Онлар көнүллү олараг өзләрини тәгдим етдиләр. Еквадорда

ИТАЛИЈАДА бир ҝәнҹ гардаш ҹидди сечим гаршысында иди. О, орта мәктәби әла гијмәтләрлә гуртармышды вә инди мүәллимләри вә гоһум-әгрәбалары ону али тәһсил алмасы үчүн дилә тутурдулар. Анҹаг бир нечә ил бундан әввәл Бруно өзүнү Јеһоваја һәср етмишди вә сөз вермишди ки, Онун ирадәсини јеринә јетирмәји һәјатында биринҹи јерә гојаҹаг. Бәс гардаш һансы гәрары верди? О дејир: «Мән Јеһоваја дуада сөз вермишдим ки, һәср олунмағыма ујғун јашајаҹағам вә Она хидмәт һәјатымда биринҹи јердә дураҹаг. Ејни заманда ачыг шәкилдә дуамда билдирдим ки, һәјатымын дарыхдырыҹы јох, мараглы, мүхтәлиф фәалијјәт нөвү илә зәнҝин олмасыны истәјирәм».

Бир нечә илдән сонра Бруно Ҹәнуби Америкада јерләшән Еквадора ҝетди. О дејир: «Јеһова мәним дуама ҝөзләдијимдән дә артыг ҹаваб верди». Еквадорда Јеһоваја даһа чох хидмәт етмәк мәгсәдилә башга јерләрдән көчүб ҝәлән чохлу ҝәнҹләр ҝөрәндә бу, онун үчүн сүрприз олду.

ЈЕҺОВАНЫ «СЫНАЈАН» ҜӘНҸЛӘР

Дүнјадакы минләрлә ҝәнҹ кими, Бруно да Јеһованын бу чағырышына һај вериб: «Мәни сынајын. Ҝөрәҹәксиниз ки, ҝөјләрин пәнҹәрәләрини сизә ачаҹағам, үзәринизә... бәрәкәт јағдыраҹағам» (Мал. 3:10). Аллаһа мәһәббәтдән ирәли ҝәләрәк онлар Падшаһлығын тәблиғчиләринә еһтијаҹ олан өлкәјә көчдүләр вә вахт, ҝүҹ вә вәсаитләрини бурада хидмәтә јөнәлтмәклә Јеһованы «сынамаг» гәрарына ҝәлдиләр.

Бу фәдакар баҹы-гардашлар онлар үчүн јени олан әразијә ҝәләндә мәһсулун бол, ишчинин исә аз олдуғуну өз ҝөзләри илә ҝөрүрләр (Мат. 9:37). Мисал үчүн, Алманијадан олан Жаклин Еквадор филиалына мәктуб јазараг өз севинҹини бөлүшмүшдү: «Ики илдән чохдур ки, Еквадорда хидмәт едирәм вә артыг бурада 13 нәфәрлә Мүгәддәс Китабы өјрәнирәм вә онлардан 4-ү мүнтәзәм шәкилдә јығынҹаг ҝөрүшләриндә иштирак едир. Бу неҹә дә ҝөзәлдир!» Канададан олан Шантел дејир: «2008-ҹи илдә мән Еквадорун саһилјаны әразиләриндән биринә көчәндә орада ҹәми-ҹүмләтаны бир јығынҹаг фәалијјәт ҝөстәрирди. Инди исә бурада үч јығынҹаг вә 30-дан чох пионер вар. Бу гәдәр инсанын руһани инкишафыны өз ҝөзүнлә ҝөрмәк һеч нә илә мүгајисә олуна билмәз!» О әлавә едир: «Мән тәзәликҹә Анд дағларынын гојнунда, дәниз сәвијјәсиндән 2743 метр һүндүрлүкдә јерләшән бир шәһәрә көчмүшәм. Һәмин шәһәрдә 75 000-дән чох адам јашаса да, бурада да ҹәми бир јығынҹаг вар. Бу әрази чох мәһсулдардыр! Бурада хидмәт етмәк үрәјимҹәдир».

ЧӘТИНЛИКЛӘР

Дүздүр, хариҹи өлкәләрдә хидмәт етмәк елә дә асан иш дејил. Бәзи ҝәнҹләр һәтта башга әразијә көчмәздән әввәл өз өлкәләриндә белә манеәләрлә үзләшибләр. Бирләшмиш Штатлардан олан Кајла данышыр: «Доғма јығынҹағымдакы бәзи гардашларын јахшы нијјәтдән ирәли ҝәләрәк мәни фикримдән дашындырмаг ҹәһдләри әлими сојудурду. Онлар мәним хариҹи өлкәјә пионер кими ҝетмәк истәјими баша дүшмүрдүләр. Бәзән өзүмдә дә шүбһәләр јаранырды: “Ҝөрәсән, мән дүзмү едирәм?”» Буна бахмајараг, Кајла көчмәк гәрарына ҝәлди. О изаһ едир: «Чохлу дуалардан вә јеткин баҹы-гардашларла сөһбәтләрдән сонра баша дүшдүм ки, Јеһова ҹанла-башла өзләрини Она тәгдим едән инсанлара хејир-дуа верир».

