Вахт вә дөврләр Аллаһы олан Јеһоваја етибар един
«Вахты вә дөврү дәјишдирән Одур. О, падшаһлары тахтдан салар вә тахта гојар» (ДАН. 2:21).
НЕҸӘ ҸАВАБ ВЕРӘРДИНИЗ?
Хилгәт вә јеринә јетән пејғәмбәрликләр неҹә ҝөстәрир ки, Јеһова вахтын Ағасыдыр?
Јеһованын вахт вә дөврләр Аллаһы олдуғуну дәрк етмәјимиз бизи нәјә тәшвиг едир?
Һарадан билирик ки, дүнјадакы һадисәләр вә инсанларын планлары Јеһованын ҹәдвәлинә тәсир едә билмәз?
1, 2. Вахт анлајышынын Јеһова үчүн сирр олмадығы нәдән бәллидир?
ЈЕҺОВА инсанлары јаратмаздан чох-чох әввәл вахты мүәјјән етмәјә көмәк едән васитәләр јаратмышды. Дөрдүнҹү јарадылыш ҝүнүндә Аллаһ деди: «Гој ҝөј гүббәсиндә ҝеҹәни ҝүндүздән ајыран чыраглар олсун. Онлар... фәсилләри вә ҝүнләрлә илләри ҝөстәрсин» (Јар. 1:14, 19, 26). Вә әлбәттә ки, һәр шеј Јеһованын истәдији кими олду.
2 Лакин вахт анлајышы үстүндә алимләр арасында ҝедән мүбаһисәләр һәлә дә сәнҝимәк билмир. Бир енсиклопедијада гејд едилир: «“Вахт” дүнјада ән дәркедилмәз сирләрдән биридир. Һеч кәс вахтын нә олдуғуну дәгиг дејә билмәз». Анҹаг Јеһова вахтын нә олдуғундан тамамилә аҝаһдыр. Ахы Јеһова «ҝөјләри јарадан Рәбб»дир, «О, дүнјаны јаратды, она гурулуш верди». Јеһова һәмчинин «ахыры әввәлдән, баш вермәмиш һадисәләри әзәлдән билдирән» Аллаһдыр (Јешаја 45:18; 46:10). Инди биз Јеһоваја вә Онун Кәламына олан иманымызы мөһкәмләндирәҹәк ики саһәјә диггәт јетирәҹәјик. Ҝәлин ҝөрәк Јеһованын јаратдыглары шејләр вә јеринә јетән пејғәмбәрликләр Онун вахтын Ағасы олдуғуну, јәни һәр шеји тәјин етдији вахтда јеринә јетирдијини неҹә ҝөстәрир.
ХИЛГӘТ ВАХТЫН АҒАСЫ ОЛАН ЈЕҺОВАЈА ЕҺТИРАМ ҺАСИЛ ЕДИР
3. Тәбиәтдә вахта ҝөрә һәр шејин дәгиг тәнзимләнмәси нәдән бәллидир?
3 Јеһованын јаратдығы һәр шеј — ән хырда зәррәҹикдән тутмуш бөјүк шејләрәдәк дәгиг вахтла ишләјир. Мәсәлән, атомларын вибрасија етдији ритм һеч вахт дәјишмир. Атом вибрасијасы илә ишләјән бејнәлхалг саат еталонунун хәтасы 80 милјон ил мүддәтиндә 1 санијәдән артыг дејил, јәни бу мүддәт әрзиндә һәмин саат ја 1 санијә дала галыр, ја да габаға гачыр. Улдузларын вә планетләрин һәрәкәти дә вахт бахымындан дәгиг тәнзимләниб. Онларын сәмадакы мөвгеләри дәгиг мүәјјән едилдији үчүн фәсилләри ајырд етмәк вә сәјаһәт заманы јери дәгигләшдирмәк мүмкүндүр. Бу дәгиг «саатлары» јарадан Јеһова бөјүк гүдрәтә саһибдир вә сөзсүз ки, Она һәмд етмәјимизә лајигдир. (Јешаја 40:26 ајәсини оху.)
