«Ҹәсарәтли вә чох мөһкәм ол»
«Ҹәсарәтли вә чох мөһкәм ол... чүнки Аллаһын Рәбб... сәнинләдир» (ЈЕШУА 1:7—9).
НЕҸӘ ҸАВАБ ВЕРӘРДИН?
Ханок вә Нуһ неҹә ҹәсарәт ҝөстәрирдиләр?
Гәдимдә јашајан бәзи гадынлар иман вә ҹәсарәтлә бағлы бизә һансы нүмунәни гојублар?
Сәнә ҝүҹлү тәсир бағышлајан ҹәсарәтли ҝәнҹләр кимләрдир?
1, 2. а) Һәјатда дүзҝүн оланы етмәк үчүн бәзән һансы хүсусијјәт лазымдыр? б) Биз инди нәји арашдыраҹағыг?
ҸӘСАРӘТ горхунун, утанҹаглығын вә үрәксизлијин тамамилә әкси олан бир хүсусијјәтдир. Ҹәсарәтли дејилдикдә, ағлымыза ҝүҹлү, шүҹаәтли вә мәрд инсан ҝәлә биләр. Лакин ҝүндәлик һәјатда дүзҝүн оланы етмәк үчүн дә бәзән ҹәсарәт тәләб олунур.
2 Мүгәддәс Китабда һаггында бәһс олунан инсанлардан бәзиләри чох чәтин шәраитдә бөјүк ҹәсарәт ҝөстәрмишдиләр. Диҝәрләри исә бу ҝүн Јеһованын бир чох хидмәтчиләринин үзләшдији охшар вәзијјәтләрдә ҹәсарәт ҝөстәрмишләр. Мүгәддәс Китабын ҹәсарәт нүмунәләриндән нә өјрәнмәк олар? Бәс биз неҹә ҹәсарәтли ола биләрик?
АЛЛАҺСЫЗ ДҮНЈАДА ҸӘСАРӘТЛИ ШАҺИДЛӘР
3. Ханокун аллаһсыз инсанлара чатдырдығы хәбәр нәдән ибарәт иди?
3 Дашгындан әввәлки дөврдә јашајан пис инсанлара Јеһова һаггында шәһадәт вермәк бөјүк ҹәсарәт тәләб едирди. Лакин «Адәмдән сонра једдинҹи нәсилдә доғулмуш Ханок» Аллаһын нөвбәти пејғәмбәрлик хәбәрини инсанлар арасында шүҹаәтлә бәјан едирди: «Будур, Јеһова он минләрлә мүгәддәс мәләји илә ҝәлди ки, һамы үзәриндә һөкмүнү иҹра етсин вә бүтүн аллаһсызлары горхуб-чәкинмәдән ҝөрдүкләри пис ишләринә ҝөрә, Аллаһ горхусу олмајан ҝүнаһ саһибләрини Она гаршы дедикләри бүтүн биабырчы сөзләрә ҝөрә иттиһам етсин» (Јәһуда 14, 15). Ханокун бу пејғәмбәрлији артыг һәјата кечмиш кими бәјан етмәси онун јеринә јетәҹәјинә зәррә гәдәр дә шүбһә етмәдијини ҝөстәрирди. Елә дә олду: бүтүн аллаһсыз инсанлар Дашгын заманы мәһв олдулар.
4. Нуһ һансы шәраитдә Аллаһла јеријирди?
4 Дашгын ерамыздан әввәл 2370-ҹи илдә, Ханокун пејғәмбәр кими хидмәт етдији дөврдән тәхминән 650 ил сонра баш вермишди. Бу әрәфәдә Нуһ дүнјаја ҝәлди, аилә саһиби олду вә оғуллары илә бирликдә ҝәми тикди. Пис мәләкләр инсан ҹилдинә ҝирәрәк ҝөзәл гадынлардан өзләринә арвад алдылар вә онлардан нәһәнҝ инсанлар дүнјаја ҝәлди. Үстәлик, инсанларын шәр әмәлләри о гәдәр чохалды ки, јер үзү зоракылыгла долду (Јар. 6:1—5, 9, 11). Бу ҹүр аҹынаҹаглы вәзијјәтин һөкм сүрмәсинә бахмајараг, Нуһ «Аллаһла бир јол ҝедирди» вә «салеһлик тәблиғчиси» олараг ҹәсарәтлә тәблиғ едирди. (2 Петер 2:4, 5 ајәләрини оху.) Ахыр ҝүнләрдә бизә дә мәһз белә ҹәсарәт лазымдыр.
