Өјрәнмәјин ҝәтирдији мүкафатлар

ҺЕЧ адамларын мејвәни неҹә сечдијинә фикир вермисән? Чохлары онун јетишиб-јетишмәдијини билмәк үчүн рәнҝинә вә бөјүклүјүнә бахыр. Кимиси мејвәни ијләјир, кимиси әли илә јохлајыр, һәтта сыхыр. Башгалары исә һансынын даһа ширәли олдуғуну мүәјјән етмәк үчүн һәр әлиндә бирини тутуб ағырлығыны јохлајыр. Бу адамлар нә фикирләширләр? Онлар һәр шеји тәһлил едир, фәргләри мүәјјән едир, әввәлки сечимләрини јадларына салыр вә инди ҝөрдүкләри илә артыг билдикләрини мүгајисә едирләр. Диггәтлә сечдикләри үчүн онлар дадлы мејвә јејәҹәкләр.

Әлбәттә, Аллаһын Кәламыны өјрәнмәјин мүкафаты бундан гат-гат бөјүк олур. Белә өјрәнмә һәјатымызда ваҹиб јер тутанда иманымыз мөһкәмләнир, мәһәббәтимиз артыр, хидмәтимиз даһа сәмәрәли олур вә чыхардығымыз гәрарларда узагҝөрәнлик вә илаһи мүдриклик өзүнү даһа ајдын бүрузә верир. Сүлејманын мәсәлләри 3:15 ајәсиндә бу ҹүр мүкафатлар һагда дејилир: «Хошладығын бүтүн шејләр она тај дејил». Сән дә белә мүкафатлары алырсанмы? Неҹә өјрәнмәјинин бу ишдә ролу бөјүкдүр (Колос. 1:9, 10).

Өјрәнмәк нәдир? Бу, садәҹә үздән охумаг дејил. Өјрәнмәк о демәкдир ки, адам зеһни габилијјәтини ишә салараг мөвзуну һәртәрәфли вә диггәтлә нәзәрдән кечирир. Бура охудуғуну тәһлил етмәк, ону артыг билдијин шејләрлә мүгајисә етмәк вә ирәли сүрүлән фикирләрә даир верилән сүбутлара диггәт јетирмәк дахилдир. Өјрәнәркән сәнин үчүн јени олан фикирләр үзәриндә дәриндән дүшүн. Һәмчинин Мүгәддәс Јазылара әсасланан мәсләһәти өз һәјатында даһа чох неҹә тәтбиг едә биләҹәјин барәдә фикирләш. Јеһованын Шаһиди олдуғундан, материалдан башгаларына көмәк етмәк үчүн неҹә истифадә едә биләҹәјини дә ҝөтүр-гој етмәк лазымдыр. Беләликлә, өјрәнмәк өзүнә дүшүнмәји дахил едир.

Дүзҝүн мүнасибәт

Адәтән өјрәнмәјә башлајаркән јанына Мүгәддәс Китабы, лазым олан нәшрләри, карандаш, јахуд гәләм вә ола билсин, дәфтәр гојурсан. Бәс үрәјини дә һазырлајырсанмы? Мүгәддәс Китабда дејилир ки, «Рәббин шәриәтини арајыб јеринә јетирмәк үчүн вә Исраилдә гануну вә һөкмләри өјрәтмәк үчүн Езра өз үрәјини һазырламышды» (Езра 7:10, КМ). Үрәји неҹә һазырламаг олар?

Дуа көмәк едир ки, Аллаһын Кәламыны өјрәнмәјә дүзҝүн јанашаг. Биз үрәјимизин, дахили варлығымызын Јеһованын вердији нәсиһәтләрә гаршы һәссас олмасыны истәјирик. Һәр дәфә өјрәнмәјә башламаздан әввәл Јеһоваја дуа едиб, мүгәддәс руһу илә көмәк етмәсини хаһиш ет (Лука 11:13). Өјрәнәҹәјин материалын мәнасыны, онун Аллаһын нијјәти илә неҹә бағлы олдуғуну, јахшы илә писи ајырд етмәјә сәнә неҹә көмәк едәҹәјини вә Јеһова илә мүнасибәтинә неҹә тәсир етдијини баша дүшмәк үчүн Ондан көмәк истә (Сүл. мәс. 9:10). Өјрәнәндә Аллаһдан мүдриклик ‘дилә’ (Јаг. 1:5). Јанлыш фикирләрдән вә зәрәрли арзулардан јаха гуртармаг үчүн Јеһовадан көмәк истәјәркән өзүнү охудугларын әсасында виҹданла јохла. Јеһоваја ачдығы һәгигәтләрә ҝөрә һәмишә ‘шүкүр нәғмәси сөјлә’ (Мәз. 147:7). Өјрәнмәјә дуа едәрәк башламаг Јеһова илә сых мүнасибәтләрә ҝәтириб чыхарыр, чүнки бунун сајәсиндә Кәламы васитәсилә бизимлә данышан Аллаһа һај верә билирик (Мәз. 145:18).

