Мүталиәнизи тәкмилләшдирин!

1. Нәјә ҝөрә бәзиләри мүталиә етмәјә мејилли дејил?

ИНДИКИ зәманәдә доланмаг елә дә асан дејил. Баҹы-гардашларымызын чоху аиләләрини зәрури шејләрлә тәмин етмәк үчүн саатларла ишләмәли олур. Сајсыз-һесабсыз диндашымыз ишә ҝедиб-ҝәлмәк үчүн јола хејли вахт сәрф едир. Бир чохлары өзләрини тәмин етмәк үчүн ағыр ишдә ишләјир. Ҝүнүн сонунда бу зәһмәткеш баҹы-гардашларымыз о гәдәр јорулурлар ки, нә исә охумаға һаллары галмыр.

2. Сиз ҝүнүн һансы вахтында мүталиә едирсиниз?

² Амма бир шеј вар ки, Аллаһын Кәламынын вә нәшрләримизин мүталиәсинә — дүзҝүн мүталиәсинә вахт тапмалыјыг. Јеһова илә мүнасибәтләримиз вә әбәди һәјатымыз бундан асылыдыр! (1 Тим. 4:15). Бәзиләри һәр ҝүн сүбһ тездән ојаныб, евдә сакитлик оланда, зеһнин ачыг вахты мүталиә едирләр. Диҝәрләри ахшамлар елә вахт сечирләр ки, фикирләри јајынмадан бир гәдәр мүталиә едә билсинләр.

3, 4. Алдығымыз руһани гида илә бағлы һансы дәјишиклик едилиб вә нә үчүн?

³ Јәгин разылашарсыныз ки, мүталиәјә вахт ајырмаг ваҹибдир. Бәс нәји мүталиә етмәлијик? Бәлкә дә, «охунуласы о гәдәр шеј вар ки, һамысыны охумаға вахт тапмырам» дејәҹәксиниз. Бәзиләри бүтүн нәшрләримизи охуја, чыхан һәр видеоја баха билир. Лакин чохларына вахт тапмаг чәтиндир. Рәһбәрлик Шурасы бунун фәргиндәдир. Одур ки, чап олунан вә сајтда дәрҹ олунан материалларын сајыны азалтмагла бағлы бу јахынларда гәрар вериб.

⁴ Мәсәлән, артыг «Јеһованын Шаһидләринин иллик фәалијјәти» китабы нәшр едилмир. Сәбәб jw.org^® сајтында вә JW телевизијасындакы програмларда кифајәт гәдәр руһландырыҹы һадисәләрин јер алмасыдыр. «Ҝөзәтчи гүлләси» вә «Ојанын!» журналларынын күтләви нәшрләри исә артыг илдә үч дәфә нәшр олунур. Бүтүн бу дәјишикликләр диҝәр ишләримизә даһа чох вахт ајырмағымыз үчүн едилмәјиб. Дәјишиклијин мәгсәди одур ки, даһа ваҹиб шејләрә фикримизи ҹәмләмәк үчүн вахтымыз олсун (Филип. 1:10). Ҝәлин приоритетләримизи мүәјјән етмәјин вә Мүгәддәс Китабын мүталиәсиндән там фајдаланмағын јолларыны арашдыраг.

ПРИОРИТЕТЛӘРИНИЗИ МҮӘЈЈӘН ЕДИН

5, 6. Һансы нәшрләри дәриндән мүталиә етмәлијик?

⁵ Мүталиә үчүн приоритетимиз нә олмалыдыр? Сөзсүз ки, һәр ҝүн Аллаһын Кәламыны охумаға вахт ајырмалыјыг. Јығынҹагда Мүгәддәс Китабын һәфтәлик мүталиәси үчүн нәзәрдә тутулан ајәләрин сајы азалдылыб ки, охудугларымызын үзәриндә дәриндән дүшүнмәјә вә әлавә ахтарыш апармаға вахтымыз олсун. Мәгсәдимиз садәҹә бу һәфтә үчүн нәзәрдә тутулан һиссәни охумаг јох, Аллаһын Кәламынын үрәјимизә тәсир етмәси вә бизи Јеһоваја јахынлашдырмасы олмалыдыр (Зәб. 19:14).

⁶ Даһа нәји дәриндән мүталиә етмәлијик? Әлбәттә ки, «Ҝөзәтчи гүлләси»нин тәлим мәгаләсини, һәфтәарасы ҝөрүшдә кечирилән Мүгәддәс Китаб дәрсини вә диҝәр бәндләри. «Ҝөзәтчи гүлләси» вә «Ојанын!» журналларынын јени сајларыны да охумаг зәруридир.