ИМАН ВӘ ҸӘСАРӘТ НҮМУНӘЛӘРИ
5. Муса иман вә ҹәсарәти неҹә тәзаһүр етдирмишди?
5 Муса тәглид едилмәли иман вә ҹәсарәт нүмунәсидир (Ибр. 11:24—27). Ерамыздан әввәл 1513—1473-ҹү илләрдә исраиллиләри Мисирдән чыхартмаг вә сәһрада онлара бәләдчилик етмәк үчүн Аллаһ Мусадан истифадә етмишди. Муса бу тәјинат үчүн јарарсыз олдуғуну дүшүнсә дә, ону гәбул етди (Чых. 6:12). О вә гардашы Һарун дәфәләрлә Мисирин зүлмкар падшаһынын һүзуруна ҝәләрәк Јеһованын Он бәласыны ҹәсарәтлә билдирирдиләр. Бу бәлалар васитәсилә Јеһова Мисир аллаһларыны алчалтды вә Өз халгыны хилас етди (Чых., фәс. 7—12). Аллаһ бу ҝүн бизә көмәк етдији кими, она да көмәк етдији үчүн Муса иман вә ҹәсарәт тәзаһүр етдирмишди (Ганун. т. 33:27).
6. Һакимијјәт органлары тәрәфиндән сорғу-суала тутулсаг, ҹәсарәтлә шаһидлик вермәјә бизә нә көмәк едәҹәк?
6 Мусада олан ҹәсарәт бизә дә лазымдыр, чүнки Иса демишди: «Мәндән өтрү сизи һакимләрин вә падшаһларын өнүнә ҝәтирәҹәкләр. Беләҹә онлара вә диҝәр халглара шәһадәт верәҹәксиниз. Сизи мәһкәмәјә верәндә нәдән вә ја неҹә данышаҹағыныз барәсиндә нараһат олмајын, чүнки нә демәк лазым олдуғу сизә һәмин ан вериләҹәк. Данышанда тәк олмајаҹагсыныз, Атанызын мүгәддәс руһу сизин васитәнизлә данышаҹаг» (Мат. 10:18—20). Һакимијјәт органлары тәрәфиндән сорғу-суала тутулсаг, Јеһованын руһу бизә һөрмәтҹил тәрздә, ејни заманда иман вә ҹәсарәтлә шаһидлик вермәјә көмәк едәҹәк. (Лука 12:11, 12 ајәләрини оху.)
7. Јешуанын ҹәсарәтли вә мүвәффәгијјәтли олмасына сәбәб нә иди?
7 Мусанын хәләфи Јешуа Аллаһын Ганунуну мүнтәзәм арашдырдығы үчүн онун мөһкәм иманы вә ҹәсарәти варды. Ерамыздан әввәл 1473-ҹү илдә Исраил халгы Вәд едилмиш дијарын астанасында дурурду. Бу заман Аллаһ әмр етди: «Ҹәсарәтли вә чох мөһкәм ол». Јешуа Гануна ујғун даврандығы тәгдирдә мүдрик давранаҹаг вә уғур газанаҹагды. Аллаһ она демишди: «Горхма вә руһдан дүшмә, чүнки Аллаһын Рәбб ҝедәҹәјин һәр јердә сәнинләдир» (Јешуа 1:7—9). Бу сөзләр Јешуаны неҹә дә үрәкләндирмишди! Шүбһә јохдур ки, Аллаһ онунла иди вә Вәд едилмиш дијарын бөјүк һиссәсини ҹәми-ҹүмләтаны алты илә, јәни ерамыздан әввәл 1467-ҹи иләдәк истила едилмәси буна бир сүбутдур.