Чохлары јени дил өјрәнмәк проблеми илә үзләширләр. Ирландијадан олан Шабон адлы бир баҹы хатырлајыр: «Мәнә фикирләрими чатдырмаг чәтин иди. Мән сәбирли вә дили өјрәнмәкдә чалышган олмағы, еләҹә дә етдијим сәһвләрә ҝүлмәји өјрәндим». Естонијадан олан Анна әлавә едир: «Тропик истиләр, тоз-торпаг вә исти душ гәбул етмәк имканынын олмамасы испан дилини өјрәнмәклә мүгајисәдә һеч нә иди. Бәзән һәр шеји атыб бурдан чыхыб ҝетмәк истәјирдим. Лакин мән диггәтими бурахдығым сәһвләрә јох, мәндә ҝедән инкишафа јөнәлтмәји өјрәндим».

Диҝәр бир чәтинлик адамын өз доғмалары үчүн дарыхмасыдыр. Бирләшмиш Штатлардан олан Ҹонатан етираф едир: «Бура ҝәлдикдән гыса мүддәт сонра аиләмдән вә достларымдан узагда олдуғум үчүн руһ дүшкүнлүјүнә гапылдым. Лакин диггәтими шәхси өјрәнмәјә вә хидмәтә јөнәлтмәклә бу һиссләрин өһдәсиндән ҝәлдим. Тәблиғдә баш верән севиндириҹи һадисәләр, еләҹә дә јығынҹагдакы јени достларым сајәсиндә севинҹими јенидән гајтардым».

Диҝәр чәтинлик исә һәјат сәвијјәсинин ашағы олмасыдыр. Чох еһтимал ки, сәнин көчмәк истәдијин өлкәдәки шәраит доғма өлкәндән фәргләнәҹәк. Канададан олан Боу дејир: «Өз өлкәмдә јашајанда крандан ҝәлән су вә ишыг кими зәрури хидмәтләр мәним үчүн ади бир шеј иди. Анҹаг бурада бунлар ҝаһ олур, ҝаһ олмур». Касыбчылыг, раһат олмајан нәглијјат васитәләри вә савадсызлыг инкишаф етмәкдә олан бир чох өлкәләрә хасдыр. Австријадан олан Инес бу кими чәтинликләрин өһдәсиндән ҝәлмәк үчүн диггәтини јерли сакинләрин мүсбәт хүсусијјәтләринә ҹәмләјир. О дејир: «Онлар чох гонагпәрвәр, меһрибан, тәвазөкардырлар вә башгаларына әл тутмаға һазырдырлар. Ән ваҹиби исә онларын Аллаһ һаггында өјрәнмәк истәкләри олдугҹа бөјүкдүр».

«ҮЗӘРИНИЗӘ ЕҺТИЈАҸЛАРЫНЫЗДАН ДА ЧОХ БӘРӘКӘТ ЈАҒДЫРАҸАҒАМ»

Еквадорда хидмәт едән бу ҝәнҹ баҹы-гардашлар мүәјјән шејләри гурбан вермәли олсалар да, онлар ҝөрмүшләр ки, Јеһова онлар үчүн дүшүндүкләриндән «гат-гат артығыны» едиб (Ефес. 3:20). Онлар Јеһованын онларын үзәринә еһтијаҹларындан да чох бәрәкәт јағдырдығыны һисс едирләр (Мал. 3:10). Ҝөрүн бу баҹы-гардашлар бурадакы хидмәтләри барәдә өзләри нә дејир:

Бруно: «Мән Еквадорда хидмәтими һејрәтамиз Амазон чајы әразисиндә башладым. Даһа сонра Еквадор филиалынын ҝенишләндирилмәси ишиндә иштирак етдим. Һал-һазырда исә Бет-Елдә хидмәт едирәм. Һәлә Италијада јашајаркән Јеһоваја хидмәт етмәји һәјатымда биринҹи јерә гојмаг гәрарыны вердим вә О, һәгигәтән дә, мараглы, мүхтәлиф фәалијјәт нөвү илә зәнҝин олан һәјат сүрмәк арзуму ҝерчәкләшдирди».

Боу: «Инди мән өзүмү Јеһоваја даһа јахын һисс едирәм, чүнки Еквадорда бүтүн вахтымы руһани ишләрә һәср етмәк имканым вар. Ејни заманда мәнзәрәли јерләрә сәјаһәт етмәк арзум да ҝерчәкләшди. Бу да мәним үчүн бир хејир-дуадыр».

