Јеһова хошбәхт халгыны топлајыр
«Халгын киши, гадын вә ушагларыны, һәмчинин шәһәриниздә јашајан јаделлиләри топлајын» (ГАНУН. Т. 31:12).
НЕҸӘ ҸАВАБ ВЕРӘРДИНИЗ?
Һансы нүмунәләр ҝөстәрир ки, бөјүк јығынҹаглар Јеһованын халгынын тарихиндә әвәзсиз рол ојнајыр?
Гәдимдә бир чох исраиллиләр Јерусәлимдәки бајрамларда иштирак етмәк үчүн һансы гурбанлары верирдиләр?
Нәјә ҝөрә конгресләри бурахмамалыјыг?
1, 2. Бу мәгаләдән конгресләр барәдә нә өјрәнәҹәјик?
ӘКСӘРИЈЈӘТИМИЗ һәгигәтдә ҝөз ачандан бәри бејнәлхалг вә вилајәт конгресләри Јеһованын Шаһидләри олан бизләрин мүасир тарихинин ајрылмаз һиссәси иди. Чохларымыз бу севиндириҹи ҝөрүшләрин бир нечәсиндә иштирак етмишик вә ола билсин, Јеһоваја хидмәт етдијимиз узун мүддәт әрзиндә артыг онларын сајыны итирмишик.
2 Гәдим заманларда да Аллаһын халгы бөјүк мүгәддәс јығынҹаглар кечирирди. Инди биз Мүгәддәс Јазыларда гејд олунан һәмин јығынҹаглара гысаҹа нәзәр салаҹаг, онларла мүасир конгресләр арасындакы үмуми ҹәһәтләрә диггәт јетирәҹәк, еләҹә дә конгресләрдә иштирак етмәјин нәјә ҝөрә фајдалы олдуғуну мүзакирә едәҹәјик (Мәз. 44:1; Ром. 15:4).
ТАРИХИ КОНГРЕСЛӘР — ГӘДИМ ВӘ МҮАСИР ДӨВРДӘ
3. а) Мүгәддәс Јазыларда хатырланан Аллаһын халгынын илк бөјүк јығынҹағы нә илә јадда галды? б) Исраиллиләри бир араја јығмаг үчүн Јеһова Мусаја нә тапшырмышды?
3 Мүгәддәс Јазылара әсасән, Аллаһын халгынын илк бөјүк јығынҹағы Сина дағынын әтәјиндәки јығынҹаг иди. Руһани тәлим вермәк мәгсәдилә тәшкил олунан һәмин ҝөрүш, һәгигәтән дә, тәмиз ибадәтин тарихиндә дөнүш нөгтәси олмушду. Иштиракчыларын јаддашында унудулмаз из бурахан бу һәјәҹанландырыҹы јығынҹаг заманы Јеһова исраиллиләрә Ганун верди вә Өз ҝүҹүнү нүмајиш етдирди (Чых. 19:2—9, 16—19; Чыхыш 20:18; Ганунун тәкрары 4:9, 10 ајәләрини оху). Бу һадисә Аллаһын Исраил халгы илә мүнасибәтиндә јени сәһифә ачды. Бундан чох кечмәмиш Јеһова Мусаја халгы бир јерә јығмаг үчүн ҝүмүшдән ики кәрәнај дүзәлтмәји тапшырды. Кәрәнајлар чалынанда бүтүн иҹма Һүзур чадырынын ҝиришинә топлашмалы иди (Сај. 10:1—4). Бу јығынҹаглар заманы халгын арасында һөкм сүрән севинҹ вә һәјәҹаны тәсәввүр етмәјә чалышын!
4, 5. Нәјә ҝөрә Мусанын вә Јешуанын кечирдији бөјүк јығынҹаглар хүсуси әһәмијјәт кәсб едирди?
4 Исраиллиләрин сәһрадакы 40 иллик сәјаһәтинин сонуна јахын, јени халгын тарихинин мүһүм анында Муса сојдашларыны јенә дә бир араја јығды. Тезликлә халг Вәд едилмиш дијара дахил олаҹагды. Бу, Мусанын исраиллиләрә Јеһованын кечмишдә онлара етдији, еләҹә дә ҝәләҹәкдә едәҹәји бүтүн шејләри хатырлатмасы үчүн әлверишли вахт иди (Ганун. т. 29:1—15; 30:15—20; 31:30).
