«О ҝүнү вә о сааты билмирсиниз»

«Буна ҝөрә дә ојаг галын, чүнки о ҝүнү вә о сааты билмирсиниз» (МАТ. 25:13).

НЕҸӘ ҸАВАБ ВЕРӘРДИН?

О ҝүнү вә о сааты билмәмәјимизин бизә һансы хејри вар?

Мәсһ олунмуш мәсиһчиләр неҹә ојаг галыблар?

Мәсиһин ҝәлишинә һазыр олдуғумузу неҹә ҝөстәрә биләрик?

1-3. а) Һансы вәзијјәтләр Исанын чәкдији ики мәсәлин мәғзини баша дүшмәјә көмәк едир? б) Биз һансы суаллара ҹаваб тапмалыјыг?

ТӘСӘВВҮР ЕТ КИ, бир дөвләт мәмуру сәндән ону ваҹиб ҝөрүшә апармағыны хаһиш едир. Јола дүшмәјинә бир нечә дәгигә галмыш бирдән јанаҹаг чәниндә бензинин кифајәт гәдәр олмадығыны ҝөрүрсән. Јанаҹаг мәнтәгәсинә ҝедиб-гајыдана гәдәр мәлум олур ки, мәмур артыг ҝедиб: о тәләсирди вә сәни јериндә тапмајанда башгасындан ону ҝөрүшә чатдырмасыны хаһиш етди. Бу вәзијјәтдә өзүнү неҹә һисс едәрдин?

² Инди исә башга вәзијјәти тәсәввүр ет. Сән мәмурсан вә үч сәриштәли адама ваҹиб бир иш тапшырырсан. Вәзифәләрини баша салдыгдан сонра онларын үчү дә ҹанла-башла һәмин иши ҝөрмәјә разылашыр. Анҹаг бир мүддәтдән сонра гајыдыб ҝөрүрсән ки, онлардан јалныз икиси ишин өһдәсиндән ҝәлиб. Үчүнҹүсү исә өзүнә һагг газандырмаг үчүн мүхтәлиф бәһанәләр ҝәтирир, һалбуки әлини ағдан гараја белә вурмајыб. Бәс белә вәзијјәтдә нә һисс едәрдин?

³ Иса ағыллы вә ағылсыз гызлар, о ҹүмләдә талант мәсәлләриндә ејни вәзијјәтләри тәсвир етмишди. Һәр ики мәсәл сон ҝүнләрә аиддир вә бу мәсәлләрдә изаһ олунур ки, нәјә ҝөрә бәзи мәсһ олунмушлар сон ҝүнләрдә садиг вә ағыллы олаҹаг, диҝәрләри исә јохa (Мат. 25:1—30). Бу мәсәлләрин мәғзини вурғулајараг о деди: «Буна ҝөрә дә ојаг галын, чүнки о ҝүнү вә о сааты [јәни Исанын нә заман Шејтанын дүнјасы үзәриндә Јеһованын һөкмүнү иҹра етмәк үчүн ҝәләҹәји вахты] билмирсиниз» (Мат. 25:13). Бу ҝөстәришә биз дә әмәл етмәлијик. Исанын ојаг галмаг барәдә дедикләринә риајәт етмәк бизә һансы фајданы ҝәтирир? Кимләр ојаг галараг өзләрини хилас үчүн һазыр вәзијјәтдә сахлајырдылар? Вә ојаг галмаг үчүн биз индидән нә етмәлијик?

ОЈАГ ГАЛМАҒЫН ХЕЈРИ

4. Нәјә ҝөрә ојаг галмаг ҝөзүнү чәкмәдән саата бахмаг демәк дејил?

