Нәјә ҝөрә Јеһоваја хидмәт һәјатымызда биринҹи јердә дурмалыдыр?
«Ҝүн боју салеһлијини, гуртулушуну дилим бәјан едир» (МӘЗ. 71:15).
НЕҸӘ ҸАВАБ ВЕРӘРДИН?
Нуһ, Муса, Јеремја вә Павел нәјә ҝөрә һәјатларында Јеһоваја хидмәти биринҹи јерә гојурдулар?
Һәјатыны нәјә сәрф етдијини мүәјјән етмәјә сәнә нә көмәк едәҹәк?
Сән нәјә ҝөрә һәјатында Јеһоваја хидмәти биринҹи јерә гојмаға гәти гәрарлысан?
1, 2. а) Јеһоваја һәср олунмагла инсан нәји ҝөстәрмиш олур? б) Нуһун, Мусанын, Јеремјанын вә һәвари Павелин нүмунәләриндән неҹә фајдалана биләрик?
СӘН өзүнү Јеһоваја һәср едиб Исанын давамчысы кими вәфтиз оланда чох ҹидди бир аддым атдын. Сәнин өзүнү Аллаһа һәср етмәјин һәјатда гәбул етдијин ән ҹидди гәрар иди. Һәмин ан сән, санки, Јеһоваја бу сөзләри дејирдин: «Јеһова, мән истәјирәм ки, Сән мәним Ағам оласан вә һәјатымын һәр бир саһәсиндә мәнә рәһбәрлик едәсән. Мән Сәнин хидмәтчинәм. Мән истәјирәм ки, мәним үчүн нәјин даһа ваҹиб олдуғуну, еләҹә дә вахтымдан, габилијјәтләримдән вә имканларымдан неҹә истифадә етмәји Сән мүәјјән едәсән».
2 Сән өзүнү Јеһоваја һәср едәндә Она сөз вердин. Белә дүзҝүн вә мүдрик гәрар вермәклә сән чох тәрифәлајиг бир аддым атдын. Бир һалда ки Јеһованы Аға кими гәбул етмисән, бу, сәни өз вахтындан Она мәгбул тәрздә истифадә етмәјә неҹә тәшвиг етмәлидир? Нуһун, Мусанын, Јеремјанын вә һәвари Павелин нүмунәләри бизә бу суалын ҹавабыны тапмагда көмәк едәҹәк. Онларын һәр бири Јеһоваја сидг-үрәкдән хидмәт етмишди. Бизим дә вәзијјәтимиз онларынкына охшајыр. Онларын һәјатда гәбул етдикләри гәрарлар һансы мәшғулијјәтләрә үстүнлүк вердикләрини ҝөстәрирди вә бу, бизи вахтымыздан неҹә истифадә етдијимизи јохламаға тәшвиг едә биләр (Мат. 28:19, 20; 2 Тим. 3:1).
ДАШГЫНДАН ӘВВӘЛ
3. Бизим ҝүнләрлә Нуһун ҝүнләри арасында һансы охшарлыг вар?
3 Иса Нуһун ҝүнләри илә бизим ҝүнләр арасында охшарлыг олдуғуну демишди: «Нуһун ҝүнләриндә неҹә идисә, инсан Оғлунун иштиракы заманы да елә олаҹаг». Онлар «јејир, ичир, евләнир, әрә ҝедирди вә Нуһ ҝәмијә минмәјинҹә, дашгын ҝәлиб онларын һамысыны апармајынҹа һеч нәји фикирләшмирдиләр» (Мат. 24:37—39). Бу ҝүн дә инсанларын әксәријјәти һансы дөврдә јашадыгларына гәтијјән мәһәл гојмур. Онлар Аллаһын Өз хидмәтчиләри васитәсилә чатдырдығы хәбәрдарлыға диггәт јетирмирләр. Һәтта Нуһун ҝүнләриндә олдуғу кими, чохлары Аллаһын бәшәријјәтин ишләринә мүдахилә едәҹәји фикрини әлә салырлар (2 Пет. 3:3—7). Бәс әдавәтли инсанларын әһатәсиндә јашајан Нуһ вахтындан неҹә истифадә етмишди?
