Охуҹуларын суаллары
Нәјин әсасында Иса ҝүнаһкар кими танынан гадынын ҝүнаһларынын бағышландығыны деди? (Лука 7:37, 48).
Иса Шимон адлы фәрисејин евиндә наһар едән заман бир нәфәр гадын ҝәлиб онун «ајагларынын јанында дурду». Гадын онун ајагларыны ҝөз јашлары илә исладыб сачлары илә силирди. Сонра да онун ајагларыны өпүр вә онларын үстүнә әтирли јағ төкүрдү. «Мүждә»дә дејилир ки, һәмин гадын шәһәрдә «ҝүнаһкар» кими танынырды. Әлбәттә, гејри-камил инсанларын һамысы ҝүнаһлыдыр, анҹаг, адәтән, Мүгәддәс Китабда бу сөз алтында ҹидди ҝүнаһ ишләдән вә ја пис ад чыхармыш инсан нәзәрдә тутулур. Еһтимал ки, гадын фаһишә иди. Исанын: «Ҝүнаһларын бағышланды» сөзләри дә елә һәмин гадына үнванланмышды (Лука 7:36—38, 48). Бунунла Иса нә демәк истәјирди? Әҝәр фидјә гурбанлығы һәлә тәгдим олунмамышдыса, гадынын ҝүнаһлары неҹә бағышлана биләрди?
Иса онун ајагларыны јујуб јағлајан гадына ҝүнаһларынын бағышландығыны демәздән өнҹә, ев јијәси Шимона ваҹиб бир мәгамы изаһ етмәк үчүн нүмунә чәкди. Ҝүнаһы гајтарылмалы олан бөјүк борҹла мүгајисә едәрәк деди: «Бир борҹ верәнин ики борҹлусу вар иди; бири беш јүз, о бири әлли динар борҹлу иди. Онларын өдәмәјә бир шејләри олмадығындан, о, борҹу һәр икисинә бағышлады. Инди, сөјлә, бунлардан һансы ону чох севәҹәкдир?» Шимон ҹаваб верди: «“Елә дүшүнүрәм ки, өзүнә ән чох бағышланан”. Иса она: “Дүз фикирләшдин”, — деди» (Лука 7:41—43). Аллаһа итаәт етмәк һамымызын борҹудур, анҹаг Онун сөзүндән чыхыб ҝүнаһа јол верәндә биз Она борҹлу олуруг. Бунунла борҹларымыз үст-үстә јығылыр. Амма Јеһова борҹлары бағышлајан борҹверәнә бәнзәјир. Буна ҝөрә дә Иса давамчыларыны белә дуа етмәјә тәшвиг едирди: «Бизә борҹлу оланлары бағышладығымыз кими, бизим борҹларымызы да бағышла» (Мат. 6:12). Лука 11:4 ајәсиндә бу борҹларын ҝүнаһ олдуғу билдирилир.
Аллаһ кечмишдә ҝүнаһлары нәјин әсасында бағышлајырды? Онун мүкәммәл әдаләтинә әсасән ҝүнаһын әвәзи өлүмдүр. Бу сәбәбдән Адәм ҝүнаһынын әвәзини һәјаты илә өдәмәли олду. Лакин Аллаһын исраиллиләрә вердији Гануна мүвафиг олараг ҝүнаһкар адам бағышланмаг үчүн Јеһоваја һејван гурбаны ҝәтирмәли иди. Бу һагда һәвари Павел дејир: «Мүгәддәс Гануна ҝөрә, тәгрибән һәр шеј ганла тәмизләнир вә ган төкүлмәдән бағышланма олмур» (Ибр. 9:22). Јәһудиләр билирдиләр ки, Аллаһ тәрәфиндән бағышланмағын јеҝанә јолу гурбан ҝәтирмәкдир. Буна ҝөрә дә, Исанын гадына дедији сөзләрә инсанларын нәјә ҝөрә етираз етдикләри тәәҹҹүблү дејил. Иса илә сүфрә архасында оланлар дејирдиләр: «Бу кимдир ки, ҝүнаһлары да бағышлајыр?» (Лука 7:49). Бәс ҝүнаһлы гадынын ҝүнаһларынын бағышланмасы нәјин әсасында мүмкүн иди?