⁴ Бәзән дәгиг вахты билмәк ваҹибдир. Мәсәлән, әҝәр сән заводда ишләјирсәнсә, һәкимин гәбулуна јазылмысанса, јахуд гатар вә ја автобусла сәфәрә чыхмалысанса, ҝеҹикмәмәк үчүн вахта диггәт јетирмәлисән. Лакин јанғыны сөндүрәркән вә ја тәбии фәлакәтин нәтиҹәләрини арадан галдырылма ишләриндә иштирак едәркән бир дәгигәдән бир саата бахмаг инсаны әлиндәки ишиндән јајындыра, ән пис һалда исә тәһлүкәли вәзијјәт јарада биләр. Белә вәзијјәтләрдә диггәти ишә ҹәмләмәк саата бахмагдан даһа өнәмлидир. Һәр өтән ҝүн бизи бу дүнјанын сонуна даһа да јахынлашдырыр, буна ҝөрә дә Јеһованын бизә тапшырдығы иш — инсанлара ниҹат јолуну ҝөстәрмәк иши һәлә һеч вахт бу гәдәр ваҹиб олмајыб. Биз мәсиһчиләрин ојаг галмасы ҝөзүмүзү саатдан чәкмәмәк демәк дејил. Биз сонун нә заман ҝәләҹәјини дәгиг билмирик. Ҝәлин ҝөрәк о ҝүнү вә о сааты билмәмәјимизин бизә һансы беш фајдасы вар.

5. О ҝүнү вә о сааты билмәмәјимиз үрәјимиздә оланлары неҹә үзә чыхардыр?

⁵ Биринҹиси, сонун нә заман ҝәләҹәјини билмәмәјимиз үрәјимиздә оланлары үзә чыхардыр. Биз ирадә азадлығымыздан Она олан сәдагәтимизи ҝөстәрмәк үчүн истифадә едә биләрик. Јеһованын буна јол вермәси Онун бизә һөрмәт етдијини ҝөстәрир. Дүздүр, бу дүнјанын сонуну сәбирсизликлә ҝөзләјирик, лакин биз сағ галмаг истәдијимиз үчүн јох, Јеһованы севдијимиз үчүн Она хидмәт едирик. (Мәзмур 37:4 ајәсини оху.) Онун ирадәсини јеринә јетирмәк бизә зөвг верир вә биз дәрк едирик ки, Аллаһын тәлимләри бизим хејримиз үчүндүр (Јешаја 48:17). Биз Онун әмрләрини ағыр һесаб етмирик (1 Јәһ. 5:3).

6. Јеһоваја мәһәббәтдән ирәли ҝәләрәк хидмәт едәндә О, нә һисс едир вә нәјә ҝөрә?

⁶ О ҝүнү вә о сааты билмәмәјимизин икинҹи хејри одур ки, бу, бизә Јеһованын үрәјини севиндирмәк имканы верир. Јеһоваја сырф мүкафат алмаг хатиринә вә ја сонун тарихини билдијимиз үчүн јох, мәһәббәтдән ирәли ҝәләрәк хидмәт едәндә дүшмәни олан Шејтанын әсассыз иттиһамларына ҹаваб вермәк үчүн Онун әлинә фүрсәт дүшүр (Әјј. 2:4, 5; Сүлејманын мәсәлләри 27:11 ајәсини оху). Иблисин бизә чәкдирдији бүтүн ағры вә аҹылары ҝөрәрәк биз онун пис рәһбәрлијини рәдд едир вә севинҹлә Јеһованын али һөкмранлығынын тәрәфини тутуруг.

7. Сәнҹә, нәјә ҝөрә биз фәдакар һәјат сүрмәлијик?

⁷ Үчүнҹүсү, конкрет тарихи билмәмәјимиз бизи фәдакар һәјат сүрмәјә тәшвиг едир. Аллаһы танымајан бәзи инсанлар да дәрк едирләр ки, дүнјадакы вәзијјәт чох чәкән дејил. Үзәрләринә ҝәлән намәлум фәлакәтдән горхан бу адамлар «ҝәлин јејиб-ичәк, чүнки сабаһ өләҹәјик» принсипи илә јашајырлар (1 Кор. 15:32). Лакин биз горхмуруг. Биз худбин арзуларымызы тәмин етмәк үчүн өзүмүзү башгаларындан тәҹрид етмирик (Сүл. мәс. 18:1). Әксинә, өзүмүзү инкар едир вә вахтымызы, ҝүҹүмүзү, еләҹә дә вәсаитләримизи Аллаһын Падшаһлығы һагда хош хәбәри башгалары илә бөлүшмәјә сәрф едирик. (Матта 16:24 ајәсини оху.) Биз Аллаһа хидмәт етмәкдән, әләлхүсус башгаларына Ону танымаға көмәк етмәкдән севинҹ дујуруг.