АЛЛАҺА ХИДМӘТ ЕДӘН МӘРД ГАДЫНЛАР
8. Раһаб иман вә ҹәсарәт тәзаһүр етдирмәкдә һансы нүмунәни гојуб?
8 Кечмишдә бир чох гадынлар Јеһоваја хидмәтдә мәрдлик ҝөстәрмишләр. Мәсәлән, Јерихо шәһәриндә јашајан фаһишә Раһаб Аллаһа иман тәзаһүр етдирмишди: о, ҹәсарәт ҝөстәрәрәк Јешуанын ҝөндәрдији ики кәшфијјатчыны ҝизләтмиш, сонра исә онлары ахтаран падшаһын адамларыны сәһв истигамәтә јөнәлтмишди. Исраиллиләр Јерихо шәһәрини әлә кечирәндә о, аиләси илә сағ галды. Раһаб пис һәјат тәрзиндән әл чәкиб Јеһованын садиг хидмәтчиси олду вә һәтта Мәсиһин улу нәнәси олмаг шәрәфинә лајиг ҝөрүлдү (Јешуа 2:1—6; 6:22, 23; Мат. 1:1, 5). Иман вә ҹәсарәти она бөјүк хејир-дуалар ҝәтирди!
9. Девора, Бараг вә Јаел неҹә шүҹаәт ҝөстәрибләр?
9 Јешуа ерамыздан әввәл тәхминән 1450-ҹи илдә вәфат етдикдән сонра Исраилдә һакимләр дөврү башлады. Кәнан падшаһы Јавин 20 ил Исраил халгына зүлм едиб, әзијјәт верирди. Һәмин әрәфәдә Јеһова гадын пејғәмбәр Девора васитәсилә һаким Барага бу падшаһла дөјүшмәји әмр етди. Бараг 10 000 нәфәр адамы Тавор дағына јығды. Јавинин орду башчысы Сисра ордусу вә 900 дөјүш арабасы илә Гишон вадисинә ҝәлди. Исраиллиләр вадијә дахил оланда Аллаһ елә етди ки, чај гәфләтән өз мәҹрасындан чыхды вә дөјүш мејданчасы батаглыға чеврилди. Белә вәзијјәтдә кәнанлыларын дөјүш арабалары артыг ишә јарамырды. Барагын адамлары дөјүшдә галиб ҝәлдиләр, «Сисранын бүтүн ордусу [исә] гылынҹдан кечирилди». Сисра гачыб Јаел адлы бир гадынын чадырында ҝизләнди, лакин о, јухуја ҝедәндә гадын ону өлдүрдү. Деворанын Барага габагҹадан дедији кими, бу гәләбәнин шөһрәти гадынын — Јаелин адына јазылды. Деворанын, Барагын вә Јаелин шүҹаәти сајәсиндә Исраил «гырх ил раһат јашады» (Һак. 4:1—9, 14—22; 5:20, 21, 31). Аллаһдан горхан бир чох киши вә гадынлар ејни иман вә ҹәсарәт тәзаһүр етдирмишләр.
СӨЗЛӘРИМИЗ ИНСАНЛАРЫ ҸӘСАРӘТЛӘНДИРӘ БИЛӘР
10. Нәјә ҝөрә демәк олар ки, сөзләримиз һәмиманлыларымызы ҹәсарәтләндирә биләр?
10 Сөзләримиз һәмиманлыларымызы ҹәсарәтләндирә биләр. Ерамыздан әввәл 11-ҹи әсрдә јашамыш падшаһ Давуд оғлу Сүлејмана нәсиһәт етмишди: «Мөһкәм вә ҹәсарәтли ол, бу иши ҝөр, горхма вә руһдан дүшмә, чүнки Рәбб Аллаһ, мәним Аллаһым сәнинләдир. О, Рәббин мәбәдинин бүтүн хидмәт иши сона чатмамыш сәни атмаз вә тәрк етмәз» (1 Салн. 28:20). Сүлејман ҹәсарәтлә давранды вә Јерусәлимдә Јеһова үчүн мөһтәшәм бир мәбәд инша етди.
