Ҹәсарәтли ол, Аллаһын Јеһова сәнинләдир!

1, 2. а) Һансы хүсусијјәтләр бизә чәтинликләрә синә ҝәрмәјә көмәк едәҹәк? б) Иман нәдир? Нүмунә чәк.

ЈЕҺОВАЈА хидмәт етмәк бизә бөјүк севинҹ бәхш едир. Лакин һамы кими биз дә чәтинликләрлә үзләшир вә «салеһлик уғрунда» әзаб чәкирик (1 Пет. 3:14; 5:8, 9; 1 Кор. 10:13). Бу чәтинликләрә мүвәффәгијјәтлә синә ҝәрмәк үчүн бизә иман вә ҹәсарәт ҝәрәкдир.

² Иман нәдир? Һәвари Павел јазмышды: «Иман үмид едилән шејләрин мүтләг јеринә јетәҹәјинә олан әминлик, ҝөзлә ҝөрүнмәјән шејләрин әслиндә мөвҹуд олдуғунун сүбутудур» (Ибр. 11:1). «Әминлик» кими тәрҹүмә олунан јунан ифадәси кечмишдә тез-тез истифадә олунурду. Бу ифадәјә әсасән ишҝүзар сәнәдләрдә раст ҝәлинир вә ҝәләҹәкдә әлдә олунаҹаг шејә зәманәт верилдијини ҝөстәрирди. Ејнилә, әҝәр инсан Аллаһын вәдләринә инанырса, онларын мүтләг һәјата кечәҹәјинә зәманәт алыр. Иманымыз бизи үмид етдијимиз Мүгәддәс Китабдакы вәдләрин јеринә јетәҹәјини ҝөрәҹәјимизә, һәмчинин ҝөзлә ҝөрә билмәдијиниз руһани һәгигәтләрин доғрулуғуна әмин едир.

3, 4. а) Ҹәсарәт нәдир? б) Иманымызы вә ҹәсарәтимизи мөһкәмләндирмәјин үсулларындан бири һансыдыр?

³ Ҹәсарәт сөзү «манеәләр вә тәһлүкәләрлә үзләшәркән горхмадан данышмаға вә давранмаға тәшвиг едән руһани, емосионал вә мәнәви гүввә» кими мүәјјән едилир («The New Interpreter’s Dictionary of the Bible»). Ҹәсарәтли олмаг мөһкәм вә мәрд олмаг, һәтта инандығымыз шејләрә ҝөрә әзијјәт чәкмәјә һазыр олмаг демәкдир (Марк 6:49, 50; 2 Тим. 1:7).

⁴ Иман вә ҹәсарәт һамынын арзуладығы хүсусијјәтдир. Анҹаг өзүмүзү елә һисс едә биләрик ки, бизә даһа чох иман вә ҹәсарәт лазымдыр. Мүгәддәс Китабда бу хүсусијјәтләри тәзаһүр етдирән минләрлә инсанын нүмунәси гәләмә алыныб. Иманымызы вә ҹәсарәтимизи мөһкәмләндирмәјин үсулларындан бири бу нүмунәләрдән бәзиләрини арашдырмагдыр.

ЈЕҺОВА ЈЕШУА ИЛӘ ИДИ

5. Мәгсәдинә чатмаг үчүн Јешуанын нәјә еһтијаҹы вар иди?

⁵ Ҝәлин бир анлыг өзүмүзү тәхминән 3500 ил бундан әввәл баш вермиш һадисәләрин ичәрисиндә тәсәввүр едәк. Милјонларла исраиллинин Јеһованын мөһтәшәм ҝүҹү сајәсиндә Мисир әсарәтиндән азад олмаларындан гырх ил өтүб. Онлара Аллаһын пејғәмбәри Муса рәһбәрлик едир. Инди о, 120 јашындадыр, узагдан Вәд едилмиш дијары сејр едир вә елә орада, Нево дағынын башында өлүр. Онун хәләфи «һикмәт руһу илә» долан Јешуа олур (Ганун. т. 34:1—9). Исраиллиләр Кәнан дијарыны мүлк олараг алмаг үзрәдирләр. Јахшы рәһбәр олмасы үчүн Јешуаја Аллаһдан вердији мүдриклијә, иман вә ҹәсарәтә еһтијаҹы варды (Ганун. т. 31:22, 23).