5 Јәгин, һәмин бөјүк јығынҹаг заманы Муса билдирмишди ки, Јеһова халга тәлим вермәк үчүн һәмишә онлары бир араја топлајаҹаг. Һәр једди илдән бир Чардаглар бајрамында кишиләр, гадынлар, ушаглар вә Исраилдә јашајан јаделлиләр Аллаһын сечәҹәји јерә топлашмалы идиләр. Бунун мәгсәди барәдә Мүгәддәс Китабда охујуруг: «Гој һамы ешидиб өјрәнсин вә Аллаһыныз Рәбдән горхуб ганунун бүтүн сөзләринә диггәтлә әмәл етсин». (Ганунун тәкрары 31:1, 10—12 ајәләрини оху.) Беләликлә, Аллаһын халгынын тарихинин еркән чағларындан бәлли иди ки, онлар Јеһованын кәламларыны вә нијјәтләрини өјрәнмәк үчүн тез-тез бир араја топлашмалы идиләр. Исраиллиләр Вәд едилмиш дијары зәбт етдикдән сонра онларын әтрафында һәлә дә бүтпәрәст халглар јашајырды. Бу заман Јешуа халгын Јеһоваја садиг галмаг әзмини мөһкәмләндирмәк үчүн онларын һамысыны бир јерә јығды. Халг да Аллаһа хидмәт едәҹәјинә анд ичди (Јешуа 23:1, 2; 24:1, 15, 21—24).
6, 7. Мүасир дөврдә һансы тарихи конгресләр кечирилиб?
6 Јеһованын халгынын мүасир тарихиндә дә теократик фәалијјәтимиздә едилән дәјишикликләрлә, еләҹә дә Мүгәддәс Китаб ајәләринин дәгигләшдирилмиш изаһатлары илә јадда галан бөјүк вә мүһүм јығынҹаглар, јәни конгресләр кечирилиб (Сүл. мәс. 4:18). Биринҹи Дүнја мүһарибәсиндән сонра Мүгәддәс Китаб Тәдгигатчыларынын илк бөјүк конгреси 1919-ҹу илдә, АБШ-ын Оһајо штатынын Сидар-Поинт шәһәриндә баш тутмушду. 7000 нәфәр иштиракчысы олан бу конгрес үмумдүнја тәблиғ кампанијасына тәкан вермәси илә јадда галыб. 1922-ҹи илдә ејни мәканда кечирилән доггузҝүнлүк конгрес заманы Ҹозеф Рутерфорд гардаш тәсирли нитглә чыхыш едәрәк диггәтли динләјиҹиләрини Бөјүк Бабил дармадағын олунана гәдәр һәр јердә дурмадан тәблиғ етмәјә сәсләмишди. О демишди: «Ағамызын садиг вә һәгиги шаһиди олун. Бабил јерлә јексан олунана гәдәр мүбаризәни дајандырмајын. Хош хәбәри јахын вә узаг елләрдә бәјан един. Бүтүн дүнја билмәлидир ки, Јеһова Аллаһдыр, Иса Мәсиһ исә падшаһларын Падшаһы вә ағаларын Ағасыдыр. Бу, тарихдә ән мүһүм ҝүндүр. Будур! Падшаһ артыг һөкмранлыг едир! Сиз онун ҹарчыларысыныз. Буна ҝөрә дә Падшаһы вә онун Падшаһлығыны елан един, елан един, елан един». Конгрес нүмајәндәләри вә үмумиликдә Аллаһын халгы бу чағырыша севинҹлә һај верди.
7 АБШ-ын Оһајо штатынын Колумбус шәһәриндә 1931-ҹи илдә кечирдикләри конгресдә Мүгәддәс Китаб Тәдгигатчылары ҹан-дилдән Јеһованын Шаһидләри адыны гәбул етдиләр. 1935-ҹи илдә Вашингтонда Рутерфорд гардаш «Вәһј» китабында тәсвир олунан «тахтын вә Гузунун гаршысында» дуран бөјүк издиһамын ким олдуғуну ачыглады (Вәһј 7:9—17). 1942-ҹи илдә, Икинҹи Дүнја Мүһарибәсинин ән гызғын чағында Нејтан Норр «Сүлһ чох сүрәҹәкми?» адлы мөһтәшәм нитг сөјләди. Нитгиндә о, «Вәһј» китабынын 17-ҹи фәслиндә бәһс едилән ал-гырмызы вәһши һејванын кимлијини ачыглады вә мүһарибә битәндә тәблиғ ишинин ҝениш вүсәт алаҹағыны гејд етди.
8, 9. Бәзи конгресләри хүсусилә тәсирли едән нәдир?