11. Исраилли гызҹығазын ҹәсарәтлә дедији сөзләр бир инсанын һәјатыны неҹә дәјишди?
11 Ерамыздан әввәл онунҹу әсрдә исраилли гызҹығазын ҹәсарәтлә дедији сөзләр бир ҹүзамлы үчүн әсил хејир-дуа олду. Исраилә сохулан гулдур дәстәси бу ушағы Суријаја әсир апармышды вә о, ҹүзама тутулмуш орду башчысы Нааманын гуллугчусу олмушду. Јеһованын Елиша васитәсилә ҝөстәрдији мөҹүзәләриндән хәбәри олан бу гыз Нааманын арвадына деди ки, әри Исраилә ҝетсә, һәмин пејғәмбәр ону сағалдаҹаг. Онун дедији кими давранан Нааман мөҹүзәви шәкилдә хәстәлијиндән шәфа тапыб Јеһованын хидмәтчиси олду (2 Пад. 5:1—3, 10—17). Әҝәр сән ҝәнҹсәнсә вә бу гыз кими Јеһованы севирсәнсә, О, мүәллимләринә, синиф јолдашларына вә башгаларына тәблиғ етмәјин үчүн сәнә дә ҹәсарәт верә биләр.
12. Падшаһ Хизгијанын сөзләри онун тәбәәләринә неҹә тәсир етди?
12 Тәһлүкәли вәзијјәтлә үз-үзә ҝәлән инсана дејилән дүшүнүлмүш сөзләр она үрәк-дирәк верә биләр. Ерамыздан әввәл сәккизинҹи әсрдә ассуријалылар Јерусәлимә һүҹум етмәјә һазырлашанда Хизгија падшаһ тәбәәләринә деди: «Мөһкәм вә ҹәсарәтли олун. Ашшур падшаһындан вә онун јанында олан чохлу гошундан горхмајын, руһдан дүшмәјин, чүнки бизимлә олан онунла оландан бөјүкдүр. Онунла олан инсан ҝүҹүдүр, анҹаг бизимлә олан Аллаһымыз Рәбдир ки, бизә көмәк едир вә мүһарибәләримиздә вурушур». Бу сөзләр халга неҹә тәсир етди? «Халг Јәһуда падшаһы Хизгијанын сөзләриндән үрәкләнди» (2 Салн. 32:7, 8). Биз тәгиб олунанда белә сөзләр һәм бизә, һәм дә һәмиманлыларымыза ҹәсарәт верә биләр.
13. Ахавын сарај рәиси Авдија ҹәсарәтли олмагда бизә һансы нүмунәни гојуб?
13 Бәзән сусмаг үчүн дә ҹәсарәт тәләб олунур. Ерамыздан әввәл онунҹу әсрдә падшаһ Ахавын сарај рәиси Авдија ҹәсарәтлә Јеһованын јүз пејғәмбәрини «әлли-әлли... мағараларда» ҝизләдирди ки, залым мәликә Изебел онлары өлдүрмәсин (1 Пад. 18:4). Авдија кими, Јеһованын бир чох мүасир садиг хидмәтчиләри һәмиманлылары барәдә мәлуматлары тәгибчиләрә сөјләмәкдән имтина етмәклә ҹәсарәт ҝөстәрмиш олурлар.
ҸӘСАРӘТЛИ МӘЛИКӘ ЕСТЕР
14, 15. Мәликә Естерин иманы вә ҹәсарәти нәдән ҝөрүнүрдү?
14 Ерамыздан әввәл бешинҹи әсрдә гәддар Һаман бүтүн Фарс империјасында јәһудиләрин көкүнү кәсмәк планыны гуранда мәликә Естер бөјүк ҹәсарәт вә иман тәзаһүр етдирмишди. Тәәҹҹүблү дејил ки, бундан хәбәр тутан халг дәрин кәдәрә гәрг олмушду, онлар оруҹ тутуб, сидги-үрәкдән дуа едирдиләр (Ест. 4:1—3). Мәликә Естер чох нараһатчылыг кечирирди. Онун әмиси оғлу Мордокај бу фәрманын сурәтини Естерә ҝөндәрди вә она падшаһын јанына ҝедиб халг үчүн јалвармасыны истәди. Лакин падшаһын чағырышы олмадан онун һүзуруна ҝәлән һәр кәси өлүм ҝөзләјирди (Ест. 4:4—11).