4. Ҹанлы аләмдә мүшаһидә олунан вахт дәгиглији Аллаһын мүдриклијини неҹә әкс етдирир?
4 Ҹанлы аләмдә дә вахт дәгиглији мүшаһидә олунур. Бир чох биткиләрин вә һејванларын һәјаты дахили саат сајәсиндә низамланыр. Гушларын чоху инстинктив олараг нә заман көч етмәјин лазым олдуғуну билир (Јер. 8:7). Инсанларда да ҝеҹә-ҝүндүз ритми илә ишләјән вә 24 саатдан ибарәт олан дахили саат вар. Инсан тәјјарә илә бир өлкәдән башга өлкәјә ҝедәндә, адәтән, бир нечә саат гуршағы кечир; буна ҝөрә дә дахили саатын јенидән өз гајдасы илә ишләмәси үчүн бир нечә ҝүн лазымдыр. Доғрудан да, ҹанлы вә ҹансыз аләмдә һәр шејин вахта ҝөрә дәгиг тәнзимләнмәси вахт вә дөврләр Аллаһы олан Јеһованын гүдрәтиндән вә һикмәтиндән хәбәр верир. (Мәзмур 104:24 ајәсини оху.) Бәли, вахтын Ағасы Јеһова Каинатда ән мүдрик вә гүдрәтли Шәхсдир. Буна ҝөрә биз там әмин ола биләрик ки, О, бүтүн нијјәтләрини һәјата кечирмәјә гадирдир!
ДҮЗ ВАХТЫНДА ЈЕРИНӘ ЈЕТӘН ПЕЈҒӘМБӘРЛИКЛӘР ИМАНЫМЫЗЫ МӨҺКӘМЛӘНДИРИР
5. а) Биз бәшәријјәтин ҝәләҹәјини јалныз һансы јолла өјрәнә биләрик? б) Нәјә ҝөрә Јеһова һадисәләри вә онларын вахтыны дәгиг дејә биләр?
5 Јеһованын јаратдығы тәбиәт Онун ҝөзәҝөрүнмәз хүсусијјәтләри һагда бизә чох шеј өјрәдир. Лакин тәбиәт «ҝәләҹәкдә бәшәријјәти нә ҝөзләјир?» кими ваҹиб суаллар гаршысында аҹиздир (Ром. 1:20). Буна ҝөрә дә биз Онун Кәламы олан Мүгәддәс Јазылара мүраҹиәт етмәлијик. Бу китабы арашдыранда ҝөрүрүк ки, орада чохсајлы пејғәмбәрликләр вар вә онларын һәр бири вахтында јеринә јетиб! Јеһова һадисәләр барәдә габагҹадан хәбәр вермәјә гадирдир, чүнки О, ҝәләҹәји ајдын ҝөрүр. Үстәлик, Мүгәддәс Китабдакы пејғәмбәрликләр вахтында јеринә јетир, чүнки Јеһова Аллаһ һадисәләри елә истигамәтләндирә биләр ки, онлар нијјәтинә ујғун олараг тәјин етдији вахтда јеринә јетсин.
6. Һарадан билирик ки, Јеһова Мүгәддәс Китабдакы пејғәмбәрликләрин јеринә јетдијини баша дүшмәјимизи истәјир?
6 Јеһова истәјир ки, хидмәтчиләри Мүгәддәс Јазылардакы пејғәмбәрликләри баша дүшсүнләр вә онлардан фајдалансынлар. Аллаһын вахта олан бахышы бизимкиндән фәргли олса да, ҝәләҹәк һадисәләрин вахтындан хәбәр верәндә бизим баша дүшдүјүмүз вахт ваһидләриндән истифадә едир. (Мәзмур 90:4 ајәсини оху.) Мәсәлән, «Вәһј» китабында «ан, ҝүн, ај вә ил үчүн һазырланмыш дөрд мәләк»дән бәһс олунур вә бу вахт ваһидләри бизим үчүн анлашылмаз дејил (Вәһј 9:14, 15). Бу пејғәмбәрликләрин дүз вахтында неҹә јеринә јетдијини ҝөрмәк вахт вә дөврләр Аллаһы олан Јеһоваја вә Онун Кәламына олан иманымызы даһа да мөһкәмләндирмәлидир. Ҝәлин бир нечә нүмунәјә нәзәр салаг.
