Охуҹуларын суаллары

Һансы мәнада «садиг бәндәләринин өлүмү Јеһова үчүн баһадыр»?

▪ Мәзмурчу Аллаһдан илһам алараг охујурду: «Садиг бәндәләринин өлүмү Јеһова үчүн баһадыр» (Мәз. 116:15, ЈД). Һәр бир һәгиги хидмәтчисинин һәјаты Јеһованын ҝөзүндә чох гијмәтлидир. Лакин индиҹә ситат ҝәтирдијимиз 116-ҹы мәзмурдакы ајәдә Аллаһын ајры-ајры хидмәтчиләринин өлүмү нәзәрдә тутулмур.

Аллаһын хидмәтчиси садиг бир мәсиһчи кими өлсә белә, дәфн мәрасиминдә мәрузә сөјләниләркән Мәзмур 116:15 ајәсини она тәтбиг етмәк дүзҝүн дејил. Нијә? Чүнки мәзмурчу бу ифадәни ҝениш мәнада истифадә етмишди. Бу, о демәкдир ки, Јеһова садиг хидмәтчиләринин бир груп шәклиндә өлүмүнү һәддән артыг баһа гијмәт һесаб етдији үчүн бунун баш вермәсинә һеч вахт јол вермәјәҹәк. (Мәзмур 72:14; 116:8 ајәләринә бах.)

Мәзмур 116:15 ајәси бизә зәманәт верир ки, Јеһова садиг хидмәтчиләринин бир груп шәклиндә тамамилә јер үзүндән силинмәсинә јол вермәјәҹәк. Мүасир тарихимиз бизим бир чох шиддәтли сынаг вә тәгибләрә таб ҝәтирдијимизи ҝөстәрир. Бу, Јеһованын бизим тамамилә мәһв олунмағымыза һеч вахт јол вермәјәҹәјинә дәлаләт едир.

Јеһова түкәнмәз ҝүҹ саһибидир вә мүмкүн дејил ки, Онун нијјәти јеринә јетмәсин, буна ҝөрә дә О, бизим бир груп кими јер үзүндән силиниб атылмағымыза јол вермәјәҹәк. Әҝәр Аллаһ буна иҹазә версәјди, белә бир тәәссүрат јаранаҹагды ки, дүшмәнләри Ондан даһа ҝүҹлүдүр, бу исә гәтијјән мүмкүн дејил! Белә олан һалда Јеһованын јер үзүндә Она садиг олан инсанларын јашамасына даир нијјәти боша чыхаҹагды, лакин бу нијјәтин баш тутмајаҹағына аз да олса еһтимал јохдур (Јешаја 45:18; 55:10, 11). Әҝәр мөһтәшәм руһани мәбәдин јер үзүндәки һәјәтиндә бир нәфәр дә олсун ибадәт едән адам галмасајды, онда бурада Јеһова гаршысында мүгәддәс хидмәтин иҹра олунмасына сон гојуларды! «Јени јер»ин, јәни «јени ҝөј»үн рәһбәрлији алтында јашајаҹаг салеһ инсан ҹәмијјәтинин јарадылмасы үчүн һеч бир тәмәл олмајаҹагды (Вәһј 21:1). Онда јер үзүндә садиг тәбәәләр олмадан Мәсиһин Миниллик Һөкмранлығы да баш тутмајаҹагды (Вәһј 20:4, 5).

Әҝәр Јеһова дүшмәнләринин әлинә бүтүн хидмәтчиләрини јер үзүндән силмәк фүрсәти версәјди, Онун адына вә мөвгејинә шүбһә јаранарды. Белә олан һалда Јеһованын дашыдығы «Каинатын Һөкмдары» титулу ләкәләнәрди. Бундан әлавә, О, Өзүнә вә мүгәддәс адына һөрмәтдән ирәли ҝәләрәк, садиг инсанларын бир груп кими өлмәсинә јол вермәјәҹәк. Ҝәлин бир анлыға дүшүнәк: әҝәр Аллаһ «һеч заман һагсызлыг [етмирсә]», сизҹә, О, Она сәдагәтлә хидмәт едән инсанлары груп шәклиндә горумајаҹаг? (Ганун. т. 32:4; Јар. 18:25). Үстәлик, Өз хидмәтчиләринин груп шәклиндә көкүнүн кәсилмәсинә јол вермәси Кәламындакы: «Рәбб халгыны Өз бөјүк исми наминә атмајаҹаг», — сөзләринә зидд оларды (1 Шам. 12:22). Бәли, «Рәбб халгыны Өзүндән ајырмаз, ирсини Өз әлиндән вермәз» (Мәз. 94:14).

Јер үзүндә Јеһованын халгынын һеч вахт мәһв олмајаҹағыны билмәк неҹә дә тәсәлливериҹидир! Белә исә, ҝәлин Она садиг галмаг үчүн әлимиздән ҝәләни әсирҝәмәјәк вә Онун нөвбәти вәдинә етибар едәк: «Сәнә гаршы ишләнән һеч бир силаһ ишә јарамајаҹаг. Мәһкәмәдә сәни тәгсирләндирән һәр кәси тәгсиркар чыхараҹагсан. Рәббә гуллуг едәнләрин ирси беләдир. Онларын салеһлији Мәндән ҝәлир» (Јешаја 54:17).

[22–ҹи сәһифәдәки јазы]

Јеһова һеч вахт Өз халгынын көкүнүн кәсилмәсинә јол вермәјәҹәк