«Өзүнүзү фәрисејләрин мајасындан... ҝөзләјин»
Иса шаҝирдләринә хәбәрдарлыг етмишди: «Өзүнүзү фәрисејләрин мајасындан, јәни икиүзлүлүкдән ҝөзләјин» (Лука 12:1). Паралел ајәдә ҝөстәрилир ки, Иса бурада фәрисејләрин тәлимләрини мүһакимә едирди (Мат. 16:12).
Мүгәддәс Китабда «маја» сөзү бәзән хараб олманын символу кими ишләдилир. Шүбһә јохдур ки, фәрисејләрин јалан тәлимләри вә дүшүнҹә тәрзләри онлара гулаг асан инсанлара да өз пис тәсирини ҝөстәрирди. Нәјә ҝөрә фәрисејләрин тәлимләри бу гәдәр тәһлүкәли иди?
1 Фәрисејләр өзләрини һәддән артыг салеһ һесаб едир вә садә халга јухарыдан ашағы бахырдылар.
Фәрисејләрин бу ҹүр дүшүнҹә тәрзи Исанын чәкдији бир мәсәлдән ајдын ҝөрүнүр: «Фәрисеј дуруб үрәјиндә белә дуа етди: “Шүкүр Сәнә, Илаһи! Мән галан адамлар кими — сојғунчу, һагсыз, зинакар вә ја бу верҝијыған кими дејиләм. Һәфтәдә ики дәфә оруҹуму тутурам, алдығым һәр шејин онда бирини верирәм”. Верҝијыған исә узагда дуруб ҝөзләрини дә ҝөјә галдырмаға ҹүрәт етмирди, амма пешманчылыгдан синәсинә вуруб дејирди: “Ја Аллаһ, мән ҝүнаһкара рәһмин ҝәлсин”» (Лука 18:11—13).
Иса верҝијығаны тәвазөкарлығына ҝөрә тәрифләјәрәк деди: «Буну билин ки, бу адам Аллаһын ҝөзүндә о бирисиндән [фәрисејдән] даһа салеһ чыхды. Чүнки өзүнү јүксәлдән алчалдылаҹаг, өзүнү алчалдан исә јүксәлдиләҹәк» (Лука 18:14). Верҝијығанлар дүрүст олмадыглары үчүн пис ад газансалар да, Иса она гулаг асан бу пешә саһибләринә көмәк етмәјә чалышырды. Ән азы ики верҝијыған — Матта вә Заккај онун давамчысы олмушду.
Аллаһдан алдығымыз һәр һансы бир баҹарыг вә ја мәсулијјәтә, јахуд да башгаларынын уғурсузлугларына вә ја зәифликләринә ҝөрә бизим онлардан даһа јахшы олдуғумуз фикри ағлымыздан кечирми? Әҝәр кечирсә, онда бу фикирләри дәрһал өзүмүздән узаглашдырмалыјыг, чүнки Мүгәддәс Китабда дејилир: «Мәһәббәт сәбирли вә хејирхаһдыр. Мәһәббәт пахыл дејил, ловғаланмыр, јекәханалыг етмир, налајиг давранмыр, өз хејрини ҝүдмүр, әсәбиләшмир, она едилән пислијин һесабыны тутмур. Һагсызлыға севинмир, әксинә, һәгигәтә шадланыр» (1 Кор. 13:4—6).
Биз дә Павел кими дүшүнмәлијик. «Мәсиһ Иса бу дүнјаја ҝүнаһлы адамлары хилас етмәк үчүн ҝәлди», — дедикдән сонра о әлавә етмишди: «О ҝүнаһ саһибләриндән дә ән бетәри мәнәм» (1 Тим. 1:15).
Дүшүнмәк үчүн суаллар
Ҝүнаһлы олдуғуму вә гуртулушумун Јеһованын мәнә ҝөстәрдији лүтфдән асылы олдуғуну дәрк едирәмми? Јохса Јеһоваја узун илләр сәдагәтлә хидмәт етдијим, Онун тәшкилатында мүәјјән мәсулијјәтләрим ја да һансыса анаданҝәлмә габилијјәтләрим олдуғу үчүн өзүмү башгаларындан үстүн тутурам?
2 Фәрисејләр ҹамаат гаршысында өзләрини салеһ ҝөстәрәрәк онларда тәәссүрат ојатмаға чалышырдылар. Онлар ад-сан газанмаг вә онлары уҹалдан титулларла мүраҹиәт олунмасыны истәјирдиләр.