7. JW телевизијасында, јахуд сајтымызда јерләшдирилән бүтүн материаллары нәзәрдән кечирә билмәмәјимиз бизи руһдан салмалыдырмы?

⁷ Ола билсин, дејәҹәксиниз: «Тутаг ки, бүтүн бунлары еләдим, бәс jw.org сајтында вә JW телевизијасында јерләшдирилән јени материаллар неҹә? О гәдәр мәгалә вә видео вар ки!» Ҝәлин бир нүмунәјә бахаг. Ресторанын менјусунда чешид-чешид ләзиз јемәкләр олур. Тәбии ки, мүштәри менјудакы јемәкләрин һамысындан јејә билмәз. Буна ҝөрә дә јалныз бир нечә јемәк сифариш едәҹәк. Ејнилә, әҝәр сиз дә сајтда јерләшдирилән бүтүн материаллары охуја вә ја бүтүн видеолара баха билмирсинизсә, руһдан дүшмәјин. Баҹардығыныз гәдәрини един. Ҝәлин бахаг мүталиәјә нә дахилдир вә ондан максимум фајда әлдә етмәк үчүн нә едә биләрик.

МҮТАЛИӘ ЗӘҺМӘТ ТӘЛӘБ ЕДИР

8. «Ҝөзәтчи гүлләси»ни неҹә мүталиә етмәк лазымдыр вә бунун сизә һансы фајдасы олаҹаг?

⁸ Мүталиә охудуғумуз материалдан фајда әлдә етмәк мәгсәди илә бүтүн диггәтимизи она јөнәлтмәкдир. Мүталиә садәҹә мәтнә ҝөз ҝәздириб суалларын ҹавабыны ишарәләмәк дејил. Мәсәлән, «Ҝөзәтчи гүлләси»нин тәлим мәгаләсинә һазырлашаркән илк өнҹә иҹмалы охујун. Сонра мәгаләнин ады, јарымбашлыглар вә тәкрар үчүн суаллар үзәриндә дүшүнүн. Даһа сонра мәгаләни тәләсмәдән вә диггәтлә охујун. Һәр абзасын әсас фикрини вурғулајан ҹүмләсинә диггәт јетирин, чох вахт бу, абзасын илк ҹүмләси олур. Әсас ҹүмлә сизә абзасын маһијјәтини анламаға көмәк едәҹәк. Охудугҹа һәр абзасын јарымбашлыгла вә мәгаләнин әсас мөвзу илә неҹә бағлы олдуғуна диггәт јетирин. Сизә таныш олмајан сөзләри вә фикирләри арашдырмаг истәјирсинизсә, бир јерә гејд един.

9. а) «Ҝөзәтчи гүлләси» мәгаләсини мүталиә едәркән нә үчүн ајәләрә хүсуси диггәт јетирмәлијик вә буну неҹә едә биләрик? б) Јушә 1:8 ајәсиндә вурғуландығы кими, ајәләри охумагла јанашы нә етмәлијик?

⁹ «Ҝөзәтчи гүлләси»нин тәлим нәшри Мүгәддәс Китабы анламағымыза көмәк едир. Буна ҝөрә дә мәгаләдә ҝәтирилән ајәләрә, ән әсасы да, јығынҹагда охунаҹаг ајәләрә хүсусилә фикир верин. Ајәләрдәки сөз вә ја ифадәнин абзасын әсас фикри илә неҹә бағлы олдуғуна хүсуси диггәт јетирин. Бундан әлавә, охудуғунуз ајәләрин дәринлијинә вармаг вә онлары һәјатынызда неҹә тәтбиг едә биләҹәјиниз үзәриндә дүшүнмәк үчүн вахт ајырын. (Јушә 1:8 ајәсини охујун.)

10. Ибраниләрә 5:14 ајәсинә әсасән, нә үчүн валидејнләр аиләви ибадәт заманы ушагларына мүталиә етмәјин вә арашдырма апармағын јолуну өјрәтмәлидирләр?