Охудугларыны ҹан-дилдән гәбул етмәләри Јеһованын халгыны башга инсанлардан фәргләндирир. Аллаһ јолуна бағлы олмајан инсанлар арасында јазыланлары шүбһә алтына алмаг вә рәдд етмәк дәбдәдир. Анҹаг бу хүсусијјәт бизә јаддыр. Биз Јеһоваја етибар едирик (Сүл. мәс. 3:5-7). Нәји исә баша дүшмәјәндә тәкәббүрлә онун сәһв олдуғу гәнаәтинә ҝәлмирик. Ҹаваб үчүн ахтарыш апарыб, тәдгиг етмәклә јанашы, биз Јеһованы ҝөзләјирик (Мик. 7:7). Езра кими бизим дә мәгсәдимиз өјрәндикләримизә ујғун һәрәкәт етмәк вә онлары башгаларына өјрәтмәкдир. Өјрәнмәк үчүн үрәји бу ҹүр һазырламағын мүкафаты бол олаҹаг.

Неҹә өјрәнмәли?

Садәҹә биринҹи абзасдан башлајыб ахыра гәдәр охумаг әвәзинә, әввәлҹә бүтүн мәгаләни, јахуд фәсли нәзәрдән кечир. Илк өнҹә башлығы тәһлил ет. Өјрәнәҹәјин материалын мөвзусу башлыгда әкс олунур. Сонра јарымбашлыгларын мөвзу илә неҹә бағлы олдуғуна диггәт јетир. Мәтнә аид шәкилләрә, ҹәдвәлләрә, чәрчивәләрә бах. Материалла таныш олдугдан сонра өзүндән соруш: «Бу материалдан, чох еһтимал ки, нә өјрәнәҹәјәм? Бунун мәнә һансы фајдасы олаҹаг?» Белә һазырлашмаг өјрәнмәјинә истигамәт верәҹәк.

Инди әсас мәсәләјә кечмәк олар. «Ҝөзәтчи Гүлләси»нин өјрәнмә мәгаләләриндә вә бәзи китабларда суаллар чап олунур. Һәр абзасы охудугҹа ҹаваблары ишарәләмәк сәнин үчүн фајдалы олар. Һәтта суаллар олмајанда да јадда сахламаг истәдијин ваҹиб фикирләри гејд едә биләрсән. Әҝәр һансыса фикир сәнин үчүн јенидирсә, ону јахшы баша дүшмәк үчүн бир аз артыг вахт ајыр. Хидмәтдә фајдалы олаҹаг, јахуд тапшырығыны һазырлајаркән истифадә едә биләҹәјин нүмунәләрә вә ја дәлилләрә диггәт јетир. Өјрәндикләрини бөлүшмәјинин сајәсиндә иманы мөһкәмләнә биләҹәк адамлар һаггында дүшүн. Истифадә етмәк истәдијин мәгамлары ишарәлә вә өјрәниб гуртарандан сонра онлары тәкрар ет.

Материалы арашдыраркән ҝәтирилән ајәләрә бах. Һәр бир ајәнин абзасын үмуми фикри илә неҹә бағлы олдуғуну тәһлил ет.

Һәрдән чәтин баша дүшдүјүн, јахуд әтрафлы арашдырмаг истәдијин фикирләрә раст ҝәлә биләрсән. Мөвзудан јајынмамаг үчүн, онлары гејд ет ки, сонра арашдырасан. Чох вахт материалын ардыны охудугҹа фикирләр ајдынлашыр. Әҝәр ајдынлашмаса, әлавә арашдырма апара биләрсән. Һансы фикирләр бу ҹүр арашдырма тәләб едир? Ола биләр, ајдын баша дүшмәдијин ајә ситат ҝәтирилир. Јахуд онун мүзакирә олунан мөвзуја неҹә аид олдуғуну дәрһал ҝөрә билмирсән. Бәлкә дә, һисс едирсән ки, мәгаләдәки мүәјјән фикри баша дүшүрсән, анҹаг башгасына кифајәт гәдәр јахшы изаһ едә билмәзсән. Бунларын үстүндән өтүб кечмәкдәнсә, өјрәндијин материалы гуртардыгдан сонра, јахшы олар ки, бу һагда ахтарыш апарасан.