8 Оһајо штатынын Кливленд шәһәриндә 1946-ҹы илдә кечирилән «Хошбәхт халглар» адлы теократик конгресдә Норр гардашын «Јенидәнгурма вә ҝенишләндирмә ишинин чәтинликләри» адлы нитги динләјиҹиләрин диггәтини ҹәлб етди. Һәмин конгресдә иштирак едән бир гардаш бу нитгин динләјиҹиләрә неҹә тәсир бағышладығы барәдә јазмышды: «Нитг заманы мән сәһнәдә идим. Гардаш Бруклиндәки ишин ҝедишаты вә Бет-Елин јашајыш биналарыны вә чапхананы ҝенишләндирмәк планлары барәдә данышанда сајсыз-һесабсыз динләјиҹиләрдән даһа ҝурултулу алгышлар ҝәлди. Сәһнәдән онларын үзләри ҝөрүнмәсә дә, севинҹләрини дујмаг мүмкүн иди». 1950-ҹи илдә Нју–Јорк шәһәриндә кечирилән бејнәлхалг конгресин иштиракчылары Јунанҹа Мүгәддәс Јазыларын «Јени Дүнја тәрҹүмәси»ни аланда севинҹләриндән јерә-ҝөјә сығмырдылар. Бу, Аллаһын адынын орижинал мәтнә әсасән бәрпа едилдији илк мүасир тәрҹүмә иди (Јер. 16:21, ЈД).
9 Тәгибләрдән вә гадағалардан сонра Јеһованын Өз садиг Шаһидләрини топладығы конгресләр дә иштиракчылара бөјүк тәсир бағышламышды. Адолф Һитлер анд ичмишди ки, Алманијада Јеһованын Шаһидләринин көкүнү кәсәҹәк, лакин вахтилә һәрби парадларын кечирилдији Нүрнберг шәһәриндә 1955-ҹи илдә конгресдә 107 000 нәфәр иштирак етмишди. Иштиракчыларын бир чоху севинҹ ҝөз јашларыны сахлаја билмәјиб ағламышдылар! 1989-ҹу илдә Полшада кечирилән «Аллаһа сәдагәт» адлы үч конгресдә 166 518 нәфәр иштирак етмишди. Онларын арасында кечмиш Совет Иттифагындан, Чехословакијадан, еләҹә дә Шәрги Авропанын диҝәр өлкәләриндән дәвәт олунан чохлу нүмајәндәләр вар иди. Бәзиләри һәјатларында илк дәфә иди ки, 15 вә ја 20 нәфәрдән чох Аллаһын хидмәтчисинин топлашдығы ҝөрүшдә иштирак едирди. 1993-ҹү илдә Украјнанын Кијев шәһәриндә кечирилән «Илаһи тәлим» адлы бејнәлхалг конгресдә 7402 нәфәр вәфтиз олунду. Јеһованын Шаһидләринин тарихиндә вәфтиз олунанларын ән јүксәк сајы илә јадда галан бу конгресдә јашанан севинҹи тәсәввүр етмәјә чалышын (Јешаја 60:22; Һаг. 2:7).
10. Һансы конгресләр сизин үчүн хүсусилә јаддагалан олуб вә нәјә ҝөрә?
10 Ола билсин, һансыса вилајәт вә ја бејнәлхалг конгрес јаддашынызда хүсусилә һәкк олунуб. Илк дәфә иштирак етдијиниз вә ја вәфтиз олундуғунуз конгреси хатырлајырсыныз? Бу конгресләр руһани фәалијјәтиниздә дөнүш нөгтәси олуб. Бу хатирәләри дәјәрләндирин! (Мәз. 42:4).
БИЗӘ ҺӘР ЗАМАН СЕВИНҸ БӘХШ ЕДӘН ТӘДБИРЛӘР
11. Аллаһ гәдим Исраилдә һансы иллик бајрамлары тәсис етмишди?
11 Јеһова исраиллиләрә илдә үч дәфә Јерусәлимдә кечирилән бајрамлара — Мајасыз чөрәк бајрамына, Һәфтәләр бајрамына (сонрадан Әллинҹи ҝүн бајрамы адландырылды) вә Чардаглар бајрамына ҝәлмәји тапшырмышды. Бу бајрамларла әлагәдар Јеһова әмр етмишди: «Илдә үч дәфә сизин бүтүн кишиләриниз Саһибләри Рәббин һүзуруна ҝәлсинләр» (Чых. 23:14—17). Бу бајрамларын руһани дәјәрини дәрк едән бир чох аилә башчылары өз аиләләрини дә бу тәдбирләрә апарырдылар (1 Шам. 1:1—7; Лука 2:41, 42).
12, 13. Бир чох исраиллиләр үчүн Јерусәлимдә кечирилән иллик бајрамлара ҝетмәк нә демәк иди?