¹⁰ Тәбии ки, валидејнләр һәр һәфтә кечирдикләри аиләви ибадәтин ушаглара хош тәсир бағышламасыны истәјир. Дүздүр, онлар аиләви ибадәтдә нә арашдыраҹагларыны һәмишә әввәлҹәдән мүәјјәнләшдирмәлидирләр. Лакин бу о демәк дејил ки, һәр һәфтә хүсуси, јахуд гејри-ади програм тәртиб етмәк лазымдыр. Аиләви ибадәт заманы JW телевизијасынын ајлыг програмына бахмаг, ара-сыра һансыса лајиһә үзәриндә ишләмәк, мәсәлән, Нуһун ҝәмисинин макетини дүзәлтмәк олар. Бунларла јанашы, ушаға дүзҝүн мүталиә етмәјин јолуну да өјрәтмәк ваҹибдир. Онлар јығынҹаға һазырлашмағы, һәмчинин мәктәбдә һансыса суал јарананда бу һагда арашдырма апармағы өјрәнмәлидирләр. (Ибраниләрә 5:14 ајәсини охујун.) Ибадәт ҝөрүшләримиздә һәмишә видео нүмајиш олунмур. Одур ки, ушаглар евдә Мүгәддәс Китаба аид мөвзулары арашдырмаға бир аз вахт ајырсалар, јығынҹагда вә бөјүк топлантыларда диггәтлә гулаг аса биләҹәкләр. Тәбии ки, валидејнләрин мүталиәјә нә гәдәр вахт ајыраҹаглары һәр ушағын јашындан вә хасијјәтиндән асылыдыр.

11. Мүгәддәс Китаб дәрси кечдијимиз инсанлара сәмәрәли мүталиә етмәји өјрәтмәк нә үчүн ваҹибдир?

¹¹ Мүгәддәс Китаб дәрси кечдијимиз инсанлар да мүталиә етмәји өјрәнмәлидирләр. Тәзә-тәзә онларын ибадәт ҝөрүшүнә һазырлашаркән ҹавабларын алтындан неҹә хәтт чәкдијини ҝөрәндә севинирик. Лакин биз онлара тәкбашына арашдырма апармағын вә дәриндән мүталиә етмәјин јолуну өјрәтмәлијик. Беләҹә, проблемләри оланда көмәк үчүн дәрһал һансыса баҹы вә ја гардаша јахынлашмајаҹаг, әксинә, нәшрләримиздән арашдырма апарыб лазым олан мәлуматы тапмағын јолуну биләҹәкләр.

МӘГСӘДЈӨНЛҮ МҮТАЛИӘ ЕДИН

12. Мүталиә едәркән һансы мәгсәдләри гоја биләрик?

¹² Охумағы севән инсан дејилсинизсә, бәлкә дә, мүталиәдән зөвг алмағын мүмкүн олмадығыны дүшүнүрсүнүз. Лакин бу мүмкүндүр. Аз-аз охумагдан башлајын вә тәдриҹән мүталиәјә ајырдығыныз вахты артырын. Мәгсәдјөнлү охујун. Тәбии ки, мүталиәмизин әсас мәгсәди Јеһоваја даһа да јахынлашмаг олмалыдыр. Даһа тез чатмаг истәдијимиз мәгсәд исә үзләшдијимиз һәр һансы чәтинликлә вә ја верилән һансыса суалла бағлы арашдырма апармаг ола биләр.

13. а) Мәктәбдә охујан мәсиһи етигадыны мүдафиә етмәк үчүн һансы аддымлары ата биләр? б) Колослулара 4:6 ајәсиндәки мәсләһәтә неҹә әмәл едә биләрсиниз?

¹³ Мисал үчүн, әҝәр сиз мәктәблисинизсә, чох ҝүман ки, синиф јолдашларыныз ад ҝүнләрини гејд едирләр. Јәгин сиз онларын ад ҝүнү шәнлијиндә нә үчүн иштирак етмәдијинизи изаһ етмәк истәјәрдиниз, амма баҹармајаҹағынызы дүшүнүрсүнүз. Демәли, мүталиә етмәјин там вахтыдыр! Гаршыныза ики мәгсәд гоја биләрсиниз: 1) Аллаһын ад ҝүнү шәнликләрини бәјәнмәдијинә әминлијинизи артырмаг; 2) һәгигәти мүдафиә етмәк баҹарығынызы јахшылашдырмаг (Мәт. 14:6—11; 1 Бут. 3:15). Дүшүнүн, синиф јолдашларыныз ад ҝүнүнү гејд етмәјин сәбәбләрини неҹә изаһ едирләр? Синиф јолдашларыныз ад ҝүнү кечирмәклә бағлы һансы әсаслары ҝәтирирләр? Сонра нәшрләримиз васитәсилә дәриндән арашдырма апарын. Чүнки чохлары ад ҝүнүнү һамы гејд едир дејә гејд едир. Ҹәми бир-ики әсас тапсаныз, суалына доғрудан да ҹаваб ахтаран инсана көмәк етмиш ола биләрсиниз. (Колослулара 4:6 ајәсини охујун.)