4. Нуһ Јеһовадан тапшырыг аландан сонра өз вахтыны нәјә сәрф етди вә о, нәјә ҝөрә белә етди?
4 Нуһ Аллаһын нијјәти һагда өјрәнәндә вә Ондан тапшырыг аланда инсанларын вә һејванларын һәјатыны хилас едәҹәк бир ҝәми тикди (Јар. 6:13, 14, 22). Нуһ һәмчинин Јеһованын гачылмаз һөкмләрини дә бәјан едирди. Һәвари Петер ону «салеһлик тәблиғчиси» адландырмышды; бу ҝөстәрир ки, Нуһ инсанлара вәзијјәтләринин нә дәрәҹәдә ҹидди олдуғуну баша дүшмәләри үчүн бөјүк сәј ҝөстәрирди. (2 Петер 2:5 ајәсини оху.) Неҹә дүшүнүрсән, Нуһ вә онун аилә үзвләри өз вахтларыны ҝәлирли ишә башламаға, әтрафдакы инсанлардан даһа бөјүк уғур газанмаға вә өзләри үчүн раһат шәраит јаратмаға сәрф етсәјдиләр, бу, мүдрик һәрәкәт оларды? Әлбәттә, јох! Гаршыдакы һадисәләрдән хәбәрдар олан бу инсанлар онлары јајындыра биләҹәк бу кими шејләрдән узаг дурурдулар.
МИСИР ШАҺЗАДӘСИНИН СЕЧИМИ
5, 6. а) Муса алдығы тәһсил сајәсиндә нәләрә наил ола биләрди? б) Нәјә ҝөрә Муса Мисирдә она тәклиф олунан бүтүн шејләри рәдд етди?
5 Инди Мусанын нүмунәсинә нәзәр салаг. Фиронун гызы тәрәфиндән өвладлыға ҝөтүрүлән Муса сарајда бөјүјүб боја-баша чатмышды. Ҝәнҹ бир шаһзадә кими, о, «мисирлиләрин бүтүн һикмәтинә» јијәләнмишди (Һәв. иш. 7:22; Чых. 2:9, 10). Ҝөрүнүр, алдығы тәһсил она фиронун сарај әјанларындан бири олмаг имканы верәҹәкди. Муса өз дөврүнүн ән гүдрәтли дөвләтиндә нүфузлу бир вәзифә саһиби олараг кеф-дамаг ичиндә дәбдәбәли һәјат сүрә биләрди. Бәс бүтүн бунлар Муса үчүн әһәмијјәт кәсб едирдими?
6 Муса ушаг оланда доғма валидејнләри она Јеһова һагда өјрәдирдиләр. Буна ҝөрә дә Јеһованын Ибраһимә, Исһага вә Јагуба вердији вәдләрдән онун хәбәри вар иди. Муса бу вәдләрә инанырды. Јәгин ки, о, өз ҝәләҹәји вә Јеһоваја садиглији барәдә чох фикирләширди. Бәс Мисирдә шаһзадә олмагла исраилли гул олмаг арасында сечим етмәк вахты ҝәләндә о, һансы гәрары верди? Муса «ҝүнаһдан мүвәггәти һәзз алмагданса, Аллаһын халгы илә бирликдә әзијјәтә гатлашмағы үстүн тутду». (Ибраниләрә 11:24—26 ајәләрини оху.) Даһа сонра о, Јеһованын рәһбәрлијинә әмәл едәрәк һәјатыны Онун истәдији кими јашады (Чых. 3:2, 6—10). Муса нәјә ҝөрә белә етди? Чүнки о, Аллаһын вәдләринә инанырды. О, белә бир нәтиҹә чыхармышды ки, Мисирдә онун һеч бир ҝәләҹәји јохдур. О, һаглы иди: бир мүддәтдән сонра Аллаһ мисирлиләри ҹәзаландырмаг үчүн Он бәла ҝөндәрди. Аллаһын бүтүн һәср олунмуш хидмәтчиләри Онун нүмунәсиндән өзләри үчүн дәрс ҝөтүрмәлидирләр. Бу дүнјада карјера гурмаг вә ја «кеф елә!» принсипи илә јашамаг әвәзинә, диггәтимизи Јеһоваја вә хидмәтә јөнәлтмәлијик.