6. а) Јешуа 23:6 ајәсинә әсасән, биз нәдә ҹәсарәтли олмалыјыг? б) Һәвариләрин ишләри 4:18—20 вә 5:29 ајәләриндән нә өјрәнирик?

⁶ Кәнан дијарыны әлә кечирмәк үчүн дөјүшдүкләри узун илләр әрзиндә Јешуанын ҝөстәрдији мүдриклик, ҹәсарәт вә иман, чох еһтимал ки, исраиллиләри мөһкәмләндирирди. Ҹәсарәт онлара тәкҹә дөјүшдә јох, Аллаһа итаәт етмәләри үчүн дә лазым иди. Јешуа өлүм габағы белә нәсиһәт етмишди: «Мусанын Ганун китабында јазылан һәр шеји сахлајыб јеринә јетирмәк үчүн чох диггәтли олун ки, ондан нә саға, нә дә сола дөнәсиниз» (Јешуа 23:6). Јеһоваја һәр заман итаәт етмәк үчүн биздән дә ҹәсарәт ҝөстәрмәк тәләб олунур. Бу хүсусијјәт, хүсусилә дә, инсанлар бизи Аллаһын ирадәсинә зидд һәрәкәтләрә сөвг едәндә лазым олур. (Һәвариләрин ишләри 4:18—20; 5:29 ајәләрини оху.) Әҝәр дуа едәрәк Јеһоваја ҝүвәнсәк, ҹәсарәтли олмагда О, бизә көмәк едәҹәк.

ЈОЛУМУЗУ НЕҸӘ УҒУРЛУ ЕДӘ БИЛӘРИК?

7. Ҹәсарәтли олмаг вә уғур газанмаг үчүн Јешуа нә етмәли иди?

⁷ Аллаһын ирадәсини ҹәсарәтлә јеринә јетирмәк үчүн биз Онун Кәламыны охумалы вә өјрәндикләримизә әмәл етмәлијик. Мусанын хәләфи олдугдан сонра Јеһова Јешуаја нә етмәли олдуғуну деди: «Гулум Мусанын сәнә тапшырдығы гануна там вә дәгиг әмәл етмәк үчүн ҹәсарәтли вә чох мөһкәм ол... Бу Ганун китабынын сөзләри дилиндән дүшмәсин, орада јазылан һәр шејә дәгиг әмәл етмәк үчүн ҝеҹә-ҝүндүз онун үзәриндә дүшүн. Онда јолун уғурлу олаҹаг вә мүвәффәгијјәт газанаҹагсан» (Јешуа 1:7, 8). Јешуа бу мәсләһәтә әмәл етди вә онун јолу уғурлу олду. Әҝәр биз дә белә даврансаг, Аллаһа хидмәтдә ҹәсарәтли олаҹағыг вә уғур әлдә едәҹәјик.

8. Бу илин иллик ајәси һансыдыр вә нәјә ҝөрә бу сөзләрин сәнә көмәк едәҹәјини дүшүнүрсән?