8. Һансы Мүгәддәс Китаб нүмунәси бизим Јеһоваја вә Онун Кәламына даһа чох ҝүвәнмәли олдуғумузун сәбәбини ҝөстәрир?

⁸ О ҝүнү вә о сааты билмәмәјимизин дөрдүнҹү фајдасы одур ки, бу, бизә даһа чох Јеһоваја ҝүвәнмәјә вә Онун Кәламындакы мәсләһәтләри даһа јахшы тәтбиг етмәјә көмәк едир. Гејри-камил инсанлара өзләринә ҝүвәнмәк мејили хасдыр. Павел бүтүн мәсиһчиләрә нәсиһәт едирди: «Мөһкәм дајандығыны дүшүнән адам еһтијатлы олсун ки, јыхылмасын». Јешуанын рәһбәрлији алтында олан Аллаһын халгынын Вәд едилмиш дијара дахил олмасына аз вахт галмыш ијирми үч мин инсан Аллаһын лүтфүндән мәһрум олду. Павел јазыр: «Бүтүн бунлар ибрәт кими онларын башына ҝәлди вә дөврләрин сонунда јашајан бизләри горумаг мәгсәдилә јазылыб» (1 Кор. 10:8, 11, 12).

9. Сынаглар иманымызы неҹә тәмизләјә вә Аллаһа неҹә јахынлашдыра биләр?

⁹ Сонун нә заман ҝәләҹәјини билмәмәјимизин бешинҹи фајдасы одур ки, бу мүддәт әрзиндә үзләшдијимиз сынаглар иманымызы сафлашдырыр. (Мәзмур 119:71 ајәсини оху.) Һәгигәтән дә, јашадығымыз бу ахыр ҝүнләр «сон дәрәҹә ағыр»дыр (2 Тим. 3:1—5). Шејтан дүнјасында јашајан бир чох инсанлар бизә нифрәт етдији үчүн иманымыза ҝөрә бәзән тәгибләрә мәруз галырыг (Јәһ. 15:19; 16:2). Әҝәр сынаглар заманы өзүмүзү тәвазөкар апарыр вә Аллаһын рәһбәрлијини ахтарырыгса, иманымыз сафлашаҹаг, санки, оддан кечмиш кими олаҹаг. Биз хидмәтимизә сон гојмајаҹағыг. Әксинә, Јеһоваја дүшүндүјүмүздән дә јахын олаҹағыг (Јаг. 1:2—4; 4:8).

10. Вахт нә заман бир ҝөз гырпымында ҝәлиб кечир?

¹⁰ Вахт ја тез, ја да ҝеҹ кечә биләр. Башымыз ишә гарышанда вә һәр дәгигәдән бир саата бахмајанда вахт, санки, учур. Ејнилә, әҝәр Јеһованын тапшырдығы мараглы ишлә мәшғул олсаг, вахт бир ҝөз гырпымында кечәр вә биз о ҝүнүн вә о саатын неҹә ҝәлдијини һисс етмәрик. Мәсһ олунмуш мәсиһчиләрин әксәријјәти бу саһәдә бизә ҝөзәл нүмунә гојуб. Ҝәлин Исанын 1914-ҹү илдә тахта чыхмасындан сонра баш вермиш һадисәләрә гысаҹа нәзәр салаг вә ҝөрәк бәзиләринин бу ҝүнә һазыр олдуглары, диҝәрләринин исә һазыр олмадыглары нәдән бәлли иди.