Илк инсан ҹүтүнүн үсјанындан сонра Јеһованын сөјләдији илк пејғәмбәрлијә әсасән, Шејтан вә онун ‘баласы’ пејда олаҹаг «өвлад»ы дабанындан санҹаҹагдылар (Јар. 3:15). Бу, Иса Аллаһын дүшмәнләри тәрәфиндән өлдүрүлән заман баш верди (Галат. 3:13, 16). Мәсиһин ахыдылан ганы бәшәријјәти ҝүнаһ вә өлүмүн пәнҹәсиндән азад етмәк үчүн өдәнилән гијмәтдир. Јарадылыш 3:15 ајәсиндәки пејғәмбәрлик дејилән заман фидјә Јеһованын ҝөзүндә артыг өдәнилмиш кими иди, чүнки Аллаһын нијјәтинин јеринә јетмәсинә һеч нә мане ола билмәзди. Инди О, Онун вәдләринә иман ҝәтирән һәр кәси бағышлаја биләрди.
Мәсиһчиликдән әввәлки дөврдә бәзи инсанлар Јеһованын ҝөзүндә салеһ сајылырдылар. Онларын арасында Ханок, Нуһ, Ибраһим, Рахав вә Әјјуб да вар иди. Онлар Аллаһын вәдләрини јеринә јетәҹәји вахты иманла ҝөзләјирдиләр. Исанын шаҝирди Јагуб јазыр: «Ибраһим Аллаһа иман етди, бу да онун һесабына салеһлик кими гејд едилди». Јагуб Рахав һаггында исә дејир: «Фаһишә Раһав [Рахав] да ејни ҹүр өз әмәлләринә ҝөрә салеһ сајылмадымы?» (Јаг. 2:21—25).
Гәдим Исраил падшаһы Давуд бир нечә ҹидди ҝүнаһ ишләтмишди, анҹаг онун һәгиги Аллаһа мөһкәм иманы варды вә о, һәр дәфә сәмими-гәлбдән төвбә едирди. Бундан әлавә, Мүгәддәс Китабда дејилир: «Аллаһ, Мәсиһи Өз ганына иман васитәсилә ҝүнаһ әфв етдирән гурбан тәгдим етди. Бу исә, Аллаһын әдаләтини ҝөстәрмәк үчүн иди. Чүнки Аллаһ сәбирли олараг, әввәлҹә ишләдилән ҝүнаһлара диггәт јетирмәмишди ки, индики заманда Өз әдаләтини изһар етсин ки, Өзү адил олсун вә Исаја иман едәнә бәраәт версин» (Ром. 3:25, 26). Исанын ҝәләҹәк фидјә гурбанлығына әсасланараг, Јеһова әдаләт принсипиндә ҝүзәштә ҝетмәдән Давудун ҝүнаһларыны бағышлады.
Ҝөрүнүр, Исанын ајагларыны јағлајан гадынын вәзијјәти дә ејни иди. О, әхлагсыз һәјат тәрзи сүрүрдү, лакин сонрадан төвбә етди. Гадын ҝүнаһларындан азад олунмаға еһтијаҹ дујдуғуну баша дүшүр вә әмәлләри илә ҝөстәрирди ки, Јеһованын фидјә гурбанлығы кими тәгдим едәҹәји бу инсаны гијмәтләндирир. Фидјә гурбаны һәлә өдәнилмәсә дә, онун дәјәрини артыг бу кими инсанлара тәтбиг етмәк мүмкүн иди, чүнки онун тәгдим олунаҹағына һеч бир шүбһә јох иди. Буна ҝөрә дә, Иса она деди: «Ҝүнаһларын бағышланды».
Бу һадисәдән ҝөрдүјүмүз кими, Иса ҝүнаһлы инсанлардан һеч вахт гачмырды. О, онлара һәмишә јахшылыг едирди. Үстәлик, Јеһова да төвбә едән ҝүнаһкарлары бағышламаға һазырдыр. Бу, бизим кими гејри-камил инсанлар үчүн неҹә һејрәтамиз вә руһландырыҹы бир зәманәтдир!
[7-ҹи сәһифәдәки шәкил]
Онлар салеһ сајылырдылар