ЈЕРЕМЈА ГАРШЫДАКЫ ҺАДИСӘЛӘРДӘН ХӘБӘРДАР ИДИ
7. Һансы мәнада Јеремјанын вәзијјәти бизимкинә охшајырды?
7 Јеһоваја хидмәти һәјатларында биринҹи јерә гојан шәхсләрдән бири дә Јеремја пејғәмбәр иди. Јеһова она дөнүк Јерусәлим вә Јәһуда сакинләринә һөкм хәбәрини бәјан етмәк тапшырығыны вермишди. Мүәјјән мәнада Јеремја да «сон ҝүнләрдә» јашајырды (Јер. 23:19, 20, «Китабы Мукаддес»). О, јахшы билирди ки, онун јашадығы систем чох чәкән дејил.
8, 9. а) Нәјә ҝөрә Барукун дүшүнҹә тәрзинә дүзәлиш етмәк лазым иди? б) Планлар гураркән нәји јадда сахламалыјыг?
8 Јеремјанын ҝәләҹәкдә баш верәҹәк һадисәләрә инанмасы мәнтиги олараг ону нәјә тәшвиг едирди? Агибәти габагҹадан бәлли олан о системдә Јеремја өз ҝәләҹәјини тәмин етмәјә чалышмырды. Бунун һеч бир мәнасы јох иди! Анҹаг Јеремјанын мирзәси Барук башга ҹүр дүшүнүрдү. Буна ҝөрә дә Аллаһ Јеремја васитәсилә она деди: «Бах Мән тикдијими дағыдаҹағам, әкдијими чыхараҹағам, өзү дә бүтүн өлкәдә. Әҝәр сән өзүн үчүн чох шеј истәјирсәнсә, истәмә. Чүнки Мән бүтүн бәшәрин үзәринә бәла ҝәтирәҹәјәм... Анҹаг һара ҝедирсән, ҝет, һеч олмаса ҹаныны горујаҹағам» (Јер. 45:4, 5).
9 Биз Барукун өзү үчүн истәдији «чох шеј»ин нә олдуғуну дәгиг билмирикa. Лакин бизә бир шеј мәлумдур ки, бу, ҝәләҹәји олмајан, бизим ерамыздан әввәл 607-ҹи илдә бабиллиләрин Јерусәлими зәбт етмәләри илә сона јетәҹәк шејләрә аид иди. Өзүн үчүн бурада ибрәт дәрси ҝөрүрсәнми? Өзүмүзү мадди ҹәһәтдән тәмин етмәк үчүн биз мүәјјән планлар гурмалы олуруг (Сүл. мәс. 6:6—11). Фајдасы, узағы, Һар-Маҝедона гәдәр олан мәшғулијјәтләрә чохлу вахт вә ҝүҹ сәрф етмәк нә дәрәҹәдә ағыллы һәрәкәтдир? Дүздүр, Јеһованын тәшкилаты јени Падшаһлыг залларынын, филиалларын тикинтисини вә диҝәр теократик лајиһәләр планлашдырмаға давам едир. Бүтүн бунларын ҝәләҹәји вар, чүнки онлар Падшаһлығын мараглары үчүн хидмәт едир. Јахшы оларды ки, Јеһованын бүтүн һәср олунмуш хидмәтчиләри планлар гураркән ејни дәјәрләрә үстүнлүк версинләр. Бәс сән «падшаһлығы вә [Јеһованын] салеһлијини һәјатынызда һәмишә биринҹи јерә гојун» сөзләринә ујғун давранырсанмы? (Мат. 6:33).