ҺАЗЫР ОЛАН МӘСҺ ОЛУНМУШЛАР

11. Нәјә ҝөрә 1914-ҹү илдән сонра бәзи мәсһ олунмушлар Ағанын јубандығыны дүшүнүрдүләр?

¹¹ Ҝәлин Исанын гызлар вә талантлар мәсәлләринә јенидән гајыдаг. Әҝәр гызлар бәјин, гуллар исә ағанын ҝәләҹәји вахты билсәјдиләр, ојаг галмаларына еһтијаҹ олардымы? Хејр. Мәһз елә буна ҝөрә дә онлар ојаг галмалы идиләр. Мәсһ олунмуш мәсиһчиләр 1914-ҹү или мүһүм тарих һесаб етсәләр дә, о заман нә баш верәҹәјини дәгиг анламырдылар. Һадисәләр ҝөзләдикләри кими ҹәрәјан етмәјәндә онлара елә ҝәлә биләрди ки, Бәј ҝеҹикир. Бир гардаш хатырлајыр: «Бәзиләримиз [1914-ҹү илин] октјабр ајынын илк һәфтәсиндә ҝөјә ҝедәҹәјимизә там әмин идик».

12. Мәсһ олунмуш мәсиһчиләр садиг вә ағыллы олдугларыны неҹә ҝөстәрдиләр?

¹² Тәсәввүр едирсән, сону ҝөзләмәк вә ҝөзләдијин вахтда онун ҝәлмәдијини ҝөрмәк неҹә дә аҹынаҹаглыдыр?! Һәмин гардашлар бу, еләҹә дә Биринҹи Дүнја мүһарибәси уҹбатындан јаранан диҝәр сынагларла да үзләшмишдиләр. Демәк олар ки, фәалијјәтсизлик дөврү башлады, онлар, санки, јухуја ҝетмишдиләр. Анҹаг 1919-ҹу илдә «ојанмаг» чағырышы сәсләнди! Иса Аллаһын руһани мәбәдинә ҝәлди вә јохлама вахты башлады. Бу јохламадан кечмәјән мәсһ олунмушлар Падшаһын ишини давам етдирмәк шәрәфиндән мәһрум олдулар (Мат. 25:16). Ағылсыз гызлар кими, онлар чырагларыны руһани јағла долдурмаг ишинә сәһләнкар јанашдылар. Вә тәнбәл гул кими, онлар да Падшаһлыг наминә гурбанлар вермәк истәмәдиләр. Анҹаг мәсһ олунмуш мәсиһчиләрин әксәријјәти һәтта мүһарибәнин ән кешмәкешли илләриндә белә Ағаларына там садиг олдугларыны вә она хидмәт етмәк арзусу илә алышыб-јандыгларыны ҝөстәрдиләр.

13. Мәсһ олунмуш мәсиһчиләрин 1914-ҹү илдән сонра әһвал-руһијјәләри неҹә иди вә инди неҹәдир?

¹³ «Ҝөзәтчи гүлләси»ндә 1914-ҹү илдән сонра бу ваҹиб бәјанат чап едилмишди: «Гардашлар, Аллаһла мүнасибәтләрини дүзҝүн гуранлар һеч вахт мәјус олмајаҹаглар. Биз өз ирадәмизин јеринә јетмәси үчүн чалышмырдыг; бу сәбәбдән 1914-ҹү илин октјабр ајы илә бағлы олан үмидләримиз пуча чыханда биз шад идик ки, Ағамыз бизә ҝөрә Өз планларыны дәјишмәди. Истәдијимиз бу дејилди. Биз садәҹә Онун нијјәтини дәрк етмәјә ҹан атырдыг». Тәвазөкарлыг вә сәдагәт бу ҝүн дә Ағанын мәсһ олунмушларына хас олан хүсусијјәтләрдир. Бу гардашлар Аллаһдан илһам алдыгларыны иддиа етмирләр; онлар садәҹә Ағанын јер үзүндә онлара һәвалә етдији иши иҹра етмәк истәјирләр. Диҝәр гојунлардан ибарәт олан бөјүк издиһам, јәни јер үзүндә јашамаг үмидинә малик олан мәсиһчиләр онлар кими ајыг-сајыг вә сәјлидирләр (Вәһј 7:9; Јәһ. 10:16).