⁸ Шүбһә јохдур ки, Јеһованын нөвбәти сөзләри Јешуаны мөһкәмләндирди: «Ҹәсарәтли вә мөһкәм ол. Горхма, тәшвишә дүшмә, чүнки Аллаһын Јеһова һәр јердә сәнинләдир» (Јешуа 1:9, Јени Дүнја тәрҹүмәси). Бәли, Јеһованын бизә дә бу ҹүр дәстәк олаҹағына әмин ола биләрик. Буна ҝөрә дә гаршылашдығымыз чәтинликләрә бахмајараг, горхуја вә тәшвишә дүшмәмәлијик. «Ҹәсарәтли вә мөһкәм ол... Аллаһын Јеһова... сәнинләдир», — сөзләри бизим үчүн хүсуси мараг кәсб едир. Чүнки Јешуа 1:9 ајәсиндәки бу сөзләр 2013-ҹү илин иллик ајәси сечилиб. Аллаһын Јешуаја дедији бу сөзләр, еләҹә дә диҝәр инсанларын дилдә вә әмәлдә тәзаһүр етдирдикләри иман вә ҹәсарәт нүмунәләри ил әрзиндә бизи мөһкәмләндирәҹәк.

ОНЛАР ҸӘСАРӘТЛӘ АЛЛАҺЫН ИРАДӘСИНИ ЈЕРИНӘ ЈЕТИРМӘЈИ СЕЧДИЛӘР

9. Раһаб иманыны вә ҹәсарәтини неҹә тәзаһүр етдирди?

⁹ Фаһишә Раһаб Јешуанын Кәнан дијарына ҝөндәрдији ики кәшфијјатчыны ҝизләтди вә онларын дүшмәнләрини аздырмаг үчүн сәһв истигамәтә јөнәлтди. Исраиллиләр Јерихо шәһәрини јерлә-јексан едәндә Раһаб иманы вә ҹәсарәти сајәсиндә өзүнү вә аилә үзвләрини хилас етди (Ибр. 11:30, 31; Јаг. 2:25). Әлбәттә, Јеһованы разы салмаг үчүн Раһаб әхлагсыз һәјат тәрзиндән әл чәкди. Ејнилә, бәзи мәсиһчиләр дә малик олдуглары иман, ҹәсарәт вә мәнәви ҝүҹ сајәсиндә һәјатларында Аллаһа мәгбул дәјишиклик етмишләр.

10. Рут һәгиги ибадәтин тәрәфини тутдуғуну неҹә ҝөстәрди вә бу, она һансы хејир-дуалары ҝәтирди?

¹⁰ Јешуанын өлүмүндән сонра Моавлы Рут ҹәсарәтлә һәгиги ибадәтин тәрәфини тутду. Чох ҝүман ки, онун Јеһова һаггында мүәјјән билији варды, чүнки онун әри исраилли олмушду. Онун Моав дијарында јашајан дул гајынанасы Наоми Исраилин Бетлеһем шәһәринә гајытмаг гәрарына ҝәләндә Рут да онунла ҝетмәк истәди. Наоми јолда ҝәлинини халгынын арасына гајытмасы үчүн дилә тутмаға чалышды, Рут исә ҹаваб верди: «Мәҹбур етмә ки, сәни тәрк едиб Сәнинлә ҝетмәјим... Халгын халгым олаҹаг, Аллаһын Аллаһым» (Рут 1:16). Бир мүддәтдән сонра Наоминин јахын гоһуму Боаз Рутла евләнди вә онларын оғлу дүнјаја ҝәлди. Нәтиҹәдә, Рут Давуд падшаһын вә Иса Мәсиһин улу нәнәси олду. Бәли, Јеһова онун иманыны вә ҹәсарәтини хејир-дуаландырды (Рут 2:12; 4:17—22; Мат. 1:1—6).

ҺӘЈАТЛАРЫ ҮЧҮН ЧОХЛУ ТӘҺЛҮКӘ!

11. Јеһојада вә Јеһошева неҹә ҹәсарәт тәзаһүр етдирдиләр вә бунун нәтиҹәси нә олду?