ӨЈРӘНМӘК ҺӘВӘСИНИЗИ АРТЫРЫН

14—16. а) Мүгәддәс Китабын сизә јахшы таныш олмајан бөлмәси һагда даһа чох мәлуматы неҹә ала биләрсиниз? б) Ҝәтирилән ајәләр Амус китабыны даһа јахшы баша дүшмәјә неҹә көмәк едә биләр? («Мүгәддәс Китабы ҹанландырын!» адлы чәрчивәјә бахын.)

¹⁴ Тутаг ки, нөвбәти ибадәт ҝөрүшүндә кичик пејғәмбәрлик китабларындан бири арашдырылаҹаг. Ола билсин, һәмин пејғәмбәр һагда о гәдәр дә мәлуматыныз јохдур. Одур ки, өзүнүздә онун јаздығы китабла таныш олмаг марағы јарадын. Буну неҹә етмәк олар?

¹⁵ Әввәлҹә дүшүнүн: «Китабын јазары һагда нәләри билирәм? О ким олуб, һарада јашајыб, нә ишлә мәшғул олуб?» Јазары даһа јахшы таныјанда онун истифадә етдији сөз вә нүмунәләрин һарадан гајнагландығыны баша дүшәҹәксиниз. Мүгәддәс Китабы охујан заман јазарын неҹә инсан олдуғуну ҝөстәрән ифадәләрә фикир верин.

¹⁶ Китабын нә вахт јазылдығыны билмәк дә фајдалы олаҹаг. Мүгәддәс Китабын «Јени Дүнја Тәрҹүмәси»нин арха һиссәсиндә јерләшән «Китаблар һаггында мәлумат ҹәдвәли» сајәсиндә буну асанлыгла мүәјјән едә биләрсиниз. Һәмчинин А6 әлавәсиндәки падшаһлар вә пејғәмбәрләр һагда схемә нәзәр сала биләрсиниз. Мүталиәниздә арашдырдығыныз китабын пејғәмбәрлик китабы олдуғуну нәзәрә алсаг, јахшы олар ки, онун јазылдығы дөврдә һансы шәраитин һөкм сүрдүјүнү арашдырасыныз. Пејғәмбәр инсанларын һансы дүшүнҹә вә давранышларына дүзәлиш етмәк үчүн ҝөндәрилмишди? Онун мүасирләри кимләр иди? Ҝениш тәсәввүрүнүзүн олмасы үчүн бир нечә мәнбәдән ахтарыш апармаг лазым ҝәлә биләр. Мәсәлән, Амус пејғәмбәрин јашадығы дөврдә һөкм сүрән вәзијјәти там анламаг үчүн Амус 1:1 ајәсинин чарпаз истинадларында ҝөстәрилән 2 Падшаһлар вә 2 Салнамәләр китабларындакы мәлуматлардан јарарланмаг олар. Бундан әлавә, Амусла ејни дөврдә јашадығы еһтимал олунан Һушә пејғәмбәрин китабына да нәзәр сала биләрсиниз. Бүтүн бу мәнбәләр Амус пејғәмбәрин јашадығы дөврү тәсәввүрүмүздә даһа јахшы ҹанландырмаға көмәк едәҹәк (2 Пад. 14:25—28; 2 Салн. 26:1—15; Һушә 1:1—11; Амс. 1:1).

ДЕТАЛЛАРА ФИКИР ВЕРИН

17, 18. Мүгәддәс Китабы охујаркән илк бахышдан ҝөзә чарпмајан мәгамлара фикир вермәк мүталиәни неҹә мараглы едир? Абзасдан, јахуд өзүнүздән нүмунә чәкин.