БИЗ ҺАЗЫР ОЛДУҒУМУЗУ ҜӨСТӘРИРИК

14. Руһани гида пајламаг үчүн Аллаһын тәјин етдији садиг вә ағыллы нөкәр синфинә мөһкәм бағланмаг бизи неҹә горујур?

¹⁴ Мәсһ олунмуш мәсиһчиләр кими, бөјүк издиһамын ајыг-сајыг үзвләри руһани гида пајламаг үчүн Аллаһын тәјин етдији садиг вә ағыллы нөкәр синфинә мөһкәм бағланыблар. Нәтиҹәдә, онлар да Аллаһын Кәламы вә руһу сајәсиндә руһани јағ еһтијатларыны даима тәзәләјирләр. (Мәзмур 119:130; Јәһја 16:13 ајәләрини оху.) Мөһкәмләндирилмәләри сајәсиндә онлар да һәтта ән шиддәтли сынаглара тәһәммүл едәрәк өзләрини Мәсиһин ҝәлишинә һазыр вәзијјәтдә сахлаја биләрләр. Мәсәлән, фашистләрин һәбс дүшәрҝәләринин бириндә гардашларын илк әввәл јалныз бир Мүгәддәс Китабы варды вә онлар Аллаһдан хаһиш едирдиләр ки, онлара јенә дә руһани гида версин. Гыса мүддәт сонра онлар хәбәр тутдулар ки, дүшәрҝәјә тәзә ҝәлән гардаш протез ајағынын ичиндә «Ҝөзәтчи гүлләси»нин јени сајларыны дүшәрҝәјә кечирмәјә мүвәффәг олду. Сағ галан мәсиһчиләрин арасында Ернст Вауер адлы мәсһ олунмуш гардаш вар иди. Сонрадан о демишди: «Јеһова мөҹүзәви шәкилдә мәгаләләрдәки мөһкәмләндириҹи фикирләри јадымызда сахламаға көмәк едирди... Индики дөврдә руһани гида әлдә етмәк чох асандыр! Бәс биз буну һәмишә гијмәтләндиририк? Мән әминәм ки, Јеһова Она ҝүвәнән, Она садиг галан вә Онун сүфрәсиндән гидаланан һәр бир инсан үчүн бол хејир-дуалар һазырлајыб».

15, 16. Бир ҹүтлүјүн хидмәтдә ҝөстәрдији сәј неҹә мүкафатландырылды вә сән бу кими нүмунәләрдән өзүн үчүн һансы ибрәт дәрси ҝөтүрдүн?

¹⁵ Бөјүк издиһамын үзвләри дә мәсиһчи гардашларыны там шәкилдә дәстәкләјәрәк Ағанын ишиндә фәал иштирак едирләр (Мат. 25:40). Исанын мәсәлиндәки пис вә тәнбәл гулдан фәргли олараг, онлар лазым ҝәлдикдә нәдәнсә кечмәјә һазырдырлар вә Падшаһлығын марагларыны һәјатларында биринҹи јерә гојурлар. Мисал үчүн, Ҹон вә Масако Кенијада чинлиләрә көмәк етмәк үчүн дәвәт аланда тәрәддүд ичиндә идиләр. Анҹаг дуа едиб вәзијјәтләрини ҝөтүр-гој етдикдән сонра ораја көчмәк гәрарыны вердиләр.