12 Исраиллиләрин аиләликҹә Јерусәлимә сәјаһәт етмәләринин нә демәк олдуғуну тәсәввүр етмәјә чалышаг. Мәсәлән, Јусифлә Мәрјәм Назаретдән Јерусәлимә ҝетмәк үчүн 100 километр мәсафәни гәт етмәли идиләр. Сизҹә, балаҹа ушагларла бирликдә бу јолу нә гәдәр вахта ҝетмәк олар? Исанын ушаг икән Јерусәлимә сәфәр етмәсиндән бәһс едән Мүгәддәс Китаб парчасы ҝөстәрир ки, гоһумлар вә танышлар, адәтән, бирҝә јола дүшүрдүләр. Бирҝә јол ҝетмәјин, јемәк биширмәјин вә танымадыглары јердә ҝеҹәләмәк үчүн мүнасиб јер ахтармағын нә демәк олдуғуну тәсәввүр етмәјә чалышын. Бунунла белә, Иса кими 12 јашлы ушаға сәрбәстлик вермәк үчүн шәраит кифајәт гәдәр тәһлүкәсиз иди. Јәгин ки, белә сәфәрләр һамынын, хүсусилә дә ушагларын јаддашында силинмәз из гојурду (Лука 2:44—46).
13 Вәтәнләриндән кәнарда јашајан исраиллиләрин сајы артанда артыг бајрамлара мүхтәлиф өлкәләрдән инсанлар ҝәлирди. Ерамызын 33-ҹү илиндә Јерусәлимдә кечирилән Әллинҹи ҝүн бајрамына ахышан јәһудиләр вә прозелитләр Италија, Ливија, Крит, Кичик Асија вә Месопотамија кими јерләрдән ҝәлмишдиләр (Һәв. иш. 2:5—11; 20:16).
14. Иллик бајрамларда иштирак етмәк исраиллиләрә һансы фајданы ҝәтирирди?
14 Садиг исраиллиләр үчүн бу сәфәрләрин әсас мәғзи онлар кими Јеһованы севән минләрлә диндашлары илә бирҝә Она ибадәт етмәкдән ибарәт иди. Бәс бу бајрамлар иштиракчылара неҹә тәсир едирди? Ҹавабы Јеһованын Чардаглар бајрамы илә әлагәдар халгына вердији ҝөстәришиндә тапмаг олар: «Сиз, оғулларыныз, гызларыныз, гулларыныз, гарабашларыныз, шәһәрләриниздә јашајан Левилиләр, гәрибләр, јетимләр вә дул гадынларла бирликдә севинәҹәксиниз. Аллаһыныз Рәббин сечәҹәји јердә Рәбб үчүн једди ҝүн бу бајрамы кечирин, чүнки Аллаһыныз Рәбб бүтүн мәһсулларыныза, әлләринизин һәр ишинә хејир-дуа вериб вә сиз там севинҹ ичиндә јашајаҹагсыныз» (Ганун. т. 16:14, 15; Матта 5:3 ајәсини оху).
НӘЈӘ ҜӨРӘ МҮАСИР КОНГРЕСЛӘРИ ГИЈМӘТЛӘНДИРМӘЛИЈИК?
15, 16. Конгресләрдә иштирак етмәк үчүн сиз нәләрдән кечмәли олмусунуз? Нәјә ҝөрә ҝөстәрдијиниз сәј буна дәјәрди?
15 Арашдырдығымыз гәдим бөјүк јығынҹаглар Аллаһын мүасир халгы үчүн неҹә дә ҝөзәл нүмунәдир! Әсрләр әрзиндә онларын кечирилмәсиндә хејли дәјишикликләр едилсә дә, әсас ҹәһәтләри олдуғу кими галыб. Гәдим заманларда олдуғу кими, бизим ҝүнләрдә дә бу ҝөрүшләрдә иштирак етмәк үчүн мүәјјән гурбанлар вермәк лазым ҝәлир. Лакин һәмин ҝөрүшләрин ҝәтирдији фајда буна дәјәр. Бөјүк јығынҹаглар, әввәлләр олдуғу кими, елә инди дә ибадәтимиздә чох мүһүм рол ојнајыр. Бу ҝөрүшләрдә Аллаһла сых мүнасибәтләримизи горумаға көмәк едән мәлумат вә изаһатлар тәгдим едилир. Конгресләр бизә проблемләрдән гачмаға көмәк едир, еләҹә дә өјрәндикләримизи тәтбиг етмәјә вә диггәтимизи јүк олмајан, әксинә, бизә тәравәт ҝәтирән мәшғулијјәтләрә ҹәмләмәјә тәшвиг едир (Мәз. 122:1—4).
