Һә, јахшы, амма сәни габагҹадан хәбәрдар едирәм ки, мән Јеһованын Шаһиди олмајаҹағам”, — деди. Она “Мүгәддәс Китаб әслиндә нә өјрәдир?” китабыны ҝөндәрдикдән сонра бир нечә ҝүндән бир она зәнҝ едирдим. Анҹаг о, бир дәфә дә олсун китабын үзүнә бахмамышды. Нәһајәт, ондан хаһиш етдим ки, китабы ҝөтүрсүн. Биз тәхминән 15 дәгигә әрзиндә орада ситат ҝәтирилән бәзи ајәләри телефон васитәсилә охујуб мүзакирә етдик. Бир нечә дәфә мән она зәнҝ етдикдән сонра о истәди ки, мүзакирәмиз 15 дәгигәдән чох чәксин. Сонра о, өзү мәнә зәнҝ етмәјә башлады. Һәрдән баҹым сәһәр тездән — мән һәлә јатанда, бәзән дә ҝүндә ики дәфә зәнҝ едирди. Бундан бир ил сонра о вәфтиз олду, даһа бир илдән сонра исә пионер хидмәтинә башлады».
23. Нәјә ҝөрә биз башгаларыны руһани јухудан ојатмаға чалышанда руһдан дүшмәмәлијик?
23 Инсанларын руһани јухудан ојанмасы үчүн көмәк етмәк бир баҹарыгдыр вә бу, мүнтәзәм шәкилдә сәј ҝөстәрмәји тәләб едир. Бу ҝүн дә онлары руһани јухудан ојатмаг сәјләримизә һај верән һәлим инсанлар вар. Орта һесабла, һәр ај 20 000-дән чох адам вәфтиз олунараг Јеһованын Шаһиди олур. Буна ҝөрә дә ҝәлин Павелин биринҹи әсрдә јашајан мәсиһчи Архипә вердији мәсләһәти јадымызда мөһкәм сахлајаг: «Ағамызын сәнә һәвалә етдији хидмәти виҹданла иҹра ет» (Колос. 4:17). Нөвбәти мәгаләдә биз тәхирә салмадан тәблиғ етмәјин нә демәк олдуғуну өјрәнәҹәјик.
[13–ҹү сәһифәдәки чәрчивә]
НЕҸӘ ОЈАГ ГАЛА БИЛӘРСӘН?
▪ Аллаһын ирадәсини јеринә јетир
▪ «Зүлмәтин әмәлләрини» иҹра етмәкдән гачын
▪ Руһән јатмағын нә гәдәр тәһлүкәли олдуғуну јаддан чыхартма
▪ Саһәндәки инсанлара гаршы мүсбәт нөгтеји-нәзәри гору
▪ Тәблиғ етмәјин јени үсулларыны сынагдан кечир
▪ Хидмәтимизин ваҹиблијини унутма