¹¹ Јеһованын вә һәмиманлыларынын мәнафејини өзүнкүндән үстүн тутан инсанлара Аллаһын дајаг олдуғуну ҝөрмәк иманымызы вә ҹәсарәтимизи даһа да мөһкәмләндирир. Мисал үчүн, баш каһин Јеһојада илә арвады Јеһошеванын нүмунәсинә нәзәр салаг. Ахазја падшаһын өлүмүндән сонра анасы Аталја, Јоашдан башга, падшаһ нәслиндән олан һәр кәси мәһв етди вә тахты әлә кечирди. Јеһојада вә Јеһошева һәјатларыны тәһлүкәјә атараг Ахазын оғлу Јоашы хилас етдиләр вә дүз алты ил ҝизләтдиләр. Једдинҹи илә кечәндә Јеһојада Јоашы падшаһ елан етди вә Аталијаны өлдүрдү (2 Пад. 11:1—16). Сонра исә мәбәдин бәрпа едилмәсиндә падшаһ Јоаша көмәк етди. Јеһојада 130 јашында өләндә падшаһларын јанында басдырылды, «чүнки Исраил үчүн вә Аллаһла мәбәди үчүн јахшылыг етмишди» (2 Салн. 24:15, 16). Үстәлик, падшаһ нәслинин Давуддан Мәсиһә гәдәр ҝәлиб чатмасы да мәһз Јеһојада вә арвадынын бу ҹәсарәтли һәрәкәти сајәсиндә мүмкүн олду.  

12. Евед-Мелек ҹәсарәтли олдуғуну неҹә ҝөстәрди?

¹² Сидгија падшаһын сарај һәрәмағасы Евед-Мелек Јеремја пејғәмбәр үчүн һәјатыны рискә атды. Јәһуда башчылары јаландан Јеремјаны иғтишаш төрәтмәкдә иттиһам едирдиләр. Падшаһ Јеремјаны онларын әлинә верди ки, нә истәјирләр етсинләр. Башчылар да өлмәси үчүн ону чиркабла долу гујуја атдылар (Јер. 38:4—6). Һамынын Јеремјаја нифрәт етмәсинә бахмајараг, Евед-Мелек өзүнү тәһлүкәјә атыб ону гуртармаг үчүн Сидгијаја мүраҹиәт етди. Сидгија она көмәк етмәјә разы олду вә Јеремјаны гујудан чыхартмаг үчүн Евед-Мелекә 30 нәфәр адам верди. Јеремја пејғәмбәр васитәсилә Аллаһ Евед-Мелеки әмин етди ки, бабиллиләр Јерусәлими әлә кечирән заман ону хилас едәҹәк (Јер. 39:15—18). Аллаһ Онун ирадәсини јеринә јетирмәк үчүн ҹәсарәт ҝөстәрән инсанлары мүкафатландырыр.

13. Үч ибрани ҝәнҹ ҹәсарәтли олдуғуну неҹә ҝөстәрди вә биз онларын нүмунәсиндән нә өјрәнә биләрик?

¹³ Бизим ерадан әввәл једдинҹи әсрдә Јеһоваја хидмәт едән үч ибрани ҝәнҹин нүмунәси ајдын шәкилдә ҝөстәрди ки, Аллаһ иман вә ҹәсарәти мүкафатландырыр. Падшаһ Навуходоносор Бабилин јүксәк вәзифәли мәмурларыны бир араја јығыб дүзәлтдији бөјүк гызыл һејкәлә сәҹдә етмәләрини тәләб етди. Белә етмәјән инсан одла гыздырылмыш собанын ичинә атылаҹагды. Үч ибрани ҝәнҹ һөрмәтлә Навуходоносора деди: «Гуллуг етдијимиз Аллаһымыз бизи одла гызмыш собадан хилас етмәјә гадирдир вә сәнин дә әлиндән гуртараҹаг. Сәнә мәлум олсун ки, еј падшаһ, әҝәр белә олмаса да, биз сәнин аллаһларына гуллуг едән дејилик вә сәнин гојдуғун гызыл һејкәлә дә сәҹдә етмәјәҹәјик» (Дан. 3:16—18). Бу ибрани ҝәнҹләрин неҹә хилас олдуғу Даниел 3:19—30 ајәләриндә ајдын тәсвир олунуб. Бу ҝүн бизи одлу собада өлүм тәһлүкәси ҝөзләмәсә дә, бәзән нөгсансызлығымыз сынаға чәкилир вә биз әмин ола биләрик ки, Аллаһ бизим дә ҝөстәрдијимиз иман вә ҹәсарәти хејир-дуаландыраҹаг.