«ҺӘР ШЕЈИ ЗИБИЛ ҺЕСАБ ЕДИРӘМ»
10, 11. а) Павел мәсиһчи олмаздан әввәл онун үчүн ваҹиб олан нә иди? б) Павелин мәгсәдләрини тамамилә дәјишән нә олду?
10 Сонда һәвари Павелин нүмунәсини нәзәрдән кечирәк. Мәсиһчилији гәбул етмәздән өнҹә, гаршыда ону илк бахышдан парлаг ҝөрүнән ҝәләҹәк ҝөзләјирди. Павел өз дөврүнүн ән нүфузлу мүәллимләриндән јәһуди дини ганунларынын инҹәликләринә јијәләнмишди. Она јәһуди баш каһини тәрәфиндән мүәјјән сәлаһијјәтләр верилмишди. О, бир чох мүасирләри илә мүгајисәдә бу ишдә даһа чох ирәли ҝетмишди (Һәв. иш. 9:1, 2; 22:3; 26:10; Галат. 1:13, 14). Лакин Павел Аллаһын артыг јәһудиләрә бир халг кими хејир-дуа вермәдијини дәрк едәндә онун үчүн һәр шеј дәјишди.
11 Павел чох ҝөзәл дәрк едирди ки, јәһуди системиндә јүксәк вәзифәјә доғру ирәлиләмәк Јеһованын ҝөзүндә һеч бир дәјәрә малик дејил, чүнки о халгын ҝәләҹәји јох иди (Мат. 24:2). Кечмишдә фәрисеј олан Павел вахтилә ваҹиб һесаб етдији шејләри Аллаһын нијјәти барәдә өјрәндији јени биликләрлә вә Она хидмәт етмәк шәрәфи илә мүгајисәдә һәтта «зибил» адландырды. Павел јәһуди дининдә тутдуғу вәзифәни бурахыб, өмрүнүн галан илләрини хош хәбәри тәблиғ етмәклә кечирди. (Филипилиләрә 3:4—8, 15 ајәләрини оху; Һәв. иш. 9:15.)
СӘНИН ҮЧҮН НӘ ВАҸИБДИР?
12. Вәфтиз олунандан сонра Исанын әсас иши нәдән ибарәт иди?
12 Нуһ, Муса, Јеремја, Павел вә онлар кими бир чохлары вахтларынын вә ҝүҹләринин бөјүк гисмини теократик ишләрә сәрф едибләр. Онлар бизим үчүн ҝөзәл нүмунәдирләр. Әлбәттә, Јеһованын бүтүн һәср олунмуш хидмәтчиләри арасында ән бөјүјү Исадыр (1 Пет. 2:21). Вәфтиз олунандан сонра Иса јер үзүндәки һәјатынын галан илләрини хош хәбәрин тәблиғинә вә Јеһованы иззәтләндирмәјә һәср етмишди. Беләликлә, ајдындыр ки, Јеһованы өзүнә Аға билән мәсиһчи үчүн ән үмдә иш Она хидмәт етмәк олмалыдыр. Буну сәнин барәндә дә демәк олармы? Биз неҹә едә биләрик ки, һәм Јеһоваја даһа чох хидмәт едәк, һәм дә диҝәр мәсулијјәтләримизи јеринә јетирәк? (Мәзмур 71:15; 145:2 ајәләрини оху.)
13, 14. а) Бүтүн һәср олунмуш мәсиһчиләр нәјә тәшвиг олунурлар? б) Аллаһын халгына нә севинҹ бәхш едә биләр?