Һәвари Павел ибрани мәсиһчиләрә әтрафлы мәктуб јазанда јарыда фасилә едиб деди: «Дејиләнләрин әсасы исә будур» (Ибр. 8:1). Сән дә вахташыры өзүнә хатырлатма едирсәнми? Ҝәл ҝөрәк һәвари Павел нәјә ҝөрә белә едирди. Илһамланмыш мәктубунун әввәлки фәсилләриндә о, артыг ҝөстәрмишди ки, Аллаһын бөјүк Баш каһини олан Мәсиһ ҝөјүн өзүнә ҝирди (Ибр. 4:14–5:10; 6:20). Лакин сәккизинҹи фәслин әввәлиндә һәмин әсас фикри ајрыҹа вурғуламагла, Павел охуҹуларыны бунун онларын һәјаты илә неҹә бағлы олмасы барәдә дәриндән дүшүнмәјә һазырлады. О гејд етди ки, Мәсиһ онларын уғрунда Аллаһын һүзуруна галхды вә онларын һәмин сәмави «Мүгәддәс Јерә» дахил олмалары үчүн јол ачды (Ибр. 9:24; 10:19-22). Үмидләринин әсаслы олмасына әминлик онлары тәшвиг едәҹәкди ки, мәктубун сонракы һиссәсиндә имана, тәһәммүлә вә мәсиһчи давранышына даир верилән мәсләһәтләрә әмәл етсинләр. Ејнилә, биз дә өјрәнән заман диггәти әсас фикирләрә јөнәлдәндә мөвзунун неҹә ајдынлашдығыны анлајаҹаг вә она ујғун давранмаг үчүн тутарлы сәбәбләри бејнимизә һәкк едәҹәјик.

Кечирдијин шәхси өјрәнмә сәни һәрәкәтә тәшвиг едәҹәкми? Бу чох ваҹиб мәсәләдир. Нә исә өјрәнәндә өзүндән соруш: «Бу мәним әһвал-руһијјәмә вә һәјатдакы мәгсәдләримә неҹә тәсир етмәлидир? Проблемләри һәлл едәндә, гәрар гәбул едәндә, јахуд мәгсәдә ҹан атанда бу мәлуматы неҹә тәтбиг едә биләрәм? Аиләмдә, хидмәтдә, јығынҹагда бундан неҹә истифадә едә биләрәм?» Өјрәндикләрини тәтбиг едә биләҹәјин реал вәзијјәтләри тәсәввүр ет вә дуа едәрәк бу суалларын үзәриндә дүшүн.

Өјрәниб гуртардыгдан сонра, фәсли, јахуд мәгаләни гысаҹа нәзәрдән кечирмәк үчүн вахт ајыр. Ҝөр әсас мәгамлары вә онлары тәсдиг едән дәлилләри јадына сала билирсәнми. Белә етсән, ҝәләҹәкдә истифадә етмәк үчүн мәлуматы јадда сахлаја биләҹәксән.

Нәји өјрәнмәк лазымдыр?

Јеһованын халгынын өјрәнмәк үчүн чохлу нәшрләри вар. Бәс нәдән башлајаг? Јахшы оларды ки, һәр ҝүн «Мүгәддәс Јазыларын ҝүндәлик арашдырылмасы» брошүрасындан ҝүндәлик ајәни вә она верилән шәрһи охујаг. Һәр һәфтә ҝетдијимиз јығынҹаг ҝөрүшләринә габагҹадан һазырлашсаг, онлардан даһа чох бәһрәләнәҹәјик. Бундан башга, бәзиләри вахтдан мүдрик истифадә едиб, һәгигәтә ҝәлмәләриндән әввәл чыхан нәшрләримизи өјрәнирләр. Башгалары Мүгәддәс Китабын һәфтәлик охунмасындан бир һиссәни сечиб һәмин ајәләри дәриндән арашдырырлар.

Бәс әҝәр шәраитин һәфтәлик јығынҹаг ҝөрүшләриндә кечирилән бүтүн мөвзулары јахшы өјрәнмәјә јол вермирсә, нә етмәли? Материалы садәҹә ад олсун дејә, башдан-ајаға тәләм-тәләсик охумагдан, ја да һамысына һазырлаша билмирсән дејә, һеч бир һиссәсини өјрәнмәмәкдән өзүнү ҝөзлә. Әксинә, нә гәдәр өјрәнә биләҹәјини мүәјјәнләшдир вә ону јахшы өјрән. Буну һәр һәфтә ет. Тәдриҹән башга ҝөрүшләрә дә һазырлашмаға чалыш.