¹⁶ Онлар сәјләринә ҝөрә бол-бол мүкафат алдылар. Онлар дејирләр: «Бурада хидмәт етмәк әладыр». Бу әр-арвад једди нәфәрә Мүгәддәс Китабы өјрәтмәјә башлады. Бунун ардынҹа чохлу мараглы һадисәләр баш верди. Сонда онлар дејирләр: «Бизә бура ҝәлмәјә иҹазә вердији үчүн һәр ҝүн Јеһоваја тәшәккүр едирик». Шүбһәсиз ки, сонун нә заман ҝәләҹәјиндән асылы олмајараг, гәрарларында Јеһоваја фәал шәкилдә хидмәт етмәк гәтијјәтләри әкс олунан баҹы-гардашлар чохдур. Ҝилеад Мәктәбини битирән минләрлә һәмиманлыларымыз барәдә фикирләш. Хидмәтин бу хүсуси нөвүнүн нә олдуғуну анламаг үчүн нәјә ҝөрә «Ҝөзәтчи гүлләси»нин 2001-ҹи ил 15 октјабр сајында чыхан «Биз әлимиздән ҝәләни едирик!» мәгаләсинә (рус.) бахмајасан? Хүсуси тәјинатлы мүждәчиләрин ҝүндәлик һәјатындан бәһс едән бу мараглы мәгаләни охујанда Јеһоваја даһа чох хидмәт етмәк барәдә фикирләш. Бу, Аллаһымыза иззәт, сәнә исә севинҹ ҝәтирәҹәк!

СӘН ДӘ ОЈАГ ДУР

17. О ҝүнү вә о сааты билмәмәјимиз бизим үчүн һансы мәнада хејир-дуадыр?

¹⁷ Ајдындыр ки, бу системин сонунун нә заман ҝәләҹәјини дәгиг билмәмәјимиз әсил хејир-дуадыр. Биз нә руһдан дүшүр, нә дә мәјус олуруг. Чүнки бу, бизә севән Ата олан Јеһова Аллаһын ирадәсини јеринә јетирмәклә мәшғул олмаға вә Она јахынлашмаға көмәк едиб. Хышдан бәрк-бәрк јапышдығымыз вә бизи јајындыра биләҹәк шејләрдән узаг дурдуғумуз үчүн Ағамыза хидмәтдән бөјүк севинҹ әлдә етмишик (Лука 9:62).

18. Нәјә ҝөрә биз иманда мөһкәм галмаг истәјирик?

¹⁸ Биз Аллаһын һөкм ҝүнүнүн сүрәтлә јахынлашдығы бир дөврдә јашајырыг. Бизләрдән һеч кәс Јеһованы вә Исаны наүмид етмәк истәмир. Онлар бизә бу ахыр ҝүнләрдә хидмәт етмәк шәрәфини һәвалә едибләр. Онларын бизә етибар етмәсини јүксәк гијмәтләндиририк. (1 Тимотејә 1:12 ајәсини оху.)

19. Јеһованын ҝүнүнә неҹә һазыр ола биләрик?

¹⁹ Јердә гурулаҹаг Ҹәннәтдә вә ја ҝөјдә јашамаг үмидимиздән асылы олмајараг, ҝәлин Аллаһын бизә вердији тәблиғ етмәк вә шаҝирд һазырламаг тапшырығыны сәдагәтлә јеринә јетирмәк нијјәтимиздә гәтијјәтли олаг. Биз һәлә дә Јеһованын ҝүнүнүн дәгиг вахтыны билмирик. Үмумијјәтлә, буна еһтијаҹ вармы? Биз бундан сонра да Јеһованын ҝүнүнә һазыр олаҹағыг вә буну етмәк бизим әлимиздәдир (Мат. 24:36, 44). Нә гәдәр ки Јеһоваја там етибар едир вә Онун Падшаһлығыны һәјатымызда биринҹи јерә гојуруг, үмидләримизин пуча чыхмајаҹағына әмин ола биләрик (Ром. 10:11).

[Һашијә]

[26–ҹы сәһифәдәки шәкил]

Һәтта ән чәтин сынаглар заманы руһани гида ахтар

[27–ҹи сәһифәдәки шәкил]

Диггәтимизи мәсиһчи фәалијјәтинә ҹәмләјәндә вахт тез өтүб кечир