13 Нечә илләрдир ки, Јеһованын тәшкилаты мәсиһчиләри дуа едәрәк пионер хидмәти барәдә дүшүнмәјә тәшвиг едир. Лакин мүхтәлиф сәбәбләр уҹбатындан Јеһованын бәзи садиг хидмәтчиләринин шәраити онлара ајда 70 саат тәблиғ етмәјә имкан вермир. Онлар буна ҝөрә мәјуслуға гапылмамалыдырлар (1 Тим. 5:8). Бәс сәнин һаггында нә демәк олар? Доғруданмы, пионер хидмәти сәнин үчүн әлчатмаз мәгсәддир?
14 Бу ил кечирилән Хатирә ҝеҹәси әрзиндә Јеһованын бир чох хидмәтчиләринин севинҹинә сәбәб олан хүсуси тәдбир барәдә фикирләшәк. Март ајында көмәкчи пионер кими хидмәт етмәк истәјәнләрә 30 вә 50 саат арасында сечим етмәк имканы верилмишди (Мәз. 110:3). Бу тәдбирә милјонларла тәблиғчиләрин гатылмасы сајәсиндә јығынҹагларда гејри-ади севинҹ вә ҹанланма мүшаһидә олунурду. Сән өз ҹәдвәлиндә дәјишикликләр едәрәк тез-тез көмәкчи пионер кими хидмәт етмәји гаршына мәгсәд гоја биләрсәнми? Пионер кими хидмәт едән вәфтиз олунмуш мәсиһчи һәр ҝүнүн сонунда бөјүк мәмнунлуг һисс едир вә буна ҝөрә дә о дејә биләр: «Јеһова, бу ҝүн хидмәтдә әлимдән ҝәләни етдим».
15. Ҝәнҹ мәсиһчиләр мәктәбдә охујаркән һансы мәгсәдләр барәдә дүшүнмәлидирләр?
15 Ола билсин, сән мәктәби гуртармаг үзрәсән. Әҝәр сағламлығын јахшыдырса вә мәсулијјәтләрин бир о гәдәр чох дејилсә, даими пионер олмаг барәдә ҹидди дүшүнмүсәнми? Шүбһәсиз, мүәллимләрин там сәмими олараг фикирләширләр ки, сәнин үчүн ән јахшысы университетдә вә ја коллеҹдә охумаг, еләҹә дә бу дүнјада карјера гурмагдыр. Онларын бу ҹүр фикирләри пулун ҝүҹүнә вә инсан тәшкилатларына олан инамларындан ирәли ҝәлир. Лакин әҝәр сән пиллә-пиллә руһани мәгсәдләрә ҹан атсан, әсил дәјәри олан вә ҝәләҹәјә зәманәт верән ишлә мәшғул олаҹагсан. Бунунла сән Исанын мүкәммәл нүмунәсини изләјәҹәксән. Вердијин бу мүдрик гәрар сәни хошбәхт едәҹәк. Бу, сәнин үчүн бир мүдафиә олаҹаг, үстәлик, сәнин Јеһоваја һәср олунмағына ујғун јашамаға гәти гәрарлы олдуғундан хәбәр верәҹәк (Мат. 6:19—21; 1 Тим. 6:9—12).
16, 17. Иш вә диҝәр мәшғулијјәтләрлә әлагәдар һансы суаллар мејдана чыхыр?
16 Аллаһын бир чох хидмәтчиләри аиләләрини зәрури шејләрлә тәмин етмәк үчүн чох ишләмәли олурлар. Лакин бәзиләринин ҝеҹәләрини ҝүндүзә гатыб ишләмәләри зәруријјәтдән ирәли ҝәлмир (1 Тим. 6:8). Коммерсија дүнјасы бизи инандырмаға чалышыр ки, бу ҝүн сатыша бурахылан бир чох әшјаларсыз вә техники јениликләрсиз кечинмәк гејри-мүмкүндүр. Лакин һәгиги мәсиһчиләр истәмирләр ки, онлар үчүн нәјин даһа ваҹиб олдуғуну Шејтанын дүнјасы диктә етсин (1 Јәһ. 2:15—17). Тәгаүдә чыхан мәсиһчиләрә ҝәлинҹә исә, мәҝәр онлар үчүн Јеһоваја хидмәти һәјатларында биринҹи јерә гојараг вахтларыны даими пионер хидмәтинә сәрф етмәкдән даһа јахшы нәсә ола биләрми?