«Евини тик»

Јеһова билир ки, аилә башчылары доғмаларыны доландырмаг үчүн чалышмалыдырлар. Сүлејманын мәсәлләри 24:27 ајәсиндә дејилир: «Әввәлҹә чөлдәки ишини гуртар, зәми сал». Анҹаг аиләнин руһани тәләбатларына бармагарасы бахмаг олмаз. Буна ҝөрә дә, ајәдә ардынҹа дејилир: «Сонра евини тик». Аилә башчылары буну неҹә едә биләрләр? Сүлејманын мәсәлләри 24:3 ајәсиндә ҹаваб верилир: «Һикмәтлә ев тикиләр, дәрракә илә мөһкәмләнәр».

Дәрракә аиләнә неҹә фајда ҝәтирә биләр? Дәрракә елә әгли габилијјәтдир ки, онун сајәсиндә ади ҝөзлә ҝөрүнәндән даһа чох шеј ҝөрмәк олур. Там әминликлә демәк олар ки, јахшы аиләви өјрәнмә аиләнин өзүнү өјрәнмәкдән башлајыр. Аилә үзвләрин руһани ҹәһәтдән неҹә инкишаф едирләр? Онларла сөһбәт едәркән диггәтлә гулаг ас. Шикајәтләнмәјә, јахуд наразылыг етмәјә мејллидирләрми? Мадди шејләр онлар үчүн бөјүк әһәмијјәт кәсб едирми? Ушагларын сәнинлә хидмәтдә оланда һәмјашыдлары гаршысында өзләрини Јеһованын Шаһиди кими тәгдим етмәјә чәкинмирләр ки? Мүгәддәс Китабы аиләви охумаг вә өјрәнмәк хошларына ҝәлирми? Јеһованын јолуну һәгигәтәнми өзләринә һәјат јолу сечибләр? Диггәтлә мүшаһидә етсән, аилә үзвләриндән һәр бириндә руһани кејфијјәтләри тәрбијә етмәк вә мөһкәмләндирмәк үчүн бир аилә башчысы кими нә етмәли олдуғуну ҝөрәҹәксән.

«Ҝөзәтчи Гүлләси» вә «Ојанын!» журналларындан лазым олан мөвзу илә бағлы мәгаләләр сеч. Сонра аилә үзвләринә нә өјрәнәҹәјинизи габагҹадан хәбәр вер ки, онлар да материалы нәзәрдән кечирсинләр. Өјрәнмә заманы чалыш меһрибан аб-һава јарадасан. Һеч кими тәнгид вә ја пәрт етмәдән, өјрәндијиниз материалы аиләнизин конкрет тәләбатларына тәтбиг едәрәк онун дәјәрини вурғула. Һәр кәси мүзакирәјә ҹәлб ет. Аиләнин һәр бир үзвүнә Јеһованын Кәламынын һәјат үчүн лазым олан һәр шеји тәгдим едән мүкәммәл мәнбә олдуғуну баша сал (Мәз. 19:7).

Өјрәнмәјин ҝәтирдији мүкафатлар

Руһани анлајышы олмајан мүшаһидәчи инсанлар каинаты, дүнјада баш верән һадисәләри вә һәтта өзләрини өјрәнә биләрләр, анҹаг буна бахмајараг, онлар ҝөрдүкләринин әсил мәнасыны дәрк едә билмирләр. Аллаһын Кәламыны мүнтәзәм өјрәнән инсанлар исә Аллаһын руһунун көмәји илә бу шејләрдә Аллаһын әл ишини, Мүгәддәс Китаб пејғәмбәрликләринин јеринә јетмәсини вә итаәткар инсанларын хејир-дуа алмасы үчүн Аллаһын нијјәтинин аддымбааддым неҹә јеринә јетдијини ҝөрүрләр (Марк 13:4-29; Ром. 1:20; Вәһј 12:12).

Бу, нә гәдәр мөһтәшәм олса да, бизә гүрурланмаға әсас вермир. Әксинә, Аллаһын Кәламыны һәр ҝүн арашдырмаг бизә тәвазөкар галмаға көмәк едир (Ганун. т. 17:18-20). Бу һәм дә бизи ‘ҝүнаһын һијләсиндән’ мүдафиә едир, чүнки Аллаһын Кәламы үрәјимиздә ҹанлы оланда аз еһтимал вар ки, ҝүнаһын ҹазибәси она гаршы дурмаг гәтијјәтимизә үстүн ҝәлсин (Ибр. 2:1; 3:13; Колос. 3:5-10). Беләликлә, биз ‘Рәббә лајиг шәкилдә һәрәкәт едиб, Ону һәр ҹәһәтдән разы салаҹаг, һәр ҹүр хејирли ишдә сәмәрә верәҹәјик’ (Колос. 1:10). Аллаһын Кәламыны өјрәнмәкдә мәгсәдимиз будур, бу мәгсәдә чатмаг исә ән бөјүк мүкафаты ҝәтирир.