7. Јеремјанын Јерусәлим вә Јәһуда һагда сөјләдији пејғәмбәрликләрин јеринә јетмәси Јеһованын вахтын даһи Ағасы олдуғуну неҹә ҝөстәрди?
7 Ҝәлин хәјалән ерамыздан әввәл једдинҹи әсрә гајыдаг. «Јәһуда падшаһы Јошија оғлу Јеһојагимин падшаһлығынын дөрдүнҹү илиндә» вахтын даһи Ағасы олан Јеһовадан «бүтүн Јәһуда халгы барәдә Јеремјаја сөз назил олду» (Јер. 25:1). Јеһова габагҹадан Јерусәлимин виран галаҹағыны, јәһудиләрин исә Бабилә сүрҝүн едиләҹәјини сөјләди. Онлар орада «Бабил падшаһына јетмиш ил гуллуг едәҹәк»диләр. Ерамыздан әввәл 607-ҹи илдә Бабил ордусу Јерусәлими, һәгигәтән дә, виран гојду вә јәһудиләри Јәһудадан Бабилә әсир апарды. Бәс 70 ил сона чатанда нә баш верди? Јеремја белә бир пејғәмбәрлик сөјләмишди: «Рәбб белә дејир: “Бабилдә јетмиш илиниз битәндә Мән сизә јенә баш чәкәҹәјәм вә сизи бураја гајтараҹағым барәдә вердијим хош сөзү јеринә јетирәҹәјәм”» (Јер. 25:11, 12; 29:10). Бу пејғәмбәрлик дүз вахтында, ерамыздан әввәл 537-ҹи илдә мидијалылар вә фарслар јәһудиләри Бабил әсарәтиндән азад едәндә јеринә јетди.
8, 9. Мәсиһин ҝәлиши вә сәмави Падшаһлығын тәсиси барәдә Даниелин пејғәмбәрликләри Јеһованын вахт вә дөврләр Аллаһы олдуғуну неҹә ҝөстәрир?
8 Ҝәлин Аллаһын гәдим халгы илә бағлы олан нөвбәти пејғәмбәрлијә нәзәр салаг. Јәһудиләрин Бабилдән чыхмаларындан тәхминән ики ил әввәл Аллаһ Даниел васитәсилә пејғәмбәрлик етмишди ки, Јерусәлимин бәрпасы барәдә фәрманын чыхмасындан 483 ил сонра Мәсиһ пејда олаҹаг. Мидија-Фарс империјасынын падшаһы һәмин фәрманы ерамыздан әввәл 455-ҹи илдә вермишди. Дүз 483 ил сонра, ерамызын 29-ҹу илиндә Назаретли Иса вәфтиз олунаркән Мәсһ олунду вә Мәсиһ олдуa (Неһ. 2:1, 5—8; Дан. 9:24, 25; Лука 3:1, 2, 21, 22).
9 Инди исә ҝөрәк Мүгәддәс Китабда Падшаһлыгла бағлы һансы пејғәмбәрлик јазылмышды. Мәсәлән, орада дејилир ки, Мәсиһин Падшаһлығы 1914-ҹү илдә ҝөјдә тәсис олунаҹагды. Һәмчинин орада Мәсиһин иштиракынын «әламәти», Шејтанын ҝөјдән јерә атылаҹағы вә дүнјада бөјүк фәлакәтләрин олаҹағы һагда јазылмышды (Мат. 24:3—14; Вәһј 12:9, 12). Үстәлик, Мүгәддәс Китабда дәгиг вахт — 1914-ҹү ил ҝөстәрилмишди. Һәмин ил «милләтләр үчүн тәјин олунмуш вахт» сона чатаҹагды вә Падшаһлыг ҝөјдә идарә етмәјә башлајаҹагды (Лука 21:24; Дан. 4:10—17)b.
