Мүгәддәс Китаб васитәсилә иманынызы јохлајын
ОЛА БИЛСИН сиз Христиан дининә мәнсубсунуз. Үмумиликдә бүтүн дүнјада һәр үч нәфәрдән бири христиандыр. Христиан дининин бу ҝүн минләрлә мәзһәби вар вә бу мәзһәбләрин бир-биринә зидд тәлим вә бахышлары мөвҹуддур. Буна ҝөрә дә чох еһтимал ки, сизин дә инанҹларыныз диҝәр христианларын инанҹларындан фәргләнир. Бәс нәјә инандығыныз ваҹибдир? Әлбәттә! Әҝәр сиз Аллаһы разы салан тәрздә ибадәт етмәк истәјирсинизсә, нәјә инандығынызы билмәлисиниз.
Иса Мәсиһин биринҹи әсрдәки давамчылары «мәсиһи» кими танынырдылар (Һәвариләрин ишләри 11:26). Онун илк давамчылары ҹүрбәҹүр мәзһәбләрә бөлүнмәдикләринә ҝөрә онлары ајырд етмәк үчүн мүхтәлиф адлара еһтијаҹ јох иди. Бу инсанлар Иса Мәсиһин тәлим вә ҝөстәришләрини јекдилликлә гәбул едирдиләр. Бәс сизин мәнсуб олдуғунуз килсә һагда нә демәк олар? Орада дејиләнләр Мәсиһин өјрәтдији вә онун илк давамчыларынын гәбул етдији тәлимләрлә үст-үстә дүшүр? Буну неҹә билә биләрсиниз? Јеҝанә јол иманынызы Мүгәддәс Китабда јазыланларла јохламагдыр.
Билдијимиз кими, Иса Мәсиһ Мүгәддәс Китабы Аллаһын Кәламы һесаб едир, орада јазыланлары әзиз тутурду. О, инсан әнәнәләринә үстүнлүк верән вә Мүгәддәс Китаб тәлимләрини һечә ендирән инсанлардан наразы иди (Марк 7:9—13). Буна әсасән, Иса Мәсиһин әсил давамчысы да инанҹларыны Мүгәддәс Китаба әсасландырмалыдыр. Одур ки, өзүнү Исанын давамчысы сајан һәр кәс дүшүнмәлидир: «Мәнсуб олдуғум динин тәлимләри Мүгәддәс Китабла үст-үстә дүшүр?» Бу суала ҹаваб тапмаг үчүн мәсләһәт ҝөрүрүк ки, дининизин өјрәтдикләринә Аллаһын Кәламынын ишығында бахасыныз.
Иса Мәсиһ демишди ки, биз «һәгигәтә ујғун» ибадәт етмәлијик. Һәгигәт исә Мүгәддәс Китабдадыр (Јәһја 4:24; 17:17). Һәвари Булус да демишди ки, хиласымыз «һәгигәт барәсиндә дәгиг билијә» јијәләнмәјимиздән асылыдыр (1 Тимутијә 2:4). Буна ҝөрә ваҹибдир ки, инандығымыз шејләрин әсасыны Мүгәддәс Китаб тәшкил етсин. Әкс һалда, хилас олмағымыз суал алтында ола биләр!
НЕҸӘ ЈОХЛАЈА БИЛӘРИК?
Тәклиф едирик ки, чәрчивәдәки алты суалы охујуб Мүгәддәс Китабын бу суаллара вердији ҹаваба фикир верәсиниз. Һәмчинин ситат ҝәтирилән ајәләри охујуб үзәриндә дүшүнүн. Өзүнүзә суал верин: «Динимин өјрәтдикләри Мүгәддәс Китабда јазыланлара ујғун ҝәлир?»
Бу јолла сиз Мүгәддәс Китаб васитәсилә иманынызы јохламыш олаҹагсыныз. Бәс дининизин өјрәтдикләри диҝәр тәлимләрин дә Мүгәддәс Китабда јазыланлара ујғун ҝәлиб-ҝәлмәдијини јохламаг истәјәрдиниз? Јеһованын Шаһидләри бу саһәдә сизә бөјүк мәмнунијјәтлә көмәк едәрләр. Мүгәддәс Китабы пулсуз өјрәнмәк үчүн онлара мүраҹиәт един. Бундан әлавә, Јеһованын Шаһидләринин рәсми сајты олан jw.org сајтыны зијарәт едә биләрсиниз.