14. Даниел неҹә ҹәсарәт тәзаһүр етдирди вә бу нә илә нәтиҹәләнди?

¹⁴ Даниелин дүшмәнләри Дараны Даниелин зәрәринә олан бир гәрар чыхармаға инандырдылар. Онлар падшаһа дедиләр: «Отуз ҝүн әрзиндә ким сәндән башга бир аллаһа јахуд инсана дуа етсә, ширләр олан гујуја атылсын». Даниел белә чәтин вәзијјәтдә дә өз иманыны вә ҹәсарәтини горуду. Белә бир фәрманын имзаландығыны ешидәндә о, «өз евинә гајытды. Онун јухары отағынын Јерусәлимә тәрәф олан пәнҹәрәләри ачыг иди. Даниел әввәлләр етдији кими ҝүндә үч дәфә диз чөкүб өз Аллаһына дуа етди вә Онун өнүндә шүкүр етди» (Дан. 6:6—10). Нәтиҹәдә, Даниели ширләр олан гујуја атдылар, амма Јеһова ону горуду (Дан. 6:16—23).

15. а) Акила вә Прискилла һансы ҝөзәл ҹәсарәт вә иман нүмунәси гојмушлар? б) Исанын Јәһја 13:34 ајәсиндәки сөзләри һансы мәнаны дашыјыр вә бир чох мәсиһчиләр бу ҹүр мәһәббәти неҹә тәзаһүр етдирирләр?

¹⁵ Мүгәддәс Китабда дејилир ки, Акила вә Прискилла Павелә ҝөрә ҹанларыны тәһлүкәјә атмышдылар (Һәв. иш. 18:2; Ром. 16:3, 4). Онлар ҹәсарәт ҝөстәрәрәк Исанын сөзләринә ујғун давранмышдылар: «Сизә јени бир әмр верирәм: бир-биринизи севин. Мән сизи севдијим кими, сиз дә бир-биринизи севин» (Јәһ. 13:34). Мусанын гануну һәр бир кәсдән гоншусуну өзү кими севмәји тәләб едирди (Лев. 19:18). Бәс нә үчүн демәк олар ки, Исанын әмри «јени» иди? Чүнки бу әмр, Иса кими, һәр биримиздән һәјатымызы башгалары уғрунда гурбан вермәјә һазыр олмағы тәләб едир. Бир чох мәсиһчиләр һәмиманлыларыны тәһлүкә вә өлүмдән гуртармаг үчүн ҹәсарәтлә ҹанларыны тәһлүкәјә атараг мәһәббәт тәзаһүр етдирирләр. (1 Јәһја 3:16 ајәсини оху.)

16, 17. Мәсиһин еркән вә мүасир давамчылары иманларыны сынаға чәкән һансы сынагларла үзләшмишләр?

¹⁶ Иса кими, еркән мәсиһчиләр дә ҹәсарәт ҝөстәрәрәк јалныз Јеһоваја ибадәт едирдиләр (Мат. 4:8—10). Онлар Рома императорунун шәрәфинә бухур јандырмагдан имтина едирдиләр. (Шәклә бахын.) Дениел Манникс јазмышды: «Чох аз мәсиһчи өз әгидәсиндән имтина едирди, һәрчәнд онлара асан олсун дејә, аренада ичәрисиндә од олан гурбанҝаһ сахлајырдылар. Мәһбусдан садәҹә бир чимдик бухур ҝөтүрүб јанан одун үстүнә атмаг тәләб олунурду, бундан сонра она гурбан шәһадәтнамәси верилир вә о, азад едилирди. Ејни заманда, она дәгигликлә баша салынырды ки, бунунла о, императора сәҹдә етмир, садәҹә Рома дөвләтинин башчысы кими императорун илаһи мөвгејини гәбул етмиш олур. Бүтүн бунлара бахмајараг, демәк олар ки, һеч бир мәсиһчи азад олмаг үчүн бу имкандан истифадә етмирди» («Those About to Die»).