10. Һансы һадисәләрин ҝәләҹәкдә дүз вахтында јеринә јетәҹәјинә зәррә гәдәр дә шүбһә јохдур?
10 Гаршыда бизи Мәсиһин дедији «бөјүк мүсибәт» ҝөзләјир. Бундан сонра Мәсиһин Миниллик Һөкмранлығы башлајаҹаг. Дејилән бүтүн бу һадисәләрин дүз вахтында јеринә јетәҹәјинә зәррә гәдәр дә шүбһә ола билмәз. Иса јер үзүндә оланда Јеһова артыг бу һадисәләрин баш верәҹәји «ҝүнү вә сааты» тәјин етмишди (Мат. 24:21, 36; Вәһј 20:6).
«ВАХТЫНЫЗЫН ГӘДРИНИ БИЛИН»
11. Сон ҝүнләрдә јашадығымызы билмәјимиз бизә неҹә тәсир етмәлидир?
11 Мәсиһин артыг падшаһлыг етдијини вә ахыр ҝүнләрдә јашадығымызы билмәјимиз бизә неҹә тәсир етмәлидир? (Дан. 12:4). Чохлары дүнјадакы вәзијјәтин ҝет-ҝедә писләшдијини ҝөрсәләр дә, онлар баша дүшмүрләр ки, бунунла Мүгәддәс Китабда сон ҝүнләр барәдә јазылан пејғәмбәрликләр јеринә јетир. Бәзиләри бу системин бир ҝүн дағылаҹағыны, диҝәрләри исә инсанларын сәји нәтиҹәсиндә јер үзүндә сүлһ вә тәһлүкәсизлијин бәргәрар олаҹағыны дүшүнүрләр (1 Салон. 5:3). Бәс биз? Әҝәр биз, доғрудан да, Шејтан дүнјасынын мәһвинин астанасында јашадығымызы дәрк едириксә, онда галан вахтымызы Аллаһа хидмәт етмәк вә башгаларына Онун һаггында өјрәнмәјә көмәк етмәк үчүн сәрф етмәли дејилик? (2 Тим. 3:1). Биз вахтымыздан мүдрикҹәсинә истифадә етмәлијик. (Ефеслиләрә 5:15—17 ајәләрини оху.)
12. Исанын Нуһун ҝүнләри барәдә дедији сөзләрдән биз нә өјрәнә биләрик?
12 Диггәти јајындыран шејләрлә долу олан бу дүнјада ваҹиб шејләрә вахт тапмаг бәзән чәтин олур. Иса хәбәрдарлыг етмишди: «Нуһун ҝүнләриндә неҹә идисә, инсан Оғлунун иштиракы заманы да елә олаҹаг». Нуһун ҝүнләри неҹә иди? Һәмин дөврдә габагҹадан дејилмишди ки, дүнјаны су басаҹаг вә бүтүн пис инсанлар Дашгында мәһв олаҹаглар. «Салеһлик тәблиғчиси» олан Нуһ Аллаһын хәбәрини сәдагәтлә инсанлара чатдырырды (Мат. 24:37; 2 Пет. 2:5). Лакин «ҹамаат јејир, ичир, евләнир, әрә ҝедирди вә... дашгын ҝәлиб онларын һамысыны апармајынҹа һеч нәји фикирләшмирдиләр». Буна ҝөрә дә Иса давамчыларына хәбәрдарлыг етмишди: «Һазыр олун, чүнки инсан Оғлу ҝөзләмәдијиниз саатда ҝәләҹәк» (Мат. 24:38, 39, 44). Биз Нуһун мүасирләри кими јох, онун кими олмалыјыг. Бәс бизә өзүмүзү һазыр вәзијјәтдә сахламаға нә көмәк едәҹәк?
13, 14. Инсан Оғлунун ҝәлишини ҝөзләдијимиз мүддәтдә Јеһоваја сәдагәтлә хидмәт етмәк үчүн Онун барәсиндә нәји јадда сахламалыјыг?