Анна: «Һеч вахт фикирләшмәздим ки, мәнә — субај баҹыја хүсуси тәјинатлы мүждәчиa һәјаты сүрмәк нәсиб олар. Анҹаг инди билирәм ки, бу мүмкүндүр. Мән чох хошбәхтәм ки, Јеһованын хејир-дуасы сајәсиндә шаҝирд һазырламаг ишиндә, Падшаһлыг залларынын тикинтисиндә иштирак едирәм вә јени инсанларла достлашырам».

Елке: «Вәтәним Австријада тез-тез Јеһоваја дуа едирдим ки, Мүгәддәс Китабы өјрәнмәк истәјән һеч олмаса бир нәфәр тапым. Бурада исә мән 15 нәфәрә Мүгәддәс Китабы өјрәдирәм! Һәгигәтдә инкишаф едән бу инсанларын ҝөзләриндәки севинҹи ҝөрмәк неҹә дә ҝөзәлдир!»

Ҹоел: «Јеһоваја хидмәт етмәк үчүн танымадығын бир јерә көчмәк артыг өзү бөјүк бир ишдир. Сән Она даһа чох етибар етмәји өјрәнирсән. Онун сәнин сәјләринә неҹә хејир-дуа вердијини ҝөрмәк дә чох руһландырыҹыдыр! Бирләшмиш Штатлардан ҝәлдијим илк илдә хидмәт етдијим групда тәблиғчиләрин сајы 6-дан 21-ә галхмышды. Хатирә ҝеҹәсиндә исә 110 нәфәр иштирак етмишди».

СӘНИН ГӘРАРЫН

Әзиз ҝәнҹ баҹы вә гардашлар, сизин шәраитиниз тәблиғчиләрә даһа чох еһтијаҹ олан өлкәләрдә хидмәт етмәјә имкан верирми? Әлбәттә, бу кими ҹидди гәрар вермәздән өнҹә һәр шеји јахшыҹа ҝөтүр-гој етмәк лазымдыр. Бундан әлавә, башга өлкәјә көчмәк үчүн ҝәрәк инсанын үрәјиндә Јеһоваја вә инсанлара ҝүҹлү мәһәббәт олсун. Әҝәр сәндә бу ҹүр мәһәббәт вә диҝәр хүсусијјәтләр варса, хариҹдә хидмәт етмәк барәдә Јеһоваја дурмадан дуа ет. Бундан башга, сән мәсиһчи валидејнләрин вә јығынҹағынын ағсаггаллары илә дә өз истәјин барәдә сөһбәт едә биләрсән. Үмидварыг ки, сән дә мүгәддәс хидмәтин бу севиндириҹи вә мәмнунедиҹи нөвүндә иштирак етмәк үчүн јарарлы олдуғун гәнаәтинә ҝәләҹәксән.

[Һашијә]

[3–ҹү сәһифәдәки јазы]

«Чохлу дуалардан вә јеткин баҹы-гардашларла сөһбәтләрдән сонра баша дүшдүм ки, Јеһова ҹанла-башла өзләрини Она тәгдим едән инсанлара хејир-дуа верир» Кајла (АБШ)

[6–ҹы сәһифәдәки чәрчивә/шәкил]

Хариҹдә хидмәт етмәк үчүн тәләбләр

• Дәриндән арашдырмалар апар вә мүнтәзәм шәкилдә шәхси өјрәнмә кечир

• «Бизим Падшаһлыг Хидмәтимиз» вәрәгәсинин 2011-ҹи ил август сајынын 4-дән 6-дәк сәһифәләрдәки мәлуматы нәзәрдән кечир

• Хариҹи өлкәдә хидмәт едән инсанларла сөһбәт ет

• Өлкәнин мәдәнијјәт вә тарихини арашдыр

• Дил курсларына ҝет

[6–ҹы сәһифәдәки чәрчивә/шәкил]

Хариҹдә хидмәт едәнләрин бәзиләри өзләрини тәмин етмәк үчүн...

• һәр ил бир нечә ај әрзиндә өз өлкәләриндә ишләјирләр

• евләрини вә ја бизнесләрини иҹарәјә верирләр

• Интернет васитәсилә ишләјирләр

[4, 5–ҹи сәһифәләрдәки шәкилләр]

1 Жаклин (Алманијадан)

2 Бруно (Италијадан)

3 Боу (Канададан)

4 Шабон (Ирландијадан)

5 Ҹоел (АБШ-дан)

6 Ҹонатан (АБШ-дан)

7 Анна (Естонијадан)

8 Елке (Австријадан)

9 Шантел (Канададан)

10 Инес (Австријадан)