17 Јеһованын бүтүн һәср олунмуш хидмәтчиләри өзләриндән соруша биләрләр: «Һәјатда әсас мәгсәдим нәдир? Падшаһлығын марагларыны һәјатымда биринҹи јерә гојураммы? Мән дә Иса кими фәдакарлыг руһу тәзаһүр етдирирәмми? Исанын даима онун ардынҹа ҝетмәк мәсләһәтинә әмәл едирәмми? Тәблиғ хидмәтинә вә диҝәр руһани мәшғулијјәтләрә даһа чох вахт сәрф етмәк үчүн ҹәдвәлимдә дәјишикликләр едә биләрәмми? Әҝәр һал-һазырда шәраитим хидмәтими ҝенишләндирмәјә имкан вермирсә, фәдакарлыг руһу инкишаф етдирмәјә давам едирәм?»
АРЗУ ВӘ ҺӘРӘКӘТЛӘРИН
18, 19. Сән нә барәдә дуа едә биләрсән вә нәјә ҝөрә демәк олар ки, бу хаһишин Јеһоваја мәгбул олаҹаг?
18 Аллаһын халгынын ҹанла-башла хидмәт етдијини ҝөрмәк чох севиндириҹидир. Лакин бәзиләринин шәраити пионер кими хидмәт етмәјә јол версә дә, онлар буна мејилли дејилләр вә ја өзләрини бу хидмәтә лајиг билмирләр (Чых. 4:10; Јер. 1:6). Белә һалда нә етмәк олар? Мәҝәр бу, дуа үчүн мүнасиб мөвзу дејил? Әлбәттә, бу барәдә Јеһоваја дуа едә биләрсән. Павел һәмиманлыларына демишди: «[Јеһова] сизин арзу вә һәрәкәтләринизи истәдији сәмтә јөнәлдәрәк сиздә фәалијјәт ҝөстәрир» (Филип. 2:13). Әҝәр үрәјин сәни хидмәтини ҝенишләндирмәјә тәшвиг етмирсә, Јеһовадан сәнә арзу вә габилијјәт вермәсини хаһиш ет (2 Пет. 3:9, 11).
19 Нуһ, Муса, Јеремја, Павел вә Иса Аллаһын садиг бәндәләри идиләр. Онлар өз вахтларыны вә ҝүҹләрини Јеһованын һөкм хәбәрләрини бәјан етмәјә сәрф едирдиләр, еләҹә дә јол вермирдиләр ки, нә исә онлары бу ишдән јајындырсын. Бу системин сону јахындыр. Бунунла белә, һәјатыны Аллаһа һәср едән һәр бир инсан әмин олмалыдыр ки, Мүгәддәс Китабдакы бу јахшы нүмунәләри изләмәк үчүн әлиндән ҝәләни едир (Мат. 24:42; 2 Тим. 2:15). Белә етсәк, Јеһованы разы салаҹағыг вә Ондан бол-бол хејир-дуалар алаҹағыг. (Малаки 3:10 ајәсини оху.)
[Һашијә]
a «Аллаһын Јеремја васитәсилә бизә чатдырдығы хәбәр» китабынын 104-дән 106-дәк сәһифәләринә (рус.) бах.
[21–ҹи сәһифәдәки шәкил]
Инсанлар Нуһун бәјан етдији хәбәрдарлыға мәһәл гојмурдулар
[24–ҹү сәһифәдәки шәкил]
Даими пионерләрин сырасына гошулмағы ҹидди шәкилдә ҝөтүр-гој етмисән?