13 Инсан Оғлу бизим дүшүнмәдијимиз саатда ҝәләҹәк, бунунла белә, биз јадда сахламалыјыг ки, Јеһова һәмишә Өз нијјәтини тәјин етдији вахтда јеринә јетирир. Дүнјадакы һадисәләр вә инсанларын планлары Онун тәјин етдији вахта һеч ҹүр тәсир едә билмәз. Јеһова нијјәтини һәјата кечирмәк үчүн һадисәләрин баш верәҹәји вахты вә бунларын нәтиҹәләрини Өзү мүәјјән едир. (Даниел 2:21 ајәсини оху.) Сүлејманын мәсәлләри 21:1 ајәсиндә дејилир: «Падшаһын үрәји Рәббин әлиндәдир, ону су архы кими истәдији сәмтә дөндәрәр».
14 Јеһова нијјәтини дүз вахтында һәјата кечирмәк үчүн һадисәләрә тәсир ҝөстәрмәјә гадирдир. Дүнјада баш верән бир чох мүһүм дәјишикликләр Мүгәддәс Китабдакы пејғәмбәрликләрин, хүсусилә дә Аллаһын Падшаһлығы һагда хош хәбәрин бүтүн дүнјада тәблиғ олунаҹағына даир пејғәмбәрликләрин јеринә јетмәсидир. Совет Иттифагынын сүгутуну вә бунун нәтиҹәләрини бир анлыға ҝөзүнүзүн габағына ҝәтирин. Јәгин, чох аз адам фикирләширди ки, бу кими бөјүк сијаси дәјишиклик белә бир гыса заманда баш верә биләр. Анҹаг бунун сајәсиндә хош хәбәр әввәлләр фәалијјәтимизин гадаған олундуғу бир чох әразиләрдә тәблиғ едилир. Буна ҝөрә дә ҝәлин вахтымызын гәдрини биләрәк вахт вә дөврләр Аллаһына сәдагәтлә хидмәт етмәји давам етдирәк.
ВАХТ МӘСӘЛӘСИНДӘ ЈЕҺОВАЈА ЕТИБАР ЕДИН
15. Тәшкилати дәјишикликләрә әмәл етмәклә өз иманымызы неҹә ҝөстәрә биләрик?
15 Бу сон ҝүнләрдә Падшаһлыг һагда хош хәбәрин тәблиғини давам етдирмәк үчүн биздән Јеһованын Өз нијјәтини там вахтында јеринә јетирәҹәјинә иман етмәк тәләб олунур. Ола билсин ки, дүнјада вәзијјәт дәјишдијинә ҝөрә биздән шаҝирд һазырламаг ишиндә дәјишиклик етмәк лазым ҝәләр. Тәблиғ фәалијјәтимизин даһа сәмәрәли олмасы үчүн Јеһованын тәшкилаты бәзән дәјишикликләр едир. «Јығынҹағын... башы» вә Аллаһын Оғлу олан Мәсиһин рәһбәрлији алтында сәдагәтлә хидмәт едән бизләр бу дәјишикликләрә там әмәл етмәклә вахт вә дөврләр Аллаһы олан Јеһоваја иман етдијимизи ҝөстәририк (Ефес. 5:23).
16. Нәјә ҝөрә Јеһованын бизә дүз вахтында көмәк едәҹәјинә иман едә биләрик?
16 Јеһова истәјир ки, биз Она чәкинмәдән вә «вахтында» бизә көмәк едәҹәјинә там иманла дуа едәк (Ибр. 4:16). Мәҝәр бу, Аллаһын һәр биримизи ајры-ајрылыгда севдијини вә гајғымыза галдығыны ҝөстәрмир? (Мат. 6:8; 10:29—31). Биз Јеһова Аллаһа олан иманымызы мүнтәзәм олараг көмәк үчүн Она дуа етмәклә, сонра да дуаларымыза вә Онун ҝөстәришләринә ујғун давранмагла тәзаһүр етдирә биләрик. Биз һәмиманлыларымыз үчүн дә дуа етмәји јаддан чыхармырыг.