¹⁷ Мүгәддәс Китабы даһа чох шеј өјрәнмәк һәвәси илә охумаг фајдалыдыр. Дејәк ки, сиз Зәкәријјә китабынын 12-ҹи фәслиндән Мәсиһин өлүмү илә бағлы пејғәмбәрлији арашдырырсыныз (Зәк. 12:10). Бу фәслин 12-ҹи ајәсинә чатанда «Натан еви»нин Мәсиһин өлүмүнә ҝөрә јас тутаҹағыны охујурсунуз. Бу мәгамын үстүндән өтүб кечмирсиниз, дајаныб дүшүнүрсүнүз: «Натан еви илә Мәсиһ арасында һансы әлагә вар? Бу һагда даһа чох һарадан мәлумат ала биләрәм?» Беләҹә, сиз ахтарыш ишинә башлајырсыныз. Чарпаз истинад сизи 2 Ишмуил 5:13,14 ајәләринә јөнәлдир. Бурадан өјрәнирсиниз ки, Натан Давуд падшаһын оғулларындан бири иди. Чарпаз истинадда ҝәтирилән икинҹи ајәни, Лука 3:23, 31 ајәләрини охујанда ајдын олур ки, Иса Мәсиһ Мәрјәмин улу бабасы Натанын нәслиндән ҝәлибb. Будур, артыг мараг ојанды! Сиз билирдиниз ки, Иса Мәсиһин Давудун нәслиндән ҝәләҹәји пејғәмбәрлик олунуб (Мәт. 22:42). Лакин Давуд пејғәмбәрин 20-дән чох оғлу вар иди. Одур ки, Зәкәријјә пејғәмбәрин Исанын өлүмүнә ҝөрә мәһз Натанын евинин јас сахлајаҹағыны вурғуламасы, һәгигәтән дә, мараглы фактдыр!

¹⁸ Башга бир нүмунәјә нәзәр салаг. Луканын Мүждәсинин биринҹи фәслиндә охујуруг ки, Ҹәбрајыл мәләк Мәрјәмин јанына ҝәлиб она дүнјаја ҝәтирәҹәји оғул барәдә нөвбәти сөзләри дејир: «О, бөјүк олаҹаг, Һагг-Тааланын Оғлу адланаҹаг. Јеһова Аллаһ она атасы Давудун тахтыны верәҹәк. О, Јагубун еви үзәриндә әбәдијјән һөкмранлыг едәҹәк» (Лука 1:32, 33). Чох вахт бу ајәни охујанда мәләјин илк сөзләри диггәтимизи чәкир, «Һагг-Тааланын Оғлу адланаҹаг». Лакин Ҹәбрајыл мәләк Исанын һәмчинин «һөкмранлыг» едәҹәјини дә пејғәмбәрлик етмишди. Бу заман дүшүнә биләрик, Мәрјәм бу сөзләри ешидәндә нә дүшүнмүшдү? Бәлкә, о дүшүндү ки, Иса Һиродун, ја да онун варисләринин јеринә Исраилин падшаһы олаҹаг? Әҝәр Иса падшаһ олаҹагдыса, Мәрјәм падшаһ анасы олуб аиләсилә бирҝә сарајда јашајаҹагды. Лакин Мүгәддәс Китабда Мәрјәмин Ҹәбрајыла белә бир фикир сөјләдији, јахуд Исанын ики шаҝирди кими Падшаһлыгда јүксәк мөвге истәмәси барәдә бир кәлмәјә дә раст ҝәлә билмәрик (Мәт. 20:20—23). Бу кичик мәлумат Мәрјәмин дүшүндүјүмүздән дә тәвазөкар бир гадын олдуғуну ҝөрмәјә көмәк едир.

19, 20. Јагуб 1:22—25 вә 4:8 ајәләринә әсасән, мүталиә заманы мәгсәдимиз нә олмалыдыр?

¹⁹ Ҝәлин унутмајаг ки, Аллаһын Кәламыны вә нәшрләримизи мүталиә етмәкдә әсас мәгсәдимиз Јеһоваја даһа да јахынлашмагдыр. Биз һәмчинин мүталиә васитәсилә неҹә инсан олдуғумузу даһа ајдын ҝөрмәјә вә Аллаһы разы салмаг үчүн лазыми дәјишикликләр етмәјә чалышмалыјыг. (Јагуб 1:22—25; 4:8 ајәләрини охујун.) Буна ҝөрә дә һәр дәфә мүталиәдән өнҹә Јеһовадан мүгәддәс руһ диләмәлијик. Она јалвармалыјыг ки, охујаҹағымыз материалдан там фајдаланмаға вә Онун биздә ҝөрдүјү нөгсанлары ҝөрмәјә көмәк етсин.

²⁰ Ҝәлин һәр биримиз мәзмурчунун тәсвир етдији Аллаһ адамына бәнзәмәјә чалышаг: «О, Јеһованын ганунундан һәзз алыр, ҝеҹә-ҝүндүз Онун ганунунун дәринлијинә варыр... [Белә адам] һәр ишиндә уғур газанар» (Зәб. 1:2, 3).