15 Буна бахмајараг, Мордокај Естерә деди: «Әҝәр сән сусарсанса, Јәһудиләрә јардым вә гуртулуш башга јердән ҝәләҹәк... Ким билир, бәлкә елә бу ҝүн үчүн сән мәләкәлијә чатмысан?» Естер Мордокајдан Шушан шәһәриндә олан бүтүн јәһудиләри топлајыб онун үчүн оруҹ тутмағы хаһиш етди. О деди: «Мән дә... оруҹ тутаҹағам вә сонра гануну позуб падшаһын јанына ҝирәҹәјәм. Буна ҝөрә өлмәлијәмсә, гој өлүм» (Ест. 4:12—17). Естер ҹәсарәтлә давранды вә онун адыны дашыјан китабда ҝөстәрилдији кими, Аллаһ Өз халгыны хилас етди. Бизим ҝүнләрдә дә мәсһ едилмиш мәсиһчиләр вә онларын һәср олунмуш әмәкдашлары сынаглар заманы ејни ҹәсарәт ҝөстәрирләр вә «дуалары ешидән» Аллаһ һәр заман онларладыр. (Мәзмур 65:2; 118:6 ајәләрини оху.)
«ГОРХМА»
16. Иса ҝәнҹләримиз үчүн һансы саһәдә ҝөзәл нүмунәдир?
16 Ерамызын биринҹи әсриндә 12 јашлы Иса бир дәфә мәбәддә «мүәллимләрин арасында отуруб онлара гулаг асыр вә суал верирди». «Исаны динләјәнләрин һамысы онун зәкасына вә ҹавабларына валеһ олурду» (Лука 2:41—50). Ҝәнҹ олмасына бахмајараг, јашҹа өзүндән бөјүк олан бу мүәллимләрә суал вермәк үчүн онун кифајәт гәдәр иман вә ҹәсарәти вар иди. Исанын нүмунәсини јадда сахламаг јығынҹагдакы ҝәнҹләрә онлардан изаһат тәләб едән һәр кәсин гаршысында үмидләрини мүдафиә етмәк үчүн јаранан фүрсәтләрдән истифадә етмәјә көмәк едәҹәк (1 Пет. 3:15).
17. Нәјә ҝөрә Иса давамчыларыны ҹәсур олмаға тәшвиг едирди вә бизә нә үчүн ҹәсарәт лазымдыр?
17 Иса башгаларыны горхмамаға тәшвиг едирди (Мат. 9:2, 22). О, шаҝирдләринә демишди: «Елә бир вахт ҝәлир ки, артыг ҝәлиб дә, һамыныз мәни тәк гојуб евинизә дағылышаҹагсыныз. Анҹаг мән тәк галмајаҹағам, чүнки Атам мәнимләдир. Буну сизә она ҝөрә дедим ки, мәним сајәмдә гәлб раһатлығы тапасыныз. Дүнјада чох әзијјәтлә үзләшәҹәксиниз, анҹаг ҹәсарәтли олун! Мән дүнјаја галиб ҝәлдим» (Јәһ. 16:32, 33). Дүнја Исанын еркән давамчыларына нифрәт етдији кими, бизә дә нифрәт едир. Лакин ҝәлин һеч вахт бу дүнја кими олмајаг! Аллаһын Оғлунун ҹәсарәти үзәриндә дүшүнмәк бизә өзүмүзү бу дүнјадан ләкәсиз сахламаға көмәк едәҹәк. Иса дүнјаја галиб ҝәлди. Бу, биздә дә алынаҹаг! (Јәһ. 17:16; Јаг. 1:27).
«ҸӘСАРӘТЛИ ОЛ!»