17, 18. а) Тезликлә Јеһованын дүшмәнләри илә нә баш верәҹәк? б) Биз һансы тәләдән өзүмүзү ҝөзләмәлијик?
17 Инди тәрәддүд етмәјин вә имансызлыға гапылмағын вахты дејил; инди иман сајәсиндә мөһкәм олмағын вахтыдыр (Ром. 4:20). Аллаһын дүшмәнләри олан Шејтан вә онун әлалтылары Исанын, биз дә дахил олмагла, өз давамчыларына тапшырдығы ишин гаршысыны алмаға чалышырлар (Мат. 28:19, 20). Иблисин һүҹумларына бахмајараг, биз билирик ки, Јеһова «һәр ҹүр инсанын, әләлхүсус да садиг адамларын Хиласкары»дыр. «Јеһова Она садиг инсанлары сынаглардан неҹә гуртармағы... јахшы билир» (1 Тим. 4:10; 2 Пет. 2:9).
18 Тезликлә Јеһова бу пис системә сон гојаҹаг. Бунун нә вахт вә неҹә баш верәҹәјини там тәфәррүаты илә билмәсәк дә, һеч шүбһә етмирик ки, Мәсиһ дүз вахтында Аллаһын дүшмәнләринин пајыны верәҹәк вә Јеһованын али һөкмранлығына бәраәт газандырылаҹаг. Буна ҝөрә дә бизим һансы зәманәдә јашадығымызы нәзәрә алмамаг бөјүк ағылсызлыг оларды! Чохлары «һәр шеј јарадылышдан бәри олдуғу кими» дурдуғуну дүшүнүрләр. Ҝәлин биз һеч вахт бу тәләјә дүшмәјәк (1 Салон. 5:1; 2 Пет. 3:3, 4).
АЛЛАҺЫ СӘБИРЛӘ ҜӨЗЛӘЈИН
19, 20. Нәјә ҝөрә биз Јеһованы сәбирлә ҝөзләмәлијик?
19 Јеһова бәшәријјәти јараданда нијјәти о иди ки, инсанлар Онун Өзү вә јаратдыглары мөһтәшәм шејләр һаггында әбәдијјән өјрәнсинләр. Ваиз 3:11 ајәсиндә гејд олунур: «Аллаһ һәр шеји өз вахтында ҝөзәл јаратды вә әбәдијјәти дә инсанларын үрәјинә гојду. Һәрчәнд ки инсан Аллаһын етдији иши әввәлдән ахыра гәдәр анлаја билмәз».
20 Биз неҹә дә хошбәхтик ки, Јеһованын бәшәријјәтә даир нијјәти дәјишилмәз олараг галыб (Мал. 3:6). Аллаһ «көлҝә кими дәјишкән дејил» (Јаг. 1:17). Инсанларын вахты мүәјјән етмәк үчүн истифадә етдикләри васитәләр, мәсәлән, Јер күрәсинин фырланмасы Јеһованын нијјәтини һәјата кечирәҹәји вахта тәсир етмир. Јеһова «әбәдијјәт Падшаһы»дыр (1 Тим. 1:17). Буна ҝөрә дә ҝәлин бизи «хилас едән Аллаһы» ҝөзләјәк (Мик. 7:7). «Еј Рәббә үмид бағлајан бүтүн инсанлар, ҹәсарәтли, мөһкәм олун!» (Мәз. 31:24).
[Һашијәләр]
a «Мүгәддәс Китаб әслиндә нә өјрәдир?» китабынын 197-дән 199-дәк сәһифәләринә бахын.
b «Мүгәддәс Китаб әслиндә нә өјрәдир?» китабынын 215-дән 218-дәк сәһифәләринә бахын.
[19–ҹу сәһифәдәки шәкил]
Даниел Аллаһдан алдығы пејғәмбәрлик сөзләринин јеринә јетәҹәјинә иман едирди
[21–ҹи сәһифәдәки шәкил]
Јеһованын нијјәтини јеринә јетирмәк үчүн вахтдан дүзҝүн истифадә едирсинизми?