Аллаһ вә Иса Мәсиһ һаггында һәгигәт

Аллаһы јахындан таныјаг

Аллаһын ады. Аллаһ Өзү дејир: «Мән Јеһовајам. Адым будур» (Әшија 42:8). Мүгәддәс Китабда Аллаһын адына тәхминән 7000 дәфә раст ҝәлинир. Лакин Мүгәддәс Китабын бир чох тәрҹүмәләриндә бу ад башга сөзләрлә, мәсәлән, «Рәбб» сөзү илә әвәз олунуб. Аллаһ истәјир ки, сиз Онунла дост оласыныз, буна ҝөрә дә сизи адыны чағырмаға сәсләјир (Зәбур 105:1).

Јеһова Аллаһа үнванланан хитаблар. Мүгәддәс Китабда Јеһова Аллаһа «Гадир Аллаһ», «Јарадан», «Ата», «Рәбб», «Күлли-Ихтијар» сөзләри илә хитаб олунур. Мүгәддәс Китабда јазылан бир чох дуаларда Јеһоваја һәм бу һөрмәтҹил сөзләрлә, һәм дә ады илә мүраҹиәт олунур (Дәнјал 9:4).

Аллаһын варлығы. Аллаһ ҝөзәҝөрүнмәз, руһани Варлыгдыр (Јәһја 4:24). Мүгәддәс Китаб да тәсдиг едир ки, «бәшәр өвладларындан һеч ким һеч вахт Аллаһы ҝөрмәмишдир» (Јәһја 1:18). Мүгәддәс Китабда һәмчинин Аллаһын һиссләри барәсиндә дә јазылыб. Инсанларын әмәлләри Аллаһа ја ағыр, ја да хош ҝедә биләр (Мәсәлләр 11:20; Зәбур 78:40, 41).

Аллаһын мөһтәшәм кејфијјәтләри. Аллаһ бәндәләри арасында ајры-сечкилик етмир. О, һәр халгдан, һәр тәбәгәдән олан инсанлара ејни ҹүр јанашыр (Һәвариләрин ишләри 10:34, 35). О, «рәһмли вә мәрһәмәтли, сәбирли, мәһәббәти бол, һәгигәти әнҝин» олан Аллаһдыр (Чыхыш 34:6, 7). Аллаһын дөрд кејфијјәти хүсусилә ҝөзәлдир.

Ҝүҹ. Јеһова Гадир Аллаһ олдуғу үчүн вәд етдији һәр шеји јеринә јетирмәјә ҝүҹү чатыр (Јарадылыш 17:1).

Һикмәт. Аллаһ һәр кәсдән һикмәтлидир. Бу сәбәбдән Мүгәддәс Китабда дејилир ки, Аллаһ «һикмәтин тәк саһиби»дир (Ромалылара 16:27).

Әдаләт. Аллаһ һәмишә дүзҝүн давраныр. Онун ишләри мүкәммәлдир, О, һеч вахт наһаг иш ҝөрмүр (Ганунун тәкрары 32:4).

Мәһәббәт. Мүгәддәс Китабда дејилир ки, «Аллаһ мәһәббәтдир» (1 Јәһја 4:8). Аллаһ садәҹә мәһәббәт ҝөстәрмир, О, мәһәббәтин тәҹәссүмүдүр. О, һәр шеји мәһәббәтдән ирәли ҝәләрәк едир. Биз бунун хејрини һәр саһәдә ҝөрүрүк.

Аллаһын инсанларла достлуғу. Аллаһ Өз бәндәләрини Ата кими севир (Мәтта 6:9). Она иман етсәк, Онунла дост ола биләрик (Зәбур 25:14). Аллаһ сизи дуа едәрәк Она јахынлашмаға вә бүтүн гајғыларынызы Онун үзәринә гојмаға сәсләјир, чүнки О гајғынызы чәкир (1 Бутрус 5:7; Јагуб 4:8).

Иса Мәсиһ кимдир?

Иса Мәсиһи Аллаһа шәрик гошмаг олмаз. Исаны фәргли едән одур ки, о, Аллаһын билаваситә Өзүнүн јаратдығы јеҝанә варлыгдыр. Буна ҝөрә Мүгәддәс Китабда она мәҹази мәнада Аллаһын Оғлу дејилир (Јәһја 1:14). Илк олараг Исаны јарадандан сонра Јеһова галан һәр кәси вә һәр шеји јаратмаг үчүн ондан уста кими истифадә етмишди (Мәсәлләр 8:30, 31; Колослулара 1:15, 16).

Иса Мәсиһ һеч вахт Аллаһ олдуғуну демәмишди. Әксинә, о демишди ки, «мән Онун [Аллаһын] елчисијәм, мәни О ҝөндәриб» (Јәһја 7:29). Иса Мәсиһ шаҝирдләриндән бири илә данышанда Јеһованы өз Атасы вә онларын Атасы, өз Аллаһы вә онларын Аллаһы адландырмышды (Јәһја 20:17). Иса Мәсиһ өләндән сонра Јеһова Аллаһ ону дирилдиб, ҝөјә галдырмыш вә Она бөјүк сәлаһијјәт верәрәк сағ тәрәфиндә әјләшдирмишди (Мәтта 28:18; Һәвариләрин ишләри 2:32, 33).

Иса Мәсиһ Аллаһа апаран јолдур

Иса Мәсиһ Атасыны танытмаг үчүн јер үзүнә ҝәлмишди. Јеһова Иса барәдә демишди: «Бу, Мәним севимли Оғлумдур. Она гулаг асын!» (Марк 9:7). Иса Мәсиһ Аллаһы һәр кәсдән јахшы таныјыр. О демишди: «Атаны да Оғулдан савајы вә Оғулун танытмаг истәдији адамдан савајы һеч кәс танымыр» (Лука 10:22).

Иса Мәсиһ Аллаһын кејфијјәтләрини мүкәммәл сүрәтдә әкс етдирир. О, хасијјәтҹә Аллаһа о гәдәр бәнзәјирди ки, белә сөзләр демишди: «Мәни ҝөрән Атаны да ҝөрүб» (Јәһја 14:9). Иса Мәсиһ сөзүндә вә әмәлиндә Аллаһын мәһәббәтини әкс етдирәрәк инсанлары Аллаһа ҹәлб едирди. О демишди: «Јол, һәгигәт вә һәјат мәнәм. Мәним васитәчилијим олмадан һеч кәс Атанын јанына ҝәлә билмәз» (Јәһја 14:6). Һәмчинин гејд етмишди ки, «Атаја дүзҝүн ибадәт едәнләр руһа вә һәгигәтә ујғун ибадәт едәҹәкләр. Чүнки Ата Она бу ҹүр ибадәт етмәк истәјәнләри ахтарыр» (Јәһја 4:23). Тәсәввүр едирсиниз, Јеһова Аллаһ сизин кими инсанлары, Онун һаггында һәгигәти билмәк истәјән инсанлары ахтарыр!