18, 19. Һәвари Павел иман вә ҹәсарәти неҹә тәзаһүр етдирирди?
18 Һәвари Павел бир чох сынаглара таб ҝәтирмишди. Бир дәфә о, Јерусәлимдә оланда јәһудиләр она һүҹум етмәк истәјирдиләр. Рома әсҝәрләри өзләрини вахтында чатдырмасајдылар, онлар Павели парча-парча едәрдиләр. «Ҝеҹә Ағамыз Павелин јанында дуруб деди: “Ҹәсарәтли ол! Неҹә ки, мәним һаггымда Јерусәлимдә әтрафлы шәһадәт верирсән, Ромада да еләҹә шәһадәт вермәлисән”» (Һәв. иш. 23:11). Павел мәһз белә дә етди.
19 Павел Коринфдәки јығынҹағы парчаламаға чалышан «ҝөркәмли [һәвариләри]» горхмадан тәнбеһ едирди (2 Кор. 11:5; 12:11). Онлардан фәргли олараг, Павел әсил һәвари олдуғуну сүбут едә биләрди: о, дәфәләрлә һәбсханаја дүшмүш, дөјүлмүш, тәһлүкәли сәфәрләрдә олмуш, диҝәр тәһлүкәләрлә үзләшмиш, аҹ-сусуз вә јухусуз галмыш, еләҹә дә һәмиманлыларынын фикрини чәкмишди. (2 Коринфлиләрә 11:23—28 ајәләрини оху.) Павелин ҝөстәрдији иман вә ҹәсарәт бу гүввәнин Аллаһдан олдуғуна дәлаләт едир.
20, 21. а) Һәјатдакы чәтин вәзијјәтләрин өһдәсиндән ҝәлмәк үчүн бизә ҹәсарәтин лазым олдуғуну ҝөстәрән бир нүмунә чәк. б) Һансы вәзијјәтләрдә ҹәсарәт ҝөстәрмәк лазымдыр вә биз нәјә әмин ола биләрик?
20 Һәгиги мәсиһчиләрин һамысы шиддәтли тәгибләрә мәруз галмыр. Бунунла белә, һәр биримизә ҝүндәлик проблемләрин өһдәсиндән ҝәлмәк үчүн ҹәсарәт ҝәрәкдир. Бразилијада јашајан вә вахтилә гулдур дәстәсинин үзвү олмуш бир ҝәнҹ гардашын нүмунәсинә нәзәр салаг. Мүгәддәс Китабы өјрәнәркән о баша дүшдү ки, һәјатында дәјишиклик етмәлидир. Лакин дәстәни тәрк едәнләр, адәтән, өлдүрүлүрдү. О дуа етди вә Мүгәддәс Китаб әсасында дәстә башчысына нә үчүн дәстәни тәрк етмәк истәдијини изаһ етди. Ҝәнҹ оғлан һеч бир проблем олмадан дәстәдән чыхды вә буна ҝөрә ондан гисас алмадылар. Сонра о, тәблиғчи олду.
21 Хош хәбәри тәблиғ етмәк үчүн ҹәсарәт ҝәрәкдир. Мәктәбдә охујан ҝәнҹ мәсиһчиләрә нөгсансызлыгларыны горумаг үчүн ҹәсарәт лазымдыр. Башдан ахыра гәдәр конгресләрдә иштирак етмәк үчүн ишдән иҹазә алмаг да ҹәсарәт тәләб едир. Бунун кими нә гәдәр истәсәниз вәзијјәтләр садаламаг олар. Үзләшдијимиз сынаглардан асылы олмајараг, Јеһова «иманла едилән» дуаларымызы ҹавабсыз гојмајаҹаг (Јаг. 5:15). Шүбһә јохдур ки, О, бизә Өз мүгәддәс руһундан верә биләр ки, «ҹәсарәтли вә чох мөһкәм» олаг!
[11-ҹи сәһифәдәки шәкил]
Ханок Аллаһсыз дүнјада ҹәсарәтлә тәблиғ едирди
[12-ҹи сәһифәдәки шәкил]
Јаел ҹәсарәтли вә мөһкәм иди