Анҹаг Иса хәбәрдарлыг етмишди: «Һәр бир иши өзләрини ҹамаата ҝөстәрмәк үчүн едирләр. Онлар һәмаил кими тахдыглары ајә гутуҹугларыны ҝенишләндирир, әбаларынын сачагларыны узадырлар. Онлар мәҹлисләрдә јухары башда вә синагогларда габаг ҹәрҝәләрдә отурмағы севирләр, базар мејданларында ҹамаатдан салам алмағы, инсанларын онлары “Мүәллим” чағырмағыны хошлајырлар» (Мат. 23:5—7). Иса илә фәрисејләр арасында јерлә ҝөј гәдәр фәрг вар иди! Иса Аллаһын Оғлу вә камил олмасына бахмајараг, тәвазөкар иди. Бир дәфә бир нәфәр она «Јахшы» дејә мүраҹиәт едәндә о, белә ҹаваб вермишди: «Мәни нијә “Јахшы” адландырырсан? Аллаһдан башга Јахшы шәхсијјәт јохдур» (Марк 10:18). Башга бир вәзијјәтдә исә Иса шаҝирдләринин ајағыны јумушду вә бунунла да давамчыларына тәвазөкарлыг нүмунәси гојмушду (Јәһ. 13:1—15).
Һәгиги мәсиһчиләр һәмиманлыларына хидмәт етмәлидирләр (Галат. 5:13). Хүсусилә бу, јығынҹагда нәзарәтчи олмаг истәјән гардашлара аиддир. Гардаш «нәзарәтчи вәзифәсинә» ҹан атырса, бу, тәрифәлајигдир. Лакин онун бу мәгсәдинин архасында башгаларына көмәк етмәк арзусу дурмалыдыр. Нәзарәтчи башгаларындан даһа үстүн дејил вә јығынҹаг үзвләри арасында ағалыг етмәмәлидир. Онлар, Иса кими, гәлбән тәвазөкар олмалыдырлар (1 Тим. 3:1, 6; Мат. 11:29).
Дүшүнмәк үчүн суаллар
Јығынҹагда мәсулијјәтләрә наил олмаг, јахуд да әлавә мәсулијјәтләр алмаг хатиринә диҝәрләринә нисбәтән мәсул гардашлара даһа чох һөрмәт едирәм? Мүәјјән хидмәт нөвләринә үстүнлүк вермәјимә сәбәб онларын даһа чох нәзәрә чарпан олмасы дејил ки? Башгаларынын ҝөзүнә ҝирмәјә чалышырам?
3 Фәрисејләрин тәсис етдији гајдалар вә адәт-әнәнәләр Гануну бүтүн халгын ҝөзүндә ағыр бир јүкә чевирмишди.
Мусанын Гануну исраиллиләрин Јеһоваја неҹә ибадәт етмәләри илә бағлы үмуми ҝөстәришләрдән ибарәт иди. Анҹаг орада һәр шеј хырдалығына гәдәр верилмәмишди. Мәсәлән, Ганунда Шәнбә ҝүнүндә иш ҝөрмәк гадаған иди, лакин орада нәјин иш сајылдығы, нәјинсә иш сајылмадығы һагда бир кәлмә белә дејилмирди (Чых. 20:10). Фәрисејләр Јеһованын ганунларында кифајәт гәдәр мәлумат олмадығыны дүшүнәрәк, ораја өз ганун, адәт вә фикирләрини әлавә етмишдиләр. Иса фәрисејләрин ујдурдуғу сәрт ганунлары рәдд етсә дә, Мусанын ганунуна риајәт едирди (Мат. 5:17, 18; 23:23). О, Ганунун мәғзини баша дүшүрдү вә анлајырды ки, инсанларын шәфгәтә вә мәрһәмәтә еһтијаҹы вар. Һәтта давамчылары сәһвә јол верәндә белә, о, анлајыш ҝөстәрирди. Мәсәлән, Иса һәбс олундуғу ҝеҹә үч һәварисинә тәкидлә ојаг галмағы тапшырса да, онлар һәр дәфә јухуја ҝедирдиләр. Бунунла белә, о, шәфгәтлә онлара деди: «Руһ ҝүҹлү, бәдән исә зәифдир» (Марк 14:34—42).
Дүшүнмәк үчүн суаллар
Мән сәрт гајдалар тәсис едирәм? Шәхси фикирләрими ганун кими тәгдим етмирәм ки? Башгаларыны анламаға чалышыраммы?
Иса илә фәрисејләрин тәлимләри арасындакы фәрг үзәриндә дүшүнүн. Һансы саһәләрдә дәјишиклик етмәк лазым олдуғуну ҝөрүрсүнүзмү? Әҝәр ҝөрүрсүнүзсә, нәјә ҝөрә онларын үзәриндә ишләмәји гаршыныза мәгсәд гојмајасыныз?
[28–ҹи сәһифәдәки шәкил]
Фәрисејләр ајә гутуҹуглары ҝәздирирдиләр (Мат. 23:2, 5)
[29–ҹу сәһифәдәки шәкил]
Тәкәббүрлү фәрисејләрдән фәргли олараг, тәвазөкар ағсаггаллар башгаларына хидмәт едирләр
[30–ҹу сәһифәдәки шәкил]
Сиз дә Иса кими башгаларына анлајыш ҝөстәрмәјә чалышырсынызмы?