¹⁷ Мүасир дөврдә мәсиһчиләр насист дүшәрҝәләриндә өлүмлә үз-үзә дураркән онлара дәфәләрлә имкан верилирди ки, азадлыға бурахылмаг үчүн Јеһованы инкар етдикләрини ҝөстәрән әризә имзаласынлар. Анҹаг сәнәди имзалајанлар садәҹә бир нечә нәфәр олду. Руандада олан сојгырым вахты тутси вә һути халгындан олан Шаһидләр бир-бирләрини мүдафиә едирдиләр. Белә сынаглар заманы Аллаһын халгына иман вә ҹәсарәт лазымдыр.

УНУТМА, ЈЕҺОВА БИЗИМЛӘДИР!

18, 19. Иман вә ҹәсарәтлә бағлы һансы Мүгәддәс Китаб нүмунәләри бизә тәблиғ ишини давам етдирмәјә көмәк едәҹәк?

¹⁸ Бу ҝүн бизә Падшаһлыг һаггында хош хәбәри тәблиғ етмәк вә шаҝирд һазырламаг кими ҝөзәл имкана маликик. Бу, Аллаһын јер үзүндәки хидмәтчиләринә һәвалә етдији ән мөһтәшәм ишдир (Мат. 24:14; 28:19, 20). Әвәзолунмаз нүмунәсинә ҝөрә биз Исаја неҹә дә миннәтдарыг! О, «шәһәрбәшәһәр, кәндбәкәнд ҝәзиб Аллаһын падшаһлығы һаггында хош хәбәри тәблиғ едирди» (Лука 8:1). Онун кими, биз дә Падшаһлыг һаггында хош хәбәри тәблиғ етмәк үчүн иман вә ҹәсарәтә еһтијаҹ дујуруг. Аллаһын көмәји сајәсиндә биз дә «аллаһсызларла долу гәдим [дүнјада]» горхмадан үмумдүнја дашгынын олаҹағы барәдә тәблиғ едән «салеһлик тәблиғчиси» Нуһ кими ола биләрик (2 Пет. 2:4, 5).

¹⁹ Дуа бизә тәблиғ ишини давам етдирмәјә көмәк едәҹәк. Исанын бәзи давамчылары тәгибләрлә үзләшәркән Аллаһын сөзүнү ҹәсарәтлә данышмаг үчүн дуа едәндә онларын бу хаһиши ешидилирди. (Һәвариләрин ишләри 4:29—31 ајәләрини оху.) Әҝәр евдән-евә тәблиғ етмәјә горхурсанса, Јеһова иман вә ҹәсарәт үчүн етдијин дуалары ешидәҹәк. (Мәзмур 66:19, 20 ајәләрини оху.)a

20. Јеһованын хидмәтчиләри кими бизим һансы көмәјимиз вар?

²⁰ Шејтанын дүнјасында јашаја-јашаја Аллаһын ирадәсини јеринә јетирмәк елә дә асан дејил. Лакин биз тәк дејилик. Јеһова вә јығынҹағын башы олан Иса Мәсиһ бизимләдир. Үстәлик, бүтүн дүнјада 7 000 000-дан чох һәмиманлымыз вар. Ҝәлин һамымыз иманымызы горујаг вә хош хәбәри бәјан едәркән 2013-ҹү илин иллик ајәсини јадымызда сахлајаг: «Ҹәсарәтли вә мөһкәм ол... Аллаһын Јеһова... сәнинләдир» (Јешуа 1:9, Јени Дүнја тәрҹүмәси).