16 Конгрес заманы иштиракчылар арасында севинҹ һөкм сүрүр. 1946-ҹы илдә кечирилән бир конгресин һесабатында гејд олунурду: «Минләрлә шаһидләрин раһат јерләшдирилдијини мүшаһидә етмәк, һәгигәтән дә, севиндириҹи иди. Лакин оркестрин сәдалары алтында бу бөјүк издиһамын Јеһованын шәрәфинә ифа етдији ҝөзәл нәғмәләрә гулаг асмаг даһа севиндириҹи иди». Һәмин һесабатда әлавә олунур: «Бир чох нүмајәндәләр садәҹә һәмиманлыларына хидмәт етмәк истәкләриндән ирәли ҝәләрәк Көнүллүләрин хидмәти шөбәсинә јахынлашыб өз адларыны јаздырырдылар». Бејнәлхалг вә вилајәт конгресләри сизин үчүн дә белә севиндириҹи кечирми? (Мәз. 110:3; Јешаја 42:10—12).
17. Сон вахтларда конгресләрин тәшкил едилмәсиндә һансы дәјишикликләр едилиб?
17 Конгресләрин тәшкил едилмәсиндә бәзи дәјишикликләр едилиб. Мәсәлән, Аллаһын бәзи хидмәтчиләри конгресләрин сәккиз ҝүн чәкдији вахтлары хатырлајырлар! Үстәлик, бу ҝөрүшләр сәһәрдән ахшама гәдәр давам едирди. Саһә хидмәти програмын ајрылмаз һиссәси иди. Бәзән конгрес сәһәр саат доггузда башлајыр вә чох вахт ахшам саат доггузда гуртарырды. Көнүллүләр јорулмаг билмәдән иштиракчылар үчүн сәһәр, наһар вә шам јемәји һазырлајырдылар. Бизим ҝүнләрдә исә конгрес програмынын вахты вә ҝүнләри гысалдылыб, еләҹә дә һәр кәс наһары габагҹадан һазырлајыб өзү илә ҝәтирдији үчүн диггәтини даһа чох руһани гидаја ҹәмләјир.
18, 19. Конгресин һансы бәндләри сизин үчүн даһа мараглыдыр вә нәјә ҝөрә?
18 Конгрес програмынын елә бәндләри вар ки, һамымыз онлары сәбирсизликлә ҝөзләјирик. Бизә Мүгәддәс Китаб пејғәмбәрликләрини вә тәлимләрини даһа јахшы баша дүшмәјә көмәк едән вахтлы-вахтында верилән руһани гида јалныз нитг шәклиндә тәгдим олунмур, һәм дә конгресләрдә елан едилән јени нәшрләр гисминдә дә олур (Мат. 24:45). Бу нәшрләр чох вахт сәмими инсанлара Мүгәддәс Китаб һәгигәтләрини дәрк етмәјә көмәк едир. Мүгәддәс Китаба әсасланан драмлар ҝәнҹ вә ја јашлы олмаларындан асылы олмајараг, һамыны нијјәтләрини јохламаға вә өзләрини аллаһсыз дүнјанын дүшүнҹә тәрзиндән горумаға тәшвиг едир. Вәфтиз олунанлар үчүн нәзәрдә тутулан нитг исә һәјатда бизим үчүн нәјин даһа ваҹиб олдуғуну ајырд етмәк вә вәфтиз олунанларын севинҹинә шәрик олмаг имканыны верир.
19 Бәли, та гәдимдән тәмиз ибадәтин ајрылмаз һиссәси олан бөјүк јығынҹаглар Јеһованын хошбәхт халгына бу кешмәкешли ҝүнләрдә Она лајигли тәрздә ибадәт етмәјә көмәк едир. Белә јығынҹаглар бизә руһани стимул верир, јени достлар газандырыр, үмумдүнја гардашлығымызы гијмәтләндирмәјә көмәк едир, үстәлик, конгресләр васитәсилә Јеһова халгына хејир-дуалар верир вә онун гајғысына галыр. Шүбһә јохдур ки, һамымыз һәр конгресдә әввәлдән ахыра гәдәр иштирак етмәк үчүн ишләримизи саһмана салаҹағыг (Сүл. мәс. 10:22).
[30–ҹу сәһифәдәки шәкил]
1950-ҹи илдә Нју–Јорк шәһәриндә кечирилән бејнәлхалг конгрес
[32–ҹи сәһифәдәки шәкил]
Мозамбик
[32–ҹи сәһифәдәки шәкилләр]
Ҹәнуби Кореја