МҮГӘДДӘС КИТАБА АИД СУАЛЛАРА ҸАВАБ
Аллаһ ҝүнаһларымызы бағышлаја биләр?
Аллаһын разылығыны газанмаг чәтин дејил
Мүгәддәс Китабда дејилир ки, бүтүн инсанлар ҝүнаһлыдыр. Ҝүнаһ бизә улу валидејнимиз Адәмдән мирас галыб. Мәһз буна ҝөрәдир ки, биз һәрдән сәһвләр едирик вә сонрадан бунун пешманчылығыны чәкирик. Аллаһын Оғлу Иса Мәсиһ ҝүнаһларымызын әвәзини өдәмәк үчүн бизим уғрумузда өлдү. Онун фидјә гурбанлығы сајәсиндә ҝүнаһларымызын бағышланмасы мүмкүн олур. Бәли, фидјә Аллаһдан бир немәтдир. (Ромалылара 3:23, 24 ајәләрини охујун.)
Бәзи инсанлар ағыр ҝүнаһлар ишләјибләр вә фикирләширләр ки, ҝөрәсән Аллаһ онлары бағышлајар. Амма Мүгәддәс Китабда дејилир: «Онун Оғлу Исанын ганы бизи бүтүн ҝүнаһлардан тәмизләјир» (1 Јәһја 1:7). Әҝәр инсан пешмандырса вә төвбә едирсә, Јеһова ән ағыр ҝүнаһлары да бағышлајыр. (Әшија 1:18 ајәсини охујун.)
Ҝүнаһларымызын бағышланмасы үчүн нә етмәлијик?
Јеһованын ҝүнаһларымызы бағышламасыны истәјириксә, Онун һагда, јәни Онун јоллары, ҝөстәришләри вә биздән нә тәләб етдији барәдә өјрәнмәлијик (Јәһја 17:3). Тутдуғу әмәлдән пешман оланлары вә дәјишмәк истәјәнләри Јеһова үрәкдән бағышлајыр. (Һәвариләрин ишләри 3:19 ајәсини охујун.)
Аллаһын разылығыны газанмаг мүмкүндүр. Јеһова бизим зәиф ҹәһәтләримизи билир. О, мәрһәмәтли вә хејирхаһ Аллаһдыр. Бу ҹүр мәрһәмәтли Аллаһ һагда даһа чох өјрәнмәк, Ону разы салмаг истәмәздиниз? (Зәбур 103:13, 14 ајәләрини охујун.)